Oʻzbekiston Respublikasi Prezidentining

Qarori

Imom Moturidiy xalqaro ilmiy-tadqiqot markazini tashkil etish chora-tadbirlari toʻgʻrisida

Buyuk mutafakkir ajdodimiz, moturidiylik taʼlimoti asoschisi imom Abu Mansur Moturidiy va uning izdoshlari merosini chuqur oʻrganish, ularning aqida va kalom ilmi rivojiga qoʻshgan bebaho hissasini tadqiq etish va keng targʻib qilish, milliy-diniy qadriyatlarimizni asrab-avaylash va rivojlantirish, shu asosda yosh avlodni ezgu umuminsoniy gʻoyalar ruhida tarbiyalash, ularda maʼnaviy va maʼrifiy qarashlarimizga yot boʻlgan zararli taʼsirlarga qarshi mafkuraviy immunitetni kuchaytirish maqsadida:

1. Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita (keyingi oʻrinlarda — Din ishlari boʻyicha qoʻmita), Oʻzbekiston xalqaro islom akademiyasi, Oʻzbekistondagi Islom sivilizatsiyasi markazi va Imom Buxoriy xalqaro ilmiy-tadqiqot markazining Oʻzbekiston xalqaro islom akademiyasi huzurida davlat muassasasi shaklidagi Imom Moturidiy xalqaro ilmiy-tadqiqot markazini (keyingi oʻrinlarda — Markaz) tashkil etish toʻgʻrisidagi taklifi maʼqullansin.

Oldingi tahrirga qarang.

2. Markazning asosiy vazifalari etib quyidagilar belgilansin:

Imom Moturidiy, Abu Muin Nasafiy kabi buyuk alloma ajdodlarimiz qoldirgan boy maʼnaviy merosni oʻrganish, jahon ilm-fani rivojiga qoʻshgan beqiyos hissasini xalqimiz, ayniqsa, yoshlarga yetkazish, ular yaratgan asarlarning ilmiy-izohli tarjima va qiyosiy matnlarini nashr etish, mamlakatimiz hududida roʻy bergan Birinchi va Ikkinchi Renessansning ilmiy-nazariy asoslarini tadqiq etish hamda Yangi Oʻzbekiston taraqqiyotining maʼnaviy poydevorini yaratishda ishtirok etish;

islom dinining insonparvarlik mohiyati, maʼrifiy-madaniy roli va rivojlanish yoʻnalishlarini ilmiy asosda oʻrganish va keng ommaga, jumladan, xalqaro jamoatchilikka yetkazish;

mamlakatda hamda xorijiy davlatlarning kutubxonalari va arxiv fondlarida saqlanayotgan buyuk allomalarning kalom ilmiga oid merosi hamda islom dunyosi uchun muhim ilmiy ahamiyatga ega boʻlgan qoʻlyozma, toshbosma asarlarning asl hamda elektron nusxalarini toʻplash va kelajak avlodga yetkazish uchun tizimli ilmiy tadqiqotlarni tashkil etish;

islomiy ilmlar, xususan, kalom ilmi tarixi va uning bugungi kundagi ahamiyatini ilmiy tadqiq etish sohasidagi xalqaro hamkorlikni kuchaytirish maqsadida ilmiy-nazariy va uslubiy masalalarga bagʻishlangan anjuman, konferensiya, simpozium, koʻrgazma, ilmiy maʼruza, seminar-trening va tanlovlar hamda boshqa madaniy-maʼrifiy tadbirlarni tashkil etish;

tadqiqot natijalari yuzasidan qomuslar, kataloglar, albomlar, ilmiy-ommabop hujjatli filmlar, axborot-resurs bazasini tayyorlash va ommaviy axborot vositalari, xususan, Internet jahon axborot tarmogʻida eʼlon qilishni tashkil qilish;

islom tarixi va kalom ilmi yoʻnalishidagi yangi tadqiqotlar natijalaridan ilmiy jamoatchilikni keng xabardor etish;

“jaholatga qarshi maʼrifat” gʻoyasi asosida islom dinining ilm-maʼrifat, maʼnaviy poklik, tinchlik-osoyishtalik, taraqqiyot va bunyodkorlikka chaqiruvchi gʻoyalarini xalqqa, ayniqsa, yoshlarga yetkazish, mutaassiblik, ekstremizmning maqsadlari, gʻoyaviy negizlari, zamonaviy koʻrinishlari va faoliyat uslublarini oʻrganish hamda ularga qarshi kurashishning ilmiy-maʼrifiy asoslarini ishlab chiqish va amaliyotda qoʻllash uchun tavsiya etish;

diniy taʼlim muassasalariga ilmiy-tadqiqot va oʻquv-uslubiy masalalarda hamda pedagog kadrlar va diniy xodimlarning malakasini oshirib borishda amaliy yordam koʻrsatish;

ijtimoiy-maʼnaviy muhit barqarorligini saqlash, yoshlarni yot gʻoyalar taʼsiridan asrashga qaratilgan strategik ahamiyatga ega loyiha va tashabbuslarni ishlab chiqish.

