toggle_night_mode
Hujjat kuchini yo‘qotgan 28.12.2023
Oʻzbekiston Respublikasi Veterinariya va chorvachilikni rivojlantirish davlat qoʻmitasining
Qarori
Qorakoʻlchilik subyektlariga subsidiya berish tartibi toʻgʻrisidagi nizomni tasdiqlash haqida
[Oʻzbekiston Respublikasi Adliya vazirligi tomonidan 2020 yil 24-yanvarda roʻyxatdan oʻtkazildi, roʻyxat raqami 3213]
 LexUZ sharhi
Mazkur qaror Oʻzbekiston Respublikasi qishloq xoʻjaligi vazirining 2023-yil 15-dekabrdagi 1-sonli ““Qorakoʻlchilik subyektlariga subsidiya berish tartibi toʻgʻrisidagi nizomni tasdiqlash haqida”gi qarorni oʻz kuchini yoʻqotgan deb topish toʻgʻrisida”gi buyrugʻiga (roʻyxat raqami 3213-1, 26.12.2023-y.) asosan oʻz kuchini yoʻqotgan.
Oʻzbekiston Respublikasi Prezidentining 2019-yil 16-avgustdagi PQ-4420-son “Qorakoʻlchilik tarmogʻini kompleks rivojlantirish chora-tadbirlari toʻgʻrisida”gi qarori ijrosini taʼminlash maqsadida Oʻzbekiston Respublikasi Veterinariya va chorvachilikni rivojlantirish davlat koʻmitasi qaror qiladi.
1. Qorakoʻlchilik subyektlariga subsidiya berish tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Rais B. NORQOBILOV
Toshkent sh.,
2019-yil 20-dekabr,
14-son
Oʻzbekiston Respublikasi Veterinariya va chorvachilikni rivojlantirish davlat qoʻmitasining 2019-yil 20-dekabrdagi 14-son qaroriga
ILOVA
Qorakoʻlchilik subyektlariga subsidiya berish tartibi toʻgʻrisidagi
NIZOM
Ushbu Nizom Oʻzbekiston Respublikasi Prezidentining 2019-yil 16-avgustdagi PQ-4420-son “Qorakoʻlchilik tarmogʻini kompleks rivojlantirish chora-tadbirlari toʻgʻrisida”gi qaroriga asosan qorakoʻlchilik subyektlariga subsidiya berish tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
subsidiya — eksportbop qorakoʻl va qorakoʻlcha teri yetishtirib, eksportga yoʻnaltiruvchi qorakoʻlchilik subyektlariga Oʻzbekiston Respublikasi Davlat budjetidan beriladigan moliyaviy yordam;
qorakoʻlchilik subyektlari — qorakoʻl qoʻylarini parvarish qiluvchi va ulardan qorakoʻl va qorakoʻlcha teri yetishtirish bilan shugʻullanuvchi masʼuliyati cheklangan jamiyatlar va fermer xoʻjaliklari;
qorakoʻl teri — qorakoʻl zotiga mansub ona (sovliq) qoʻylardan tugʻilgan qoʻzilardan olinadigan xomashyo;
qorakoʻlcha teri — asosiy podaga yaroqsiz ona (sovliq) qoʻylarni boʻrdoqiga boqib, urugʻlantirib boʻgʻozlikning 130 — 135 kunligida soʻyilishi natijasida olinadigan xomashyo.
2. Ushbu Nizom talablari 2019 — 2023-yillarda qorakoʻl va qorakoʻlcha teri yetishtirib, eksportga sotadigan qorakoʻlchilik subyektlariga nisbatan tatbiq etiladi.
3. Subsidiyalarni ajratish Oʻzbekiston Respublikasi Davlat budjeti mablagʻlari hisobidan amalga oshiriladi.
4. Qorakoʻl va qorakoʻlcha terini oʻzida yetishtirmasdan aholi va boshqa qorakoʻlchilik subyektlaridan xarid qilgan yoki qorakoʻl va qorakoʻlcha terini eksportga yoʻnaltirmagan qorakoʻlchilik subyektlariga subsidiya ajratilmaydi.
2-bob. Subsidiya ajratish shartlari
5. Qorakoʻl va qorakoʻlcha teri yetishtirib, eksportga yoʻnaltiruvchi qorakoʻlchilik subyektlari subsidiya oluvchilar hisoblanadi.
6. Qorakoʻl va qorakoʻlcha teri yetishtirib, eksportga sotgan qorakoʻlchilik subyektlariga har moliya yilida keyingi moliya yiliga qadar Oʻzbekiston Respublikasi Davlat budjetidan quyidagi miqdorda bir martalik subsidiya ajratiladi:
qorakoʻlchilik subyektlarida yetishtirib, eksportga sotilgan har bir dona qorakoʻl terisi uchun 50 ming soʻmdan;
qorakoʻlchilik subyektlarida yetishtirib, eksportga sotilgan har bir dona qorakoʻlcha terisi uchun 75 ming soʻmdan.
7. Qorakoʻlchilik subyektlariga subsidiya mazkur Nizomning 1-ilovasiga muvofiq sxema asosida beriladi.
8. Subsidiya eksportbop qorakoʻl va qorakoʻlcha teri yetishtirish uchun sarflangan xarajatlarining bir qismini qoplashga yoʻnaltiriladi.
3-bob. Subsidiya berish uchun taqdim etiladigan hujjatlar va ularni koʻrib chiqish tartibi
9. Qorakoʻlchilik subyektlari Oʻzbekiston Respublikasi Veterinariya va chorvachilikni rivojlantirish davlat qoʻmitasiga (bundan buyon matnda Qoʻmita deb yuritiladi) subsidiya ajratishni soʻrab mazkur Nizomning 2-ilovasiga muvofiq shaklda ariza topshiradi. Arizaga quyidagi hujjatlar ilova qilinadi:
tuman statistika boʻlimi tomonidan berilgan mavjud qorakoʻl qoʻylar bosh soni va yetishtirilgan qorakoʻl va qorakoʻlcha teri soni toʻgʻrisida maʼlumotnoma;
qorakoʻl va qorakoʻlcha terini eksport qilish boʻyicha eksport shartnomasi hamda eksportga yuborilgan mahsulotlar uchun hisob-faktura hujjatlari nusxalari;
qorakoʻl va qorakoʻlcha terini eksport qilganligi toʻgʻrisida bojxona yuk deklaratsiyasi nusxasi.
10. Arizachi taqdim etilgan hujjatlarning ishonchliligi va qonunchilik hujjatlariga muvofiqligi uchun javobgar hisoblanadi.
(10-band Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)
11. Qorakoʻlchilik subyektlaridan mazkur Nizomning 9-bandida nazarda tutilgan hujjatlardan tashqari boshqa hujjatlarni talab qilish taqiqlanadi.
12. Ariza va unga ilova qilingan hujjatlar Qoʻmitaga bevosita, pochta aloqasi vositalari orqali yoki elektron shaklda taqdim etiladi.
13. Ariza va unga ilova qilingan hujjatlar qorakoʻlchilik subyekti tomonidan Qoʻmitaga bevosita taqdim etilganda, ushbu Nizomning 9-bandida qayd etilgan hujjatlar toʻliq boʻlmasa, ariza koʻrib chiqish uchun qabul qilinmaydi.
14. Ariza va unga ilova qilingan hujjatlar Qoʻmitaga qorakoʻlchilik subyekti tomonidan pochta aloqasi orqali yoki elektron shaklda taqdim etilganda, ushbu Nizomning 9-bandida qayd etilgan hujjatlar toʻliq taqdim etilmagan boʻlsa, Qoʻmita ariza kelib tushgan sanadan boshlab bir ish kuni ichida qorakoʻlchilik subyektiga hujjatlarni tegishli javob xati bilan qaytaradi.
15. Mazkur Nizomning 9-bandida qayd etilgan hujjatlar toʻliq taqdim etilganda, Qoʻmita ariza kelib tushgan sanadan boshlab uch ish kuni ichida taqdim etilgan hujjatlar asosida qorakoʻlchilik xoʻjaliklarida yetishtirilgan hamda eksportga yoʻnaltirilgan qorakoʻl va qorakoʻlcha teri sonini oʻrganadi hamda quyidagi xulosalardan birini qabul qiladi:
subsidiya berish toʻgʻrisida — bu haqda arizachiga bir ish kuni ichida bildirishnoma yuboriladi;
subsidiya berishni rad etish toʻgʻrisida — bu haqda arizachiga bir ish kuni ichida sabablari koʻrsatilgan holda bildirishnoma yuboriladi.
16. Subsidiya berish toʻgʻrisidagi xulosada subsidiya summasi va uni ajratish muddati koʻrsatilishi zarur.
17. Qoʻmita qorakoʻlchilik subyekti tomonidan taqdim etilgan hujjatlarni vakolatli davlat organlariga tegishli soʻrovnomalar yuborish orqali oʻrganib chiqadi.
18. Qorakoʻlchilik subyektiga subsidiya ajratishni rad etish uchun quyidagilar asos boʻladi:
qorakoʻlchilik subyekti mazkur Nizomda belgilangan shartlarga mos kelmasa;
qorakoʻlchilik subyekti tomonidan taqdim etilgan hujjatlarda mazkur Nizomning 15-bandiga asosan oʻrganish natijasida soxta hujjatlar taqdim etilganligi yoki notoʻgʻri maʼlumotlar mavjudligi yoxud maʼlumotlarni buzib koʻrsatish holatlari aniqlanganda.
19. Mazkur Nizomning 18-bandida qayd etilganidan boshqa holatlarga koʻra subsidiya ajratishni rad etishga yoʻl qoʻyilmaydi.
20. Qorakoʻlchilik subyektlari Qoʻmita tomonidan subsidiya berishni rad etish toʻgʻrisida bildirishnoma yuborilgan kundan boshlab koʻrsatilgan kamchiliklarni bartaraf etgan holda subsidiya olish uchun Qoʻmitaga ariza bilan qayta murojaat qilishlari mumkin.
Bunda arizalar Qoʻmita tomonidan ikki ish kuni mobaynida koʻrib chiqiladi.
21. Qorakoʻlchilik subyekti subsidiya ajratilishini rad etish toʻgʻrisidagi xulosadan norozi boʻlgan taqdirda, oʻrnatilgan tartibda sudga shikoyat qilish huquqiga ega.
4-bob. Subsidiya toʻlovini amalga oshirish tartibi
22. Qoʻmita subsidiya berish toʻgʻrisida xulosa qabul qilingandan soʻng bir ish kuni ichida Oʻzbekiston Respublikasi Moliya vazirligiga subsidiya berish toʻgʻrisida buyurtmanomani taqdim etadi.
23. Oʻzbekiston Respublikasi Moliya vazirligi bir ish kuni ichida buyurtmanomada koʻrsatilgan mablagʻlarni Qoʻmitaning maxsus shaxsiy gʻazna hisobvaragʻiga oʻtkazib beradi.
24. Qoʻmitaning maxsus shaxsiy gʻazna hisobvaragʻiga kelib tushgan mablagʻlar bir ish kuni ichida subsidiya oluvchilarning tijorat banklaridagi hisob raqamiga oʻtkazib berilishi lozim.
25. Moliya yili yakuni boʻyicha Qoʻmitaning maxsus shaxsiy gʻazna hisobvaragʻida foydalanilmay qolgan budjet mablagʻlari Oʻzbekiston Respublikasi Davlat budjetiga qaytariladi.
26. Subsidiya ajratilgan eksportyorlarning reyestri Qoʻmita tomonidan yuritib boriladi.
27. Reyestrdagi maʼlumotlar oʻzgargan hollarda, Qoʻmita tomonidan tegishli oʻzgartirishlar uch ish kuni ichida kiritilishi lozim.
28. Qoʻmita maʼlumotlarning Reyestrga toʻgʻri, oʻz vaqtida kiritilishi va yangilanib borilishiga masʼul hisoblanadi.
5-bob. Yakuniy qoidalar
29. Qorakoʻl va qorakoʻlcha teri yetishtirib, eksportga sotgan qorakoʻlchilik subyektlariga ajratilgan subsidiyalarni nazorat qilish Oʻzbekiston Respublikasi Moliya vazirligining Davlat moliyaviy nazorati departamenti tomonidan amalga oshiriladi.
30. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.
(30-band Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)
31. Mazkur Nizom Oʻzbekiston Respublikasi Moliya vazirligi, Iqtisodiyot va sanoat vazirligi, Savdo-sanoat palatasi, Oʻzbekiston fermer, dehqon xoʻjaliklari va tomorqa yer egalari Kengashi hamda Respublika “Qorakoʻlchilik” uyushmasi bilan kelishilgan.
Moliya vaziri D. KUChKAROV
2019-yil 20-dekabr
Iqtisodiyot va sanoat vaziri B. XODJAYEV
2019-yil 20-dekabr
Savdo-sanoat palatasi raisi A. IKRAMOV
2019-yil 20-dekabr
Oʻzbekiston fermer, dehqon xoʻjaliklari va tomorqa yer egalari Kengashi raisi A. XAITOV
2019-yil 20-dekabr
Respublika “Qorakoʻlchilik” uyushmasi raisi N. YOʻLDOShEV
2019-yil 20-dekabr
Qorakoʻlchilik subyektlariga subsidiya berish tartibi toʻgʻrisidagi nizomga
1-ILOVA
Qorakoʻlchilik subyektlariga subsidiya berish
SXEMASI

