toggle_night_mode
Oʻzbekiston Respublikasi Vazirlar Mahkamasining
qarori
2025-yilda Oʻzbekistonda yoshlar oʻrtasidagi IV yozgi Osiyo oʻyinlarini oʻtkazishga tayyorgarlik koʻrish chora-tadbirlari toʻgʻrisida
Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid davlat dasturi toʻgʻrisida” 2020-yil 2-martdagi PF-5953-son Farmoniga muvofiq 2025-yilda Oʻzbekistonda yoshlar oʻrtasidagi yozgi Osiyo oʻyinlarini oʻtkazishga tayyorgarlik koʻrish maqsadida Vazirlar Mahkamasi qaror qiladi:
1. Osiyo Olimpiya kengashining (keyingi oʻrinlarda — OOK) 2019-yil 28-sentabrda Doxa shahrida (Qatar) boʻlib oʻtgan 73-Ijroqoʻm yigʻilishida 2025-yilda yoshlar oʻrtasidagi IV yozgi Osiyo oʻyinlarini Toshkent shahrida (keyingi oʻrinlarda — “Toshkent — 2025” yozgi Osiyo oʻyinlari) oʻtkazishga rozilik bildirish toʻgʻrisida qaror qabul qilinganligi maʼlumot uchun qabul qilinsin.
2. Quyidagilar:
“Toshkent — 2025” yozgi Osiyo oʻyinlarini oʻtkazishni tashkil etish boʻyicha tashkiliy qoʻmita (keyingi oʻrinlarda — Tashkiliy qoʻmita) tarkibi 1-ilovaga;
“Toshkent — 2025” yozgi Osiyo oʻyinlarini yuqori saviyada oʻtkazishga tayyorgarlik koʻrish boʻyicha chora-tadbirlar dasturi 2-ilovaga muvofiq tasdiqlansin.
3. Oʻzbekiston Milliy olimpiya qoʻmitasi hamda Oʻzbekiston Respublikasi Jismoniy tarbiya va sport vazirligining ilgʻor davlatlar tajribasidan kelib chiqib, Osiyo oʻyinlarini yuqori saviyada tashkil etish va oʻtkazish bilan bogʻliq vazifalarni yagona organ orqali tizimli amalga oshirish maqsadida yuridik maqomga ega boʻlgan Oʻzbekiston Milliy olimpiya qoʻmitasi huzurida “Toshkent — 2025” yozgi Osiyo oʻyinlarini oʻtkazish direksiyasini (keyingi oʻrinlarda — Direksiya) tashkil etish toʻgʻrisidagi taklifi maʼqullansin.
4. Quyidagilar Direksiyaning asosiy vazifalari etib belgilansin:
Oʻzbekistonda Osiyo oʻyinlarini oʻtkazish boʻyicha OOK bilan Oʻzbekiston Respublikasi Hukumati oʻrtasida shartnomalar, kelishuvlar, memorandumlar va kafolat xatlarini imzolash tadbirlarini tashkil etish;
OOK va sport turlari boʻyicha Osiyo sport federatsiyalari (uyushmalari) bilan oʻzaro hamkorlik qilish, OOK tomonidan tasdiqlangan Osiyo oʻyinlariga tayyorgarlikning bosh rejasini tuzish, Osiyo oʻyinlarining dasturini hamda milliy qadriyatlarimizdan kelib chiqib, “Toshkent — 2025” Osiyo oʻyinlarining logotipini ishlab chiqish;
Osiyo oʻyinlarini yuqori saviyada tashkil etish va oʻtkazish boʻyicha xalqaro va respublika miqyosidagi tadbirlar hamda uning doirasida koʻrgazmalar, konferensiyalar, ilmiy-amaliy anjumanlar va boshqa tadbirlarni oʻtkazish;
mavjud infratuzilmalar quvvatini tahlil qilish asosida Osiyo oʻyinlari oʻtkaziladigan sport inshootlari va boshqa obyektlarni OOK va xalqaro sport federatsiyalari talablariga muvofiq tayyorlash, ularni zarur boʻladigan sport, tibbiy, texnik va boshqa jihozlar bilan taʼminlash;
Osiyo oʻyinlarini oʻtkazish bilan bogʻliq boʻlgan barcha masalalarni muvofiqlashtirish va zarur hollarda Tashkiliy qoʻmita va manfaatdor vazirlik va idoralarga takliflar kiritish;
televizion koʻrsatuvlarni taqdim etish va texnik tayyorgarlik, efirga uzatish huquqlari himoyasi, oʻyinlar, uning tantanali ochilish hamda yopilish marosimlariga tayyorgarlik koʻrish;