(2-band Oʻzbekiston Respublikasi Prezidentining 2025-yil 11-sentabrdagi PF-164-sonli Farmoni tahririda — Qonunchilik maʼlumotlari milliy bazasi, 11.09.2025-y., 06/25/164/0821-son)

3. Quyidagilar:

Imom Moturidiy xalqaro ilmiy-tadqiqot markazining faoliyatini qoʻllab-quvvatlash va muvofiqlashtirish boʻyicha vasiylik kengashining tarkibi 1-ilovaga muvofiq;

2020 — 2024-yillarda Imom Moturidiy va moturidiylik taʼlimotini oʻrganishni qoʻllab-quvvatlash boʻyicha “Yoʻl xaritasi” 2-ilovaga muvofiq tasdiqlansin.

4. Belgilab qoʻyilsinki:

Oldingi tahrirga qarang.

Markaz direktori Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi;

(4-bandning ikkinchi xatboshisi Oʻzbekiston Respublikasi Prezidentining 2025-yil 11-sentabrdagi PF-164-sonli Farmoni tahririda — Qonunchilik maʼlumotlari milliy bazasi, 11.09.2025-y., 06/25/164/0821-son)

Imom Moturidiy xalqaro ilmiy-tadqiqot markazining faoliyatini qoʻllab-quvvatlash va muvofiqlashtirish boʻyicha vasiylik kengashi Markaz faoliyatini muvofiqlashtiradi, unga yuklangan vazifalarni amalga oshirishda koʻmaklashadi hamda faoliyatining asosiy yoʻnalishlarini belgilaydi.

5. Markaz faoliyatini moliyalashtirish manbalari etib quyidagilar belgilansin:

Oʻzbekiston Respublikasi Davlat budjeti mablagʻlari;

jismoniy va yuridik shaxslarning homiylik xayriyalari;

qonun hujjatlari bilan taqiqlanmagan boshqa manbalar.

6. Oʻzbekiston Respublikasi Vazirlar Mahkamasi ikki oy muddatda:

Imom Moturidiy xalqaro ilmiy-tadqiqot markazining tuzilmasi va ustavini tasdiqlasin;

Markaz uchun zarur moddiy-texnik baza va infratuzilmani barpo etish boʻyicha tegishli choralarni koʻrsin;

Markazga yuqori malakali mutaxassislarni jalb etish boʻyicha tashkiliy ishlarni amalga oshirsin.

7. Oʻzbekiston xalqaro islom akademiyasi, Oʻzbekiston Respublikasi Oliy va oʻrta maxsus taʼlim vazirligi hamda Din ishlari boʻyicha qoʻmitaning xorijiy tadqiqotchi va izlanuvchilar uchun Imom Moturidiy nomidagi xalqaro stipendiyani taʼsis etish toʻgʻrisidagi taklifiga rozilik berilsin.

Belgilansinki:

xalqaro stipendiyaga nomzodlar Imom Moturidiy va moturidiylik taʼlimoti bilan bogʻliq izlanishlarni amalga oshiruvchi xorijiy tadqiqotchi va izlanuvchilar orasidan saralab olinadi;

xalqaro stipendiya sovrindorlarining Oʻzbekistondagi ilmiy izlanishlari xalqaro va xorijiy tashkilotlarning grantlari hisobiga moliyalashtiriladi.

Oldingi tahrirga qarang.

8. Markaz direktoriga:

(8-bandning birinchi xatboshisi Oʻzbekiston Respublikasi Prezidentining 2025-yil 11-sentabrdagi PF-164-sonli Farmoni tahririda — Qonunchilik maʼlumotlari milliy bazasi, 11.09.2025-y., 06/25/164/0821-son)

xorijlik malakali mutaxassislarni ilmiy tadqiqotchi sifatida jalb etib, ularga mehnat bozorining amaldagi konyunkturasini hisobga olgan holda ish haqi va boshqa toʻlovlarni belgilash;

Markaz ilmiy tadqiqotchilari va mutaxassislarining xorijiy taʼlim va ilmiy-tadqiqot muassasalarida malaka oshirishi va stajirovka oʻtashi qiymati hamda shu bilan bogʻliq xarajatlar uchun toʻlovlarni amalga oshirish huquqi berilsin.

Oldingi tahrirga qarang.

9. Markaz Oʻzbekiston Respublikasi Tashqi ishlar vazirligi bilan birgalikda Taʼlim, fan va madaniyat masalalari boʻyicha Islom olami tashkilotiga (ICESCO) aʼzo mamlakatlar va boshqa davlatlarning maxsus muassasalari, universitetlari oʻrtasida samarali xalqaro hamkorlikni oʻrnatish va rivojlantirish boʻyicha aniq choralarni koʻrib borsin.

(9-band Oʻzbekiston Respublikasi Prezidentining 2025-yil 11-sentabrdagi PF-164-sonli Farmoni tahririda — Qonunchilik maʼlumotlari milliy bazasi, 11.09.2025-y., 06/25/164/0821-son)

10. Oʻzbekiston Respublikasi Innovatsion rivojlanish vazirligi ikki oy muddatda:

Markazda noyob qoʻlyozma asarlarni oʻrganish boʻyicha ilmiy-tadqiqot ishlariga davlat buyurtmasi belgilangan tartibda shakllantirilishini;

ilmiy faoliyatga oid davlat dasturlari doirasida bajariladigan maqsadli ilmiy loyihalarga Oʻzbekiston Respublikasi Davlat budjeti mablagʻlari hisobidan Markazga mablagʻlar ajratilishini taʼminlasin.

