1.12.00.00.00 Axborot va axborotlashtirish / 12.03.00.00 Axborot resurslari. Axborot resurslaridan foydalanish / 12.03.08.00 Axborotni taqdim qilish. Axborot xizmatlari]
[TSZ:
1.Iqtisodiyot / Aloqa]
O‘zbekiston Respublikasi Vazirlar Mahkamasining
qarori
“ZiyoNET” tarmog‘i axborot resurslarining yagona reyestri to‘g‘risidagi nizomni tasdiqlash haqida
“ZiyoNET” ta’lim axborot tarmog‘i faoliyatini yanada takomillashtirish, umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar), oliy ta’lim muassasalari, yoshlar tashkilotlari, axborot-kutubxona muassasalari, muzeylar va boshqa ta’lim, ilmiy va madaniy-ma’rifiy muassasalarning “ZiyoNET” tarmog‘idan foydalanish sifatini yaxshilash va oshirish maqsadida Vazirlar Mahkamasi qaror qiladi:
1. “ZiyoNET” tarmog‘i axborot resurslarining yagona reyestri to‘g‘risidagi nizom 1-ilovaga muvofiq tasdiqlansin.
[OKOZ:
1.21.00.00.00 O‘zgartirish va qo‘shimchalar kiritish bo‘yicha kompleks tusdagi hujjatlar / 21.03.00.00 O‘zbekiston Respublikasi Vazirlar Mahkamasining qarorlari]
2. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirishlar kiritilsin.
3. Mazkur qarorning bajarilishini nazorat qilish O‘zbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov zimmasiga va O‘zbekiston Respublikasi Vazirlar Mahkamasining Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini ta’minlash masalalari kotibiyatiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2019-yil 28-noyabr,
955-son
Vazirlar Mahkamasining 2019-yil 28-noyabrdagi 955-son qaroriga 1-ILOVA
“ZiyoNET” tarmog‘i axborot resurslarining yagona reyestri to‘g‘risida
NIZOM
1-bob. Umumiy qoidalar
1. Mazkur Nizom “ZiyoNET” tarmog‘i axborot resurslarining yagona reyestrini (keyingi o‘rinlarda Yagona reyestr deb ataladi) shakllantirish va yuritish, shuningdek, maktabgacha ta’lim muassasalari, umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar), oliy ta’lim muassasalari, yoshlar tashkilotlari, axborot-kutubxona muassasalari, muzeylar va boshqa ta’lim, ilmiy hamda madaniy-ma’rifiy tashkilotlarning (keyingi o‘rinlarda foydalanuvchilar deb ataladi) undan foydalanish tartibini belgilaydi.
2. Yagona reyestrda “ZiyoNET” tarmog‘iga ulangan obyektlarga foydalanish huquqi bilan taqdim etiladigan saytlar va axborot resurslarining jamlanma ro‘yxati shakllantiriladi.
3. Yagona reyestrning axborot resurslaridan foydalanish ulanish huquqi “O‘zbektelekom” AK (keyingi o‘rinlarda operator deb ataladi) tomonidan beriladi.
4. Yagona reyestrdagi axborot resurslarining ro‘yxatidan keyinchalik boshqa operatorlar va provaydyerlar tomonidan bolalar va yoshlar uchun mo‘ljallangan “xavfsiz internet” xizmatlarini joriy etish orqali foydalanilishi mumkin.
5. Yagona reyestrning faoliyat ko‘rsatishini ta’minlash, uni onlayn rejimda yuritish bo‘yicha tashkiliy-texnik ishlar O‘zbekiston Respublikasi Xalq ta’limi vazirligi huzuridagi Xalq ta’limi sohasida axborot-kommunikatsiya texnologiyalarini rivojlantirish markazi (keyingi o‘rinlarda Markaz deb ataladi) tomonidan amalga oshiriladi.
