1.11.00.00.00 Atrof tabiiy muhit va tabiiy resurslar / 11.08.00.00 Atmosfera havosini muhofaza qilish qonunchiligi / 11.08.02.00 Atmosfera havosini muhofaza qilish borasidagi davlat boshqaruvi. Atmosfera havosi holati monitoringi. Atmosfera havosi holati yuzasidan kuzatuv xizmati. Atmosfera havosini nazorat qilish]
[TSZ:
1.Tabiiy resurslar / Atmosfera havosini muhofaza qilish]
Oʻzbekiston Respublikasi Vazirlar Mahkamasining
qarori
Ozon qatlamini buzuvchi moddalardan foydalanishni toʻxtatish boʻyicha milliy dasturni tasdiqlash toʻgʻrisida
“Atmosfera havosini muhofaza qilish toʻgʻrisida”gi Oʻzbekiston Respublikasi Qonuni talablarini, Ozon qatlamini muhofaza qilish boʻyicha Vena konvensiyasi majburiyatlarini bajarish, shuningdek, ozon qatlamini buzuvchi moddalardan foydalanishni toʻxtatish chora-tadbirlarini amalga oshirish maqsadida Vazirlar Mahkamasi qaror qiladi:
1. Oʻzbekiston Respublikasida:
Vena Konvensiyasi boʻyicha Monreal protokolining majburiyatlarini bajarish yuzasidan 2005 — 2019-yillar davrida ozon qatlamini buzuvchi moddalardan foydalanish miqdori 884 tonnadan 33 tonnagacha kamaytirilganligi;
Monreal protokolining A, V va E roʻyxatlarida, shuningdek, S roʻyxati II va III guruhlarida koʻrsatilgan moddalarni import qilish taqiqlanganligi;
ozon qatlamini buzuvchi moddalardan foydalanishni toʻxtatish boʻyicha Global ekologik jamgʻarma, Birlashgan Millatlar Tashkilotining Atrof muhit va Taraqqiyot dasturlari koʻmagida hamda mahalliy tashkilotlar mablagʻlari hisobidan 2000 — 2018-yillar davomida respublikada 9,9 mln AQSh dollariga teng boʻlgan 6 ta loyiha amalga oshirilganligi;
2019 — 2024-yillarda samarali texnologiyalarni joriy etish orqali ozon qatlamini buzuvchi moddalarni butunlay isteʼmoldan chiqarish boʻyicha 8,6 mln AQSh dollariga teng boʻlgan loyiha amalga oshirilishi maʼlumot uchun qabul qilinsin.
2. Quyidagilar:
ozon qatlamini buzuvchi moddalardan foydalanishni toʻxtatishning asosiy maqsadlari va strategik yoʻnalishlari, chora-tadbirlari amalga oshirilishi nazarda tutilgan Ozon qatlamini buzuvchi moddalardan foydalanishni toʻxtatish boʻyicha milliy dastur (keyingi oʻrinlarda — Milliy dastur) 1-ilovaga muvofiq;
Milliy dasturni bajarishda davlat organlari tomonidan amalga oshiriladigan chora-tadbirlar, ozon qatlamini yemirish xususiyatiga ega boʻlmagan samarali texnologiyalarni amaliyotga joriy etish boʻyicha loyihalarni, shuningdek, targʻibot-tashviqot ishlarini amalga oshirish tadbirlaridan iborat Ozon qatlamini buzuvchi moddalardan foydalanishni toʻxtatish boʻyicha milliy dasturni amalga oshirishning “yoʻl xaritasi” (keyingi oʻrinlarda — “Yoʻl xaritasi”) 2-ilovaga muvofiq tasdiqlansin.
3. Oʻzbekiston Respublikasi Ekologiya va atrof muhitni muhofaza qilish davlat qoʻmitasi:
Milliy dasturni amalga oshirish bilan bogʻliq ishlarni muvofiqlashtirish;
ozon qatlamini buzuvchi moddalardan foydalanishni toʻxtatish boʻyicha majburiyatlarni bajarish;
ozon qatlamini buzuvchi moddalar va tarkibida ushbu moddalar mavjud boʻlgan mahsulotlarning importi va eksportiga ruxsatnomalarni elektron ariza taqdim etilgandan soʻng “Yagona darcha” bojxona axborot tizimi, Davlat xizmatlari markazlari va Yagona interaktiv davlat xizmatlari portali orqali berish;
Oʻzbekiston Respublikasi Davlat bojxona qoʻmitasi bilan birgalikda ozon qatlamini buzuvchi moddalar va tarkibida ushbu moddalar mavjud boʻlgan mahsulotlarning importi va eksporti nazoratini olib borish, shuningdek, mahsulotlar miqdorini hisobga olish hamda ularning maʼlumotlar bazasi shakllantirilishi va yuritilishi uchun masʼul organ etib belgilansin.
4. Vazirlar Mahkamasining 2018-yil 9-yanvardagi 17-son qarori bilan tasdiqlangan Tarkibida ozonni buzuvchi moddalar boʻlgan, Oʻzbekiston Respublikasiga import va Oʻzbekiston Respublikasidan eksport qilish ruxsatnomalar boʻyicha amalga oshiriladigan mahsulotlar turlari roʻyxatiga3-ilovaga muvofiq oʻzgartirishlar kiritilsin.
