Oʻzbekiston Respublikasining Bojxona kodeksiga muvofiq Oʻzbekiston Respublikasi Davlat bojxona qoʻmitasi qaror qiladi:

1. Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran uch oydan keyin kuchga kiradi.

Mazkur Nizom Oʻzbekiston Respublikasining Bojxona kodeksiga muvofiq bojxona yuk deklaratsiyasini (bundan buyon matnda BYD deb yuritiladi) oʻzgartirish, qoʻshimcha kiritish, qayta rasmiylashtirish, qaytarib olish hamda bekor qilish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

ariza — vakolatli shaxsning BYDga oʻzgartirish, qoʻshimcha kiritish, uni qayta rasmiylashtirish, qaytarib olish yoki bekor qilish boʻyicha yozma yoki elektron shakldagi murojaati;

bojxona organi — BYDni rasmiylashtirish, qayta rasmiylashtirish, qaytarib olish, bekor qilish, unga oʻzgartirish, qoʻshimcha kiritish boʻyicha kelib tushgan murojaatlarni koʻrib chiqish va tegishli harakatlarni amalga oshirishga vakolatli boʻlgan Iqtisodiyot va moliya vazirligi huzuridagi Bojxona qoʻmitasi (bundan buyon matnda Bojxona qoʻmitasi deb yuritiladi), Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi va bojxona postlari;

bojxona qiymati deklaratsiyasi (bundan buyon matnda BQD deb yuritiladi) — BYDning ajralmas qismi boʻlib, tovarning bojxona qiymati toʻgʻrisidagi maʼlumotlar koʻrsatilgan va deklaratsiyalovchi shaxs tomonidan bojxona organiga BYD bilan bir paytda topshiriladigan hujjat;

BYDni tuzatish shakli (bundan buyon matnda BDT) — Bojxona qoʻmitasi tomonidan belgilangan format va tuzilishga muvofiq tayyorlangan BYD hamda BQDdagi maʼlumotlarga oʻzgartirish va (yoki) qoʻshimchalar kiritish haqidagi elektron hujjat;

BYDdagi xato — bojxona rasmiylashtiruvi uchun taqdim etilgan hujjatlardagi axborot va (yoki) bojxona organlarida mavjud axborot bilan BYD va (yoki) BQDdagi maʼlumotlar orasidagi tafovut, shuningdek BYD yoki BQD grafalaridagi notoʻgʻri maʼlumotlar;

BYDdagi kamchilik — bojxona rasmiylashtiruvi uchun zarur boʻlgan maʼlumotlarning yetishmasligi yoki BYD bilan birga taqdim etilishi lozim boʻlgan hujjatlarning toʻliq boʻlmasligi bilan bogʻliq holatlar;

BYDga oʻzgartirish kiritish — BYD va (yoki) BQDdagi maʼlumotlarga oʻzgartirishlar kiritish;

BYDga qoʻshimcha kiritish — BYD va (yoki) BQDga yangi maʼlumotlarni kiritish yohud tegishli hujjatlarni qoʻshish;

BYDni qayta rasmiylashtirish — rasmiylashtirilgan qogʻoz shaklidagi BYDni bekor qilib, uning oʻrniga yangi BYDni rasmiylashtirish;

BYDni qaytarib olish — BYDni bojxona organida roʻyxatga olinganidan soʻng uni qaytarish orqali yuridik kuchga ega hujjat sifatida amal qilishini toʻxtatish;

BYDni bekor qilish — BYDni bojxona organida roʻyxatga olinganidan soʻng bekor qilish orqali yuridik kuchga ega hujjat sifatida amal qilishini toʻxtatish;

deklarant — tovarlarni va (yoki) transport vositalarini oʻz nomidan deklaratsiyalovchi shaxs yoxud uning nomidan tovarlar va (yoki) transport vositalari deklaratsiyalanayotgan shaxs;

deklaratsiyalovchi shaxs — bojxona organlariga BYDni oʻz nomidan taqdim etayotgan deklarant yoki BYDni toʻldirish, imzolash va bojxona organlariga deklarant nomidan taqdim etishga vakolatli bojxona rasmiylashtiruvi boʻyicha mutaxassis yoxud boshqa shaxs;

deklaratsiyalovchi shaxslar roʻyxati — deklarant tomonidan Yagona interaktiv davlat xizmatlari portalining “Deklaratsiyalovchi shaxslar roʻyxati” interaktiv xizmatiga(dan) qoʻshish va chiqarish yoʻli bilan shakllantiriladigan deklaratsiyalovchi shaxslar roʻyxati;

rasmiylashtirilgan BYD — bojxona organi tomonidan roʻyxatga olingan va “D” grafasiga bojxona organining tegishli belgilari qoʻyilgan BYD;

roʻyxatga olinib, rasmiylashtirilmagan BYD — bojxona organi tomonidan BYDning 7-grafasiga BYD raqami va qabul qilingan sana koʻrsatilgan, ammo “D” grafasiga bojxona organining tegishli belgilari qoʻyilmagan BYD;

tovarlarni elektron deklaratsiyalashning avtomatlashtirilgan axborot tizimi (bundan buyon matnda TEDAAT deb yuritiladi) — vazirlik va idoralarning tegishli axborot tizimlarining aloqasini taʼminlovchi dasturiy-texnik vositalar kompleksi;

elektron shakldagi BYD — deklaratsiyalovchi shaxsning elektron raqamli imzosi (bundan buyon matnda ERI deb yuritiladi) bilan tasdiqlangan, Bojxona qoʻmitasi tomonidan belgilangan shaklda TEDAAT vositasida elektron hujjat koʻrinishida taqdim etilgan BYD;

axborot almashish tizimi — axborot tizimlari orqali ERIdan foydalangan holda bojxona organlari va deklaratsiyalovchi shaxslar oʻrtasida elektron xabarlarni almashish, tegishli hujjatlarni taqdim etish va qabul qilib olish vositasi;

yangi BDT — deklaratsiyalovchi shaxs tomonidan bojxona organiga taqdim etilib roʻyxatga olinmagan yoki avval roʻyxatga olingan BDTdagi xato va kamchiliklarni bartaraf etish uchun taqdim etilgan BDT;

yangi BYD — deklaratsiyalovchi shaxs tomonidan bojxona organiga taqdim etilib roʻyxatga olinmagan yoki avval roʻyxatga olinib, undagi xato va kamchiliklar bartaraf etilib, qayta taqdim etilgan BYD;

qayta rasmiylashtirilgan BYD — yangi BYD rasmiylashtirilib, yuridik kuchga ega hujjat sifatida amal qilishi toʻxtatilgan avvalgi BYD;

hududiy bojxona boshqarmalari — Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi;

Bojxona qoʻmitasining yagona avtomatlashtirilgan axborot tizimi — bojxona chegarasi orqali olib oʻtiladigan tovarlar va transport vositalarining bojxona nazoratini amalga oshirish uchun ularga doir hujjatlar va maʼlumotlarning kiritilishini, hisobga olinishini hamda monitoring qilinishini nazarda tutuvchi Bojxona qoʻmitasining avtomatlashtirilgan tizimi.

2. Bojxona rasmiylashtiruvi tugallanganidan va tovarlar muayyan bojxona rejimiga joylashtirilganidan keyin BYD qabul qilingan kundan eʼtiboran uch yil ichida BYDga bojxona organining talabi bilan yoki vakolatli shaxsning arizasiga koʻra, mazkur Nizom talablari asosida oʻzgartirish, qoʻshimcha kiritish, uni qayta rasmiylashtirish yoxud bekor qilish mumkin.

Agar bojxona organi deklarant yoki bojxona brokeri tomonidan koʻrsatilgan sabablarni asosli deb topsa, BYD tovarlar chiqarib yuborilguniga qadar deklarant yoki bojxona brokeri tomonidan qaytarib olinishi mumkin.

Olib chiqilayotgan tovarlarga doir BYD ushbu tovarlarni olib chiqishga ruxsat berilganidan keyin ham, lekin ular amalda olib chiqilguniga qadar qaytarib olinishi mumkin.

3. Bojxona organiga kelib tushgan ariza Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonunining 28-moddasida belgilangan muddatda koʻrib chiqiladi.

Arizani koʻrib chiqish natijasi boʻyicha arizachiga yozma yoxud elektron shaklda javob beriladi. Javob xati bojxona organi boshligʻi yoki uning oʻrinbosari tomonidan imzolanadi.

4. Bojxona organi arizani toʻliq va xolisona koʻrib chiqish uchun zarur boʻlgan qoʻshimcha hujjatlar va maʼlumotlarni hamda yozma tushuntirishlarni soʻrab olishi mumkin.

5. Elektron BYDga oʻzgartirish va (yoki) qoʻshimcha kiritish deklaratsiyalovchi shaxs tomonidan bojxona organiga BDT taqdim etish orqali mazkur Nizom talablari asosida amalga oshiriladi, zarur hollarda BQD yoki tegishli hujjatlar BDTga ilova qilinadi.

Bojxona organlari tomonidan deklaratsiyalovchi shaxsdan oʻzgartirish va (yoki) qoʻshimcha kiritilayotgan BYDda mavjud hujjatlarni takroran BDTga ilova qilinishi talab etilmaydi, sifatsiz (hira, boʻyalgan, tushunarsiz va h.k.) hujjatlar bundan mustasno.

BDT oʻzgartirish va (yoki) qoʻshimcha kiritilgan elektron BYDning ajralmas qismi boʻlib hisoblanadi.

