|
Hujjat kuchini yo‘qotgan 20.01.2026
|
Oʻzbekiston Respublikasi moliya vazirining
buyrugʻi
Uy-joy-kommunal xizmatlar haqini toʻlash boʻyicha kompensatsiya pul toʻlovlarining mexanizmi toʻgʻrisidagi nizomga oʻzgartirishlar kiritish haqida
[Oʻzbekiston Respublikasi Adliya vazirligi tomonidan 2020-yil 6-noyabrda roʻyxatdan oʻtkazildi, roʻyxat raqami 2175-6]
LexUZ sharhiMazkur buyruq Oʻzbekiston Respublikasi iqtisodiyot va moliya vazirining 2026-yil 12-yanvardagi 319-sonli ““Uy-joy-kommunal xizmatlar haqini toʻlash boʻyicha kompensatsiya pul toʻlovlarining mexanizmi toʻgʻrisidagi nizomni tasdiqlash haqida”gi buyruq, shuningdek unga oʻzgartirish va qoʻshimchalarni oʻz kuchini yoʻqotgan deb topish toʻgʻrisida”gi buyrugʻiga (roʻyxat raqami 2175-9, 19.01.2026-y.) asosan oʻz kuchini yoʻqotgan.
Oʻzbekiston Respublikasining 2019-yil 30-dekabrdagi OʻRQ-599-son “Oʻzbekiston Respublikasining Soliq kodeksiga oʻzgartish va qoʻshimchalar kiritish toʻgʻrisida”gi Qonuni, Oʻzbekiston Respublikasi Prezidentining 2017-yil 1-dekabrdagi PF-5270-son “Nogironligi boʻlgan shaxslarni davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi va 2020-yil 27-apreldagi PF-5986-son “Koronavirus pandemiyasi davrida aholi va tadbirkorlik subyektlarini qoʻllab-quvvatlash boʻyicha qoʻshimcha chora-tadbirlar toʻgʻrisida”gi farmonlariga muvofiq buyuraman:
1. Oʻzbekiston Respublikasi moliya vazirining 2010-yil 30-noyabrdagi 102-son buyrugʻi (roʻyxat raqami 2175, 2010-yil 30-dekabr) (Oʻzbekiston Respublikasi qonun hujjatlari toʻplami, 2010-y., 52-son, 531-modda) bilan tasdiqlangan Uy-joy-kommunal xizmatlar haqini toʻlash boʻyicha kompensatsiya pul toʻlovlarining mexanizmi toʻgʻrisidagi nizomga ilovaga muvofiq oʻzgartirishlar kiritilsin.
2. Mazkur buyruq rasmiy eʼlon qilingan kundan eʼtiboran kuchga kiradi.
Moliya vaziri T. ISHMETOV
Toshkent sh.,
2020-yil 15-oktabr,
45-son
Oʻzbekiston Respublikasi moliya vazirining 2020-yil 15-oktabrdagi 45-son buyrugʻiga
ILOVA
Uy-joy-kommunal xizmatlar haqini toʻlash boʻyicha kompensatsiya pul toʻlovlarining mexanizmi toʻgʻrisidagi nizomga kiritilayotgan oʻzgartirishlar
1. 3-bandning birinchi xatboshi quyidagi tahrirda bayon etilsin:
“3. Oʻzbekiston Respublikasining Soliq kodeksiga muvofiq, uy-joy-kommunal xizmatlar haqini toʻlash boʻyicha har oylik kompensatsiya pul toʻlovlari jami daromad tarkibiga kiritilmaydi va ish haqi (pensiyalar, nafaqa) toʻlanadigan muddatlarda toʻlanadi. Bunda, kompensatsiyalar har oyda korxona shtatida turgan har bir xodimga ish joyida, pensionerlarga va nafaqa oladigan nogironligi boʻlgan bolalar hamda nafaqa oladigan pensiya tayinlash uchun zarur ish stajiga ega boʻlmagan, mehnatga qobiliyatsiz keksa fuqarolarga — pensiya (nafaqa) olish joyida toʻlanadi.”.
2. 6-band quyidagi tahrirda bayon qilinsin:
“6. Kompensatsiyalar quyidagi tartibda toʻlanadi:
pensionerlar va ijtimoiy nafaqalar oluvchilarga — pensiya (ijtimoiy nafaqa) toʻlash bilan bir vaqtda;
ishlaydigan fuqarolarga, shu jumladan Oʻzbekiston Respublikasi Davlat budjeti hisobidan pensiya oluvchi ishlaydigan pensionerlarga ish haqini toʻlash muddatlarida.”.
3. 10-band quyidagi tahrirda bayon qilinsin:
“10. Ishlovchi fuqarolar va Oʻzbekiston Respublikasi Davlat budjeti hisobidan pensiya oluvchi ishlovchi pensionerlar ishdan boʻshash holatida, xodim boʻshayotgan oy uchun kompensatsiya ish joyida toʻlanadi.”.
4. 12-band oʻz kuchini yoʻqotgan deb topilsin.
(Qonun hujjatlari maʼlumotlari milliy bazasi, 06.11.2020-y., 10/20/2175-6/1478-son)
