Oʻzbekiston Respublikasi Vazirlar Mahkamasining

Toshkent kimyo-texnologiya institutining Shahrisabz filialini tashkil etish toʻgʻrisida

Qashqadaryo viloyatida oziq-ovqat mahsulotlari ishlab chiqarish sanoati salohiyatini yanada oshirish va iqtisodiyotning bazaviy tarmoqlarida oliy maʼlumotli kadrlar tayyorlashni kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Iqtisodiyot va sanoat vazirligi, Moliya vazirligi va Qashqadaryo viloyati hokimligining Qashqadaryo viloyatining Shahrisabz shahrida Toshkent kimyo-texnologiya institutining Shahrisabz filialini (keyingi oʻrinlarda Filial deb ataladi) tashkil etish toʻgʻrisidagi taklifiga rozilik berilsin.

Belgilansinki, Filial Toshkent kimyo-texnologiya institutining yuridik shaxs maqomiga ega boʻlgan tarkibiy boʻlinmasi hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga hamda Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaraqlariga ega boʻladi.

2. Quyidagilar Filialning asosiy vazifalari etib belgilansin:

hududda kimyo va oziq-ovqat sanoati sohasining rivojlanish istiqbollari va ustuvor vazifalarini, zamonaviy texnika hamda texnologik tendensiyalarni hisobga olgan holda ehtiyoj yuqori boʻlgan mutaxassisliklar boʻyicha amaliy koʻnikmalarni egallagan malakali kadrlarni tayyorlash;

kimyo va oziq-ovqat texnologiyalarining barcha yoʻnalishlari boʻyicha malakali kadrlarni tayyorlash va qayta tayyorlash, korxonalarning muammolarini hal etishga qaratilgan innovatsion tadqiqotlarni faol rivojlantirish;

oʻquv va ilmiy loyihalarni amalga oshirish, taʼlim va ilmiy izlanishlar jarayoniga malakali mutaxassislarni keng jalb etish maqsadida ishlab chiqarish va qayta ishlash sohalaridagi respublika va xorijiy yetakchi oliy taʼlim muassasalari va ilmiy markazlar bilan hamkorlik aloqalarini kuchaytirish;

respublika va xorijiy oliy taʼlim muassasalari hamda ilmiy markazlarga istiqbolli yosh bitiruvchilarni magistratura va doktoranturaga muntazam yuborish orqali Filialning ilmiy-pedagogik salohiyatini oshirib borish;

Filialning mintaqa va xalqaro miqyosdagi nufuzini oshirish maqsadida chet el fuqarolari uchun taʼlim olish imkoniyatini kengaytirish va ilgʻor xalqaro tajribani tatbiq qilish;

vebinar taʼlim usullarini joriy etish va rivojlantirish.

3. Belgilansinki, Filialda oʻquv jarayoni 2019/2020 oʻquv yilidan boshlanadi hamda talabalarni qabul qilish soni belgilangan tartibda har yili tasdiqlanadigan respublika oliy taʼlim muassasalariga oʻqishga qabul qilish kvotalaridan kelib chiqqan holda belgilanadi.

4. Toshkent kimyo-texnologiya instituti Shahrisabz filialining vasiylik kengashi tarkibi ilovaga muvofiq tasdiqlansin.

Belgilansinki, vasiylik kengashi quyidagi ustuvor yoʻnalishlarda Filialni rivojlantirishga koʻmaklashadi:

Filialni moddiy-texnik jihatdan taʼminlash uchun moliyaviy yordam tashkil etish, budjetdan tashqari mablagʻlarni jalb etish;

taʼlim muassasalari va tashkilotlardan tayinlangan malakaviy amaliyot rahbarlarini muassasaning budjetdan tashqari mablagʻlari, ragʻbatlantirish fondi hisobidan moddiy qoʻllab-quvvatlash tizimini joriy etish hamda iqtidorli talabalarning rivojlangan xorijiy mamlakatlarning taʼlim muassasalarida amaliyotini tashkil etish;

kimyo, oziq-ovqat va vinochilik texnologiyalari, oziq-ovqat mahsulotlarini saqlash, qayta ishlash hamda biotexnologiyalar sohasida Filialni rivojlantirishga koʻmaklashuvchi yangi usullar, dasturlar va istiqbolli tashabbuslarni qoʻllab-quvvatlash, ishlab chiqarish tashkilotlari faoliyatiga ilmiy ishlanmalar natijalarini samarali joriy etish;