Oldingi tahrirga qarang.

11. Oʻzbekiston Respublikasi Oliy va oʻrta maxsus taʼlim vazirligi hamda Mutaxassislarni xorijda tayyorlash va vatandoshlar bilan muloqot qilish boʻyicha “El-yurt umidi” jamgʻarmasi muntazam ravishda Markazning asoslantirilgan takliflari va toʻgʻridan-toʻgʻri buyurtmalari asosida ilmiy xodim va tadqiqotchilarning xorijda amaliyot oʻtashi va stajirovkasini tashkil etish hamda xorijlik ilmiy xodim va tadqiqotchilarni Markazga jalb qilish choralarini koʻrib borsin.

(11-band Oʻzbekiston Respublikasi Prezidentining 2021-yil 9-noyabrdagi PF-3-sonli Farmoni tahririda — Qonunchilik maʼlumotlari milliy bazasi, 09.11.2021-y., 06/21/3/1037-son)

Oldingi tahrirga qarang.

12. Markaz rahbariyati, ilmiy xodimlari va mutaxassislariga Oʻzbekiston Respublikasi Prezidentining 2018-yil 16-apreldagi “Diniy-maʼrifiy soha faoliyatini tubdan takomillashtirish chora-tadbirlari toʻgʻrisida”gi PF-5416-son Farmonining 11-bandi amal qilinishi tatbiq etilsin.

(12-band Oʻzbekiston Respublikasi Prezidentining 2021-yil 21-apreldagi PF-6212-sonli qarori tahririda — Qonun hujjatlari maʼlumotlari milliy bazasi, 22.04.2021-y., 06/21/6212/0358-son)

13. Din ishlari boʻyicha qoʻmita ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

14. Ushbu qarorning ijrosini nazorat qilish Oʻzbekiston Respublikasi Prezidenti maslahatchisi R.S. Qosimov va Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2020-yil 11-avgust,

PQ-4802-son

Oldingi tahrirga qarang.

Oʻzbekiston Respublikasi Prezidentining 2020-yil 11-avgustdagi PQ-4802-son qaroriga
1-ILOVA

Imom Moturidiy xalqaro ilmiy-tadqiqot markazining faoliyatini qoʻllab-quvvatlash va muvofiqlashtirish boʻyicha vasiylik kengashining

TARKIBI

1.	R.Q. Davletov	—	Oʻzbekiston Respublikasi Prezidenti maslahatchisi, Vasiylik kengashi raisi
2.	Z.B. Maxkamova	—	Oʻzbekiston Respublikasi Bosh vazirining oʻrinbosari
3.	A.J. Tashkulov	—	adliya vaziri
4.	K.A. Sharipov	—	oliy taʼlim, fan va innovatsiyalar vaziri
5.	U.K. Abidxadjayev	—	iqtisodiyot va moliya vaziri oʻrinbosari
6.	S.D. Toshboyev	—	Oʻzbekiston Respublikasi Din ishlari boʻyicha qoʻmitasi raisi
7.	F.F. Abduxalikov	—	Vazirlar Mahkamasi huzuridagi Oʻzbekistondagi Islom sivilizatsiyasi markazi direktori
8.	M.M. Kamilov	—	Oʻzbekiston xalqaro islomshunoslik akademiyasi rektori
9.	Sh.A. Ayupov	—	Oʻzbekiston Fanlar akademiyasi prezidenti
10.	G.S. Ismailova	—	“El-yurt umidi” jamgʻarmasi ijrochi direktori
11.	O.A. Xasanov	—	Respublika Maʼnaviyat va maʼrifat markazi rahbari
12.	Sh.Yu. Ziyodov	—	Vazirlar Mahkamasi huzuridagi Imom Buxoriy xalqaro ilmiy-tadqiqot markazi direktori
13.	Lavozim boʻyicha	—	Vazirlar Mahkamasi huzuridagi Imom Moturidiy xalqaro ilmiy-tadqiqot markazi direktori, Vasiylik kengashi kotibi

Izohlar:

Vasiylik kengashi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Vasiylik kengashi ishiga kelishilgan holda boshqa vazirliklar, idoralar, mahalliy davlat hokimiyati organlari, xoʻjalik jamiyatlari va fuqarolik jamiyati institutlari rahbarlari va mutaxassislari jalb qilinishi mumkin.

(1-ilovaning matni Oʻzbekiston Respublikasi Prezidentining 2025-yil 11-sentabrdagi PF-164-sonli Farmoni tahririda — Qonunchilik maʼlumotlari milliy bazasi, 11.09.2025-y., 06/25/164/0821-son)

Oʻzbekiston Respublikasi Prezidentining 2020-yil 11-avgustdagi PQ-4802-son qaroriga
2-ILOVA

2020 — 2024-yillarda Imom Moturidiy va moturidiylik taʼlimotini oʻrganishni qoʻllab-quvvatlash

“YOʻL XARITASI”