6. Mazkur Nizomda quyidagi asosiy tushunchalardan foydalaniladi:
axborot resursi — elektron ko‘rinishdagi axborot, ma’lumotlar banki, axborot tizimi tarkibidagi ma’lumotlar bazasi;
“ZiyoNET” tarmog‘i axborot resurslarining yagona reyestri — “ZiyoNET” tarmog‘iga ulangan, obyektlarga foydalanish uchun taqdim etiladigan butunjahon Internet axborot tarmog‘idagi ilmiy-ta’lim, ma’naviyat va tarbiya yo‘nalishlaridagi saytlar va resurslarning tizimlashtirilgan jamlanma ro‘yxati. Reyestr butunjahon Internet axborot tarmog‘idagi xorijiy va milliy segmentlarning axborot resurslaridan, shu jumladan davlat organlarining axborot resurslaridan shakllantiriladi;
“ZiyoNET” tarmog‘iga ulangan obyektlar — “ZiyoNET” tarmog‘iga ulangan maktabgacha ta’lim muassasalari, umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar), oliy ta’lim muassasalari, yoshlar tashkilotlari, axborot-kutubxona muassasalari, muzeylar va boshqa ta’lim, ilmiy hamda madaniy-ma’rifiy tashkilotlar;
obyektlarni “ZiyoNET” tarmog‘iga ulash operatori — “O‘zbektelekom” AK nomidan Yagona reyestr axborot resurslaridan maxsus tariflarda foydalanish huquqini berishni tashkil etadigan operator;
Yagona reyestrni shakllantiruvchi ishchi guruh (keyingi o‘rinlarda Ishchi guruh deb ataladi) — Yagona reyestrga kiritish uchun axborot resurslarini yig‘ish, qayta ishlash va shakllantirish bo‘yicha Markaz xodimlaridan va Maktabgacha ta’lim vazirligi, Xalq ta’limi vazirligi, Oliy va o‘rta-maxsus ta’lim vazirligi, O‘zbekiston Yoshlar ittifoqi, Respublika ma’naviyat va ma’rifat markazining bittadan mas’ul xodimlaridan (jamoatchilik asosida) tashkil etiladigan guruh. Ishchi guruhga Markaz direktori rahbarlik qiladi;
Yagona reyestrni shakllantiruvchi ekspert komissiyasi (keyingi o‘rinlarda Ekspert komissiyasi deb ataladi) — Maktabgacha ta’lim vazirligi, Xalq ta’limi vazirligi, Oliy va o‘rta-maxsus ta’lim vazirligi, O‘zbekiston yoshlar ittifoqi, Respublika ma’naviyat va ma’rifat markazining bittadan rahbar xodimlaridan iborat vakillari (jamoatchilik asosda ish ko‘radigan) tarkibidagi Yagona reyestrning axborot resurslarini baholash komissiyasi;
Yagona reyestrni shakllantiradigan axborot tizimi — Yagona reyestrni shakllantirish uchun mo‘ljallangan, axborot resurslarini yig‘ish va baholash imkoniyatlarini o‘z ichiga oladigan, shuningdek, Yagona reyestrni shakllantirish doirasida tegishli mutaxassislarning o‘zaro munosabatlarini va faoliyatini ta’minlovchi dasturiy-apparat tizimi;
“ZiyoNET” portalidagi Yagona reyestr katalogi — “ZiyoNET” portalida (www.ziyonet.uz) Yagona reyestrning axborot resurslari ro‘yxatini e’lon qilish uchun mo‘ljallangan maxsus bo‘lim;
Ommaviy kommunikatsiyalar masalalari bo‘yicha markaz — “ZiyoNET” tarmog‘idagi axborot resurslarinining muntazam tizimli monitoringini tashkil etish va amalga oshirishni ta’minlovchi O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Ommaviy kommunikatsiyalar masalalari bo‘yicha markazi.
2-bob. Yagona reyestrni yuritish maqsadlari va vazifalari
7. Yagona reyestr “ZiyoNET” tarmog‘iga ulangan obyektlarda tarmoqdan foydalanish samaradorligini oshirish, ma’naviy barkamol va intellektual rivojlangan shaxsni tarbiyalashga ko‘maklashadigan axborot resurslarining ro‘yxatini shakllantirish orqali yoshlarni butunjahon Internet axborot tarmog‘idagi buzg‘unchi mazmundagi resurslarning salbiy ta’siridan himoya qilishni ta’minlash maqsadida yaratilgan.
8. Quyidagilar Yagona reyestrning asosiy vazifalari hisoblanadi:
yoshlar uchun foydali va bilim olishlari uchun mo‘ljallangan milliy va xorijiy axborot resurslari bazasini shakllantirish, uni dolzarb talablardan kelib chiqqan holda doimiy ravishda to‘ldirib borish va yangilab turilishini ta’minlash;
“ZiyoNET” tarmog‘iga ulangan obyektlarda Yagona reyestr resurslaridan foydalanish huquqini berish;
“ZiyoNET” tarmog‘iga ulangan obyektlarda butunjahon Internet axborot tarmog‘ining resurslaridan foydalanish samaradorligini oshirish.