Elektron BYD yoki BQD grafalariga oʻzgartirish va (yoki) qoʻshimcha kiritish talab etilmasdan bojxona rasmiylashtiruvi uchun zarur boʻlgan tegishli hujjatlar taqdim etish lozim boʻlgan taqdirda, deklaratsiyalovchi shaxs bojxona organlariga hujjatlarni TEDAAT yoki Bojxona qoʻmitasi tomonidan koʻrsatiladigan tegishli interaktiv xizmatlar orqali taqdim etadi.

6. Qogʻoz shakldagi BYDga oʻzgartirish va (yoki) qoʻshimcha kiritish BYDning barcha nusxalaridagi tegishli grafalariga oʻzgartirish yoki qoʻshimcha kiritish yohud uni qayta rasmiylashtirish orqali mazkur Nizom talablariga muvofiq amalga oshiriladi.

7. BYDning faqat bojxona organi tomonidan toʻldiriladigan grafalaridagi yozuvlarga oʻzgartirish kiritish zarur boʻlgan taqdirda, oʻzgartirish kiritish bojxona organi xodimi tomonidan amalga oshiriladi hamda uning imzosi va shaxsiy raqamli muhri (elektron BYDda ERI) bilan tasdiqlanadi. Bojxona organi tomonidan toʻldiriladigan grafalaridagi yozuvlarga oʻzgartirish kiritilganligi haqida deklarant yoki deklaratsiyalovchi shaxs yozma shakldagi xat yoki axborot almashish tizimi orqali xabardor qilinadi.

8. BYDga oʻzgartirish va (yoki) qoʻshimcha kiritish, uni qayta rasmiylashtirish, bekor qilish yoki qaytarib olish quyidagi hollarda mazkur Nizom talablari asosida amalga oshiriladi:

bojxona rasmiylashtiruvi jarayonida yoʻl qoʻyilgan xato va kamchiliklarni bartaraf etish zarur boʻlganda;

bojxona qiymati va (yoki) bojxona toʻlovlari summasini toʻgʻrilash zarurati yuzaga kelganda;

tovarlarni tashishga moʻljallangan transport vositalari texnik jihatdan nosoz boʻlganda;

eksport bojxona rejimiga rasmiylashtirilgan tovarlar ularni olib chiqishga ruxsat berilgan sanadan soʻng avtotransport vositasi tashuvida oʻn kunga qadar, boshqa transport vositalari tashuvida yigirma kunga qadar olib chiqilmagan holatlarda;

BYD yoki uning bir qismi boʻyicha rasmiylashtirilgan tovarga egalik qilish huquqi tashqi iqtisodiy faoliyatning boshqa subyektiga berilganida, bundan eksport yoki erkin muomalaga chiqarish (import) bojxona rejimiga rasmiylashtirilib, kontrakt (shartnoma, kelishuv) shartlari toʻliq bajarilgan va (yoki) shartli chiqarilmagan tovarlar, shuningdek tovardan foydalanish huquqi cheklangan hamda Oʻzbekiston Respublikasi Bojxona kodeksining 96-moddasiga koʻra bojxona ombori bojxona rejimiga joylashtirilgan tovarni boshqa shaxsga oʻtkazish bilan bogʻliq holatlar mustasno;

kontrakt (shartnoma, kelishuv) shartlari oʻzgarganda, bundan eksport yoki erkin muomalaga chiqarish (import) bojxona rejimiga rasmiylashtirilib, kontrakt (shartnoma, kelishuv) shartlari toʻliq bajarilgan va (yoki) shartli chiqarilmagan tovarlar, shuningdek tovardan foydalanish huquqi cheklangan holatlar mustasno;

BYD erkin muomalaga chiqarish (import) bojxona rejimiga rasmiylashtirilgandan soʻng, undagi tovarlar boʻyicha tuzilgan kontraktlarga qoʻshimcha kelishuvlar kiritilib, ularga muvofiq xoʻjalik yurituvchi subyektlar, xorijiy hamkorlar va ularning rekvizitlari oʻzgargan taqdirda;

bitta tovar yuzasidan takroran bir nechta BYD qabul qilingan holat aniqlanganda;

BYDga oʻzgartirish, qoʻshimcha kiritish yoki uni qayta rasmiylashtirish uchun asos boʻladigan hamda taqdim etilgan hujjatlar bilan tasdiqlangan, qonunchilik hujjatlariga zid boʻlmagan boshqa hollarda.

9. Roʻyxatga olinib, rasmiylashtirilmagan BYDga oʻzgartirish va (yoki) qoʻshimcha kiritish mazkur Nizomning 8-bandi ikkinchi — toʻrtinchi va oʻninchi xatboshilarida nazarda tutilgan hollarda amalga oshiriladi.

10. Quyidagi hollarda BYDga oʻzgartirish va (yoki) qoʻshimcha kiritish taqiqlanadi:

deklarant yoki deklaratsiyalovchi shaxsdan BYDda maʼlum qilingan tovarlarga nisbatan hujjatlar va (yoki) maʼlumotlar talab qilinib, bu boʻyicha tekshiruv yakuniga yetmagan boʻlsa;

BYDda maʼlum qilingan tovarlarni bojxona koʻrigidan oʻtkazish belgilanib, bu jarayon yakuniga yetmagan boʻlsa;

BYDdagi tovarlarni bojxona ekspertizasidan oʻtkazish tayinlanib, bu jarayon yakuniga yetkazilmagan boʻlsa.

11. Roʻyxatga olinib, rasmiylashtirilmagan BYDga oʻzgartirish va (yoki) qoʻshimcha kiritish zarurati yuzaga kelganda, deklaratsiyalovchi shaxs BYD roʻyxatga olingan bojxona organiga axborot almashish tizimi orqali murojaat qiladi. Murojaatda bojxona organi tomonidan berilgan BYDning roʻyxat raqami, mazkur BYDga oʻzgartirish va (yoki) qoʻshimcha kiritishning aniq sabablari koʻrsatiladi.

12. Bojxona organi bir ish kuni ichida BYDga oʻzgartirish va (yoki) qoʻshimcha kiritish boʻyicha murojaatni koʻrib chiqadi va natijasi boʻyicha axborot almashish tizimi orqali maʼlum qiladi.

13. Bojxona organi tomonidan BYDga oʻzgartirish va (yoki) qoʻshimcha kiritish uchun asoslar mavjud deb topilganda, axborot almashish tizimida qoʻshimcha ravishda BYDdagi xato va (yoki) kamchiliklar boʻyicha taqdim etilishi lozim boʻlgan BDT va (yoki) qonunchilik hujjatlarida belgilangan tegishli hujjatlar hamda ularni taqdim etish muddati koʻrsatiladi.

14. BDT yoki tegishli hujjatlarni taqdim etish muddati deklaratsiyalovchi shaxsga axborot almashish tizimi orqali maʼlum qilingan kundan keyingi ish kuni yakuniga qadar etib belgilanadi.

15. Deklaratsiyalovchi shaxs tomonidan bojxona organiga:

BDT axborot almashish tizimida bayon etilgan muddatda taqdim etilganida, bojxona organi taqdim etilgan BDTni mazkur Nizomda belgilangan tartibda roʻyxatga oladi;

tegishli hujjatlar axborot almashish tizimida bayon etilgan muddatda taqdim etilganida, bojxona organi taqdim etilgan hujjatni qabul qilib oladi, bundan talab etilmagan (asossiz taqdim etilgan) yoki sifatsiz (hira, boʻyalgan, tushunarsiz va h.k.) hujjatlar mustasno.

BDT yoki tegishli hujjatlar axborot almashish tizimida belgilangan muddatda taqdim etilmaganda, bojxona organi BYDni bekor qiladi, bundan mazkur Nizomning 26-bandida nazarda tutilgan holatlar mustasno.

16. Bojxona organi murojaatni koʻrib chiqish natijasi boʻyicha BYDga oʻzgartirish va (yoki) qoʻshimcha kiritish uchun asoslar mavjud emas yoxud taqdim etilgan hujjatlar toʻliq emas deb topsa, BYDga oʻzgartirish yoki qoʻshimcha kiritishni rad etishga haqli.

Bunday holatlarda rad etishning asoslangan sabablari axborot almashish tizimi orqali maʼlum qilinadi.

17. Roʻyxatga olinib, rasmiylashtirilmagan BYDga oʻzgartirish va (yoki) qoʻshimcha kiritish yuzasidan deklarant ariza bilan BYD roʻyxatga olingan bojxona organiga murojaat qilishi mumkin. Bunday hollarda bojxona organi tomonidan arizani koʻrib chiqib, oʻzgartirish va (yoki) qoʻshimcha kiritish uchun asoslar muvjud emas deb topilganda, arizachiga oʻzining asoslantirilgan javob xatini yuborishi lozim.

18. Roʻyxatga olinib, rasmiylashtirilmagan BYDga bojxona organi tashabbusi bilan oʻzgartirish va (yoki) qoʻshimchalar kiritish mazkur Nizomning 8-bandi ikkinchi — toʻrtinchi hamda oʻninchi xatboshilarida nazarda tutilgan hollarda amalga oshiriladi.

19. Mazkur Nizomning 10-bandi uchinchi va toʻrtinchi xatboshilarida nazarda tutilgan hollarda BYDga oʻzgartirish va (yoki) qoʻshimchalar kiritish taqiqlanadi.

20. Bojxona organi tomonidan aniqlangan BYDdagi xato va (yoki) kamchiliklarni bartaraf etish zarur boʻlganda, bojxona organi deklaratsiyalovchi shaxsni axborot almashish tizimi orqali xabardor qiladi. Bunda bojxona organi BYDdagi xato va (yoki) kamchiliklar toʻgʻrisida aniq maʼlumotlar hamda ularni bartaraf etish uchun taqdim etiladigan BDT yoki tegishli hujjatlarni taqdim etish muddati koʻrasatilishi shart. BDT yoki tegishli hujjatlarni taqdim etish muddati mazkur Nizomning 14-bandiga asosan belgilanadi.