T/r	Chora-tadbirlar nomi	Amalga oshirish mexanizmi	Ijro muddati	Masʼullar
I. Tashkiliy chora-tadbirlar
1.	Imom Moturidiy va moturidiylik taʼlimotini oʻrgangan mahalliy va xorijiy olimlar hamda tadqiqotchilar, ularning ilmiy tadqiqotlari haqida maʼlumotlar bazasini tashkil etish.	1. Imom Moturidiy va moturidiylik taʼlimotini oʻrgangan mahalliy olim va tadqiqotchilar roʻyxatini shakllantirish.	2020-yil sentabr	Oʻzbekiston xalqaro islom akademiyasi (R. Qosimov), Imom Buxoriy xalqaro ilmiy-tadqiqot markazi (Sh. Ziyodov), Abu Rayhon Beruniy nomidagi Sharqshunoslik instituti (B. Abduhalimov)
		2. Imom Moturidiy va moturidiylik taʼlimotini oʻrgangan xorijiy olim va tadqiqotchilar roʻyxatini shakllantirish.	2020-yil oktabr
		3. Mahalliy va xorijiy olim hamda tadqiqotchilar, ularning Imom Moturidiy va moturidiylik taʼlimoti boʻyicha yozgan maqola, risola, kitob, monografiya, ilmiy tadqiqotlari haqida elektron baza yaratish.	2021-yil may
2.	Imom Moturidiy xalqaro ilmiy-tadqiqot markaziga doimiy asosda faoliyat yurituvchi xorijiy yetakchi moturidiyshunos olim va mutaxassislarni jalb etish.	1. Markazda faoliyat yuritishi mumkin boʻlgan xorijlik yetakchi moturidiyshunos olimlar roʻyxatini shakllantirish.	2020-yil noyabr	Oʻzbekiston xalqaro islom akademiyasi (R. Qosimov), “El-yurt umidi” jamgʻarmasi (A. Bekmurodov), Tashqi ishlar vazirligi (A. Kamilov), manfaatdor vazirlik va idoralar
		2. Xorijlik yetakchi moturidiyshunos olimlarni Markaz faoliyatiga jalb etish choralarini koʻrish.	2021-yil oktabr
3.	Markaz ilmiy xodimlarining moturidiylik taʼlimoti boʻyicha jahonning yetakchi universitetlari va ilmiy-tadqiqot markazlarida malaka oshirishini tashkil etish.	1. Jahonning yetakchi universitetlari va ilmiy-tadqiqot markazlari roʻyxatini shakllantirish.	2020-yil oktabr	Innovatsion rivojlanish vazirligi (I. Abduraxmonov), Tashqi ishlar vazirligi (A. Kamilov), “El-yurt umidi” jamgʻarmasi (A. Bekmurodov)
		2. Malaka oshirishda ishtirok etish uchun yosh tadqiqotchilar, doktorant va magistrlarni jalb qilish.	2021-yildan
		3. Markaz ilmiy xodimlarini tanlov asosida xorijiy taʼlim, ilmiy-tadqiqot va boshqa muassasalarga doktorantura va magistraturaga oʻqishga, stajirovka oʻtashga yoki malaka oshirishga yuborishni tashkil etishga koʻmaklashish.	reja asosida
4.	Yurtimiz moturidiyshunos olimlarining xorijiy mamlakatlarda moturidiylik taʼlimotiga bagʻishlab oʻtkaziladigan xalqaro konferensiyalarda doimiy ishtirokini taʼminlash.	1. Xorijiy mamlakatlarda moturidiylik taʼlimotiga bagʻishlab oʻtkaziladigan konferensiyalar roʻyxatini shakllantirish.	2020-yil noyabr	Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov), Tashqi ishlar vazirligi (A. Kamilov)
		2. Oʻzbekistondagi moturidiyshunos olimlarning reja asosida xalqaro konferensiyalarda ishtirokini taʼminlash.	2021-yildan reja asosida
5.	Markazga dunyoning turli mamlakatlarida nashr etilgan islomiy ilmlar, jumladan, Imom Moturidiy va moturidiylik taʼlimotiga oid kitoblarni xarid qilish va keltirish choralarini koʻrish.	1. Islomiy ilmlar, Imom Moturidiy va moturidiylik taʼlimotiga oid kitoblar roʻyxatini shakllantirish.	2020-yil oktabr	Oʻzbekiston xalqaro islom akademiyasi (R. Qosimov), Din ishlari boʻyicha qoʻmita (A. Axmedov), Tashqi ishlar vazirligi (A. Kamilov), Davlat bojxona qoʻmitasi (M. Azimov), manfaatdor vazirlik va idoralar
		2. Moliya vazirligi tomonidan Markaz taqdimnomasiga asosan kitoblarni xarid qilish uchun zarur boʻlgan mablagʻlarni ajratish.	2021-yil fevral
		3. Xorijiy mamlakatlardan olib kelinadigan kitoblarni bojxona bojlaridan ozod etish.	alohida reja asosida