5. Oʻzbekiston Respublikasi Hukumatining 4-ilovaga muvofiq baʼzi qarorlari oʻz kuchini yoʻqotgan deb hisoblansin.
6. Oʻzbekiston Respublikasi Ekologiya va atrof muhitni muhofaza qilish davlat qoʻmitasi Oʻzbekiston Milliy teleradiokompaniyasi va Oʻzbekiston Milliy axborot agentligi bilan birgalikda ommaviy axborot vositalari orqali Milliy dastur va “Yoʻl xaritasi”ning maqsad va vazifalari hamda ularning amalga oshirilishi yuzasidan chiqishlar tashkil etilishini taʼminlasin.
7. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.
8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi Ekologiya va atrof muhitni muhofaza qilish davlat qoʻmitasi raisi A.I. Maksudov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 9-mart,
126-son
Vazirlar Mahkamasining 2021-yil 9-martdagi 126-son qaroriga 1-ILOVA
Ozon qatlamini buzuvchi moddalardan foydalanishni toʻxtatish boʻyicha milliy dastur
1-bob. Kirish
Oʻzbekiston Respublikasi 1993-yildan buyon Ozon qatlamini muhofaza qilish toʻgʻrisidagi Vena konvensiyasi (1985-yil) (keyingi oʻrinlarda — Vena konvensiyasi) va Ozon qatlamini buzuvchi moddalar boʻyicha Monreal protokoli (1987-yil) (keyingi oʻrinlarda — Monreal protokoli) tomoni hisoblanadi. Soʻnggi vaqtlarda Monreal protokoliga kiritilgan beshta tuzatishlardan Oʻzbekiston toʻrttasiga (London, 1990-yil), (Kopengagen, 1992-yil), (Monreal, 1997-yil), (Pekin, 1999-yil) qoʻshilgan va ushbu xalqaro shartnomalar asosida ozon qatlamini yemiruvchi moddalar isteʼmoli talablarini toʻliq bajarib kelmoqda.
Ozon qatlamini buzuvchi moddalardan (keyingi oʻrinlarda — OBM) foydalanishni toʻxtatish boʻyicha birinchi milliy dastur Vazirlar Mahkamasining “Ozon qatlamini himoya qilish sohasidagi shartnomalar boʻyicha Oʻzbekiston Respublikasining xalqaro majburiyatlarini bajarish chora-tadbirlari toʻgʻrisida” 2000-yil 24-yanvardagi 20-son qarori bilan tasdiqlangan.
Dastur doirasida OBMdan foydalanishni toʻxtatish boʻyicha Global ekologik jamgʻarma (keyingi oʻrinlarda — GEJ), Birlashgan Millatlar Tashkilotining Atrof muhit dasturi, Birlashgan Millatlar Tashkilotining Taraqqiyot dasturi (keyingi oʻrinlarda — BMT TD) koʻmagida hamda mahalliy tashkilotlar mablagʻlari hisobidan 2000-2018-yillar davomida respublikada 9,9 mln AQSh dollariga teng boʻlgan 6 ta loyiha amalga oshirildi.
2019 — 2024-yillarda samarali texnologiyalarni joriy etish orqali gidroxlorftoruglerodni (keyingi oʻrinlarda — GXFU) butunlay isteʼmoldan chiqarish boʻyicha Oʻzbekiston Respublikasi Ekologiya va atrof muhitni muhofaza qilish davlat qoʻmitasi (keyingi oʻrinlarda — Davlat ekologiya qoʻmitasi), BMT TD va GEJ tomonidan 8,6 mln AQSh dollariga teng boʻlgan qoʻshma loyiha amalga oshirilishi rejalashtirilgan.
Yangi tahrirda qabul qilinayotgan Ozon qatlamini buzuvchi moddalardan foydalanishni toʻxtatish boʻyicha milliy dastur (keyingi oʻrinlarda — Milliy dastur) Oʻzbekiston Respublikasi tomonidan Monreal protokoli hamda ushbu protokolga kiritilgan London, Kopengagen, Monreal va Pekin tuzatishlari doirasida qabul qilingan barcha majburiyatlarning bajarilishini qamrab oladi.
Xususan, Milliy dasturda mahalliy resurslardan foydalangan holda, OBM oʻrnini bosuvchi vositalardan foydalanishga oʻtish sohasida istiqbolli ilmiy-tadqiqot va tajriba-konstruktorlik ishlanmalarini amalga tatbiq qilish, OBM va tarkibida ular mavjud boʻlgan mahsulotlarning importi va eksporti boʻyicha maʼlumotlar bazasini shakllantirish, bojxona va huquqni muhofaza qilish organlari xodimlarining mahsulotlar importi va eksportini nazorat qilish boʻyicha bilimini va malakasini oshirish, GXFUdan qayta foydalanish tizimini mustahkamlash va ularning texnologiyalarini almashtirish sohasida ishlab chiqiladigan loyihalar natijadorligini keng omma eʼtiboriga namoyish qilish nazarda tutilgan.
Milliy dastur oʻtgan davr mobaynida xalq xoʻjaligining turli tarmoqlarida OBMdan foydalanish, davlat organlari va tashkilotlari tomonidan ulardan foydalanishni qisqartirish boʻyicha amalga oshirilgan chora-tadbirlar toʻgʻrisidagi maʼlumotlarni tahlil qilish asosida ishlab chiqilgan.