Osiyo oʻyinlari gʻoyalari va qadriyatlarini targʻib etishga qaratilgan reklama tadbirlarini oʻtkazish, axborot bilan taʼminlash, marketing dasturlarini amalga oshirish, Osiyo oʻyinlariga homiylarni jalb qilish;
Osiyo oʻyinlariga tayyorgarlik ishlarining borishi ommaviy axborot vositalari orqali, shu jumladan Internet jahon axborot tarmogʻida keng yoritilishini tashkil etish;
Osiyo oʻyinlarini oʻtkazish bilan bogʻliq boʻlgan barcha sarf-xarajatlar roʻyxatini shakllantirish;
Osiyo oʻyinlariga tayyorgarlikning borishi va amalga oshirilayotgan ishlar toʻgʻrisida Tashkiliy qoʻmitaga muntazam ravishda hisobot taqdim etib borish.
5. Oʻzbekiston Milliy olimpiya qoʻmitasi:
bir oy muddatda Direksiyaning ustavini belgilangan tartibda tasdiqlasin va uning davlat roʻyxatidan oʻtkazilishini taʼminlasin;
2021-yil 1-aprelga qadar Oʻzbekiston Respublikasi Jismoniy tarbiya va sport vazirligi hamda Moliya vazirligi bilan birgalikda Direksiyaning mablagʻlarini shakllantirish va ulardan foydalanish tartibi toʻgʻrisidagi nizomni, Direksiyaning tuzilmasini, shtatlar jadvalini va xodimlarning lavozim maoshlari miqdorini belgilangan tartibda tasdiqlash uchun Vazirlar Mahkamasiga kiritsin.
6. Tashkiliy qoʻmitaga (A.A. Abduxakimov):
2021-yil 1-yanvarga qadar OOK rahbariyati boshchiligidagi delegatsiyaning Toshkent shahriga tashrifini tashkillashtirish boʻyicha muzokaralar olib borish;
Oʻzbekistonda Osiyo oʻyinlarini oʻtkazish boʻyicha OOK bilan Oʻzbekiston Respublikasi Hukumati oʻrtasida shartnomalar, kelishuvlar, memorandumlar va kafolat xatlarini imzolash;
Osiyo oʻyinlarini yuqori saviyada tashkil etish boʻyicha barcha vazirlik va idoralar ishini muvofiqlashtirib borish hamda ularning hisobotlarini eshitish;
Osiyo oʻyinlarini oʻtkazishga tayyorgarlik koʻrish boʻyicha barcha masalalarni va yuzaga keladigan muammolarni operativ hal etish vazifalari yuklansin.
Oldingi tahrirga qarang.
7. Belgilansinki, Xalqaro olimpiya qoʻmitasi, OOK, xalqaro va Osiyo federatsiyalari vakillarining tashrifi hamda Tashkiliy qoʻmita aʼzolarining xizmat safari bilan bogʻliq barcha xarajatlarni, shu jumladan, aviachiptalar, ichki transport, yashash va ovqatlanish xarajatlarini qoplash Oʻzbekiston Respublikasi Jismoniy tarbiya va sport vazirligining sport va ommaviy jismoniy tarbiya tadbirlarining kalendar rejasiga muvofiq har yili ajratiladigan budjet mablagʻlari doirasida, Oʻzbekiston Milliy Olimpiya qoʻmitasi mablagʻlari hamda yuridik va jismoniy shaxslarning homiylik xayriyalari mablagʻlari va qonunchilik hujjatlarida taqiqlanmagan boshqa manbalar hisobidan amalga oshiriladi.
(7-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
Oldingi tahrirga qarang.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov hamda Oʻzbekiston Milliy olimpiya qoʻmitasi raisi R.M. Shaabduraxmonov zimmasiga yuklansin.
(8-band Oʻzbekiston Respublikasi Vazirlar Mahkamasining 2021-yil 16-avgustdagi 524-sonli qarori tahririda — Qonunchilik maʼlumotlari milliy bazasi, 17.08.2021-y., 09/21/524/0802-son)
Oʻzbekiston Respublikasining Bosh vaziri A. ARIPOV
Toshkent sh.,
2020-yil 7-avgust,
468-son
Vazirlar Mahkamasining 2020-yil 7-avgustdagi 468-son qaroriga
1-ILOVA
“Toshkent — 2025” yozgi Osiyo oʻyinlarini oʻtkazishni tashkil etish boʻyicha tashkiliy qoʻmita
TARKIBI
Oldingi tahrirga qarang.