21. Bojxona organi taqdim etilgan BDTni roʻyxatga olish, tegishli hujjatlarni qabul qilish yoki BYDni bekor qilish mazkur Nizomning 15-bandiga muvofiq amalga oshiriladi.

22. Roʻyxatga olinib, rasmiylashtirilmagan BYDni qaytarib olish uchun deklarant BYD roʻyxatga olingan bojxona organiga ariza bilan murojaat qiladi.

Arizani koʻrib chiqish natijasi boʻyicha BYDni qaytarib olish uchun asoslar mavjud deb topilsa, bir ish kuni davomida Bojxona qoʻmitasining Yagona avtomatlashtirilgan axborot tizimida BYD qaytariladi.

23. Bojxona organi arizani koʻrib chiqish natijasi boʻyicha BYDni qaytarib olish uchun asoslar mavjud emas deb topsa, BYDni qaytarishni rad etishga haqli. Bunda rad etishning asoslangan sabablari yozma yoki elektron shaklda arizachiga maʼlum qilinadi.

24. BYDni qaytarib olish quyidagi hollarda taqiqlanadi:

mazkur Nizomning 10-bandida nazarda tutilgan hollarda;

huquqbuzarlik holatlari aniqlangan BYD boʻyicha ish koʻrib chiqilib, sud yoki huquqni muhofaza qiluvchi organ qarori chiqqunga qadar.

25. Roʻyxatga olinib, rasmiylashtirilmagan BYDni bojxona organi tashabbusi bilan bekor qilish bitta tovar yuzasidan takroran bir nechta BYD qabul qilingan holati aniqlanganda yoki xato va kamchiliklarni bartaraf etish uchun zarur boʻlgan BDT va (yoki) tegishli hujjatlar mazkur Nizomning 14-bandida belgilangan muddatda taqdim etilmaganda amalga oshirilishi mumkin.

26. Bojxona organi tashabbusi bilan BYDni bekor qilish quyidagi hollarda taqiqlanadi:

mazkur Nizomning 10-bandi uchinchi va toʻrtinchi xatboshilarida va 24-bandining uchinchi xatboshisida nazarda tutilgan hollarda;

BYD ilgari rasmiylashtirilgan muvaqqat, toʻliq boʻlmagan, davriy va dastlabki BYDlar boʻyicha taqdim etilganda, bundan ilgari rasmiylashtirilgan ushbu BYDlar bekor qilinadigan holatlar mustasno.

27. Bitta tovar yuzasidan takroran bir nechta BYD qabul qilingan holati aniqlanganda, bojxona organi bu haqda deklaratsiyalovchi shaxsni axborot almashish tizimi orqali xabardor qiladi.

28. Deklaratsiyalovchi shaxs xabarnoma kelib tushgan kundan keyingi ish kuni yakuniga qadar aniqlangan holat boʻyicha bojxona organiga batafsil tushuntirish berishi lozim.

29. Bitta tovar yuzasidan takroran bir nechta BYD qabul qilingan holati tasdiqlanganda yoki mazkur Nizomning 28-bandida belgilangan muddatda tushuntirish berilmaganda BYD bojxona organi tomonidan bekor qilinadi, bundan mazkur Nizomning 26-bandida belgilangan hollar mustasno.

BYD bekor qilinganda, bojxona organi bu xaqda deklarant yoki deklaratsiyalovchi shaxsni xabardor qiladi.

30. Rasmiylashtirilgan BYDga oʻzgartirish va (yoki) qoʻshimcha kiritish deklarant yoki uning nomidan BYDga oʻzgartirish va (yoki) qoʻshimcha kiritish toʻgʻrisidagi ishonchnomasi asosida deklaratsiyalovchi shaxs arizasiga asosan mazkur Nizomning 8-bandida nazarda tutilgan hollarda amalga oshiriladi.

31. Mazkur Nizomning 10-bandi uchinchi va toʻrtinchi xatboshilarida va 24-bandning uchinchi xatboshisida nazarda tutilgan hollarda BYDga oʻzgartirish yoki qoʻshimcha kiritish taqiqlanadi.

32. BYDga oʻzgartirish yoki qoʻshimcha kiritish uchun deklarant yoki deklaratsiyalovchi shaxs:

murojaat etilayotgan yilda rasmiylashtirilgan BYDga bojxona toʻlovlari summalarini qaytarish bilan bogʻliq boʻlmagan yoki BYDga eksport shartnomalari boʻyicha olib chiqilgan tovarlarning xalqaro tovar birjalarida qiymati oʻzgarishi sababli uning qiymati va (yoki) bojxona toʻlovlari summalari oʻzgarishi bilan bogʻliq boʻlgan oʻzgartirish va (yoki) qoʻshimcha kiritish yuzasidan BYD roʻyxatga olingan bojxona posti boshligʻiga;

mazkur bandning ikkinchi xatboshisida nazarda tutilmagan boshqa hollarda BYDga oʻzgartirish va (yoki) qoʻshimcha kiritish yuzasidan BYD rasmiylashtirilgan hududiy bojxona boshqarmasi boshligʻi yoki uning oʻrinbosariga yozma yohud elektron shaklda ariza bilan murojaat qilishi lozim.

Arizada BYDning roʻyxat raqami, unga oʻzgartirish va (yoki) qoʻshimcha kiritish zaruriyatining aniq sabablari koʻrsatiladi va ularni tasdiqlovchi hujjatlar ilova qilinadi. Taqdim etilgan hujjatlardagi maʼlumotlarning toʻgʻriligi uchun javobgarlik arizachi zimmasiga yuklatiladi.

33. Bojxona organi arizani koʻrib chiqish natijasi boʻyicha BYDga oʻzgartirish va (yoki) qoʻshimcha kiritish uchun asoslar mavjud emas yoxud taqdim etilgan hujjatlar toʻliq emas deb topsa, BYDga oʻzgartirish va (yoki) qoʻshimcha kiritishni rad etishga haqli. Bunday holatlarda rad etishning asoslangan sabablari arizachiga yozma yoki elektron shaklda maʼlum qilinadi.

34. Bojxona organi arizani koʻrib chiqish natijasi boʻyicha BYDga oʻzgartirish va (yoki) qoʻshimcha kiritish uchun asosli deb topsa, BYDdagi xato va (yoki) kamchiliklarni bartaraf etish boʻyicha BDT va (yoki) qonunchilik hujjatlarida belgilangan tegishli hujjatlarni taqdim etish yuzasidan arizachiga yozma yoki elektron shaklda javob xatini yuboradi.

Deklarant yoki deklaratsiyalovchi shaxs BYDga oʻzgartirish va (yoki) qoʻshimcha kiritish boʻyicha javob xatini olgandan soʻng besh kundan kechiktirmay bojxona organiga BDT va (yoki) tegishli hujjatlarni taqdim etishi kerak.

BYDga oʻzgartirish yoki qoʻshimcha kiritish uchun BDT va (yoki) tegishli hujjatlarni taqdim qila olmasa, bu haqida yozma yoki elektron ravishda bojxona organiga oʻzining asoslantirilgan xatini yuborishi lozim.

35. Bojxona organi tashabbusi bilan rasmiylashtirilgan BYDga oʻzgartirish va (yoki) qoʻshimcha kiritish mazkur Nizomning 8-bandida nazarda tutilgan hollarda amalga oshiriladi.

36. BYDga oʻzgartirish va (yoki) qoʻshimcha kiritish zarurati yuzaga kelganda, bojxona organi bu haqda deklarant va (yoki) deklaratsiyalovchi shaxsni xabardor qiladi, zarur hollarda bojxona organi boshligʻi yoxud uning oʻrinbosari tomonidan imzolangan xat yuboradi.

Bojxona organi deklarant yoki deklaratsiyalovchi shaxsdan BYDga oʻzgartirish va (yoki) qoʻshimcha kiritish yuzasidan qoʻshimcha hujjat va maʼlumotlarni hamda yozma tushuntirishlarni soʻrab olishi mumkin.

37. Bojxona organi tomonidan BYDga oʻzgartirish va (yoki) qoʻshimcha kiritish boʻyicha bojxona organining xatini olgandan soʻng deklarant yoki deklaratsiyalovchi shaxs besh kundan kechiktirmay quyidagilardan birini amalga oshirishi lozim:

BYDga oʻzgartirish va (yoki) qoʻshimcha kiritish uchun bojxona organiga BDT va (yoki) tegishli hujjatlarni taqdim etishi;

BYDga oʻzgartirish va (yoki) qoʻshimcha kiritish uchun BDT yoki tegishli hujjatlarni taqdim qila olmasa yoki BYDga oʻzgartirish va (yoki) qoʻshimcha kiritish uchun zarurat yoʻq deb hisoblasa, bu haqida yozma yoki elektron shaklda bojxona organiga oʻzining asoslantirilgan xatini yuborishi.

38. Deklarant yoki deklaratsiyalovchi shaxs asoslangan sabablarga koʻra BYDga oʻzgartirish va (yoki) qoʻshimcha kiritish uchun BDT taqdim qila olmasa, bojxona organi tomonidan mustaqil ravishda bojxona maqsadlari uchun BYDga oʻzgartirish (va) yoki qoʻshimcha kiritilishi mumkin, bundan kiritiladigan oʻzgartirish va (yoki) qoʻshimchalar bojxona toʻlovlariga yoki tashqi savdo kontrakti (shartnomasi, kelishuvi)dagi maʼlumotlarga taʼsir etadigan holatlar mustasno.