Shuningdek, Milliy dastur tashkiliy va strategik chora-tadbirlar, OBMdan foydalanishni toʻxtatish boʻyicha Oʻzbekiston Respublikasi tomonidan qabul qilingan xalqaro majburiyatlarning bajarilishini normativ tartibga solish va ozon qatlamiga salbiy taʼsir etmaydigan “toza” texnologiyalarga bosqichma-bosqich oʻtish bilan bogʻliq masalalarni oʻz ichiga olgan.
2-bob. Ozon qatlamini buzuvchi moddalardan foydalanishni toʻxtatish harakatlarining asosiy yoʻnalishlari
2.1. Harakatlarning asosiy maqsadlari va strategik yoʻnalishlari
Milliy dastur Oʻzbekiston Respublikasi tomonidan Vena konvensiyasi va Monreal protokoli hamda unga kiritilgan va Oʻzbekiston ratifikatsiya qilgan tuzatishlardagi majburiyatlarning bajarilishini taʼminlash, shuningdek, texnik va moliyaviy yordam koʻrsatish boʻyicha GEJ talablariga muvofiq xalqaro hamkorlikni chuqurlashtirishga qaratilgan.
Milliy dastur ozon qatlamining yemirilishini toʻxtatishdan atrof muhitning yaxshilanishini, ozonga zarar yetkazmaydigan texnologiyalarga oʻtishning iqtisodiy foydalarini hisobga oladi. U har bir guruh uchun OBMni isteʼmoldan chiqarish jadvalining strategik yoʻnalishini belgilaydi.
Monreal protokoli bilan yuklangan majburiyatlarni bajarishda:
Monreal protokolida belgilangan OBMni xavfsiz boʻlgan moddalarga almashtirish boʻyicha talablarni oʻz muddatida bajarish;
Oʻzbekiston Respublikasiga import qilinishi taqiqlangan OBMning respublikaga olib kirilishini taqiqlash;
OBM foydalanadigan yoki ishlash jarayoni ular bilan bogʻliq boʻlgan havoni sovitish uskunalarini taqiqlash;
OBMni respublikaga olib kirish kvotalariga rioya qilish;
GEJ va boshqa xalqaro donor tashkilotlar yordamida ozon uchun xavfsiz moddalardan foydalanadigan texnologiyalarni ishlab chiqaradigan va joriy etadigan tashkilotlar, kompaniyalar va shaxslarga har tomonlama koʻmaklashish;
OBM oʻrnini bosuvchi ishlarning bajarilishi toʻgʻrisida qaror qabul qiluvchi shaxslar va aholi xabardorligini taʼminlash;
mahalliy resurslardan foydalangan holda sovitish uskunalari va tarkibida OBM boʻlmagan mahsulotlar hamda texnologiyalarni ishlab chiqarish sohasida ilmiy tadqiqotlarni yanada rivojlantirish;
Oʻzbekistonda ozon qatlamini yemirish salohiyati boʻlmagan energiya jihatidan samarali texnologiyalarni joriy etish orqali GXFUni butunlay isteʼmoldan chiqarish kabi strategik yoʻnalishlarga amal qilish zarur.
2.2. Harakatlarni amalga oshirish uchun keyingi qadamlar
OBMdan foydalanishni toʻxtatish, shuningdek, ularning oʻrnini bosuvchi moddalarni joriy etishni ragʻbatlantirish yoki ularni qayta ishlatish boʻyicha:
eksport/import sohasida, shuningdek, ruxsatnoma berish va kvota tizimida ishlashni davom ettirish, OBM bilan ishlovchi uskunalarning olib kirilishi bilan bogʻliq taqiqlarga qatʼiy rioya etish;
yuqori darajada global isishga olib keladigan gidroftoruglerod isteʼmolidan past yoki nolga teng boʻlgan moddalarga bosqichma-bosqich oʻtish choralarini koʻrish;
soliq siyosati choralari bilan birgalikda ragʻbatlantiruvchi chora-tadbirlar tizimini ishlab chiqish;
ushbu ishlarga ommaviy axborot vositalarini keng jalb qilish orqali ozon qatlamini muhofaza qilishning muhimligi haqida jamoatchilikni xabardor qilish;
qaror qabul qiladigan shaxslarning salohiyatini, OBM va ularning oʻrnini bosuvchi moddalar sohasida faoliyat yuritadigan mutaxassislarning malakasini oshirish;
sovitish uskunalarini ishlab chiqaradigan va ulardan foydalanadigan, shuningdek, erituvchilar bilan ishlaydigan yirik korxonalarda OBM bilan bogʻliq ishlab chiqarish bosqichlarini xalqaro hamjamiyat va mahalliy sarmoyadorlar ishtirokidagi investitsiya loyihalari orqali amalga oshirish lozim.
Oʻzbekiston Respublikasida birinchi Milliy dastur doirasida 3 ta OBMdan (XFU-12, tetraxlormetan, 1.1.1-trixloretan) foydalanish toʻxtatildi.
Ushbu Milliy dastur doirasida respublikada OBMni isteʼmoldan toʻliq chiqarish, mahalliy resurslardan foydalanishni hisobga olgan holda global isishga taʼsiri past darajada boʻlgan va ozon qatlamini yemirish xususiyatiga ega boʻlmagan texnologiyalarni joriy etish, shuningdek, Oʻzbekiston Respublikasining Monreal protokoli Kigali tuzatishiga qoʻshilishining maqsadga muvofiqligini oʻrganish nazarda tutilmoqda.