Filial professor-oʻqituvchilari va yosh olimlarining Scopus va Web of science kabi maʼlumotlar bazasiga kirgan xalqaro ilmiy jurnallarda ilmiy maqolalar chop etish borasidagi sarf-xarajatlarini moliyalashtirish, shuningdek, oʻquv-metodik va ilmiy-tadqiqot ishlarining bajarilishidan kelib chiqqan holda moddiy ragʻbatlantirib borishni tashkil etish;

Filialda oʻquv jarayonini tashkil etish uchun malakali professor-oʻqituvchilar, jumladan, xorijdan oʻqituvchilar, olimlar va mutaxassislar jalb etish hamda yosh olimlar, tayanch doktorantlarning xorijiy oliy taʼlim muassasalari va ilmiy markazlariga stajirovkaga yuborilishini taʼminlash;

Filial pedagog va boshqa xodimlarining mehnat sharoitlarini hamda ularning ijtimoiy taʼminotini yaxshilash va qoʻllab-quvvatlashni tashkil etish;

Filial binolarining qurilish-taʼmirlash va jihozlash ishlarini amalga oshirish uchun zarur moliyaviy mablagʻlar safarbar etilishini, zamonaviy oʻquv-laboratoriya jihozlari, kompyuter va boshqa tashkiliy texnika, kutubxona fondi bilan jihozlanishini taʼminlash.

5. Oʻzbekiston Respublikasi Oliy va oʻrta maxsus taʼlim vazirligi ikki oy muddatda:

Filialning tuzilmasini oliy taʼlim muassasalari uchun belgilangan normativlarga muvofiq tasdiqlasin;

Filialning ustavini belgilangan tartibda tasdiqlasin va uning davlat roʻyxatidan oʻtkazilishini taʼminlasin;

LexUZ sharhi

Qarang: Vazirlar Mahkamasining 2022-yil 28-sentabrdagi 542-son qarori bilan tasdiqlangan Davlat organlari va muassasalarini davlat roʻyxatidan oʻtkazish va davlat organlarini tugatish boʻyicha davlat xizmatini koʻrsatishning maʼmuriy reglamenti.

Filialni tanlov asosida yuqori malakali professor-oʻqituvchilar bilan taʼminlash choralarini koʻrsin;

Filialda oʻquv-metodik jarayonlarning tashkil etilishini taʼminlash, uni oʻquv-laboratoriya jihozlari va kompyuter texnikasi bilan taʼminlash boʻyicha aniq chora-tadbirlarni amalga oshirsin;

Filial axborot-resurs markazini tayanch oliy taʼlim muassasasi tomonidan qoʻshimcha oʻquv, ilmiy va badiiy adabiyotlar bilan taʼminlash choralarini koʻrsin;

Moliya vazirligi bilan birgalikda Filialning shtatlar jadvali va xarajatlar smetasini tasdiqlash choralarini koʻrsin.

6. Quyidagilar Filial faoliyatini moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

toʻlov-kontrakt asosida oʻqitishdan tushadigan mablagʻlar;

xoʻjalik faoliyatidan va shartnoma asosida xizmatlar koʻrsatishdan tushadigan tushumlar;

jismoniy va yuridik shaxslarning homiylik xayriyalari;

xalqaro moliya tashkilotlarining grantlari;

Oldingi tahrirga qarang.

qonunchilik hujjatlarida taqiqlanmagan boshqa manbalar.