Bojxona organi BYDga kiritilgan oʻzgartirish va (yoki) qoʻshimchalar haqidagi asoslantirilgan xatni deklarantga yuborishi shart, bundan deklarant faoliyati tugatilgan holatlar mustasno.

39. Deklarantning arizasi bilan BYDni bekor qilish faqat bitta tovar yuzasidan bir nechta BYD qabul qilingan holatlarda amalga oshirilishi mumkin.

40. Bojxona organi deklarant tomonidan koʻrsatilgan sabablarni asosli deb topsa, olib chiqilayotgan tovarlarga doir BYD ushbu tovarlarni olib chiqishga ruxsat berilganidan keyin ham, lekin ular amalda olib chiqilguniga qadar qaytarib olinishi mumkin, mazkur Nizomning 24-bandi uchinchi xatboshisida nazarda tutilgan holatlar bundan mustasno.

41. BYD rasmiylashtirilgandan keyin uni qaytarib olish yoki bekor qilish uchun deklarant BYD rasmiylashtirilgan hududiy bojxona boshqarmasi boshligʻi yoki uning oʻrinbosariga ariza bilan murojaat qiladi.

42. Agar arizani koʻrib chiqish natijasi boʻyicha BYDni qaytarib olish yoki bekor qilish uchun asoslar mavjud deb topilsa, uch ish kuni davomida Bojxona qoʻmitasining Yagona avtomatlashtirilgan axborot tizimi orqali BYD qaytariladi yoki bekor qilinadi.

Bojxona organi arizani koʻrib chiqish natijasi boʻyicha BYDni bekor qilish yoki qaytarib olish uchun asoslar mavjud emas deb topsa, BYDni bekor qilish yoki qaytarishni rad etishga haqli. Bunday holatlarda rad etishning asoslangan sabablari arizachiga yozma yoki elektron shaklda maʼlum qilinadi.

43. Rasmiylashtirilgan BYDni bojxona organi tashabbusi bilan bekor qilish mazkur Nizomning 8-bandi beshinchi va toʻqqizinchi xatboshilarida nazarda tutilgan hollarda amalga oshiriladi.

44. BYD yuzasidan huquqbuzarlik holati aniqlanib, bu boʻyicha ish sud yoki tegishli huquqni muhofaza qiluvchi organlarida koʻrib chiqilib, tegishli qaror qabul qilinmagan boʻlsa mazkur BYDni bekor qilish taqiqlanadi.

45. Bitta tovar yuzasidan takroran bir nechta BYD qabul qilingan holati aniqlanganda, bojxona organi bu haqda deklarant va (yoki) deklaratsiyalovchi shaxsni xabardor qiladi, zarur hollarda bojxona organi boshligʻi yoki uning oʻrinbosari tomonidan imzolangan xat yuboradi.

Deklarant yoki deklaratsiyalovchi shaxs bojxona organining xatini olgandan soʻng besh kun ichida aniqlangan holat boʻyicha tushuntirish berishi shart.

46. Mazkur Nizomning 8-bandi beshinchi va toʻqqizinchi xatboshilarida nazarda tutilgan holatlar tasdiqlangan hollarda BYD bojxona organi tomonidan bekor qilinadi va bu xaqda deklarant yoki deklaratsiyalovchi shaxs xabardor etiladi.

47. Roʻyxatga olinib, rasmiylashtirilmagan BYDga oʻzgartirish va (yoki) qoʻshimcha kiritish mazkur Nizomning 8-bandi ikkinchi — toʻrtinchi va oʻninchi xatboshilarida nazarda tutilgan hollarda amalga oshiriladi.

48. BYDga oʻzgartirish va (yoki) qoʻshimcha kiritish mazkur Nizomning 10-bandida nazarda tutilgan hollarda taqiqlanadi.

49. BYD bojxona organida roʻyxatga olingandan soʻng, BYDga oʻzgartirish va (yoki) qoʻshimcha kiritish zarurati yuzaga kelganda deklarant yoki deklaratsiyalovchi shaxs BYD roʻyxatga olingan bojxona organiga murojaat qiladi.

Murojaatda BYDning bojxona organida roʻyxatga olingan raqami, unga oʻzgartirish va (yoki) qoʻshimcha kiritishning aniq sabablari koʻrsatiladi.

50. BYDga oʻzgartirish kiritish BYDning barcha nusxalaridagi tegishli grafalari matnini “X” belgisi bilan oʻchirish va yangi matnni yozish, qoʻshimcha kiritish esa tegishli grafaga qoʻshimcha maʼlumotlarni kiritish yoʻli bilan amalga oshiriladi. BYDning oʻzgartirish va (yoki) qoʻshimcha kiritilishi lozim boʻlgan grafalarida oʻzgartirish va (yoki) qoʻshimchalarni kiritish uchun yetarli joy boʻlmagan taqdirda, kiritilgan oʻzgartirish va (yoki) qoʻshimcha haqidagi yozuv BYDning orqa tomoniga qayd qilinadi.

Bunda BYD nusxalarining orqa tomonida kim tomonidan, qachon, nimaga asoslanib, qaysi grafada va nima oʻzgartirilganligi haqida yozuv qayd qilinadi. Yozuv oʻzgartirish va (yoki) qoʻshimcha kiritgan deklaratsiyalovchi shaxsning imzosi bilan tasdiqlanadi.

51. BYDning faqat bojxona organi xodimi tomonidan toʻldiriladigan grafalaridagi yozuvlarga oʻzgartirish kiritish zarur boʻlgan taqdirda, oʻzgartirish kiritish bojxona organi xodimi tomonidan amalga oshiriladi hamda uning imzosi va shaxsiy raqamli muhri bilan tasdiqlanadi.

52. BYDga kiritilgan oʻzgartirishlarning umumiy soni (toʻldirish vaqtida deklaratsiyalovchi shaxs tomonidan kiritilgan oʻzgartirishlar bilan birga) toʻrttadan oshgan taqdirda, BYDning oʻrniga xato va (yoki) kamchiliklari bartaraf etilgan yangi BYD taqdim etiladi.

53. BYD roʻyxatga olingan kundan eʼtiboran besh kun ichida oʻzgartirish va (yoki) qoʻshimcha kiritilmasa yohud uning oʻrniga xato va (yoki) kamchiliklari bartaraf etilgan yangi BYD taqdim etilmasa — bojxona organi BYDni bekor qiladi, bundan mazkur Nizomning 24-bandida nazarda tutilgan holatlar mustasno.

54. Roʻyxatga olinib, rasmiylashtirilmagan BYDga bojxona organi tashabbusi bilan oʻzgartirish va (yoki) qoʻshimcha kiritish mazkur Nizomning 8-bandi ikkinchi — toʻrtinchi hamda oʻninchi xatboshilarida nazarda tutilgan hollarda amalga oshiriladi.

55. Mazkur Nizomning 10-bandi uchinchi va toʻrtinchi xatboshilarida nazarda tutilgan hollarda BYDga oʻzgartirish va (yoki) qoʻshimcha kiritish taqiqlanadi.

56. Bojxona organi tomonidan BYDda xato va kamchiliklar aniqlanganda bu haqda bojxona organi deklarant yoki deklaratsiyalovchi shaxsni xabardor qiladi. Bunda bojxona organi xodimi deklarant yoki deklaratsiyalovchi shaxsga BYDdagi xato va kamchiliklar toʻgʻrisida aniq maʼlumot berishi shart.

57. Roʻyxatga olingan BYDga oʻzgartirish va (yoki) qoʻshimchalar mazkur Nizomning 50 — 53-bandlariga muvofiq tartibda kiritiladi.

58. Bojxona organi deklarant tomonidan koʻrsatilgan sabablarni asosli deb topsa, roʻyxatga olinib, rasmiylashtirilmagan BYD deklarant tomonidan qaytarib olinishi mumkin.

59. BYDni qaytarib olish mazkur Nizomning 24-bandida nazarda tutilgan hollarda taqiqlanadi.

60. BYD roʻyxatga olingandan keyin uni qaytarib olish uchun deklarant BYD roʻyxatga olingan bojxona organiga ariza bilan murojaat qiladi.

Bojxona organi arizani koʻrib chiqish natijasida BYDni qaytarib olish uchun asoslar mavjud emas deb topsa, BYDni qaytarishni rad etishga haqli. Bunday holatlarda rad etishning asoslangan sabablari arizachiga yozma yoki elektron shaklda maʼlum qilinadi.

Agar arizani koʻrib chiqish natijasi boʻyicha BYDni qaytarib olish uchun asoslar mavjud deb topilsa, bojxona organi xodimi tomonidan BYD qaytariladi.

61. BYD qaytarilayotganda bojxona organi xodimi tomonidan mazkur BYDning barcha nusxalarida pastki chap burchakdan boshlab diagonal boʻyicha “QAYTARILDI” yozuvi qayd qilinadi. Nusxalarning orqa tomonida mazkur BYD kim tomonidan va nima asosida qaytarilganligi koʻrsatiladi.

62. Roʻyxatga olinib, rasmiylashtirilmagan BYDni bojxona organi tashabbusi bilan bekor qilish belgilangan muddatda BYDdagi xato va kamchiliklar bartaraf etilmagan holatlarda amalga oshirilishi mumkin, bundan mazkur Nizomning 24-bandida nazarda tutilgan holatlar mustasno.

63. Roʻyxatga olinib, rasmiylashtirilmagan BYDni bekor qilish unga berilgan roʻyxat raqamini bekor qilish yoʻli bilan amalga oshiriladi va bu xaqda deklarant yoki deklaratsiyalovchi shaxs xabardor etiladi.