3-bob. OBMdan foydalanishni toʻxtatish yuzasidan Milliy dasturni amalga oshirish boʻyicha ustuvor chora-tadbirlar
3.1. Strategik yoʻnalishni amalga oshirishda Vazirlar Mahkamasining, tegishli vazirliklar va idoralarning roli
Vazirlar Mahkamasi OBM isteʼmolini tartibga solish sohasida yagona davlat siyosatini amalga oshirishni, shuningdek, Vena konvensiyasi va Monreal protokoli doirasida Oʻzbekiston Respublikasining majburiyatlari bajarilishining tizimli nazorat qilinilishini taʼminlaydi.
Davlat ekologiya qoʻmitasi OBMdan foydalanishni toʻxtatish boʻyicha qabul qilingan majburiyatlarni bajarish uchun masʼul hisoblanadi.
Bundan tashqari, Davlat ekologiya qoʻmitasi tegishli vazirliklar va idoralar tomonidan Milliy dastur va “yoʻl xaritasi”da belgilangan tadbirlar amalga oshirilishini muvofiqlashtirish, shuningdek, respublika hududiga OBM va tarkibida ular mavjud boʻlgan mahsulotlarni olib kirish tartibi hamda respublika hududidan OBM va tarkibida ular mavjud boʻlgan mahsulotlarni olib chiqish doirasida ruxsatnomalar berilishini taʼminlaydi.
Shu bilan bir qatorda, Davlat ekologiya qoʻmitasi OBMni isteʼmol qilish, ulardan foydalanish monitoringini olib borish, amalga oshirilayotgan loyihalarni boshqarish, Birlashgan Millatlar Tashkilotining Atrof muhit dasturining Ozon Kotibiyati va GEJ hisobotlarini tayyorlash ishlarini amalga oshiradi.
Oʻzbekiston Respublikasi Innovatsion rivojlanish vazirligi OBM yoki ularning oʻrnini bosuvchi moddalardan foydalangan holda texnik qayta jihozlash, yangi texnika va texnologiyalarni joriy qilish loyihalarini texnik baholashni taʼminlaydi.
Oʻzbekiston Respublikasi Davlat bojxona qoʻmitasi Davlat ekologiya qoʻmitasi bilan birgalikda OBM va tarkibida ular mavjud boʻlgan mahsulotlarning importi va eksporti nazoratini olib boradi, shuningdek, ularni hisobga olish va OBM miqdori boʻyicha maʼlumotlar bazasi yaratilishiga koʻmaklashadi.
3.2. Harakatlarning istiqbolli yoʻnalishlari.
Oʻzbekiston Respublikasida Vazirlar Mahkamasining “Ozonni buzuvchi moddalar va tarkibida ular boʻlgan mahsulotlarning Oʻzbekiston Respublikasiga importini tartibga solishni yanada takomillashtirish chora-tadbirlari toʻgʻrisida” 2018-yil 17-son qarori bilan Monreal protokolining A, V va E roʻyxatlarida, shuningdek, S roʻyxatining II va III guruhlarida koʻrsatilgan moddalarni import qilish taqiqlangan.
Milliy dastur doirasida OBMni va ularning tarkibidagi mahsulotlarni Oʻzbekiston Respublikasiga olib kirish va Oʻzbekiston Respublikasidan olib chiqishni toʻxtatish nazarda tutilmoqda.
Maʼlumki, Monreal protokoli tomonlariga OBMni bosqichma-bosqich isteʼmoldan chiqarish va boshqa turdagi sovitgichlarga oʻtish uchun moliyaviy resurslar koʻrinishida texnik yordam koʻrsatiladi.
Bundan tashqari, respublikada muqobil va tabiiy sovitish agentlarida ishlab chiqarishni yoʻlga qoʻyish bilan birgalikda qoʻshimcha ish oʻrinlarini yaratish imkoniyati paydo boʻladi. Bu, oʻz navbatida, Oʻzbekiston Respublikasi tomonidan Monreal protokoli doirasidagi majburiyatlarga toʻliq rioya etilishi imkonini beradi.
3.3. Ozon qatlamini yemiruvchi moddalardan foydalanishni toʻxtatish boʻyicha milliy dasturni amalga oshirish yuzasidan tashkiliy chora-tadbirlar
OBMdan foydalanishni toʻxtatish, ozon qatlami uchun xavfsiz boʻlgan muqobil moddalardan foydalanishga oʻtish boʻyicha chora-tadbirlar ushbu Milliy dasturning strategik yoʻnalishi boʻlib, u dasturni amalga oshirishning “yoʻl xaritasi”da aks ettirilgan.
Ozon qatlamini buzuvchi moddalar va tarkibida ushbu moddalar mavjud boʻlgan mahsulotlarning importi va eksportiga ruxsatnomalar elektron ariza taqdim etilganidan soʻng “Yagona darcha” bojxona axborot tizimi orqali beriladi.