Bosqichlar

Masʼul ijrochilar

Tadbirlar

Bajarish muddatlari

1-bosqich

Qorakoʻlchilik subyektlari

Subsidiya olishda talab etiladigan barcha zarur hujjatlarni ariza bilan Oʻzbekiston Respublikasi Veterinariya va chorvachilikni rivojlantirish davlat qoʻmitasiga topshirish.

Yil davomida

2-bosqich

Oʻzbekiston Respublikasi Veterinariya va chorvachilikni rivojlantirish davlat qoʻmitasi

1. Qorakoʻlchilik subyekti tomonidan pochta aloqasi orqali yoki elektron shaklda hujjatlar toʻliq taqdim etilmagan boʻlsa, ularni javob xati bilan qaytarish.

1 ish kuni ichida

2. Qorakoʻlchilik subyekti tomonidan hujjatlar toʻliq taqdim etilganda ularni oʻrganib chiqish.

3 ish kuni ichida

3-bosqich

Oʻzbekiston Respublikasi Veterinariya va chorvachilikni rivojlantirish davlat qoʻmitasi

1. Oʻrganish natijasida qabul qilingan xulosa asosida arizachiga bildirishnoma yuborish.

2. Oʻzbekiston Respublikasi Moliya vazirligiga subsidiya berish toʻgʻrisida buyurtmanoma berish.

xulosa qabul qilingan kundan boshlab 1 ish kuni ichida

4-bosqich

Oʻzbekiston Respublikasi Moliya vazirligi

Oʻzbekiston Respublikasi Veterinariya va chorvachilikni rivojlantirish davlat qoʻmitasining buyurtmanomasiga asosan Oʻzbekiston Respublikasi Davlat budjetidan subsidiya berish.

buyurtmanoma qabul qilingan kundan boshlab
1 ish kuni ichida

5-bosqich

Oʻzbekiston Respublikasi Veterinariya va chorvachilikni rivojlantirish davlat qoʻmitasi

Tegishli toʻlov summasini qorakoʻlchilik subyektining arizasida koʻrsatilgan bank hisob raqamiga oʻtkazish.

maxsus gʻazna hisobvaragʻiga mablagʻ kelib tushgandan
boshlab 1 ish kuni ichida

Qorakoʻlchilik subyektlariga subsidiya berish tartibi toʻgʻrisidagi nizomga
2-ILOVA
‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Oʻzbekiston Respublikasi Veterinariya va chorvachilikni rivojlantirish davlat qoʻmitasiga _______________________dan

‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

(qorakoʻlchilik subyektning nomi)

‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Ariza

_______________________________________________ (qorakoʻlchilik subyektning nomi) tomonidan yetishtirilib, ______________________ga (mamlakat nomi) umumiy qiymati _______________________ (valyuta)ga teng, TIF TN kodi ____________________ boʻlgan _____________________ (mahsulotning nomi) mahsulot(lar) eksport qilindi.

Oʻzbekiston Respublikasi Prezidentining 2019-yil 16-avgustdagi PQ-4420-son qarorining 5-bandiga asosan ___________________________________________ tomonidan (qorakoʻlchilik subyektning nomi) yetishtirilib, eksport qilingan ____ dona ___________________ terisi (mahsulotning nomi) uchun Oʻzbekiston Respublikasi Davlat budjetidan subsidiya ajratilishini koʻrib chiqishingizni va tegishli mablagʻlarni ______________________________ (tijorat bankining nomi) tijorat bankining ______________________________ (hududning nomi) filialidagi _____________________________ hisob raqamiga oʻtkazib berishingizni soʻrayman.

‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Arizaga quyidagi hujjatlar ilova qilindi:

1) taʼsis hujjatlari (ustav va taʼsis shartnomasi) va qorakoʻlchilik subyektining davlat roʻyxatidan oʻtganligi toʻgʻrisidagi guvohnoma nusxalari;

2) tuman statistika boʻlimi tomonidan berilgan mavjud qorakoʻl qoʻylar bosh soni va yetishtirilgan qorakoʻl va qorakoʻlcha teri soni toʻgʻrisida maʼlumotnoma;

3) qorakoʻl va qorakoʻlcha terini eksport qilish boʻyicha eksport shartnomasi hamda eksportga yuborilgan mahsulotlar uchun hisob-faktura hujjatlari nusxalari;

4) qorakoʻl va qorakoʻlcha terini eksport qilganligi toʻgʻrisida bojxona yuk deklaratsiyasi nusxasi.

‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

_______________________ rahbari _______________________________________________________ (F.I.O.)

Bogʻlanish uchun telefon: +998 (____)______________

____________________________________________________(imzo)

(Qonun hujjatlari maʼlumotlari milliy bazasi, 24.01.2020-y., 10/20/3213/0078-son; Qonunchilik maʼlumotlari milliy bazasi, 28.07.2021-y., 10/21/3313/0724-son)