BYD bekor qilinayotganda bojxona organi xodimi tomonidan mazkur BYDning barcha nusxalarida pastki chap burchakdan boshlab diagonal boʻyicha “BEKOR QILINDI” yozuvi qayd qilinadi. Nusxalarning orqa tomonida mazkur BYD kim tomonidan va nima asosida bekor qilinganligi koʻrsatiladi.

64. Rasmiylashtirilgan BYDga oʻzgartirish va (yoki) qoʻshimcha kiritish yoki uni qayta rasmiylashtirish mazkur Nizomning 8-bandi ikkinchi — sakkizinchi va oʻninchi xatboshilarida nazarda tutilgan hollarda amalga oshiriladi.

65. BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilish mazkur Nizomning 10-bandi uchinchi va toʻrtinchi xatboshilarida hamda 24-bandning uchinchi xatboshisida nazarda tutilgan hollarda taqiqlanadi.

66. BYDni bekor qilish faqat bitta tovar yuzasidan bir nechta BYD qabul qilingan holatlarda amalga oshiriladi.

67. Bojxona organi deklarant tomonidan koʻrsatilgan sabablarni asosli deb topsa, olib chiqilayotgan tovarlar boʻyicha BYD ushbu tovarlarni olib chiqishga ruxsat berilganidan keyin ham, lekin ular amalda olib chiqilguniga qadar qaytarib olinishi mumkin, bundan mazkur Nizomning 24-bandi uchinchi xatboshisida nazarda tutilgan holatlar mustasno.

68. BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilish talab etilganida deklarant ariza bilan:

murojaat etilayotgan yilda rasmiylashtirilgan BYDga bojxona toʻlovlari summalarini qaytarish bilan bogʻliq boʻlmagan (eksport shartnomalari boʻyicha olib chiqilgan tovarning xalqaro tovar birjalarida qiymati oʻzgarishi sababli bojxona toʻlovlari summalarini qaytarish bilan bogʻliq holatlar bundan mustasno) oʻzgartirish va (yoki) qoʻshimcha kiritish yoki uni qayta rasmiylashtirish yuzasidan BYD roʻyxatga olingan bojxona posti boshligʻiga;

mazkur bandning ikkinchi xatboshisida nazarda tutilmagan boshqa hollarda BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilish yuzasidan BYD rasmiylashtirilgan hududiy bojxona boshqarmasi boshligʻi yoki uning oʻrinbosariga ariza bilan yozma yoki elektron shaklda murojaat qiladi.

Arizada BYDning roʻyxat raqami, unga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilishning aniq sabablari koʻrsatiladi va arizaga buni tasdiqlovchi hujjatlar hamda BYDning bojxona brokeri va deklarant uchun tayyorlab berilgan dastlabki rasmiylashtirilgan asl nusxalari ilova qilinadi. Taqdim etilgan hujjatlardagi maʼlumotlarning toʻgʻriligi uchun javobgarlik arizachi zimmasiga yuklatiladi.

69. Bojxona organi arizani koʻrib chiqish natijasi boʻyicha BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilish uchun asoslar mavjud emas yoxud taqdim etilgan hujjatlar toʻliq emas deb topsa, BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilishni rad etishga haqli. Bunday holatlarda rad etishning asoslangan sabablari arizachiga yozma yoki elektron shaklda maʼlum qilinadi.

70. Bojxona organi tashabbusi bilan BYDga oʻzgartirish va (yoki) qoʻshimcha kiritish, uni qayta rasmiylashtirish mazkur Nizomning 8-bandida nazarda tutilgan hollarda amalga oshiriladi.

Bojxona organi tashabbusi bilan BYDni bekor qilish bitta tovar yuzasidan bir nechta BYD qabul qilingan holatlarda amalga oshirilishi mumkin.

71. BYDga oʻzgartirish va (yoki) qoʻshimcha kiritish, uni qayta rasmiylashtirish yoki bekor qilish lozim deb topilganda bojxona organi bu haqda deklarant yoki deklaratsiyalovchi shaxsni xabardor qiladi, zarur hollarda bojxona organi boshligʻi yohud uning oʻrinbosari tomonidan imzolangan xat yuboradi.

Bojxona organi deklarant yoki deklaratsiyalovchi shaxsdan BYDga oʻzgartirish va (yoki) qoʻshimcha kiritish yuzasidan qoʻshimcha hujjatlar va maʼlumotlarni hamda yozma tushuntirishlarni soʻrab olishi mumkin.

72. Deklarant yoki deklaratsiyalovchi shaxs bojxona organining BYDga oʻzgartirish va (yoki) qoʻshimcha kiritish, uni qayta rasmiylashtirish yoki bekor qilish boʻyicha xatini olgandan soʻng besh kundan kechiktirmay quyidagilardan birini amalga oshirishi lozim:

BYDga oʻzgartirish va (yoki) qoʻshimcha kiritish, uni qayta rasmiylashtirish yoki bekor qilish uchun bojxona organiga BYD va unga tegishli hujjatlarni taqdim etishi;

BYDga oʻzgartirish va (yoki) qoʻshimcha kiritish, uni qayta rasmiylashtirish yoki bekor qilish uchun BYD va unga tegishli hujjatlarni taqdim qila olmasa yoki BYDga oʻzgartirish va (yoki) qoʻshimcha kiritish, uni qayta rasmiylashtirish yoki bekor qilish uchun asos mavjud emas deb hisoblasa, bu haqida yozma ravishda bojxona organiga oʻzining asoslantirilgan xatini yuborishi lozim.

73. Rasmiylashtirilgan BYDga oʻzgartirish kiritish BYDning barcha nusxalaridagi tegishli grafalari matnini “X” belgisi bilan oʻchirish va yangi matnni yozish, qoʻshimcha kiritish esa tegishli grafaga qoʻshimcha maʼlumotlarni kiritish yoʻli bilan amalga oshiriladi. BYDning oʻzgartirish va qoʻshimcha kiritilishi lozim boʻlgan grafalarida oʻzgartirish va qoʻshimchalarni kiritish uchun yetarli joy boʻlmagan taqdirda, kiritilgan oʻzgartirish va (yoki) qoʻshimcha haqidagi yozuv BYDning orqa tomoniga qayd qilinadi.

Bunda BYD nusxalarining orqa tomonida kim tomonidan, qachon, nimaga asoslanib, qaysi grafada va nima oʻzgartirilganligi haqida yozuv qayd qilinadi. Yozuv oʻzgartirish va (yoki) qoʻshimcha kiritgan deklaratsiyalovchi shaxsning imzosi, bojxona organi xodimi imzosi va shaxsiy raqamli muhri bilan tasdiqlanadi.

74. BYDning faqat bojxona organi tomonidan toʻldiriladigan grafalaridagi yozuvlarga oʻzgartirish va (yoki) qoʻshimchalar kiritish zarur boʻlgan taqdirda, oʻzgartirish va (yoki) qoʻshimchalar kiritish bojxona organi tomonidan amalga oshiriladi hamda bojxona organi xodimi imzosi va shaxsiy raqamli muhri bilan tasdiqlanadi.

75. BYDga kiritilgan oʻzgartirishlarning umumiy soni (toʻldirish vaqtida deklaratsiyalovchi shaxs tomonidan kiritilgan oʻzgartirishlar bilan birga) toʻrttadan oshgan taqdirda, mazkur BYD qayta rasmiylashtiriladi.

76. BYD qayta rasmiylashtirilganda qayta rasmiylashtirilgan BYDning barcha nusxalarida pastki chap burchakdan boshlab diagonal boʻyicha “QAYTA RASMIYLASHTIRILDI” yozuvi qayd qilinadi. Nusxalarning orqa tomonida mazkur BYD kim tomonidan va nima asosida qayta rasmiylashtirilganligi koʻrsatiladi.

Bunda yangi BYDga qayta rasmiylashtirilgan avvalgi BYDning roʻyxat raqami va yuk chiqarish sanasi beriladi. Yangi BYDning 50-grafasida BYDni qayta rasmiylashtirishga asos boʻlgan hujjat raqami va uning sanasi koʻrsatiladi. Ushbu grafada yetarli joy boʻlmagan taqdirda bunday yozuv BYDning orqa tomoniga qayd qilinadi.

77. Rasmiylashtirilgan BYDga oʻzgartirish va (yoki) qoʻshimcha kiritish yoki uni qayta rasmiylashtirish deklaratsiyalovchi shaxs tomonidan BYD va unga tegishli zarur hujjatlar taqdim etilgan kundan boshlab uch ish kuni ichida bojxona organi tomonidan amalga oshiriladi.

78. Deklarant yoki deklaratsiyalovchi shaxs asoslangan sabablarga koʻra BYDga oʻzgartirish va (yoki) qoʻshimcha kiritish uchun BYD taqdim qila olmasa, bojxona organi tomonidan mustaqil ravishda bojxona maqsadlari uchun BYDga oʻzgartirish (va) yoki qoʻshimcha kiritilishi mumkin, bundan kiritiladigan oʻzgartirish va (yoki) qoʻshimchalar bojxona toʻlovlariga yoki tashqi savdo kontrakti (shartnomasi, kelishuvini) maʼlumotlariga taʼsir etadigan holatlar mustasno.

Bojxona organi BYDga kiritilgan oʻzgartirish va (yoki) qoʻshimchalar haqidagi asoslantirilgan xatni deklarantga yuborishi shart, bundan deklarant faoliyati tugatilgan holatlar mustasno.

