Respublika oliy va oʻrta maxsus taʼlim tizimida boshqaruvning zamonaviy shakl va tamoyillarini keng qoʻllash, professional taʼlim muassasalarida mavjud ustaxona, oʻquv-laboratoriya bazasidan foydalanish samaradorligini oshirish va taʼlim jarayonining texnik-metrologik taʼminotini yanada yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oliy va oʻrta maxsus taʼlim tizimiga boshqaruvning yangi tamoyillarini joriy etish chora-tadbirlari toʻgʻrisida” 2019-yil 11-iyuldagi PQ-4391-son qaroriga muvofiq Oʻzbekiston Respublikasi Oliy va oʻrta maxsus taʼlim vazirligi huzurida davlat muassasasi shaklidagi Oʻquv ustaxonalari, texnik reglamentlar va metrologik nazorat xizmati (keyingi oʻrinlarda — Nazorat xizmati) tashkil etilganligi maʼlumot uchun qabul qilinsin.

2. Nazorat xizmatining asosiy vazifalari etib quyidagilar belgilansin:

idoraviy mansubligidan qatʼi nazar, barcha professional taʼlim muassasalarining oʻquv jarayonida jihoz, asbob-uskuna, texnika hamda sarflanadigan xomashyo va materiallardan, oʻquv-tajriba xoʻjaliklaridan samarali foydalanishlarini nazorat qilish;

oʻquv jarayonida qoʻllaniladigan nazorat-oʻlchash vositalaridan samarali foydalanilishi hamda metrologik qoidalarga rioya etilishini nazorat qilish, oʻlchashlarning yagona birlikda boʻlishini taʼminlash;

professional taʼlim muassasalarining asosiy faoliyatiga qoʻshimcha ravishda qonunchilik hujjatlari bilan taqiqlanmagan pullik xizmatlar koʻrsatish boʻyicha (ishlab chiqarish va xizmat koʻrsatish) faoliyatini muvofiqlashtirish.

3. Oʻzbekiston Respublikasi Oliy va oʻrta maxsus taʼlim vazirligi huzuridagi Oʻquv ustaxonalari, texnik reglamentlar va metrologik nazorat xizmatining tuzilmasi ilovaga muvofiq tasdiqlansin.

4. Nazorat xizmatiga Oʻzbekiston Respublikasi Oliy va oʻrta maxsus taʼlim vazirligi bilan kelishilgan holda quyidagilar boʻyicha professional taʼlim muassasalariga shartnoma asosida xizmatlar koʻrsatishga ruxsat berilsin:

jihozlar, asbob-uskuna va texnikalar hamda xomashyo va materiallardan oʻquv-amaliy mashgʻulotlarni oʻtkazishda samarali foydalanish boʻyicha uslubiy qoʻllanma hamda tavsiyalar ishlab chiqish va joriy etish;

professional taʼlim muassasalari hisobidagi xizmat muddatini oʻtab boʻlgan jihoz, asbob-uskuna va texnikalarning texnik holatini oʻrganish va ulardan oʻquv jarayonida foydalanish toʻgʻrisida tegishli xulosalar berish.

5. Nazorat xizmati faoliyatini moliyalashtirish manbalari etib quyidagilar belgilansin:

Oʻzbekiston Respublikasi Davlat budjeti mablagʻlari, shu jumladan, davlat ilmiy-texnika dasturlarini amalga oshirish uchun ajratilgan mablagʻlar;

xalqaro moliya tashkilotlarining grantlari;

shartnoma asosida xizmatlar koʻrsatishdan tushadigan tushumlar;

jismoniy va yuridik shaxslarning homiylik va xayriya mablagʻlari;

qonunchilik hujjatlari bilan taqiqlanmagan boshqa manbalar.

6. Belgilab qoʻyilsinki:

2021-yil 1-martdan boshlab mehnatga haq toʻlash shartlari boʻyicha Nazorat xizmati boshligʻi — oliy taʼlim muassasasi filiali direktoriga, boshliq oʻrinbosari — oliy taʼlim muassasasi filiali direktorining oʻrinbosariga, boʻlim boshliqlari — oliy taʼlim muassasasi fakultet dekani oʻrinbosariga, bosh hisobchi va bosh mutaxassis — oliy taʼlim muassasasi katta oʻqituvchisiga, yetakchi mutaxassis — oliy taʼlim muassasasi oʻqituvchisiga tenglashtiriladi;

mazkur qarorda nazarda tutilgan xarajatlarni moliyalashtirish 2021-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Oliy va oʻrta maxsus taʼlim vazirligiga ajratilgan mablagʻlar doirasida amalga oshiriladi, 2022-yildan boshlab — Oʻzbekiston Respublikasi Davlat budjeti parametrlarida nazarda tutiladi;

Nazorat xizmatiga 1 ta yengil avtotransport vositasini saqlash uchun limit ajratiladi.

7. Oʻzbekiston Respublikasi Oliy va oʻrta maxsus taʼlim vazirligi ikki oy muddatda Nazorat xizmati:

ustavini ishlab chiqsin va belgilangan tartibda tasdiqlasin;

xodimlar tarkibini amaliy tajribaga ega, yuqori malakali kadrlar bilan toʻldirish choralarini koʻrsin;

faoliyatini samarali yuritishi uchun uni Toshkent shahar, Olmazor tumani, Shifonur koʻchasi, Talabalar shaharchasi, 75-uy manzilidagi Oliy taʼlimni rivojlantirish tadqiqotlari va ilgʻor texnologiyalarni tatbiq etish markazi binosiga tekin foydalanish huquqi asosida joylashtirsin.

8. Vazirlar Mahkamasining “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi huzuridagi Idoraviy metrologik nazorat xizmatini tashkil etish toʻgʻrisida” 2006-yil 14-dekabrdagi 259-son qarori (Oʻzbekiston Respublikasi QHT, 2006-y., 48 — 50-son, 489-modda) oʻz kuchini yoʻqotgan deb hisoblansin.

9. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Oʻzbekiston Respublikasi oliy va oʻrta maxsus taʼlim vaziri A.H. Toshkulov zimmasiga yuklansin.