6.	“Moturidiylik taʼlimoti va hozirgi zamon” mavzusida onlayn konferensiya va seminarlar oʻtkazish.	1. Onlayn konferensiya va seminarlar oʻtkazish rejasini ishlab chiqish.	2020-yil dekabr	Oʻzbekiston xalqaro islom akademiyasi (R. Qosimov), Din ishlari boʻyicha qoʻmita (A. Axmedov), manfaatdor vazirlik va idoralar
		2. Konferensiya va seminarlar oʻtkazishni xorijiy mamlakatlardagi markazlar bilan muvofiqlashtirish.	2021-yildan
		3. “Moturidiylik taʼlimoti va hozirgi zamon” mavzusida onlayn konferensiya va seminarlar oʻtkazish.	reja asosida
7.	Imom Moturidiy va moturidiylik taʼlimotini oʻrganishni qoʻllab-quvvatlash maqsadida “Imom Moturidiy” nomidagi xalqaro stipendiyani taʼsis etish.	1. “Imom Moturidiy” nomidagi xalqaro stipendiyani taʼsis etish toʻgʻrisidagi nizom loyihasini ishlab chiqish.	2021-yil sentabr	Oʻzbekiston xalqaro islom akademiyasi (R. Qosimov), Fanlar akademiyasi (B. Yuldashev), Oliy va oʻrta maxsus taʼlim vazirligi (I. Madjidov), Din ishlari boʻyicha qoʻmita (A. Axmedov), Tashqi ishlar vazirligi (A. Kamilov)
		2. Stipendiyani moliyalashtirish boʻyicha xalqaro donor mamlakatlar mablagʻlari hamda qonun hujjatlarida taqiqlanmagan boshqa manbalarni jalb etish.	alohida reja asosida
8.	Imom Moturidiy va uning izdoshlari ilmiy merosiga bagʻishlangan oʻzbek, ingliz, arab tillarida faoliyat yurituvchi veb-sayt yaratish.	1. Markaz faoliyatini keng targʻib etish maqsadida oʻzbek, ingliz, arab tillarida faoliyat yuritadigan veb-sayt yaratish.	2020-yil dekabr	Oʻzbekiston xalqaro islom akademiyasi (R. Qosimov), Axborot texnologiyalari va kommunikatsiyalarini rivojlantirish vazirligi(Sh. Sadikov)
		2. Markaz veb-saytini Imom Moturidiy va uning izdoshlari ilmiy merosiga bagʻishlangan materiallar bilan boyitish.	muntazam
9.	Diniy taʼlim muassasalarining oʻquv dasturiga Imom Moturidiy taʼlimoti boʻyicha maxsus kurslar kiritish.	1. Chora-tadbirlar rejasini ishlab chiqish.	2020-yil sentabr	Oʻzbekiston musulmonlari idorasi (U. Alimov), Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov)
		2. Oʻquv dasturlarini ishlab chiqish.	2020-yil sentabr
		3. 2020/2021 oʻquv yilidan diniy taʼlim muassasalari oʻquv rejasiga kiritish.	2020-yil oktabr
II. Ilmiy-tadqiqot yoʻnalishida amalga oshiriladigan ishlar
10.	“Moturidiylik” maʼnaviy-maʼrifiy, ilmiy-adabiy choraklik jurnalini tashkil etish.	1. “Moturidiylik” maʼnaviy-maʼrifiy, ilmiy-adabiy jurnalini tashkil etish bilan bogʻliq chora-tadbirlarni amalga oshirish.	2020-yil dekabr	Oliy attestatsiya komissiyasi (A. Yusupov), Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov)
		2. Jurnalni nashr etish bilan bogʻliq moliyaviy xarajatlarni Markazga budjetdan ajratiladigan xarajatlar smetasiga kiritish.	2021-yil fevral
11.	Imom Moturidiy, Umar Nasafiy, Abu Muin Nasafiy, Abu Barakot Nasafiy kabi moturidiylik taʼlimoti ulamolarining hayoti va ilmiy merosiga oid xalqchil risolalar tayyorlash.	1. Ajdodlarimiz hayoti va ilmiy merosiga oid xalqchil risolalar tayyorlash boʻyicha Ijodiy guruhni tuzish.	2020-yil dekabr	Oʻzbekiston xalqaro islom akademiyasi (R. Qosimov), Abu Rayhon Beruniy nomidagi Sharqshunoslik instituti (B. Abduhalimov), Imom Buxoriy xalqaro ilmiy-tadqiqot markazi (Sh. Ziyodov)
		2. Risolalarni har bir hududga mos tarzda tayyorlash, tahrir qilish.	2021-yil mart
		3. Risolalarni nashr etish.	2021-yil may
12.	Imom Moturidiyning “Kitob at-tavhid” (Tavhid haqida kitob) asarini oʻzbek tiliga ilmiy-izohli tarjima qilish va nashr etish.	1. Xorijiy va mahalliy mutaxassislardan iborat tarjimonlar guruhini shakllantirish.	2020-yil sentabr	Oʻzbekiston xalqaro islom akademiyasi (R. Qosimov), Abu Rayhon Beruniy nomidagi Sharqshunoslik instituti (B. Abduhalimov), Toshkent islom instituti (U. Gʻofurov), Imom Buxoriy xalqaro ilmiy-tadqiqot markazi (Sh. Ziyodov)
		2. Ilmiy-izohli tarjimani tayyorlash, tahrir qilish.	2022-yil noyabr
		3. Asarni nashr etish choralarini koʻrish.	2022-yil dekabr