Milliy dasturni amalga oshirish uchun:
ijrochilar, ijro muddatlari va moliyalashtirish manbalari, shuningdek, kutilayotgan samaralar aniq koʻrsatilgan mexanizmlarni belgilagan holda chora-tadbirlar rejasini ishlab chiqish va amalga oshirish;
“Yoʻl xaritasi”dagi tadbirlarni bajarishda ishtirok etuvchi tegishli vazirliklar va idoralarning aniq vazifa va funksiyalarini belgilash;
vazirliklar va idoralar hamda xoʻjalik yurituvchi subyektlarning Milliy dastur ijrosi boʻyicha faoliyatini muvofiqlashtirish;
Milliy dastur ijrosi toʻgʻrisida monitoring va tahlil ishlarini amalga oshirish;
Milliy dasturning vazifalari va maqsadlarini amalga oshirish jarayonlarida jamoat tashkilotlari, nodavlat notijorat tashkilotlari vakillari hamda aholining keng qatlami ishtirokini taʼminlash;
Milliy dastur ijrosi boʻyicha ommaviy axborot vositalari orqali tizimli chiqishlar tashkil etish zarur.
Milliy dasturni amalga oshirish natijasida:
OBM va tarkibida ular mavjud boʻlgan mahsulotlarni respublika hududiga olib kirish va uning hududidan olib chiqish boʻyicha qatʼiy nazorat taʼminlanadi;
jahon tajribasini oʻrgangan holda, Oʻzbekiston Respublikasining Monreal protokoli Kigali tuzatishiga qoʻshilishining maqsadga muvofiqligi oʻrganiladi;
mahalliy resurslardan foydalangan holda, respublikada OBM oʻrnini bosuvchi moddalar ishlab chiqarishni tashkil etish boʻyicha takliflar ishlab chiqiladi;
OBM va tarkibida ular mavjud boʻlgan mahsulotlarning importi va eksporti boʻyicha maʼlumotlar bazasi shakllantiriladi;
OBMni qayta ishlash boʻyicha 6 ta yangi markaz tashkil qilinadi va 6 ta mavjud markazlar qoʻshimcha asbob-uskunalar bilan taʼminlanadi;
sovitish uskunalari ishlab chiqaradigan 100 ta korxona uchun zarur ehtiyot qismlar sotib olinadi;
ozon qatlamini yemirish xususiyatiga ega boʻlmagan va global isishga taʼsiri past darajada boʻlgan uskunalarni oʻrnatish, ishlatish va ularga texnik xizmat koʻrsatish sohasida mutaxassislar tayyorlanadi;
sovitish uskunalarini ishlab chiqarish sohasi uchun mutaxassislarni tayyorlash uchun 3 ta markaz tashkil etiladi.
Vazirlar Mahkamasining 2021-yil 9-martdagi 126-son qaroriga 2-ILOVA
Ozon qatlamini buzuvchi moddalardan foydalanishni toʻxtatish boʻyicha milliy dasturni amalga oshirishning
“YOʻL XARITASI”
T/r
Tadbirlar
Amalga oshirish mexanizmi
Ijro muddati
Moliyalashtirish manbalari
Masʼul ijrochilar
I. Davlat organlari tomonidan amalga oshiriladigan chora-tadbirlar
1.
Milliy dastur va “Yoʻl xaritasi”ni amalga oshirish va ularning ijrosi etilishi monitoringini olib borish bilan bogʻliq ishlarni muvofiqlashtirishni taʼminlash.
1. Ozon qatlamiga xavf tugʻdirmaydigan texnologiyalarni ishlab chiqaradigan va tatbiq qiladigan korxonalar, muassasalar, tashkilotlar, kompaniyalar va jismoniy shaxslarni qoʻllab-quvvatlash.
Doimiy ravishda
Mablagʻ talab etilmaydi
Davlat ekologiya qoʻmitasi, Iqtisodiy taraqqiyot va kambagʻallikni qisqartirish vazirligi, Davlat bojxona qoʻmitasi, Davlat soliq qoʻmitasi, Innovatsion rivojlanish vazirligi
2. Ozon qatlamini buzuvchi moddalarni (OBM) isteʼmoldan chiqarish nazoratini kuchaytirish maqsadida qonunchilik bazasini rivojlantirish.
3. OBMni isteʼmoldan chiqarish jarayonini taʼminlashda korxonalar va tashkilotlarni ragʻbatlantirish tartibini ishlab chiqish va joriy etish.
Talab va takliflarga muvofiq 2021-yil may
4. OBMni ishlab chiqarish va isteʼmoldan chiqarish jarayonlarining salbiy oqibatlarini kamaytirish orqali amalga oshirilishini taʼminlash choralarini koʻrish.
Dastur doirasida
2.
Oʻzbekiston Respublikasi Tashqi iqtisodiy faoliyat tovar nomenklaturasiga (TIF TN) muvofiq ozonni buzuvchi moddalar va tarkibida ular mavjud boʻlgan mahsulotlarni respublikaga olib kirish va respublikadan olib chiqish ustidan qatʼiy nazorat olib borish.
1. OBM va tarkibida ular mavjud boʻlgan mahsulotlarning importi va eksporti yuzasidan tadbirkorlar murojaatlariga oʻz vaqtida javob berilishini taʼminlash.
2. OBM va tarkibida ular mavjud boʻlgan mahsulotlarni respublika hududiga olib kirish va uning hududidan olib chiqish boʻyicha qatʼiy nazoratni taʼminlash.
Doimiy ravishda
Mablagʻ talab etilmaydi
Davlat ekologiya qoʻmitasi, Davlat bojxona qoʻmitasi
3.
Oʻzbekiston Respublikasining Monreal protokoli Kigali tuzatishiga qoʻshilishining maqsadga muvofiqligini oʻrganish.
1. Oʻzbekiston Respublikasining Kigali tuzatishiga qoʻshilishining maqsadga muvofiqligi masalasida jahon tajribasini oʻrganish.