3-bob. Yagona reyestrni shakllantirish bo‘yicha mas’ullar
9. Yagona reyestrni shakllantirish va uning keyingi faoliyat ko‘rsatishi quyidagi mas’ullarning muntazam o‘zaro hamkorligi orqali ta’minlanadi:
Ishchi guruh;
Ekspert komissiyasi;
Ommaviy kommunikatsiyalar masalalari bo‘yicha markaz.
Yagona reyestr ushbu Nizomga ilovadagi sxemaga muvofiq shakllantiriladi.
10. Quyidagilar Ishchi guruhning asosiy vazifalari hisoblanadi:
Axborot resurslarini Yagona reyestrga kiritish uchun foydalanuvchilarning takliflarini yig‘ish va hisobini yuritish, shuningdek ularning ushbu Nizomning 20-bandida ko‘rsatib o‘tilgan mezonlarga muvofiqligini ko‘rib chiqish;
yoshlarning ma’naviy, intellektual va shaxs sifatida rivojlanishiga yo‘naltirilgan, yoshlar uchun foydali bo‘lgan va bilim olishlariga yordam beradigan axborot resurslarini qidirish;
saytni Yagona reyestrga kiritish uchun (“ZiyoNET” portalidagi shaklga muvofiq) tavsiyalarni tayyorlash;
foydalanuvchilarning murojaatlari bilan ishlash, ular bo‘yicha javoblarni tayyorlash va taqdim etish.
11. Ekspert komissiyasi 5 kishidan iborat tarkibda tuziladi.
12. Ekspert komissiyasining barcha a’zolari teng huquqlidir.
Zaruratga ko‘ra, manfaatdor vazirliklar va idoralar rahbariyatining murojaati asosida Ekspert komissiyasi a’zolarining tarkibiga o‘zgartirishlar kiritilishi mumkin.
13. Quyidagilar Ekspert komissiyasining asosiy vazifalari hisoblanadi:
taklif etilgan axborot resurslarining tahlilini, ma’qullanishini yoki rad etilishini o‘z vaqtida amalga oshirish;
zaruratga ko‘ra, ayrim resurslarni ma’qullash yoki rad etish sabablari bo‘yicha qabul qilingan qarorlarni asoslash;
Yagona reyestrni shakllantirishning yangi usullarini va mexanizmlarini joriy etish hamda mavjudlarini takomillashtirishga doir takliflar tayyorlash.
14. Quyidagilar Ommaviy kommunikatsiyalar masalalari bo‘yicha markazning vazifalari hisoblanadi:
Yagona reyestr axborot resurslarining muntazam monitoringini amalga oshirish;
ushbu Nizomning 24-bandida ko‘rsatib o‘tilgan hollarda axborot resursini Yagona reyestrdan chiqarish to‘g‘risidagi hujjatlarni tayyorlash, shuningdek, saytdagi qoidabuzarlik to‘g‘risidagi xabarlarni belgilangan tartibda yuborish.
4-bob. Yagona reyestrni shakllantiradigan axborot tizimi
15. Yagona reyestr axborot resurslari Yagona reyestrni shakllantiradigan axborot tizimida shakllantiriladi.
16. Ishchi guruh va Ekspert komissiyasining a’zolariga, shuningdek, Ommaviy kommunikatsiyalar masalalari bo‘yicha markazning mas’ul mutaxassislariga Yagona reyestrni shakllantiradigan axborot tizimidan foydalanish huquqi beriladi.
Tizimga login va parol yordamida kiriladi.
17. Axborot tizimida Ishchi guruhning har bir a’zosi ushbu Nizomning 10-bandiga va Ekspert komissiyasining har bir a’zosi esa 13-bandiga muvofiq xatti-harakatlarni bajaradi.
18. Yagona reyestrga kiritilgan axborot resurslarining ro‘yxati tizimning barcha foydalanuvchilari uchun “ZiyoNET” portalining “Saytlar” bo‘limida e’lon qilinadi. Yagona reyestrdan chiqarilgan axborot resurslarining ro‘yxati boshqa foydalanuvchilar tomonidan saytning takror tavsiya qilinishining oldini olish uchun arxivda saqlanadi.