79. BYD qaytarilayotganda bojxona organi xodimi tomonidan mazkur BYDning barcha nusxalarida pastki chap burchakdan boshlab diagonal boʻyicha “QAYTARILDI” yozuvi qayd qilinadi. Nusxalarning orqa tomonida mazkur BYD kim tomonidan va nima asosida qaytarilganligi koʻrsatiladi.

80. BYD bekor qilinayotganda bojxona organi xodimi tomonidan mazkur BYDning barcha nusxalarida pastki chap burchakdan boshlab diagonal boʻyicha “BEKOR QILINDI” yozuvi qayd qilinadi. Nusxalarning orqa tomonida mazkur BYD kim tomonidan va nima asosida bekor qilinganligi koʻrsatiladi.

81. Qayta rasmiylashtirilgan yoki bekor qilingan BYDning barcha nusxalari bojxona organida saqlanadi, bundan eksport bojxona rejimida yuk moʻljallangan mamlakatga yuborish uchun tayyorlab berilgan nusxa mustasno.

82. Deklaratsiyalovchi shaxs tomonidan BDTning 1, 2, 3, 5, 7, 8, 9, 10, 14, 27, 28, 32, 50, 54, “A” va “B” grafalari bilan birga faqat BYDga oʻzgartirish va (yoki) qoʻshimchalar kiritilishi lozim boʻlgan grafalari toʻldiriladi.

BDTning 1, 2, 8, 9-grafalari va BYDga oʻzgartirish va (yoki) qoʻshimchalar kiritilayotgan grafalari Bojxona yuk deklaratsiyasini toʻldirish tartibi toʻgʻrisidagi yoʻriqnomada (roʻyxat raqami 2773, 2016-yil 6-aprel) (bundan buyon matnda Yoʻriqnoma deb yuritiladi) belgilangan tartibga muvofiq toʻldiriladi.

BDTning 3, 5, 7, 7a, 10, 14, 27, 28, 32, 50, 54, “A”, “B” va “D” grafalari mazkur Nizomning 85-bandiga muvofiq tartibda toʻldiriladi.

83. BYDning 1, 2, 3, 5, 8, 9, 14, 28, 50, 54-grafalariga oʻzgartirish va (yoki) qoʻshimchalar kiritilishi lozim boʻlgan taqdirda, BDTning “A” grafasida oʻzgartiriladigan grafalar roʻyxati koʻrsatiladi va ushbu grafalari oʻzgartirish va (yoki) qoʻshimchalar kiritilgan holda taqdim etiladi. Mazkur grafalarga oʻzgartirish va (yoki) qoʻshimchalar kiritish lozim boʻlmaganda yoki BDTning ushbu grafalarida boshqa maʼlumotlar koʻrsatish zarurati yuzaga kelmaganda, BYDning tegishli grafalaridagi maʼlumotlar takrorlanadi.

84. Yoʻriqnoma talablariga muvofiq BYDning toʻldirilishi majburiy boʻlgan barcha grafalari BDTda quyidagi holatlarda toʻldiriladi:

BYDga kiritilayotgan oʻzgartirish va (yoki) qoʻshimchalar BYDning 5-grafasidagi tovarlar soniga taʼsir etsa yoki 32-grafasi oʻzgartirilayotgan boʻlsa;

rasmiylashtirilgan bitta BYDdagi tovarlar bir nechta BYDlar bilan rasmiylashtirilishi lozim boʻlgan, BYD qismlarga boʻlinayotgan yoki aksi boʻlgan holatlarda.

85. BDTning 3, 5, 7, 7a, 10, 14, 27, 28, 32, 50, 54, “A”, “B” va “D” grafalari quyidagi tartibda toʻldiriladi:

1) 3-grafa. “Qoʻshimcha varaqlar”.

Grafaning birinchi boʻlmasida varaqning tartib raqami, ikkinchi boʻlmasida taqdim etilayotgan BDT varaqlarining umumiy soni (asosiy va qoʻshimcha varaqlari yigʻindisi) koʻrsatiladi.

Masalan, agar BDT ikkita qoʻshimcha varaqlarga ega boʻlsa BDTning asosiy varagʻida “1/3”; birinchi qoʻshimcha varagʻida “2/3”; ikkinchi qoʻshimcha varagʻida “3/3” koʻrsatiladi. Agar BDT qoʻshimcha varaqlarga ega boʻlmasa “1/1” koʻrsatiladi.

1¹) 5-grafa. “Tovarlar nomlarining umumiy soni”.

Grafada BDTning 31-grafalarida koʻrsatilgan tovarlar nomlarining umumiy soni yoziladi. Bu son BDTning toʻldirilgan 31-grafalari soniga muvofiq boʻlishi lozim;

1²) 7-grafa. “BYDning roʻyxat raqami”.

Grafada oʻzgartirish va (yoki) qoʻshimchalar kiritilishi lozim boʻlgan BYDning 7-grafasidagi BYDning roʻyxat raqami koʻrsatiladi;

2) 7a-grafa. “BDTning roʻyxat raqami”.

Grafa bojxona organi tomonidan quyidagi tartibda toʻldiriladi:

99999 /99.99.9999 / 9999999

1 2 3 4 5

1-element — BDT roʻyxatga olingan bojxona postining Yoʻriqnomaning 4-ilovasidagi Bojxona postlari tasniflagichiga muvofiq beshta belgili kodi;

2, 3 va 4-elementlar — BDT roʻyxatga olingan kun, oy va yil;

5-element — tegishli bojxona organi tomonidan roʻyxatga olingan BDTning tartib raqami (joriy yilda oʻsish tartibida, yil yakunlangach raqamlash yangidan boshlanadi). BDTning tartib raqami qaytarilmasligi lozim;

3) 10-grafa.

Grafaning chap boʻlmasida kiritilayotgan oʻzgartirish va (yoki) qoʻshimchalar turining ikkita raqamli kodi koʻrsatiladi:

“01” — bojxona organi tomonidan aniqlangan holatlar asosida boʻlsa;

“02” — deklarant yoki deklaratsiyalovchi shaxsning murojaati asosida boʻlsa;

“03” — qonunchilik hujjatlarida belgilangan tartibda boshqa idoralar tomonidan oʻtkazilgan tekshiruv natijalari asosida boʻlsa.

Grafaning oʻng boʻlmasida bojxona toʻlovlari va bojxona toʻlovlaridan berilgan imtiyozlarga taʼsir turining ikkita raqamli kodi koʻrsatiladi:

“01” — oʻzgartirish va (yoki) qoʻshimchalar bojxona toʻlovlaridan berilgan imtiyozlariga taʼsir etmasdan faqat toʻlanishi uchun hisoblangan bojxona toʻlovlariga taʼsir etsa;

“02” — oʻzgartirish va (yoki) qoʻshimchalar toʻlanishi uchun hisoblangan bojxona toʻlovlariga taʼsir etmasdan faqat bojxona toʻlovlaridan berilgan imtiyozlariga taʼsir etsa;

“03” — oʻzgartirish va (yoki) qoʻshimchalar toʻlanishi va imtiyoz qoʻllanilishi uchun hisoblangan bojxona toʻlovlariga taʼsir etsa;

“04” — oʻzgartirish va (yoki) qoʻshimchalar toʻlanishi va imtiyoz qoʻllanilishi uchun hisoblangan bojxona toʻlovlariga taʼsir etmasa;

3¹) 14-grafa. “Deklarant/bojxona brokeri”.

Grafada BDTni toʻldirgan va bojxona organlariga taqdim etayotgan bojxona brokeri yoki deklarantning qisqacha nomi, joylashgan yeri (yuridik manzili), telefon raqami va elektron pochta manzili (mavjud boʻlsa) koʻrsatiladi;

Grafaning yuqori qismida “№” belgisidan soʻng ushbu bojxona brokeri yoki deklarantni STIRi koʻrsatiladi;

4) 27-grafa.

Grafada quyidagilar koʻrsatiladi:

“0” — agar BQDdagi maʼlumotlarga oʻzgartirish va (yoki) qoʻshimchalar kiritilmayotgan boʻlsa;

“1” — agar BQDdagi maʼlumotlarga oʻzgartirish va (yoki) qoʻshimchalar kiritilayotgan boʻlsa.

4¹) 28-grafa. “Moliya va bank maʼlumotlari”.

Grafada bojxona toʻlovlarini toʻlovchi shaxsning moliyaviy va bank maʼlumotlari koʻrsatiladi, bunda maʼlumotlarning har biri yangi satrdan boshlanadi va ulardan har birining oldiga tartib raqami qoʻyiladi:

1 — toʻlovchining STIRi/bank STIRi (bojxona toʻlovlari Oʻzbekiston Respublikasi norezidenti tomonidan toʻlanganda bojxona brokeri yoki deklarantning STIRi koʻrsatiladi);

2 — bankning toʻliq nomi;

BYDga oʻzgartirish va (yoki) qoʻshimcha kiritish uchun bojxona yigʻimi undirilmaydigan hollarda grafani toʻldirish talab etilmaydi, bundan BYDning 28- grafasiga oʻzgartirish va (yoki) qoʻshimcha kiritish zarur boʻlgan hollar mustasno.

5) 32-grafa.

Grafaning chap boʻlmasida BDTdagi tovarning tartib raqami koʻrsatiladi.

BDTda bitta nomdagi tovarga oid maʼlumotlar koʻrsatilgan boʻlsa, grafada “1” raqami koʻrsatiladi.

Grafaning oʻng boʻlmasida BYDdagi oʻzgartirish va (yoki) qoʻshimchalar kiritilayotgan tovarning tartib raqami koʻrsatiladi.