2021-yil aprel
Mablagʻ talab etilmaydi
Davlat ekologiya qoʻmitasi, Iqtisodiy taraqqiyot va kambagʻallikni qisqartirish vazirligi, Davlat bojxona qoʻmitasi
2. Oʻrganish materiallarini tahlil qilish va ular asosida Vazirlar Mahkamasiga taklif kiritish.
2020-yil may
4.
Sovitish uskunalari sohasida assotsiatsiya tashkil qilishning maqsadga muvofiqligini oʻrganish.
1. Sovitish uskunalari sohasida assotsiatsiya tashkil qilishning maqsadga muvofiqligini oʻrganish maqsadida ilgʻor mamlakatlar tajribasini oʻrganish.
2. Assotsiatsiya tashkil etish yuzasidan Vazirlar Mahkamasiga taklif kiritish.
2021-yil avgust
Mablagʻ talab etilmaydi
Davlat ekologiya qoʻmitasi
II. OBM oʻrnini bosuvchi vositalardan foydalanishga oʻtish uchun ragʻbatlantirish choralari
5.
Mahalliy resurslardan foydalangan holda OBM oʻrnini bosuvchi vositalardan foydalanishga oʻtish sohasida istiqbolli ilmiy-tadqiqot va tajriba-konstruktorlik ishlanmalarini amalga tatbiq qilish.
1. OBM oʻrnini bosuvchi vositalardan foydalanishga oʻtish boʻyicha rivojlangan mamlakatlar tajribasini oʻrganish.
2. Mahalliy resurslardan foydalangan holda respublikada OBM oʻrnini bosuvchi moddalar ishlab chiqarishni tashkil etish boʻyicha takliflar ishlab chiqish va Vazirlar Mahkamasiga taqdim etish.
2021-yil noyabr
Mablagʻ talab etilmaydi
Davlat ekologiya qoʻmitasi, Innovatsion rivojlanish vazirligi, Davlat bojxona qoʻmitasi
III. OBMni isteʼmoldan chiqarish boʻyicha milliy dasturning amalga oshirilishi monitoringini olib borish tizimini yaratish
6.
OBM va tarkibida ular mavjud boʻlgan mahsulotlarning importi va eksporti boʻyicha monitoring olib borilishini taʼminlash.
1. OBM va tarkibida ular mavjud boʻlgan mahsulotlarning importi va eksporti boʻyicha maʼlumotlar bazasi shakllantirilishini takomillashtirish.
2. Birlashgan Millatlar Tashkiloti Atrof muhit dasturining Ozon Kotibiyatiga OBM va tarkibida ular mavjud boʻlgan mahsulotlarning importi va eksporti boʻyicha hisobotlarni taqdim etib borish.
Har yili
Mablagʻ talab etilmaydi
Davlat ekologiya qoʻmitasi, Davlat bojxona qoʻmitasi
7.
OBMni isteʼmoldan chiqarish boʻyicha milliy dastur doirasida nazarda tutilgan chora-tadbirlar bajarilishining tizimli monitoringini olib borish.
1. Maʼlumotlarni toʻplash, tegishli maʼlumotlarni tahlil qilish va umumlashtirish.
2. Umumlashtirilgan maʼlumotlarni yagona maʼlumotlar bazasiga kiritib borish.
Doimiy ravishda
Mablagʻ talab etilmaydi
Davlat ekologiya qoʻmitasi, Davlat bojxona qoʻmitasi, Iqtisodiy taraqqiyot va kambagʻallikni qisqartirish vazirligi
IV. Oʻzbekistonda global isishga taʼsiri past darajada boʻlgan va ozon qatlamini yemirish xususiyatiga ega boʻlmagan samarali texnologiyalarni joriy etish orqali GXFUni butunlay isteʼmoldan chiqarish boʻyicha qoʻshma loyihalarni amalga oshirish
8.
Milliy qonunchilikni amalga oshirish, bojxona va huquqni muhofaza qilish organlari xodimlarining mahsulotlar importi va eksportini nazorat qilish boʻyicha bilimini va malakasini oshirishga koʻmaklashish.
1. Xalqaro tajribani oʻrganish va qonunchilikni takomillashtirish boʻyicha takliflar tayyorlash.
2021-yil may
Global ekologik jamgʻarma va Birlashgan Millatlar Tashkiloti Taraqqiyot dasturi (0,3 mln AQSh dollari), korxonalar mablagʻlari (0,887 mln AQSh dollari)
Davlat ekologiya qoʻmitasi, Davlat bojxona qoʻmitasi
2. Davlat ekologiya qoʻmitasi va Davlat bojxona qoʻmitasi xodimlarining institutsional salohiyatini oshirishga qaratilgan tadbirlarni tashkil etish va oʻtkazish.
2021 — 2024-yillar davomida
3. GFU va boshqa muqobil sovitgichlardan foydalanish boʻyicha Kigali tuzatishiga qoʻshilish masalasini asoslash va koʻrib chiqish.
2021-yil may
4. Davlat bojxona qoʻmitasi markaziy laboratoriyasining gaz xromatograflarini kalibrovka qilish, shuningdek, ular uchun zarur uskunalarni sotib olish.
2021 — 2024-yillar davomida
5. “Yagona darcha” bojxona axborot tizimi orqali ruxsatnoma hujjatlarini olishga ariza berish va arizaga asosan ruxsatnoma hujjatlarini rasmiylash-tirish jarayonlari yuzasidan trening tashkil etish.