1.

A.A. Abduxakimov

—

Oʻzbekiston Respublikasi Bosh vazirining oʻrinbosari — turizm va sport vaziri, Tashkiliy qoʻmita raisi

2.

U.A. Azamov

—

turizm va sport vazirining birinchi oʻrinbosari, Tashkiliy qoʻmita raisining oʻrinbosari

3.

R.M. Shaabduraxmonov

—

Oʻzbekiston Milliy olimpiya qoʻmitasi raisi, Tashkiliy qoʻmita raisining oʻrinbosari

4.

J.A. Artikxodjayev

—

Toshkent shahar hokimi, Tashkiliy qoʻmita raisining oʻrinbosari

5.

A.K. Shadmanov

—

sogʻliqni saqlash vaziri

6.

T.A. Ishmetov

—

moliya vaziri

7.

P.R. Bobojonov

—

ichki ishlar vaziri

8.

R.M. Djurayev

—

Milliy gvardiya qoʻmondoni

9.

S.E. Xusanov

—

Oʻzbekiston Respublikasi Davlat xavfsizlik xizmati raisi oʻrinbosari — Chegara qoʻshinlari qoʻmondoni

10.

B.I. Zakirov

—

qurilish vaziri

11.

Sh.M. Sadikov

—

axborot texnologiyalari va kommunikatsiyalarini rivojlantirish vaziri

12.

I.U. Madjidov

—

oliy va oʻrta maxsus taʼlim vaziri

13.

O.A. Nazarbekov

—

madaniyat vaziri

14.

M.B. Azimov

—

Davlat bojxona qoʻmitasi raisi

15.

Sh.D. Kudbiyev

—

Davlat soliq qoʻmitasi raisi

16.

I.R. Maxkamov

—

transport vazirining birinchi oʻrinbosari v.b.

17.

A.Q. Karimov

—

turizm va sport vaziri oʻrinbosari

18.

B.Q. Yusupaliyev

—

Oʻzbekiston Respublikasi bosh sanitariya vrachi

19.

O.A. Kasimov

—

Oʻzbekiston Milliy olimpiya qoʻmitasi bosh kotibi

20.

Sh.I. Asadov

—

tashqi ishlar vazirining oʻrinbosari

21.

U.A. Xusanov

—

“Uzbekistan Airways” AJ boshqaruvi raisining birinchi oʻrinbosari v.b

22.

R.M. Ismailov

—

“Uzbekistan Airports” AJ boshqaruvi raisi v.b.

23.

A.D. Xadjayev

—

Oʻzbekiston milliy teleradiokompaniyasi raisi

24.

A.K. Kuchimov

—

Oʻzbekiston Milliy axborot agentligi bosh direktori

25.

R.A. Talipov

—

Vazirlar Mahkamasining Turizm, sport, madaniyat va ommaviy kommunikatsiyalar masalalari kotibiyati bosh mutaxassisi

26.

Lavozimiga koʻra

—

Sport turlari boʻyicha federatsiya va assotsiatsiyalar (uyushmalar) raislari (rais oʻrinbosarlari, bosh kotiblari)

27.