Masalan:

agar BYDning birinchi tovaridagi tegishli maʼlumotlarga oʻzgartirish va (yoki) qoʻshimchalar kiritilayotgan boʻlsa, grafada “1/1” koʻrsatiladi;

agar BYDning faqat ikkinchi tovaridagi tegishli maʼlumotlarga oʻzgartirish va (yoki) qoʻshimchalar kiritilayotgan boʻlsa, grafada “1/2” koʻrsatiladi;

BYDga kiritilayotgan oʻzgartirish va (yoki) qoʻshimchalar uning tovarga oid qismiga (masalan, BYDning 3, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47-grafalariga) taʼsir etmasa grafaning oʻng va chap boʻlmalarida “0” raqamlari koʻrsatiladi.

5¹) 50-grafa. “Ishonch bildirgan shaxs”.

Grafada quyidagi mazmundagi yozuv yoziladi:

“Taqdim etilgan hujjatlar va maʼlumotlar uchun javobgar ......” deb yozilgandan soʻng BDTni toʻldirishga asos boʻlib xizmat qiluvchi taqdim etilgan hujjatlar va maʼlumotlarga javobgar hisoblangan shaxsning familiyasi, ismi, otasining ismi, lavozimi, telefon raqami (mavjud boʻlsa) va STIRi (alohida maydonda) koʻrsatiladi.

Taqdim etilgan hujjatlar va maʼlumotlar uchun javobgar etib deklarant yoki u ishonch bildirgan shaxs belgilanadi.

Agar taqdim etilgan hujjatlar va maʼlumotlar uchun javobgar deklarant ishonch bildirgan shaxs boʻlsa, uning vakolatlarini tasdiqlovchi hujjatning (shartnomaning, ishonchnomaning) raqami, sanasi va amal qilish muddati koʻrsatiladi.

Taqdim etilgan hujjatlar va maʼlumotlar uchun javobgar shaxs STIRi mavjud boʻlmagan norezident boʻlsa, u holda shaxsning STIRi qayd etiladigan joyda “999999999” kodi koʻrsatiladi.

BDTni toʻldirishda deklarant yoki u ishonch bildirgan shaxs tomonidan qoʻshimcha hujjatlar va maʼlumotlar taqdim etilmagan boʻlsa BDTning 7-grafasida roʻyxat raqami koʻrsatilgan BYDning 50-grafasidagi maʼlumotlar takrorlanadi.

5²) 54-grafa. “Joy va sana”.

Grafada 14-grafada koʻrsatilgan shaxs nomidan BDTni taqdim etayotgan deklaratsiyalovchi shaxs haqida quyidagi maʼlumotlar koʻrsatiladi hamda maʼlumotlarning har biri yangi satrdan boshlanadi va ulardan har birining oldiga tartib raqami qoʻyiladi:

1 — BDT toʻldirilgan joy;

2 — deklaratsiyalovchi shaxsning familiyasi, ismi va otasining ismi, shuningdek elektron pochta manzili (mavjud boʻlsa);

3 — deklaratsiyalovchi shaxsning telefon raqami;

4 — agar tovarlarni deklaratsiyalash bojxona brokeri tomonidan amalga oshirilayotgan boʻlsa, bojxona brokeri va deklarant oʻrtasidagi bitim raqami va sanasi koʻrsatiladi;

5 — deklaratsiyalovchi shaxs tomonidan BDTga berilgan raqam quyidagi tartibda koʻrsatiladi:

999999999/99.99.9999/999999, bunda:

1 2 3

1-element — deklaratsiyalovchi shaxsning STIRi;

2-element — BDT toʻldirilgan sana;

3-element — deklaratsiyalovchi shaxs tomonidan BDTga berilgan tartib raqami (joriy yilda oʻsish tartibida, yil yakunlangach raqamlash yangidan boshlanadi).

Deklaratsiyalovchi shaxs tomonidan BDTga berilgan raqam qaytarilmasligi lozim.

BDTda bayon etilgan maʼlumotlarning haqqoniyligi deklaratsiyalovchi shaxsning ERIsi bilan tasdiqlanadi.

6) “A” grafa.

Grafada BYDning oʻzgartirish va (yoki) qoʻshimchalar kiritilayotgan grafasi yoki maxsus kod koʻrsatiladi:

a) agar oʻzgartirish va (yoki) qoʻshimchalar kiritilayotgan grafalar soni bir nechta boʻlsa ularning barchasi koʻrsatiladi.

Masalan:

11, 20, C;

b) BYDning tovarga oid qismiga (masalan, BYDning 3, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47-grafalariga) oʻzgartirish va (yoki) qoʻshimchalar kiritilayotganda oʻzgartirish va (yoki) qoʻshimchalar kiritilayotgan grafadan soʻng “/” ajratish belgisi qoʻyilgan holda oʻzgartirish va (yoki) qoʻshimchalar kiritilayotgan grafalarga oid tovarning tartib raqami koʻrsatiladi;

Masalan:

11, 20, C, 46/1, 46/2, 42/2.

BDTda elektron shakldagi tuzilishiga asosan oʻzgartirish va (yoki) qoʻshimchalar kiritilayotgan grafalarning har biri hech qanday ajratib turuvchi belgilar qoʻyilmasdan alohida ajratilgan maydonchalarda koʻrsatiladi. Harfli grafalar lotin alifbosida qayd etilishi lozim;

v) BYDga kiritilayotgan oʻzgartirish va (yoki) qoʻshimchalar BYDning 5-grafasidagi tovarlar soniga taʼsir etsa yoki 32-grafasi oʻzgartirilayotgan boʻlsa bunday holatlarda grafada “60” kodi koʻrsatiladi;

g) Rasmiylashtirilgan bitta BYDdagi tovarlar bir nechta BYD bilan rasmiylashtirilishi lozim boʻlgan, BYD qismlarga boʻlinayotgan yoki aksi boʻlgan holatlarda “61” kodi koʻrsatiladi va “/” ajratish belgisi qoʻyilgan holda BYDning shartli tartib raqami (“1” raqamidan boshlab oʻsish tartibida) koʻrsatiladi.

Masalan bitta BYDdagi tovarlar boʻyicha ikkita BYD rasmiylashtirilishi lozim boʻlganda:

dastlab taqdim etiladigan BYDga “61/1”;

keyingi taqdim etiladigan BYDga “61/2” koʻrsatiladi.

BYD qismlarga boʻlinayotgan holatlarda birinchi qismga tegishli BYDning roʻyxat raqami dastlabki BYDning tartib raqami bilan bir xilda shakllanadi. Keyingi qismlarga tegishli BYDning roʻyxat raqami bojxona organi tomonidan shakllantiriladi;

d) BYDning grafalariga oʻzgartirish kiritilmasdan faqat BQDdagi maʼlumotlarga oʻzgartirish kiritilayotgan holatlarda grafada “62” kodi koʻrsatiladi.

6¹) “V” grafa. “Hisob-kitob tafsilotlari”.

Grafada rasmiylashtirilgan BYDni oʻzgartirish va (yoki) qoʻshimcha kiritish uchun undiriladigan bojxona yigʻimi koʻrsatiladi.

Bojxona yigʻimi BDTning formati va tuzilishidan kelib chiqib, Yoʻriqnomaning 13-ilovasidagi Bojxona toʻlovlari tasniflagichiga muvofiq “43” toʻlov kodi ostida koʻrsatiladi.

7. “D” grafa.

Grafa bojxona organi tomonidan toʻldiriladi va grafada bojxona organining BDTga nisbatan qabul qilgan qarori haqidagi bojxona organi belgilari (yozuvlari) koʻrsatiladi. Bojxona organi belgilari (yozuvlari) bojxona organi xodimining elektron raqamli imzosi bilan tasdiqlanadi.

86. BYDning asosiy varagʻiga yoki bitta tovariga oʻzgartirish va (yoki) qoʻshimchalar kiritish zarur boʻlganda, mazkur Nizomning 1-ilovasiga muvofiq BDTning asosiy varagʻi, BYDning bir nechta tovarlariga oʻzgartirish va (yoki) qoʻshimchalar kiritilayotganda esa BDTning asosiy varagʻiga qoʻshimcha ravishda mazkur Nizomning 2-ilovasiga muvofiq BDTning qoʻshimcha varagʻi taqdim etiladi.

BDT bojxona organlariga belgilangan format va tuzilishga muvofiq taqdim etilishi lozim.

87. Deklaratsiyalovchi shaxs BDTni oʻzining elektron raqamli imzosi bilan tasdiqlaydi va bojxona organlariga elektron shaklda TEDAAT orqali bojxona organiga yuboradi.

88. Deklarant tomonidan deklaratsiyalovchi shaxslar roʻyxatiga deklaratsiyalovchi shaxs yoki bojxona rasmiylashtiruvi boʻyicha mutaxassis yoxud boshqa shaxs toʻgʻrisidagi maʼlumotlar kiritilishi hamda uning bojxona organlariga BDTni taqdim etish vakolat muddati koʻrsatilishi kerak, bundan xorijiy davlatlarning diplomatik va konsullik muassasalari mustasno.

Agar BDT xorijiy davlatlarning diplomatik va konsullik vakolatxonalari nomidan taqdim etilsa bojxona rasmiylashtiruvi boʻyicha mutaxassis yoki boshqa shaxs toʻgʻrisidagi maʼlumotlar deklaratsiyalovchi shaxslar roʻyxatiga kiritilmaydi.