19. Axborot tizimidan foydalanish bo‘yicha maxsus yo‘riqnomalarni ishlab chiqish va tizimning barcha foydalanuvchilariga tarqatish Markaz tomonidan ta’minlanadi.
5-bob. Axborot resurslarini Yagona reyestrga kiritish yoki chiqarish tartibi
20. Axborot resurslarini Yagona reyestrga kiritish uchun quyidagi mezonlarga muvofiqlik asos hisoblanadi:
bolalar va yoshlar, shu jumladan maktabgacha ta’lim muassasalari tarbiyalanuvchilari, umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar) o‘quvchilari va oliy ta’lim muassasalarining talabalari uchun bilim olish uchun zarurligi va foydaliligi;
ta’lim va maktabgacha bo‘lgan muassasalarning o‘qituvchilari uchun foydaliligi;
ilmiy-ta’lim, madaniy-ma’rifiy va ijtimoiy ahamiyati;
sog‘lom turmush tarzini targ‘ib qilish;
O‘zbekistonning boy madaniy, ma’naviy merosini va san’atini targ‘ib qilish;
o‘sib kelayotgan yosh avlodni vatanparvarlik ruhida tarbiyalash samaradorligini oshirishga, ularda Vatanga muhabbat va sadoqat tuyg‘usini, O‘zbekistonning boy tarixini o‘rganishga asoslangan yuksak axloqiy va ma’naviy fazilatlarni, xalqning milliy urf-odatlarini va ma’naviy qadriyatlarini hurmat qilish tuyg‘usini shakllantirishga ijobiy ta’sir ko‘rsatish;
bilim va tajriba almashish, faol hayotiy pozitsiyaga, ijodiy fikrlash va mamlakat taraqqiyotiga o‘z hissasini qo‘shishga tayyor shaxslar hamjamiyatlarini shakllantirish (stipendiatlar, Yoshlar ittifoqi a’zolari, sportchilar va boshqalar) imkoniyatining mavjudligi.
21. “ZiyoNET” portalida ro‘yxatdan o‘tgan yoki o‘tmagan har bir foydalanuvchi axborot resurslarini Yagona reyestrga kiritishga doir takliflarni yuborishi mumkin.
22. Barcha takliflar kelib tushish tartibida Ishchi guruh tomonidan saralanadi va ular asosida har oyda axborot resurslarini Yagona reyestrga kiritish uchun tavsiyalar shakllantiriladi.
Shuningdek, Ishchi guruh o‘z tashabbusiga ko‘ra Ekspert komissiyasiga axborot resurslarini Yagona reyestrga kiritish takliflarini yuborish huquqiga ega.
Bunda ushbu Nizomning 24-bandida keltirilgan barcha holatlarning bittasiga yoki bir nechtasiga yoki barchasi bo‘yicha mezonlar-asoslarga muvofiq bo‘lsa, taklif qilinayotgan axborot resurslari Ekspert komissiyasiga yuboriladi.
23. Ekspert komissiyasining a’zolari ko‘rib chiqishga yuborilgan axborot resurslari ro‘yxatini uch ish kuni davomida ko‘rib chiqadi. Ko‘rib chiqilgan axborot resurslari ushbu Nizomning 20-bandidagi mezonlarga muvofiq kelishi sharti bilan ma’qullanadi yoki ushbu Nizomning 24-bandidagi mezonlarga muvofiq kelganda chiqarib tashlash sabablarini ko‘rsatilgan holda ro‘yxatdan chiqariladi.
Ekspert komissiyasining a’zosi bo‘lmaganda (mehnat ta’tili, xizmat safari, boshqa lavozimga o‘tkazilishi va boshqalar) uning vazifalari va funksiyalarini bajarish uning o‘rnini bosuvchi shaxs zimmasiga yuklanadi.