13.	Imom Moturidiyning “Taʼvilot al-Qurʼon” (Qurʼoni karim oyatlarining taʼvili) asarini oʻzbek tiliga ilmiy-izohli tarjima qilish va nashr etish.	1. Xorijiy va mahalliy mutaxassislardan iborat tarjimonlar guruhini shakllantirish.	2020-yil sentabr	Imom Buxoriy xalqaro ilmiy-tadqiqot markazi (Sh. Ziyodov), Oʻzbekiston xalqaro islom akademiyasi (R. Qosimov), Innovatsion rivojlanish vazirligi (I. Abduraxmonov), Abu Rayhon Beruniy nomidagi Sharqshunoslik instituti (B. Abduhalimov)
		2. Tarjimani amalga oshirish uchun davlat loyihasini ishlab chiqish va Innovatsion rivojlanish vazirligiga taqdim etish.	2021-yil yanvar
		3. Ilmiy-izohli tarjimani tayyorlash, tahrir qilish.	2021 — 2024-yillar
		4. Asarni nashr etish choralarini koʻrish.	2024-yil noyabr
14.	Saʼduddin Taftazoniyning “Sharhu aqoidi Nasafiya” (Nasafiyning Aqida asariga sharh) asarini oʻzbek tiliga ilmiy-izohli tarjima qilish.	1. Ijodiy guruhni shakllantirish.	2020-yil sentabr	Oʻzbekiston musulmonlari idorasi (U. Alimov), Oʻzbekiston xalqaro islom akademiyasi (R. Qosimov), Innovatsion rivojlanish vazirligi (I. Abduraxmonov), Din ishlari boʻyicha qoʻmita (A. Axmedov), Abu Rayhon Beruniy nomidagi Sharqshunoslik instituti (B. Abduhalimov)
		2. Tarjimani amalga oshirish uchun davlat loyihasini ishlab chiqish va Innovatsion rivojlanish vazirligiga taqdim etish.	2020-yil dekabr
		3. Ilmiy-izohli tarjimani tayyorlash, tahrir qilish.	2020 — 2023-yillar
		4. Asarni nashr etish choralarini koʻrish.	2023-yil avgust
15.	Kamoliddin ibn Bayoziyning aqida ilmiga oid “Ishorotul marom” (Maqsadga ishoralar) kitobini oʻzbek tiliga ilmiy-izohli tarjima qilish.	1. Ijodiy guruhni shakllantirish.	2020-yil sentabr	Imom Termiziy xalqaro ilmiy-tadqiqot markazi (U. Uvatov), Din ishlari boʻyicha qoʻmita (A. Axmedov), Abu Rayhon Beruniy nomidagi Sharqshunoslik instituti (B. Abduhalimov)
		2. Ilmiy-izohli tarjimani tayyorlash, tahrir qilish.	2020 — 2022-yillar
		3. Asarni nashr etish choralarini koʻrish.	2022-yil iyul
16.	Ibn Humomning “Kitobul musayara” asarini oʻzbek tiliga ilmiy-izohli tarjima qilish.	1. Ijodiy guruhni shakllantirish.	2020-yil sentabr	Oʻzbekistondagi Islom sivilizatsiyasi markazi (Sh. Minovarov), Din ishlari boʻyicha qoʻmita (A. Axmedov), Abu Rayhon Beruniy nomidagi Sharqshunoslik instituti (B. Abduhalimov)
		2. Ilmiy-izohli tarjimani tayyorlash, tahrir qilish.	2020 — 2022-yillar
		3. Asarni nashr etish choralarini koʻrish.	2022-yil avgust
17.	Dunyo qoʻlyozma fondlarida saqlanayotgan Imom Moturidiy va moturidiylik taʼlimotiga oid qoʻlyozma asarlarning elektron nusxalarini jamlash hamda ularning katalogini yaratish.	1. Xorijiy va mahalliy mutaxassislardan iborat ishchi guruhni shakllantirish.	2020-yil sentabr	Oʻzbekistonga oid xorijdagi madaniy boyliklarni tadqiq etish markazi (R. Baxodirov), Abu Rayhon Beruniy nomidagi Sharqshunoslik instituti (B. Abduhalimov), Oʻzbekiston xalqaro islom akademiyasi (R. Qosimov)
		2. Qoʻlyozmalarni aniqlash, roʻyxatini tuzish, elektron nusxalarini homiylik mablagʻlari asosida mamlakatimizga olib kelish choralarini koʻrish.	2021-yildan reja asosida
		3. Olib kelingan qoʻlyozmalarni tadqiq etish.	reja asosida
18.	Moturidiylik taʼlimotiga oid Umar Nasafiyning “Aqoid”, Usmon Oʻshiyning “Badʼul amoliy”, AbuBarakot Nasafiyning “Umda” kabi aqidaviy matnlarning kompleks tarjima va sharhini yaratish.	1. Tarjimonlar guruhini shakllantirish.	2020-yil sentabr	Oʻzbekiston xalqaro islom akademiyasi (R. Qosimov), Toshkent islom instituti (U. Gʻofurov)
		2. Tarjimani tayyorlash, izoh va sharhlar berish.	2020 — 2022-yillar
		3. Asarni nashr etish choralarini koʻrish.	2022-yil mart