Lavozimiga koʻra

—

“Toshkent — 2025” yozgi Osiyo oʻyinlarini oʻtkazish direksiyasi direktori, Tashkiliy qoʻmita kotibi

Izoh. Tashkiliy qoʻmita aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.
(1-ilova Oʻzbekiston Respublikasi Vazirlar Mahkamasining 2021-yil 16-avgustdagi 524-sonli qarori tahririda — Qonunchilik maʼlumotlari milliy bazasi, 17.08.2021-y., 09/21/524/0802-son)
Vazirlar Mahkamasining 2020-yil 7-avgustdagi 468-son qaroriga
2-ILOVA
“Toshkent — 2025” yozgi Osiyo oʻyinlarini yuqori saviyada oʻtkazishga tayyorgarlik koʻrish boʻyicha
ChORA-TADBIRLAR DASTURI

T/r

Tadbirlar nomi

Amalga oshirish mexanizmi

Bajarish muddati

Masʼul ijrochilar

I. Tashkiliy masalalar

1.

Osiyo Olimpiya Kengashi (keyingi oʻrinlarda — OOK) rahbariyati boshchiligidagi delegatsiyaning Toshkent shahriga tashrifini amalga oshirish.

1. OOK delegatsiyasining Toshkentga tashrifini tashkillashtirish boʻyicha muzokaralar olib borish.

2. Oʻzbekistonda 2025-yil yoshlar oʻrtasida IV yozgi Osiyooʻyinlarini oʻtkazish uchun rasmiy hujjat imzolanishi (shartnoma, kelishuv memorandumi) tadbirini oʻtkazish.

3. Oʻzbekiston Respublikasi Prezidenti hamda OOK rahbari oʻrtasidagi oliy darajadagi uchrashuvni tashkil etish.

2021-yil

1-yanvarga qadar

Tashkiliy qoʻmita, Milliy olimpiya qoʻmitasi, Jismoniy tarbiya va sport vazirligi

2.

Oʻzbekistonda 2025-yil yoshlar oʻrtasida IV yozgi Osiyo oʻyinlarini (keyingi oʻrinlarda — Osiyo oʻyinlari) oʻtkazish uchun hujjatlar toʻplamini OOKga taqdim etish uchun tayyorlash.

Osiyo oʻyinlarini OOK Konstitutsiyasi asosida oʻtkazilishi boʻyicha:

1. Oʻzbekiston Respublikasi Hukumati;

2. Toshkent shahar hokimi;

3. Oʻzbekiston Respublikasi Davlat bojxona qoʻmitasi;

4. Oʻzbekiston Respublikasi Davlat xavfsizlik xizmati Chegara qoʻshinlari;

5. Oʻzbekiston Respublikasi Davlat soliq qoʻmitasi rahbarlari tomonidan kafolat xatlarini joʻnatish.

2021-yil

1-yanvarga qadar

Milliy olimpiya qoʻmitasi, Jismoniy tarbiya va sport vazirligi, sport turlari boʻyicha federatsiyalar (uyushmalar), Toshkent shahar hokimligi,

Davlat bojxona qoʻmitasi,

DXX Chegara qoʻshinlari,

Davlat soliq qoʻmitasi

3.

Xalqaro olimpiya qoʻmitasi, OOK hamda xalqaro va Osiyo federatsiyalari vakillarining Oʻzbekistonga tashriflarini tashkil etish.

1. Xalqaro olimpiya qoʻmitasi, OOK hamda xalqaro va Osiyo federatsiyalari vakillarining Oʻzbekistonga tashrifi boʻyicha muzokaralar olib borish.

2. Xalqaro olimpiya qoʻmitasi, OOK hamda xalqaro va Osiyo federatsiyalari vakillarining Oʻzbekistonga tashrifi boʻyicha kutib olish dasturini tayyorlash.

3. Xalqaro olimpiya qoʻmitasi, OOK hamda xalqaro va Osiyo federatsiyalari vakillarining tashrifi bilan bogʻliq barcha xarajatlarni,
shu jumladan, aviachiptalar, ichki transport, yashash va ovqatlanish xarajatlarini qoplash.