2021 — 2024-yillar davomida
9.
GXFUdan qayta foydalanish tizimini mustahkamlash va ularning texnologiyalarini almashtirish sohasida ishlab chiqiladigan loyihalar natijadorligi keng omma eʼtiboriga namoyish qilinishini taʼminlash.
1. OBMni qayta ishlash boʻyicha 6 ta yangi markaz tashkil qilish va 6 ta mavjud markazni qoʻshimcha asbob-uskunalar bilan taʼminlash.
2. Sovitish uskunalari ishlab chiqaradigan 100 ta korxona uchun zarur ehtiyot qismlarni sotib olish.
3. OBMni qayta ishlash markazlarining barqarorligini taʼminlash uchun biznes reja ishlab chiqishda koʻmaklashish.
4. Ozon qatlamini yemirish xususiyatiga ega boʻlmagan va global isishga taʼsiri past darajada boʻlgan uskunalarni oʻrnatish, ishlatish va ularga texnik xizmat koʻrsatish sohasida mutaxassislarning bilimlarini oshirish.
5. Davlat ekologiya qoʻmitasi, Bandlik va mehnat munosabatlari vazirligi, Davlat bojxona qoʻmitasi tomonidan sovitish uskunalarini ishlab chiqarish sohasi uchun mutaxassislarni tayyorlash uchun 3 ta markaz tashkil etish.
6. Iqtisodiy oʻtish davridagi mamlakatlardagi ozon ofislari bilan tarmoq almashinuvini taʼminlash va tajriba almashish.
7. Ozon qatlamini yemirish xususiyatiga ega boʻlmagan va global isishga taʼsiri past darajada boʻlgan texnologiyalarni amaliyotga tatbiq qilishda koʻmaklashish.
8. OBM isteʼmolini qayd etuvchi www.report.o3.uz onlayn tizimini qoʻllab-quvvatlash va tashkilotlardan maʼlumot yigʻishda va monitoring olib borishda yordamlashish.
2020 — 2024-yillar davomida
Global ekologik jamgʻarma va Birlashgan Millatlar Tashkiloti Taraqqiyot dasturi (1,25 mln AQSh dollari),
korxonalar mablagʻlari (1,0 mln AQSh dollari), xususiy sektor (4,2 mln AQSh dollari)
Davlat ekologiya qoʻmitasi, Bandlik va mehnat munosabatlari vazirligi, Davlat
bojxona qoʻmitasi
10.
Maʼlumot almashish va manfaatdor tomonlar oʻrtasida xabardorlikni oshirish.
1. Sohaga oid turli tadbirlarni (seminarlar, davra suhbatlari va uchrashuvlar) tashkil etish va oʻtkazish, axborot tarqatma materiallarni ishlab chiqish.
2. “Xalqaro Ozon qatlamini muhofaza qilish kuni”ga bagʻishlangan tadbirlarni tashkil etish va oʻtkazishda ishtirok etish.
3. Sanoat va moliya tashkilotlari oʻrtasida hamkorlik oʻrnatish, shuningdek, resurslarni safarbar qilish uchun sovitish uskunalari ishlab chiqarish sohasida xabardorlikni oshirish boʻyicha tadbirlar oʻtkazish.
2020 — 2024-yillar davomida
Global ekologik jamgʻarma va Birlashgan Millatlar Tashkiloti Taraqqiyot dasturi (0,32 mln AQSh dollari), xususiy sektor (0,5 mln AQSh dollari)
Davlat ekologiya qoʻmitasi
11.
Sovitish uskunalari va havoni konditsionerlash uskunalarini ishlab chiqarish va ularga xizmat koʻrsatish sohasiga xotin-qizlarni jalb qilish.
1. Xotin-qizlarni mazkur sohaga bosqichma-bosqich jalb qilishni nazarda tutuvchi amaliy chora-tadbirlar dasturini ishlab chiqish va belgilangan tartibda tasdiqlash.
2021-yil iyun
Global ekologik jamgʻarma va Birlashgan Millatlar Tashkiloti Taraqqiyot dasturi (0,05 mln AQSh dollari), korxonalar mablagʻlari
Davlat ekologiya qoʻmitasi, Mahalla va oilani qoʻllab-quvvatlash vazirligi, Oliy va oʻrta maxsus taʼlim vazirligi, Savdo-sanoat palatasi
2. Dasturda nazarda tutilgan tadbirlarni amalga oshirishni taʼminlash.
2021 — 2025-yillar davomida
V. OBMlarning zarari toʻgʻrisida targʻibot-tashviqot ishlarini amalga oshirish
12.
OBMdan foydalanishdan bosqichma-bosqich voz kechish, ularni ozon qatlamiga zararsiz va global isish salohiyati past boʻlgan moddalar bilan almashtirish choralarini koʻrishning maqsadlari, amaliy ahamiyati hamda belgilangan muddatlarda amalga oshirilishi yuzasidan tadbirkorlik subyektlari oʻrtasida keng targʻibot va tashviqot ishlarini tashkil etish.
1. OBM va global isish salohiyati yuqori boʻlgan moddalardan foydalanuvchilarni aniqlash boʻyicha xatlovni bosqichma-bosqich amalga oshirish.