19.	Moturidiylik taʼlimotiga oid ensiklopediya tayyorlash va nashr etish.	1. Ijodiy guruhni shakllantirish, chora-tadbirlar rejasini tuzish.	2020-yil sentabr	Abu Rayhon Beruniy nomidagi Sharqshunoslik instituti (B. Abduhalimov), Oʻzbekiston xalqaro islom akademiyasi (R. Qosimov), Imom Buxoriy xalqaro ilmiy-tadqiqot markazi (Sh. Ziyodov), Imom Termiziy xalqaro ilmiy-tadqiqot markazi (U. Uvatov)
		2. Maʼlumotlarni jamlash, umumlashtirish va tahrir qilish.	2020 — 2023-yillar
		3. Ensiklopediya tomlarini nashr etish.	reja asosida
20.	Moturidiylik taʼlimoti boʻyicha ilmiy tadqiqotlar (magistrlik, PhD, DSc) amalga oshirilishini qoʻllab-quvvatlash.	1. Chora-tadbirlar rejasini ishlab chiqish.	2020-yil sentabr	Oliy va oʻrta maxsus taʼlim vazirligi (I. Madjidov), Innovatsion rivojlanish vazirligi (I. Abduraxmonov), Oʻzbekiston Fanlar akademiyasi (B. Yuldashev), Oʻzbekiston xalqaro islom akademiyasi (R. Qosimov), Imom Buxoriy xalqaro ilmiy-tadqiqot markazi (Sh. Ziyodov), Imom Termiziy xalqaro ilmiy-tadqiqot markazi (U. Uvatov)
		2. Aqida masalalari bilan shugʻullanuvchi tadqiqotchi va magistrantlarning Markazda muntazam ravishda stajirovka oʻtashlarini tashkil etish.	reja asosida
		3. Tadqiqotchilar dissertatsiyalarining himoya oldi muhokamalarini Markazda tashkil qilish va shu asosda approbatsiya va boshqa himoya uchun tegishli hujjatlarni rasmiylashtirishda koʻmaklashish.	reja asosida
21.	Al-Azhar majmuasi tadqiqotchilari oʻrtasida Imom Moturidiy merosi boʻyicha tanlov oʻtkazish, gʻoliblarning Oʻzbekistonga sayohatini tashkil etish, mahalliy tadqiqotchilar uchun treninglar uyushtirish.	1. Tanlovning tashkiliy masalalarini Misr tomoni bilan kelishish.	2020-yil sentabr	Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov), Oʻzbekiston musulmonlari idorasi (U. Alimov), Tashqi ishlar vazirligi (A. Kamilov)
		2. Tanlovni oʻtkazish.	2021-yil oktabr
		3. Tanlov gʻoliblari tomonidan Oʻzbekistonlik tadqiqotchilar uchun seminar-treninglar tashkil etish.	reja asosida
22.	Jahonning yetakchi moturidiyshunos olimlari tomonidan Imom Moturidiyning hayoti va ilmiy merosiga bagʻishlangan yirik tadqiqotlarni oʻzbek tiliga tarjima qilish.	1. Tadbirlar rejasi va tarjimonlar guruhini shakllantirish.	2020-yil sentabr	Oʻzbekiston xalqaro islom akademiyasi (R. Qosimov), Abu Rayhon Beruniy nomidagi Sharqshunoslik instituti (B. Abduhalimov), Oʻzbekiston musulmonlari idorasi (U. Alimov), Imom Buxoriy xalqaro ilmiy-tadqiqot markazi (Sh. Ziyodov), Imom Termiziy xalqaro ilmiy-tadqiqot markazi (U. Uvatov)
		2. Imom Moturidiyning hayoti va ilmiy merosiga bagʻishlangan yirik tadqiqotlarni saralash.	2020-yil noyabr
		3. Tarjima ishlarini amalga oshirish va nashr etish.	reja asosida
III. Maʼnaviy-maʼrifiy targʻibot yoʻnalishida amalga oshiriladigan ishlar
23.	Ijtimoiy-maʼnaviy muhit ogʻir boʻlgan mahallalarda “Sogʻlom eʼtiqod asoslari”, “Aqidada adashmaylik”, “Imom Moturidiyning hayoti va ilmiy merosi”, “Moturidiylik taʼlimoti asoslari” mavzularida davra suhbatlari hamda uchrashuvlar tashkil etish.	1. Tadbirlar rejasi va targʻibotchilar guruhini shakllantirish.	2020-yil noyabr	Mahalla va oilani qoʻllab-quvvatlash vazirligi (R. Mamatov), Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov), Oʻzbekiston musulmonlari idorasi (U. Alimov)
		2. Targʻibot guruhi aʼzolari uchun oʻquv-seminarlar tashkil etish, targʻibot materiallarini tayyorlash.	2020-yil noyabr
		3. Targʻibot tadbirlarini yuqori saviyada oʻtkazish.	reja asosida
24.	Tele- va radiokanallar orqali Imom Moturidiy, Abu Muin Nasafiy, Nuriddin Sobuniy kabi yurtimiz allomalarining ibratli hayoti va boy ilmiy-maʼnaviy merosi haqida koʻrsatuvlar, davra suhbatlari va eshittirishlar tayyorlash.	1. Yurtimiz allomalarining ibratli hayoti va boy ilmiy-maʼnaviy merosi haqida koʻrsatuvlar, davra suhbatlari va eshittirishlar tashkil etish boʻyicha media reja ishlab chiqish.	2020-yil noyabr	Oʻzbekiston milliy teleradiokompaniyasi (A. Xadjayev), “Ziyo” media markazi (A. Muxtorov), Elektron ommaviy axborot vositalari milliy assotsiatsiyasi (F. Abduxoliqov)