24. Quyidagilar axborot resurslarini Yagona reyestrdan chiqarish yoki cheklash uchun asos bo‘ladigan mezonlar:
a) saytdan foydalanib bo‘lmaydi yoki tegishli kontentga ega emas;
b) yosh avlodda sog‘lom fikrlashni rivojlantirish uchun foydali kontentning yo‘qligi;
v) ijtimoiy adovatni qo‘zg‘atish;
g) milliy, irqiy, diniy adovatni qo‘zg‘atish;
d) zo‘ravonlik, shafqatsizlik, pornografiya, terrorizm va diniy ekstremizmni targ‘ib qilish;
e) qimor o‘yinlarini, shuningdek, noqonuniy xatti-harakatlarni sodir etishga undovchi yoki qaratilgan ma’lumotlarni targ‘ib qilish;
j) spirtli va tamaki mahsulotlarini targ‘ib qilish;
z) buzg‘unchi ta’sir ko‘rsatuvchi mazmun va yoshlarning ijtimoiy ongiga salbiy buzg‘unchi axborot-ruhiy ta’sir ko‘rsatish;
i) axborot sohasida shaxsiy manfaatlarni buzish;
k) axborot sohasida davlat va jamiyatning manfaatlariga zarar yetkazish;
l) milliy-madaniy an’analarni saqlab qolish va ularning uzviyligini ta’minlashni buzish;
m) buzg‘unchi ta’sir ko‘rsatuvchi va fuqarolarning jismoniy yoki ruhiy salomatligiga zarar yetkazuvchi qasddan sodir etilgan xatti-harakatlar;
n) O‘zbekiston Respublikasining amaldagi qonun hujjatlariga va normativ-huquqiy hujjatlarining talablariga zid bo‘lgan axborotni tarqatish.
25. Ekspert komissiyasining 5 nafar a’zosidan kamida 3 nafar a’zosi tomonidan ma’qullangan axborot resurslari Markaz tomonidan uch ish kuni ichida Yagona reyestrga kiritiladi va obyektlarni “ZiyoNET” tarmog‘iga ulash operatoriga tegishli axborotni yuborgan holda, “ZiyoNET” portalidagi Yagona reyestr katalogida e’lon qilinadi.
6-bob. Axborot resurslarini Yagona reyestrdan chiqarish tartibi
26. Yagona reyestrga kiritilgan axborot resurslari ushbu Nizomning 20 va 24-bandlariga muvofiqligi yuzasidan Ommaviy kommunikatsiyalar masalalari bo‘yicha markaz tomonidan tekshiriladi.
27. Yagona reyestr axborot resurslarida ushbu Nizomning 24-bandida keltirilgan mezonlardan biriga muvofiqligi aniqlanganda Ommaviy kommunikatsiyalar masalalari bo‘yicha markaz aniq sabablarni ko‘rsatgan holda axborot resurslarini Yagona reyestrdan chiqarish uchun Ishchi guruhga murojaat qiladi.
28. Ekspert komissiyasi a’zolari ham axborot resursining ushbu Nizom 24-bandida ko‘rsatilgan mezonlardan biriga muvofiqligi aniqlanganda uni Yagona reyestrdan chiqarish to‘g‘risida Ishchi guruhga murojaat qilish huquqiga egadir.
29. Axborot resurslarini Yagona reyestrdan chiqarish uchun murojaatlar Yagona reyestrni shakllantirish axborot tizimi doirasida amalga oshirilishi kerak.
30. Ishchi guruh tegishli murojaatnini olgandan keyin axborot resursini 3 ish kuni ichida Yagona reyestrdan chiqaradi.
31. Axborot resursi chiqarilgandan keyin uning ma’lumotlari foydalanuvchilarning foydalanishi cheklangan umumiy foydalanishdagi ma’lumotlar bazasida saqlanadi.
7-bob. Yagona reyestrning axborot resurslaridan foydalanish imkonini taqdim etish tartibi
32. Operator “ZiyoNET” tarmog‘iga ulangan barcha obyektlarga Yagona reyestrning axborot resurslaridan (shu jumladan uning subdomenlaridan) uzluksiz foydalanish imkonini taqdim etadi.
33. Operator Markaz bilan hamkorlikda har kuni axborotni Yagona reyestr ma’lumotlari asosida o‘z tizimida avtomatik ravishda sozlaydi.
34. Operator yangidan kiritilgan axborot resurslari Yagona reyestrga kiritilgandan keyin bir ish kunidan bo‘lmagan muddatda ulardan foydalanishni ta’minlaydi.
35. Oylik tashqi trafik tugaganda butunjahon Internet axborot tarmog‘i milliy segmentidagi (TAS-IX tarmog‘i) Yagona reyestr resurslaridan foydalanish ushbu kalendar oyi davomida cheklanmaydi.
8-bob. Yakunlovchi qoida
36. Mas’ul tashkilotlar vakillari va rahbarlari Yagona reyestrni shakllantirish va yuritish bo‘yicha vazifalarning o‘z vaqtida va sifatli bajarilishiga mas’uldir.