(6-bandning yettiinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

7. Belgilab qoʻyilsinki:

Filialni saqlash xarajatlari 2019-yilda “Maorif” sohasi boʻyicha tasdiqlangan budjet parametrlari doirasida, 2020-yildan boshlab esa mazkur sohaga har yili ajratiladigan mablagʻlar doirasida amalga oshiriladi;

Filialning boshlangʻich faoliyatini samarali tashkil etish maqsadida unga ajratilgan bino va inshootlarni joriy taʼmirlash va jihozlash (mebel, kompyuter texnikasi, oʻquv adabiyotlari va boshqa moddiy-texnika vositalarini xarid qilish) ishlari Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobiga qoplanadi.

8. Qashqadaryo viloyati hokimligi hamda Oʻzbekiston Respublikasi Oliy va oʻrta maxsus taʼlim vazirligining Qashqadaryo viloyati, Shahrisabz shahri, Shahrisabz koʻchasi, 20-uyda joylashgan Shahrisabz yengil sanoat va xizmat koʻrsatish kasb-hunar kollejining bino va inshootlarini tegishli hududi bilan birgalikda Filialga operativ boshqarish huquqi asosida berish toʻgʻrisidagi taklifi maʼqullansin.

Belgilab qoʻyilsinki, Shahrisabz yengil sanoat kasb-hunar kollejining oʻquvchilari oʻqishni bitirgunlariga qadar Filial binolarida oʻquv jarayonini davom ettiradilar.

9. Filialga 2 ta, shu jumladan, 1 ta xizmat va 1 ta maxsus yengil avtotransport vositalarini saqlashga limit ajratilsin.

10. Oʻzbekiston Respublikasi Investitsiyalar va tashqi savdo vazirligi Oliy va oʻrta maxsus taʼlim vazirligi, manfaatdor vazirliklar va idoralar bilan birgalikda tasdiqlangan loyiha-smeta hujjatlariga asosan Oʻzbekiston Respublikasi Investitsiya dasturining 2020-yil va keyingi yillar uchun parametrlarini shakllantirishda Filialning bino va inshootlarini rekonstruksiya qilish, kapital taʼmirlash, oʻquv laboratoriyalari va axborot-kommunikatsiya texnologiyalari vositalari bilan jihozlash hamda yangi 300 oʻrinli talabalar turar joyi binosini qurish loyihalari belgilangan tartibda kiritilishini taʼminlasinlar.

11. Qashqadaryo viloyati hokimligi respublika oliy taʼlim muassasalaridan Filialga faoliyat yuritish uchun taklif etilgan professor-oʻqituvchilarni uy-joy bilan, shu jumladan, 2 ta ikki xonali xizmat uyi bilan taʼminlash choralarini koʻrsin.

12. Oʻzbekiston Respublikasi Investitsiyalar va tashqi savdo vazirligi, Moliya vazirligi Uy-joy kommunal xizmat koʻrsatish vazirligi va Qashqadaryo viloyati hokimligining takliflari asosida Filialni ichimlik va oqova suv taʼminoti bilan taʼminlash loyihalarini amalga oshirish uchun zarur boʻlgan mablagʻlar 2020-yil Oʻzbekiston Respublikasi Investitsiya dasturi parametrlariga kiritilishini taʼminlasinlar.

13. Qashqadaryo viloyati hokimligi, “Oʻzdonmahsulot” AK, “Oʻzyogʻmoysanoat” uyushmasi, Oʻzbekiston Respublikasi Qishloq xoʻjaligi vazirligi huzuridagi Uzumchilik va vinochilikni rivojlantirish agentligi 2019/2020 oʻquv yili boshlanguniga qadar:

Filialda manfaatli, sohaning innovatsion rivojlanishdagi istiqbollarini hisobga olgan holda oʻquv va ilmiy laboratoriyalarni tashkil etish, uning moddiy-texnika bazasini shakllantirish, zamonaviy oʻquv adabiyotlari, laboratoriya va ishlab chiqarish trenajyorlari bilan taʼminlash choralarini koʻrsinlar;