		2. Media reja asosida koʻrsatuvlar, davra suhbatlari va eshittirishlarni tasvirga olish va qulay efir vaqtlarida namoyishini tashkil etish.	reja asosida
25.	Imom Moturidiy, Abu Muin Nasafiyning hayoti va ilmiy merosi haqida badiiy va hujjatli filmlar tayyorlash.	1. Ijodiy guruhni shakllantirish, chora-tadbirlar rejasini ishlab chiqish.	2020-yil noyabr	“Oʻzbekkino” milliy agentligi (F. Abduxoliqov), Oʻzbekiston musulmonlari idorasi (U. Alimov), Oʻzbekiston xalqaro islom akademiyasi (R. Qosimov)
		2. Filmlar ssenariylarini ishlab chiqish.	2021-yil aprel
		3. Tasvirga olish ishlarini tashkil etish.	reja asosida
		4. Filmlarning taqdimotlarini oʻtkazish, respublika boʻyicha namoyishlarini yoʻlga qoʻyish.	reja asosida
		5. Badiiy va hujjatli filmlar tayyorlash bilan bogʻliq moliyaviy xarajatlar har yili Davlat budjetidan “Oʻzbekkino” milliy agentligiga filmlar tayyorlash uchun ajratiladigan mablagʻlar hisobidan qoplanadi.	reja asosida
26.	Imom Moturidiy va moturidiylik taʼlimotini oʻrganish va keng targʻib etishni ragʻbatlantirish maqsadida diniy taʼlim muassasalarida musobaqa, viktorina va tanlovlar oʻtkazish.	1. Ishchi guruhni shakllantirish, chora-tadbirlar rejasini ishlab chiqish.	2020-yil oktabr	Oʻzbekiston musulmonlari idorasi (U. Alimov), Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov)
		2. Tadbirlarni yuqori saviyada tashkil etish.	reja asosida
27.	Imom Moturidiy hayoti va ilmiy merosi haqida badiiy asarlar yaratishni ragʻbatlantirish.	1. Imom Moturidiy va moturidiylik taʼlimoti davomchilari sanalgan olimlar haqida badiiy asarlar yaratish boʻyicha tanlov eʼlon qilish.	2020-yil oktabr	Oʻzbekiston Yozuvchilar uyushmasi (S. Saidov), Oʻzbekiston musulmonlari idorasi (U. Alimov), Din ishlari boʻyicha qoʻmita (A. Axmedov)
		2. Tanlovda ishtirok etish uchun yozuvchilar, shoirlar, yosh ijodkorlar va aholining keng qatlamini jalb qilish.	2021-yil may-iyun
		3. Tanlov natijalari boʻyicha tanlangan asarlarni nashr etish ishlarini amalga oshirish.	2021-yil oktabr
28.	Rasmiy internet saytlari, ijtimoiy tarmoqlarda aqida masalalariga oid savol-javobli videoroliklar, chiqishlar eʼlon qilib borish.	1. Ishchi guruhni shakllantirish, chora-tadbirlar rejasini ishlab chiqish.	2020-yil oktabr	Oʻzbekiston musulmonlari idorasi (U. Alimov), Oʻzbekiston xalqaro islom akademiyasi (R. Qosimov), Din ishlari boʻyicha qoʻmita (A. Axmedov)
		2. Aqidaga doir masalalarni saralab, savollar shakllantirish va bunga mutaxassislarni jalb etgan holda javoblar tayyorlash.	2020-yil noyabr
		3. Savol-javoblarni suratga olish va 2-3 daqiqalik videorolik va chiqishlar tashkil qilish.	reja asosida
		4. Tayyor boʻlgan rolik va chiqishlarni rasmiy saytlar va ijtimoiy tarmoqlarda muntazam ravishda eʼlon qilib borish.	reja asosida
29.	Juma tezislariga dolzarb aqidaviy masalalarning moturidiylik taʼlimotidagi talqini boʻyicha mavzular kiritish.	1. Dolzarb aqidaviy masalalar boʻyicha juma tezislariga kiritiladigan mavzular roʻyxatini shakllantirish.	2020-yil sentabr	Oʻzbekiston musulmonlari idorasi (U. Alimov), Din ishlari boʻyicha qoʻmita (A. Axmedov), Oʻzbekiston xalqaro islom akademiyasi (R. Qosimov)
		2. Mavzular asosida juma tezislarini tayyorlash.	2020-yil sentabr
		3. Juma tezislari asosida namozxonlarga yetkazish.	reja asosida

(Qonun hujjatlari maʼlumotlari milliy bazasi, 12.08.2020-y., 07/20/4802/1161-son; 22.04.2021-y., 06/21/6212/0358-son; Qonunchilik maʼlumotlari milliy bazasi, 09.11.2021-y., 06/21/3/1037-son; 24.05.2023-y., 06/23/75/0292-son; 11.09.2025-y., 06/25/164/0821-son)