2020 — 2025-yillar

kelishuvga muvofiq

Tashkiliy qoʻmita, Milliy olimpiya qoʻmitasi, Jismoniy tarbiya va sport vazirligi, sport turlari boʻyicha federatsiyalar (uyushmalar)

4.

Xalqaro olimpiya qoʻmitasi, OOK hamda xalqaro va Osiyo federatsiyalarivakillariga Osiyo oʻyinlari oʻtkaziladigan obyektlarni koʻrsatish.

1. Toshkent shahridagi obyeklarni tayyorlash.

2. Qoʻshimcha tarzda koʻriladigan obyektlar zaxirasini tayyorlash.

OOK tashrifi davomida

Tashkiliy qoʻmita, Milliy olimpiya qoʻmitasi, Jismoniy tarbiya va sport vazirligi, sport turlari boʻyicha federatsiyalar (uyushmalar)

5.

Oʻzbekiston Milliy olimpiya qoʻmitasi huzurida “Toshkent — 2025” yozgi Osiyo oʻyinlarini oʻtkazish direksiyasini tashkil etish

1. Direksiya mablagʻlarini shakllantirish va ulardan foydalanish tartibi toʻgʻrisidagi nizomni, direksiya tuzilmasini, shtatlar jadvalini va xodimlarning lavozim maoshlari miqdorini belgilangan tartibda tasdiqlash uchun Vazirlar Mahkamasiga kiritish.

2. Direksiyasining ustavini tasdiqlash va davlat roʻyxatidan oʻtkazish.

2021-yil

1-aprel

Milliy olimpiya qoʻmitasi Jismoniy tarbiya va sport vazirligi, Moliya vazirligi

6.

Osiyo oʻyinlarida boʻlib oʻtadigan sport turlarini aniqlash

1. Osiyo oʻyinlarida majburiy sport turlarini anaqlash.

2. Respublikamizda rivojlangan sport turlarini dasturga kiritish.

3. Medallar olish imkoni bor sport turlarini dasturga kiritish.

2021-yil

1-may

Tashkiliy qoʻmita, Milliy olimpiya qoʻmitasi, Jismoniy tarbiya va sport vazirligi, sport turlari boʻyicha federatsiyalar (uyushmalar)

7.

Osiyo oʻyinlarini oʻtkazish jarayoniga tayyorgarlik koʻrish

1. Xalqaro sport federatsiyalari bilan musobaqa oʻtkazish tizimini tanlab olish.

2. Osiyo oʻyinlarining sport turlari boʻyicha musobaqalarini oʻtkazish uchun musobaqa hakamlari tizimlariga buyurtma berish.

2022-yil

1-may

Milliy olimpiya qoʻmitasi, Jismoniy tarbiya va sport vazirligi, sport turlari boʻyicha federatsiyalar (uyushmalar)

II. Oʻzbekistonda yoshlar oʻrtasida yozgi Osiyo oʻyinlarini oʻtkazish boʻyicha xorijiy tajribani oʻrganish

8.

Yaponiyaning Tokio shahrida boʻlib oʻtadigan Olimpiya oʻyinlari, Xitoyning Shantau va Xanchjou shahrida boʻlib oʻtadigan yoshlar va kattalar oʻrtasidagi yozgi Osiyo oʻyinlarini tashkilllashtirish tajribasini oʻrganish

2021-yil Yaponiyaning Tokio shahrida yozgi Olimpiya oʻyinlari, 2021 va 2022-yillarda Xitoyning Shantau va Xanchjou shahrida boʻlib oʻtadigan yoshlar va kattalar oʻrtasidagi yozgi Osiyo oʻyinlarini tashkillashtirish tajribasini oʻrganish. Bunda:

Osiyo oʻyinlarini oʻtkazish tajribasini oʻrganish boʻyicha vazirlik
va idoralararo ishchi guruh (keyingi oʻrinlarda — ishchi guruh) tarkibini shakllantirish va Vazirlar Mahkamasiga tasdiqlash uchun kiritish.

Oʻrganilgan tajriba natijalarini tahlil qilish va Oʻzbekiston Respublikasida Osiyo oʻyinlarini oʻtkazishda sam�rali foydalanish.