89. Bojxona organida asoslangan sabablarga koʻra, mazkur Nizomning 8-bandi ikkinchi xatboshisida nazarda tutilgan holatlar yuzaga kelib, bojxona maqsadlari uchun BYDga oʻzgartirish va (yoki) qoʻshimchalar kiritish zarurati mavjud boʻlganda, hududiy bojxona boshqarmasining ruxsati bilan BDT deklaratsiyalovchi shaxslar roʻyxatiga kiritilmagan deklaratsiyalovchi shaxs tomonidan taqdim etilishi mumkin.

Bunda elektron BYDning faqat 2 (shaxsning STIRi, yuridik manzili (jismoniy shaxsning doimiy yashash manzili) boʻyicha tuman (shahar) kodi), 8 (shaxsning STIRi, yuridik manzili (jismoniy shaxsning doimiy yashash manzili) boʻyicha tuman (shahar) kodi), 9 (shaxsning STIRi, yuridik manzili (jismoniy shaxsning doimiy yashash manzili) boʻyicha tuman (shahar) kodi), 11, 13, 15, 15a, 17, 17a, 18, 19, 20, 21, 23, 24, 25, 26, 29, 37 (birinchi ikkita raqamdan tashqari), 40, 41, 44, 46-grafalariga oʻzgartirish va (yoki) qoʻshimchalar kiritilishi mumkin, bundan hisoblangan bojxona toʻlovlariga yoki tashqi savdo kontrakti (shartnomasi, kelishuvini) maʼlumotlariga taʼsir etadigan holatlar mustasno.

90. Bojxona organlariga taqdim etilgan BDT dastlabki tekshiruvdan oʻtkaziladi. Bunda BDTda koʻrsatilgan BYDga oʻzgartirish va (yoki) qoʻshimchalar kiritish uchun bojxona organi tomonidan ruxsat berilganligi, BDTning formati va tuzilishi, delaratsiyalovchi shaxsning ERIsining haqiqiyligi, deklaratsiyalovchi shaxs deklaratsiyalovchi shaxslar roʻyxatida mavjudligi, deklaratsiyalovchi shaxslar roʻyxatiga kiritilmagan boʻlsa bu boʻyicha unga bojxona organi tomonidan ruxsat berilganligi bojxona organi tomonidan tekshiriladi. Dastlabki tekshiruvda xato va (yoki) kamchilik aniqlanmasa BDT roʻyxatga olinadi.

91. Dastlabka tekshiruvda xato va (yoki) kamchiliklar aniqlansa BDT bojxona organi tomonidan qaytariladi va bu haqda deklaratsiyalovchi shaxsga axborot almashish tizimi orqali axborot yuboriladi.

92. BDT roʻyxatga olingandan soʻng:

BDT roʻyxatga olinib, rasmiylashtirilmagan BYDga oʻzgartirish va (yoki) qoʻshimchalar kiritish uchun taqdim etilgan boʻlsa — uni rasmiylashtirish BYD rasmiylashtirilgunga qadar amalga oshiriladi;

BDT rasmiylashtirilgan BYDga oʻzgartirish va (yoki) qoʻshimchalar kiritish uchun taqdim etilgan boʻlsa — uch ish kuni ichida rasmiylashtiriladi.

93. BDT rasmiylashtirilgandan soʻng u orqali avtomatlashgan holda bojxona organlarining axborot tizimi tomonidan BYDga tegishli oʻzgartirish va (yoki) qoʻshimchalar kiritiladi.

BYDga tegishli oʻzgartirish va (yoki) qoʻshimchalar kiritish jarayonida bojxona organi tomonidan uning “D” grafasida rasmiylashtirilgan BDTning roʻyxat raqami qayd etiladi.

94. BDT roʻyxatga olingandan soʻng rasmiylashtirilgunga qadar bojxona organi tomonidan xato va (yoki) kamchilik aniqlansa BDT bojxona organi tomonidan qaytariladi va bu xaqda deklaratsiyalovchi shaxsga axborot almashish tizimi orqali xabar yuboriladi.

Xabarnomada BDTdagi xato va (yoki) kamchiliklar, qaytarilgan BDTning oʻrniga yangi BDTni taqdim etish muddati ham bayon etiladi.

95. Deklaratsiyalovchi shaxs xabardor etilgan vaqtdan boshlab bir ish kuni davomida qaytarilgan BDTning oʻrniga yangi BDTni taqdim etishi lozim.

96. Deklaratsiyalovchi shaxs tomonidan roʻyxatga olinib, rasmiylashtirilmagan BYD boʻyicha bojxona organiga:

yangi BDT belgilangan muddatda taqdim etiladigan boʻlsa — bojxona organi taqdim etilgan yangi BDTni mazkur Nizom talablari asosida roʻyxatga oladi va dastlabki tekshiruvdan oʻtkazadi.

yangi BDT bir ish kuni davomida taqdim etilmaydigan boʻlsa — BYDga oʻzgartirish va (yoki) qoʻshimcha kiritish uchun BDT taqdim etilmagan deb hisoblanadi va BYD bekor qilinadi, mazkur Nizomning 26-bandida belgilangan holatlar bundan mustasno.

97. Bojxona organi deklarant yoki deklaratsiyalovchi shaxs tomonidan koʻrsatilgan sabablarni asosli deb topsa, BDT rasmiylashtirilgunga qadar murojaat qilgan deklarant yoki deklaratsiyalovchi shaxs tomonidan qaytarib olinishi mumkin.

98. BDT rasmiylashtirilgandan soʻng BYDning ajralmas qismi boʻlib hisoblanadi va unda xato va (yoki) kamchilik aniqlangan taqdirda uni tuzatish yangi BDTni taqdim etish hamda rasmiylashtirish orqali amalga oshiriladi, bundan BDTning 10, 14, 28, 50, 54 va “V” grafasidagi BDTga oid maʼlumotlarga oʻzgartirish va (yoki) qoʻshimcha kiritish bilan bogʻliq holatlar mustasno.

98^1. Rasmiylashtirilgan BDTning 10, 14, 28, 50, 54 va “V” grafasidagi BDTga oid maʼlumotlarga oʻzgartirish va (yoki) qoʻshimcha kiritish deklarantning arizasiga koʻra hududiy bojxona boshqarmasining ruxsati bilan yoki bojxona organining talabi asosida amalga oshiriladi. Bunda deklaratsiyalovchi shaxs tomonidan bojxona organiga yangi BDTning 7a-grafasida oʻzgartirish va (yoki) qoʻshimcha kiritish kerak boʻlgan BDTning roʻyxat raqamini koʻrsatgan holda taqdim etiladi.

Bojxona organi tomonidan taqdim etilgan BDTni rasmiylashtirish oʻzgartirish va (yoki) qoʻshimcha kiritish lozim boʻlgan BDTni qaytarish orqali mazkur Nizomning 91-92-bandlarida belgilangan talablar asosida amalga oshiriladi.

99. BYDga rasmiylashtirilgan BDTdagi xato va (yoki) kamchiliklarni bartaraf etish mazkur Nizomga muvofiq rasmiylashtirilgan elektron BYDga oʻzgartirish va (yoki) qoʻshimcha kiritishga qoʻyilgan talablar asosida amalga oshiriladi.

100. Bitta tovar yuzasidan takroran qabul qilingan BYDlarni bekor qilish yoki qaytarib olishda nisbatan xavf darajalari past boʻlgan BYDlar bekor qilinadi yoki qaytariladi.

Agar bitta tovar yuzasidan qabul qilingan BYDlarning xavf darajalari bir xil boʻlsa, ularning roʻyhatga olingan vaqti boʻyicha oxirgilari bekor qilinadi yoki qaytariladi.

101. TEDAATda bojxona organlari va deklaratsiyalovchi shaxslar oʻrtasida axborot almashish tizimi orqali xabarlar bilan almashish va bu orqali tegishli hujjatlarni taqdim etish va qabul qilib olish imkoniyati Bojxona qoʻmitasi tomonidan taʼminlanadi.

102. Bojxona qoʻmitasi deklaratsiyalovchi shaxslarga TEDAAT va Bojxona qoʻmitasi tomonidan koʻrsatiladigan interaktiv xizmatlar orqali taqdim etilgan BDT hamda oʻzgartirish va (yoki) qoʻshimchalar kiritilgan BYDni yuklab olish, qogʻoz shaklini chop etish huquqi va imkoniyatini taʼminlaydi.

103. Qaytarib olingan yoki bekor qilingan BYDning 7-grafasidagi roʻyxat raqami hamda 54-grafasida deklaratsiyalovchi shaxs tomonidan BYDga berilgan raqamni boshqa BYDga berish taqiqlanadi.

103^1. Deklarant yoki deklaratsiyalovchi shaxs bojxona rasmiylashtiruvi jarayonida va undan soʻng bojxona organlari tomonidan BYD va BDTlarda qoidabuzarliklar aniqlangunga qadar bojxona toʻlovlarining hisoblashga yoki taqiq, cheklovlarning qoʻllanilishiga taʼsir etmaydigan qoidabuzarliklarni ixtiyoriy ravishda bojxona organi ruxsati bilan tuzatish huquqiga ega, bundan deklarant yoki deklaratsiyalovchi shaxsning murojaatiga asosan mazkur Nizomda BYDni oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish taqiqlangan holatlar mustasno.

104. Deklarant bojxona postining yoki hududiy bojxona boshqarmasining BYDga oʻzgartirish va (yoki) qoʻshimcha kiritish, uni qayta rasmiylashtirish, qaytarib olish yoki bekor qilish boʻyicha xati yuzasidan eʼtiroz bildirib yuqori turuvchi bojxona organiga yoki sudga shikoyat qilishga haqli.

105. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

106. Mazkur Nizom Oʻzbekiston Respublikasi Savdo-sanoat palatasi bilan kelishilgan.