2. Xatlov natijasiga koʻra aniqlangan foydalanuvchilarning moliyaviy koʻmagi asosida ularning masʼul xodimlari uchun sohaga taalluqli seminarlar, oʻquv kurslari va davra suhbatlarini tashkil etish yuzasidan har yilgi rejalarni ishlab chiqish va ularni amalga oshirish.
3. Olib borilayotgan ishlar natijadorligini teleradiokanallar va boshqa ommaviy axborot vositalari orqali keng omma eʼtiboriga havola etish.
Har yili
Tadbirkorlik subyektlari mablagʻlari
Davlat ekologiya qoʻmitasi, Innovatsion rivojlantirish vazirligi, Savdo- sanoat palatasi, “Oʻzeltexsanoat” uyushmasi
13.
Ozon qatlamini muhofaza qilish sohasida aholining xabardorligini oshirish.
1. Atrof muhit holati va tabiiy resurslardan foydalanish boʻyicha milliy maʼruzalarda ozon qatlamini muhofaza qilish boʻyicha amalga oshirilayotgan ishlar xususida maʼlumotlarni muntazam berib borish.
2. OBMdan foydalanish va ularni ozon qatlami uchun xavfsiz boʻlgan turlariga almashtirish boʻyicha olib borilayotgan tadbirlar haqida chiqishlar tashkil etish.
Alohida belgilangan reja asosida
Mablagʻ talab etilmaydi
Davlat ekologiya qoʻmitasi, Oʻzbekiston Milliy teleradiokompaniyasi, Oʻzbekiston Milliy axborot agentligi
Vazirlar Mahkamasining 2021-yil 9-martdagi 126-son qaroriga 3-ILOVA
Vazirlar Mahkamasining 2018-yil 9-yanvardagi 17-son qarori bilan tasdiqlangan Tarkibida ozonni buzuvchi moddalar boʻlgan, Oʻzbekiston Respublikasiga import va Oʻzbekiston Respublikasidan eksport qilish ruxsatnomalar boʻyicha amalga oshiriladigan mahsulotlar turlari roʻyxatiga oʻzgartirishlar kiritish haqida
1. 1.1.-pozitsiya quyidagi tahrirda bayon qilinsin:
“
1.1.
Sovutgichlar, muzlatgichlar va ular uchun moʻljallangan nasos hamda kompressorlar
Vazirlar Mahkamasining 2021-yil 9-martdagi 126-son qaroriga 4-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan baʼzi qarorlari
ROʻYXATI
1. Vazirlar Mahkamasining “Ozon qatlamini himoya qilish sohasidagi shartnomalar boʻyicha Oʻzbekiston Respublikasining xalqaro majburiyatlarini bajarish chora-tadbirlari toʻgʻrisida” 2000-yil 24-yanvardagi 20-son qarori.
2. Vazirlar Mahkamasining “Hukumat komissiyalarini tuzish masalalari boʻyicha Oʻzbekiston Respublikasi Vazirlar Mahkamasining ayrim qarorlariga oʻzgartirishlar, qoʻshimchalar kiritish va oʻz kuchini yoʻqotgan deb topish toʻgʻrisida” 2000-yil 19-sentabrdagi 359-son qaroriga 1-ilovaning 33-bandi (Oʻzbekiston Respublikasi QHT, 2000-yil, 9-son, 60-modda).
3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va baʼzilarini oʻz kuchini yoʻqotgan deb hisoblash toʻgʻrisida” 2005-yil 8-sentabrdagi 206-son qaroriga 1-ilovaning 20-bandi (Oʻzbekiston Respublikasi QHT, 2005-yil, 34-36-son, 264-modda).
4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Tashqi savdo sohasida boshqaruv tizimini takomillashtirish chora-tadbirlari toʻgʻrisida” 2017-yil 13-apreldagi PF-5012-son Farmoni va Oʻzbekiston Respublikasi Prezidentining “Oʻzbekiston Respublikasi Tashqi savdo vazirligi faoliyatini tashkil etish chora-tadbirlari toʻgʻrisida” 2017-yil 13-apreldagi PQ-2887-son qarori)” 2017-yil 14-iyuldagi 499-son qaroriga ilovaning 12-bandi (Oʻzbekiston Respublikasi QHT, 2017-yil, 29-son, 693-modda).
5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Ekologiya va atrof muhitni muhofaza qilish sohasida davlat boshqaruvi tizimini takomillashtirish toʻgʻrisida” 2017-yil 21-apreldagi PF-5024-son Farmoni va Oʻzbekiston Respublikasi Prezidentining “Oʻzbekiston Respublikasi Ekologiya va atrof-muhitni muhofaza qilish davlat qoʻmitasi faoliyatini taʼminlash chora-tadbirlari toʻgʻrisida” 2017-yil 21-apreldagi PQ-2915-son qarori)” 2017-yil 17-noyabrdagi 915-son qaroriga 1-ilovaning 5-bandi (Oʻzbekiston Respublikasi QHT, 2017-yil, 46-son, 1134-modda).
6. Vazirlar Mahkamasining “Ozonni buzuvchi moddalar va tarkibida ular boʻlgan mahsulotlarning Oʻzbekiston Respublikasiga importini va Oʻzbekiston Respublikasidan eksportini tartibga solishni yanada takomillashtirish chora-tadbirlari toʻgʻrisida” 2018-yil 9-yanvardagi 17-son qaroriga 7-ilovaning 1-bandi.
(Qonun hujjatlari maʼlumotlari milliy bazasi, 10.03.2021-y., 09/21/126/0196-son)