Tokio, Shantau va Xangjou Olimpiya va Osiyo oʻyinlari tashkiliy qoʻmitalari bilan uchrashuvlar tashkil qilish.

2021-2022-yillar

Tashkiliy qoʻmita, Milliy olimpiya qoʻmitasi,

Jismoniy tarbiya

va sport vazirligi,

Tashqi ishlar

vazirligi,

Sport turlari boʻyicha federatsiyalar (uyushmalar),

tegishli vazirliklar
va idoralar

III. Oʻzbekistonda yoshlar oʻrtasida yozgi Osiyo oʻyinlarini oʻtkazish boʻyicha respublikada mavjud boʻlgan sport inshootlari, logistika, transport va mehmonxona infratuzilmalarini oʻrganish va yangilarini barpo etish boʻyicha takliflar tayyorlash, yaratiladigan infratuzilma orqali kelajakda Oʻzbekistonda sport turizmini rivojlantirish

9.

Toshkent shahri markaziy yoʻllarini taʼmirlash boʻyicha taklif tayyorlash.

Ishchi guruhini shakllantirgan holda amalga oshirilishi zarur boʻlgan chora-tadbirlar va ularni amalga oshirish xarajatlari boʻyicha Vazirlar Mahkamasiga aniq takliflar kiritish.

2021-yil

1-may

Transport vazirligi huzuridagi Avtomobil yoʻllari qoʻmitasi,

Toshkent shahar hokimligi

10.

Toshkent shahrida mavjud boʻlgan sport inshootlari, logistika, transport, mehmonxona infratuzilmalari quvvatlarini tahlil qilish va chet el tajribasini oʻrgangan holda yirik Osiyo oʻyinlarini oʻtkazish uchun talab etiladigan tegishli qoʻshimcha infratuzilmalar va obyektlar roʻyxatini shakllantirish, ularning qurilishi hajmlari va qiymatlarini aniqlash.

1. Mavjud infratuzilmalar quvvatini oʻrganish.

2. Oʻrganish asosida qoʻshimcha infratuzilmalar va ularni yaratish boʻyicha Vazirlar Mahkamasiga aniq takliflar kiritish.

2021-y�l

1-may

Tashkiliy qoʻmita, Jismoniy tarbiya va sport vazirligi,

Milliy olimpiya qoʻmitasi,

Qurilish vazirligi, Iktisodiy taraqqiyot va kambagʻallikni qisqartirish vazirligi,

Moliya vazirligi, Transport vazirligi,

Turizmni rivojlantirish davlat qoʻmitasi, AJ “Uzbekistan Airaports”, AJ “Uzbekistan Airways”, Toshkent shahar hokimligi, manfaatdor vazirlik va idoralar

12.

Oʻzbekiston Respublikasi Prezidentining “Oʻzbekistonda 2025-yil yoshlar oʻrtasida IV yozgi Osiyo oʻyinlarini yuqori saviyada oʻtkazish chora-tadbirlari toʻgʻrisida”gi qarori loyihasini ishlab chiqish.

Oʻzbekiston Respublikasi Prezidentining tegishli qarori loyihasini ishlab chiqish va Vazirlar Mahkamasiga kiritish.

2021-yil

1-sentabr

Jismoniy tarbiya va sport vazirligi,

Milliy olimpiya qoʻmitasi,

manfaatdor vazirliklar va idoralar

13.

Osiyo oʻyinlariga tayyorgarlik jarayonlarini borishi toʻgʻrisida ommaviy axborot vositalarida keng yoritish.

1. Osiyo oʻyinlariga tayyorgarlik jarayonlarini borishi toʻgʻrisida roliklar tayyorlash;

2. Turli koʻrsatuvlar va dasturlar tashkil etish.

2021-yildan boshlab

Oʻzbekiston milliy teleradiokompaniyasi


(Qonun hujjatlari maʼlumotlari milliy bazasi, 08.08.2020-y., 09/20/468/1148-son; Qonunchilik maʼlumotlari milliy bazasi, 17.08.2021-y., 09/21/524/0802-son; 05.04.2022-y., 09/22/153/0266-son)