“ZiyoNET” tarmog‘i axborot resurslarining yagona reyestri to‘g‘risidagi nizomga ILOVA
“ZiyoNET” tarmog‘i axborot resurslarining yagona reyestrini shakllantirish
“ZiyoNET” tarmog‘i axborot resurslarining yagona reyestrini shakllantirish bo‘yicha ishchi guruh
Axborot resurslarini “ZiyoNET” tarmog‘i axborot resurslarining yagona reyestri (Yagona reyestr)ga kiritish uchun tavsiyalar tayyorlash
Har oy
2-bosqich
Yagona reyestrni shakllantirish bo‘yicha ekspert komissiyasi (Ekspert komissiyasi)
Yagona reyestrga kiritish uchun taklif qilingan axborot resurslarini tahlil qilish, ma’qullash yoki rad etish
3 ish kuni davomida
3-bosqich
Xalq ta’limi sohasida axborot-kommunikatsiya texnologiyalarini rivojlantirish markazi
Ekspert komissiyasi tomonidan ma’qullangan axborot resurslarini Yagona reyestrga kiritish
3 ish kuni davomida
4-bosqich
Operator — “O‘zbektelekom” AK
Yagona reyestr axborot resurslaridan maxsus tariflar bo‘yicha foydalanishni taqdim etish
1 ish kuni davomida
5-bosqich
Ommaviy kommunikatsiyalar masalalari bo‘yicha markaz
Yagona reyestr axborot resurslarini muntazam monitoring qilish
muntazam
Vazirlar Mahkamasining 2019-yil 28-noyabrdagi 955-son qaroriga 2-ILOVA
O‘zbekiston Respublikasi Hukumatining ayrim qarorlariga kiritilayotgan o‘zgartirishlar va qo‘shimchalar
1. Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qarorining 41-bandi quyidagi tahrirda bayon qilinsin:
“41. O‘zbekiston Respublikasi Prezidentining, O‘zbekiston Respublikasi Vazirlar Mahkamasining hujjatlari va topshiriqlari bajarilishini nazorat qilish hamda ularning ijro uchun yuborilishini, ular bajarilishining natijalari yuborilishini tashkil etish O‘zbekiston Respublikasi Prezidentining “Davlat organlari va tashkilotlarida ijro intizomini yanada mustahkamlash chora-tadbirlari to‘g‘risida” 2018-yil 5-oktabrdagi PQ-3962-son qarori va O‘zbekiston Respublikasi Prezidentining “Ijro intizomi idoralararo yagona elektron tizimini joriy etish chora-tadbirlari to‘g‘risida” 2017-yil 9-avgustdagi F-5017-son farmoyishiga muvofiq Ijro intizomi idoralararo yagona elektron tizimi orqali amalga oshiriladi”.
2. Vazirlar Mahkamasining ““ZiyoNET” axborot tarmog‘ini yanada rivojlantirish to‘g‘risida” 2005-yil 28-dekabrdagi 282-son qarorining 1-bandi to‘rtinchi xatboshi va qarorga 3-ilova o‘z kuchini yo‘qotgan deb hisoblansin.
3. Vazirlar Mahkamasining ““ZiyoNET” ta’lim axborot tarmog‘ini yanada rivojlantirish chora-tadbirlari to‘g‘risida” 2013-yil 10-iyuldagi 198-son qarorida:
umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar), oliy ta’lim muassasalari, yoshlar tashkilotlari, axborot-kutubxona muassasalari, muzeylar va boshqa ta’lim, ilmiy va madaniy-ma’rifiy muassasalarning tuzilgan shartnomalarga muvofiq “ZiyoNET” tarmog‘ining axborot resurslaridan belgilangan tartibda uzluksiz foydalanishini;
umumta’lim maktablari, akademik litseylar, kasb-hunar ta’limi muassasalari (kasb-hunar maktablari, kasb-hunar kollejlari, texnikumlar), oliy ta’lim muassasalari, yoshlar tashkilotlari, axborot-kutubxona muassasalari, muzeylar va boshqa ta’lim, ilmiy va madaniy-ma’rifiy tashkilotlarga “ZiyoNET” tarmog‘idan foydalanish xizmatlarini O‘zbekiston Respublikasi Moliya vazirligi bilan kelishilgan holda O‘zbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan tasdiqlangan ro‘yxat va tariflar bo‘yicha ko‘rsatilishini ta’minlasin”.
