Vazirlar Mahkamasi maxsus tashkil etilgan komissiya tomonidan Toshkent davlat texnika universiteti faoliyatini oʻrganish natijasida bir qator jiddiy kamchiliklar va buzilishlar aniqlanganligini qayd etadi. Xususan, universitet tuzilmasida asossiz tarzda oʻquv-tarbiya jarayoni bilan bevosita bogʻliq boʻlmagan sunʼiy boshqaruv boʻlinmalari — institutlar tashkil etilgan.

Akademik guruhlari boʻlmagan va ixtisos mutaxassisliklari boʻyicha talabalar tayyorlamaydigan fakultetlar, tarkibiga koʻra kam sonli va bir-birini takrorlovchi kafedralar tashkil etilgan. Universitet bakalavriatiga qabul qilish qoidalarining qoʻpol ravishda buzilishiga yoʻl qoʻyilgan, pul evaziga oʻziga ogʻdirib olish va poraxoʻrlik hollari mavjud.

Rektorat tomonidan pedagoglar jamoasi va talabalar, ayniqsa, yotoqxonalarda yashovchi talabalar bilan ishlash susaytirib yuborilgan. Yoshlarni maʼnaviy-maʼrifiy jihatdan tarbiyalashda jiddiy kamchiliklar mavjud. Bularning hammasi universitet faoliyati susayib ketishiga hamda jamoada maʼnaviy vaziyatning jiddiy yomonlashuviga olib keldi.

Aniqlangan kamchiliklarni bartaraf etish, Toshkent davlat texnika universitetining unga yuklangan bosh vazifa — mamlakat iqtisodiyoti tarmoqlari uchun oliy texnik maʼlumotga ega boʻlgan yuqori malakali kadrlar tayyorlash vazifasini hal etishni taʼminlovchi tashkiliy tuzilmasini shakllantirish maqsadida Vazirlar Mahkamasi qaror qiladi:

1. Yoʻl qoʻyilgan jiddiy kamchiliklar uchun Toshkent davlat texnika universitetining rektori Q.R. Allayev, oʻquv ishlari boʻyicha prorektor F.S. Abdullayev, iqtisodiyot va tadbirkorlik masalalari boʻyicha prorektor A.A. Nizametdinov ishdan boʻshatilganligi, shuningdek universitet fakultetlari va kafedralarining ayrim rahbarlari vazifasidan ozod etilganligi maʼlumot uchun qabul qilinsin.

2. Quyidagilar:

Toshkent davlat texnika universiteti dekanatlarining namunaviy tashkiliy tuzilmasi 2-ilovaga muvofiq tasdiqlansin.

3. Toshkent davlat texnika universitetining “Kompyuter texnologiyalari” fakulteti tugatilsin.

Koʻrsatib oʻtilgan fakultetda taʼlim olayotgan talabalar, shuningdek “Axborotlarni tayyorlash va boshqaruv kompyuter tizimlari”, “Telematika (dasturiy taʼminot)”, “Muhandislik tayyorgarligi axborot texnologiyalari” kafedralari 2005/2006 oʻquv yilidan boshlab Toshkent axborot texnologiyalari universiteti tarkibiga oʻtkazilsin.

4. Oʻzbekiston Respublikasi Oliy va oʻrta maxsus taʼlim vazirligi ikki oy muddatda:

Toshkent davlat texnika universitetining tashkiliy tuzilmasini 1-ilovaga muvofiq tasdiqlangan tuzilmaga toʻliq muvofiqlashtirsin;

fakultetlar dekanatlarini shakllantirsin, kafedralar sonini maqbullashtirgan holda ularning roʻyxati va nomini qayta koʻrib chiqsin;

universitetning professor-oʻqituvchilar tarkibini attestatsiyadan oʻtkazsin va uni amaliy ish tajribasiga ega boʻlgan yuqori malakali mutaxassislar bilan tanlov asosida mustahkamlasin.

5. Oʻzbekiston Respublikasi Davlat mulki qoʻmitasi, Oliy va oʻrta maxsus taʼlim vazirligi 80-A va 80-B talabalar yotoqxonalarini Toshkent davlat texnika universiteti balansidan Toshkent axborot texnologiyalari universiteti balansiga toʻlovsiz oʻtkazsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

Izoh: Fakultetda kunduzgi boʻlim talabalarining soni 1000 kishidan oshganda qoʻshimcha ravishda yana bittadan shtat birligi kiritiladi:

dekanning maʼnaviy-maʼrifiy ishlar boʻyicha oʻrinbosari;

oʻquv jarayoni dispetcheri;

katta inspektor (EHM operatori).