Oʻzbekiston Respublikasi Prezidentining “Oʻzbekiston Respublikasida notariat tizimini tubdan isloh qilish chora-tadbirlari toʻgʻrisida” 2019-yil 9-sentabrdagi PF-5816-son Farmoni ijrosini taʼminlash hamda xususiy amaliyot bilan shugʻullanuvchi notariuslarning moddiy-texnik bazasini mustahkamlash orqali aholiga sifatli va uzluksiz notarial xizmatlar koʻrsatilishini taʼminlash maqsadida Vazirlar Mahkamasi qaror qiladi:

1. Belgilansinki:

xususiy amaliyot bilan shugʻullanuvchi notariuslarga Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalariga (keyingi oʻrinlardahududiy adliya organlari deb yuritiladi) operativ boshqaruv huquqi asosida biriktirilgan hamda davlat notarial idoralari notariuslari foydalanuvida boʻlgan bino va inshootlarni ijaraga berish, shuningdek, idora anjomlari, mebellar, temir shkaf, stellaj, seyf, kompyuter, orgtexnika vositalari va boshqa vositalarni (keyingi oʻrinlardainventarlar deb ataladi) sotish hududiy adliya organlari hamda xususiy amaliyot bilan shugʻullanuvchi notariuslar oʻrtasida qonunchilik hujjatlarida belgilangan tartibda amalga oshiriladi;

xususiy amaliyot bilan shugʻullanish istagini bildirgan davlat notarial idoralari notariuslari, ushbu davlat notarial idoralari notariuslari foydalanuvida boʻlgan bino va inshootlarni ijaraga olishda boshqa xususiy amaliyot bilan shugʻullanuvchi notariuslarga nisbatan ustunlikka ega boʻladi. Bunda, davlat notarial idoralari notariuslari, bino va inshootlarni ijaraga olishni yozma ravishda rad etgan taqdirda yoki ikki oy davomida ustunlik huquqidan foydalanmaganda ushbu bino va inshootlar hududiy adliya organlariga biriktirilmagan binoda faoliyat koʻrsatayotgan boshqa xususiy amaliyot bilan shugʻullanuvchi notariuslarga ijaraga beriladi;

davlat notarial idorasi notariusiga biriktirilgan inventarlar ularni sotib olish istagini bildirgan xususiy amaliyot bilan shugʻullanuvchi notariuslarga balans qiymatida sotiladi.

2. Bino va inshootlarni ijaraga berish hamda inventarlarni sotishdan tushadigan mablagʻlar budjetdan tashqari Adliya organlari va muassasalarini rivojlantirish jamgʻarmasiga yoʻnaltiriladi hamda davlat notarial idoralarini, adliya organlari va muassasalarini rivojlantirish uchun qonunchilik hujjatlarida belgilangan tartibda sarflanadi.

3. Bino va inshootlarni ijaraga berishda Vazirlar Mahkamasining 2009-yil 8-apreldagi 102-son qarori bilan tasdiqlangan Davlat mulkini ijaraga berish tartibi toʻgʻrisidagi nizomning mazkur qarorga zid kelmaydigan qoidalari amal qiladi.

4. Bino va inshootlar xususiy amaliyot bilan shugʻullanuvchi notariuslar tomonidan ijaraga olinmagan hollarda ularda davlat notarial idoralari notariuslarini joylashtirilishi, shuningdek, Oʻzbekiston Respublikasi Adliya vazirligi bilan kelishilgan holda hududiy adliya organlari tomonidan qonunchilik hujjatlarida belgilangan tartibda foydalanilishi yoki ijaraga berilishi mumkin.

5. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov va Oʻzbekiston Respublikasi Davlat aktivlarini boshqarish agentligi direktori S.X. Bekenov zimmasiga yuklansin.