“Toshkent traktor zavodi” ishlab chiqarish birlashmasi ishlab chiqarishini boshqarishni takomillashtirish va qishloq xoʻjaligi ishlab chiqarishini zamonaviy traktorlar bilan taʼminlash uchun zarur shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, “Oʻzqishloqxoʻjalikmash-xolding” xolding kompaniyasi, “Toshkent traktor zavodi” ishlab chiqarish birlashmasining “Toshkent traktor zavodi” ishlab chiqarish birlashmasini davlat-aksionerlik jamiyatiga aylantirish toʻgʻrisidagi taklifi qabul qilinsin.

2. “Toshkent traktor zavodi” davlat-aksionerlik jamiyati (“TTZ” DAJ) aksiyalari paketini quyidagi ulushlarda taqsimlashga rozilik berilsin.

40 foizi — davlat ulushi, aksiyalarning ushbu paketi Vazirlar Mahkamasining “Oʻzqishloqxoʻjalikmash-xolding” xolding kompaniyasini tashkil etish toʻgʻrisida” 1996-yil 31-yanvardagi 45-son qaroriga muvofiq “Oʻzqishloqxoʻjalikmash-xolding” xolding kompaniyasining ustav fondiga oʻtkaziladi;

15 foizi mehnat jamoasiga beriladi, shu jumladan ularning bir qismi — aksiyalashtirish toʻgʻrisidagi qonun hujjatlarida nazarda tutilgan imtiyozlar hisobiga tekin beriladi;

3 foizi — “Oʻzsanoatqurilishbank” ulushi;

5 foizi — “Oʻzqishloqxoʻjaliktaʼminottuzatish” davlat-kooperativ qoʻmitasi ulushi;

37 foizi — yuridik va jismoniy shaxslarga, shu jumladan xorijiy yuridik va jismoniy shaxslarga erkin sotiladigan ulush.

3. Belgilab qoʻyilsinki, “Toshkent traktor zavodi” davlat-aksionerlik jamiyati:

yuridik shaxs hisoblanadi, ochiq turdagi davlat-aksionerlik jamiyati shaklida taʼsis etiladi va “Oʻzqishloqxoʻjalikmash-xolding” xolding kompaniyasi tarkibiga kiradi;

oʻz faoliyatini Oʻzbekiston Respublikasining amaldagi qonun hujjatlari va jamiyatning taʼsis hujjatlari asosida amalga oshiradi;

boshlangʻich ustav fondini davlat mulki, “Toshkent traktor zavodi” ishlab chiqarish birlashmasi mehnat jamoasi mulki hamda “Oʻzsanoatqurilishbank” va “Oʻzqishloqxoʻjaliktaminottuzatish” davlat-kooperativ qoʻmitasi pul mablagʻlari hisobiga 1,5 mlrd. soʻm miqdorida shakllantiradi;

“Toshkent traktor zavodi” ishlab chiqarish birlashmasi tomonidan ilgari tuzilgan barcha shartnomalar va qabul qilingan majburiyatlar boʻyicha javob beradi.

4. Quyidagilar “Toshkent traktor zavodi” davlat-aksionerlik jamiyatining asosiy vazifalari va faoliyat yoʻnalishlari etib belgilansin:

yuqori unumli qishloq xoʻjaligi texnikasi uchun raqobatbardoshli traktorlar yaratish va ishlab chiqarish, xalq isteʼmol tovarlari ishlab chiqarishni hamda uning turlarini koʻpaytirish;

yetakchi xorijiy firmalar va kompaniyalar bilan qishloq xoʻjaligi texnikasini yaratish, ishlab chiqarish, sotish hamda ularga servis xizmati koʻrsatish boʻyicha zamonaviy ishlab chiqarishlar va qoʻshma korxonalar tashkil etish;

xoʻjalik faoliyatini marketing, ishlab chiqarilgan mahsulotni sotish bozorini kengaytirishni, eksportga mahsulot yetkazib berishni koʻpaytirishni taʼminlash asosida amalga oshirish;

“Oʻzqishloqxoʻjalikmash-xolding” kompaniyasi bilan birgalikda innovatsiya faoliyatini amalga oshirish, chet el investitsiyalarini jalb etish.

5. “Toshkent traktor zavodi” davlat-aksionerlik jamiyati boshqaruv organlarining, tashkiliy tuzilmasiga, ijro etuvchi apparati tuzilmasiga 1, 2-ilovalarga muvofiq rozilik berilsin.

Belgilab qoʻyilsinki, “Toshkent traktor zavodi” davlat-aksionerlik jamiyatining direktorlar Kengashi raisi — bosh direktori hamda direktorlari “Oʻzqishloqxoʻjalikmash-xolding” xolding kompaniyasining Vazirlar Mahkamasi bilan kelishilgan tavsiyanomasiga binoan aksionerlarning umumiy yigʻilishi (konferensiyasi) tomonidan saylanadilar.

6. Davlat mulki qoʻmitasi “Oʻzqishloqxoʻjalikmash-xolding” kompaniyasi, “Toshkent traktor zavodi” ishlab chiqarish birlashmasi, Oʻzbekiston Respublikasi Adliya vazirligi, “Oʻzsanoatqurilishbank”, “Oʻzqishloqxoʻjaliktaʼminottuzatish” davlat-kooperativ qoʻmitasi ikki hafta muddatda “Toshkent traktor zavodi” davlat-aksionerlik jamiyatining taʼsis hujjatlari va Ustavi loyihalarini tayyorlasinlar, 1996-yil 1-oktabrgacha taʼsis konferensiyasini oʻtkazsinlar.

7. “Oʻzqishloqxoʻjalikmash-xolding” kompaniyasi “Oʻzqishloqxoʻjalikmash-xolding” kompaniyasining ustav fondiga berilgan aksiyalarning davlat ulushi boʻyicha dividendlar sifatida tushuvchi mablagʻlarning kamida 50 foizini ishlab chiqarishni rivojlantirish uchun “Toshkent traktor zavodi” davlat-aksionerlik jamiyati schyotlariga 5 yil davomida oʻtkazib tursin.

9. Oʻzbekiston Respublikasi Moliya vazirligi, “Toshkent traktor zavodi” davlat-aksionerlik jamiyati Toshkent shahar va Toshkent viloyati hokimliklari bilan birgalikda “Toshkent traktor zavodi” davlat-aksionerlik jamiyati balansidan:

uy-joy-kommunal boshqarmasi va maktabgacha bolalar muassasalari obyektlarini Toshkent shahar hokimligi balansiga;

yordamchi xoʻjalikni Toshkent viloyati hokimligi balansiga berish-qabul qilishni bosqichma-bosqich amalga oshirsinlar.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.