Filialning moddiy-texnika va ilmiy-laboratoriya bazasini mustahkamlash, ilmiy ishlanmalarni joriy etish, ilmiy-pedagog xodimlarni moddiy ragʻbatlantirish va malakasini oshirishda moliyaviy qoʻllab-quvvatlash bilan bogʻliq sarf-xarajatlarni Vazirlar Mahkamasining “Ilmiy-innovatsion ishlanma va texnologiyalarni ishlab chiqarishga tatbiq etishning samarali mexanizmlarini yaratish chora-tadbirlari toʻgʻrisida” 2018-yil 12-yanvardagi 24-son qarori 3-bandi, “Xoʻjalik boshqaruvi organlari va yirik davlat korxonalaridagi innovatsion faoliyatni qoʻllab-quvvatlash jamgʻarmasi toʻgʻrisidagi namunaviy nizomni tasdiqlash haqida” 2018-yil 12-martdagi 195-son qaroriga binoan innovatsion faoliyatni qoʻllab-quvvatlash jamgʻarmalari mablagʻlari hisobiga amalga oshirilishini taʼminlasinlar.

14. Oʻzbekiston Respublikasi Innovatsion rivojlanish vazirligi, Fanlar akademiyasi, Oliy va oʻrta maxsus taʼlim vazirligi Filialni yuqori malakali, ilmiy va ilmiy pedagogik kadrlar bilan taʼminlash maqsadida Filial uchun ilmiy-tadqiqot institutlari va respublikaning yetakchi oliy taʼlim muassasalarida tayanch doktoranturaga 2020-yildan maqsadli kvotalar ajratilishini taʼminlasinlar.

15. Oʻzbekiston Respublikasi Iqtisodiyot va sanoat vazirligi, Oliy va oʻrta maxsus taʼlim vazirligi Filialni yuqori malakali pedagog kadrlar bilan taʼminlash maqsadida 2019/2020 oʻquv yilidan boshlab Filial uchun respublikaning yetakchi oliy taʼlim muassasalarida tegishli magistratura mutaxassisliklari boʻyicha maqsadli qabul parametrlariga takliflarni shakllantirsin va Vazirlar Mahkamasiga kiritsin.

Oldingi tahrirga qarang.

16. Oʻzbekiston Respublikasi Oliy va oʻrta maxsus taʼlim vazirligi, Fanlar akademiyasi, Qishloq xoʻjaligi vazirligi, Oʻsimliklar karantini va himoyasi agentligi 2019/2020 oʻquv yilidan boshlab:

(16-bandning birinchi xatboshisi Oʻzbekiston Respublikasi Vazirlar Mahkamasining 2021-yil 15-dekabrdagi 752-sonli qarori tahririda — Qonunchilik maʼlumotlari milliy bazasi, 16.12.2021-y., 09/21/752/1166-son)

talabalarning amaliy koʻnikmalarini oshirish maqsadida soha mutaxassislarini taʼlim jarayoniga jalb etish;

professor-oʻqituvchilar va talabalarning ilmiy-tadqiqot institutlari va yetakchi tashkilotlarning laboratoriyalaridan foydalanishlari uchun tegishli shart-sharoitlar yaratish choralarini koʻrsinlar.

17. Qashqadaryo viloyati hokimligi “Oʻztransgaz” AJ bilan birgalikda bir oy muddatda Filialni tabiiy gaz taʼminotiga ulash uchun texnik shart berilishi choralarini koʻrsin.

18. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oliy va oʻrta maxsus taʼlim vazirligining murojaatiga asosan Filialni yuqori tezlikdagi Internet hamda elektron taʼlim milliy tarmogʻiga belgilangan tartibda ulash choralarini koʻrsin.

19. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

20. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, oliy va oʻrta maxsus taʼlim vaziri I.U. Madjidov hamda Qashqadaryo viloyati hokimi Z.Sh. Roʻziyev zimmasiga yuklansin.

Oʻzbekiston Respublikasining Bosh vaziri A. ARIPOV

2019-yil 11-iyun,

Vazirlar Mahkamasining 2019-yil 11-iyundagi 489-son qaroriga
ILOVA

Toshkent kimyo-texnologiya instituti Shahrisabz filialining vasiylik kengashi

1.	Z. Ruziyev	—	Qashqadaryo viloyati hokimi, Vasiylik kengashi raisi
2.	Sh. Aslanov	—	“Shoʻrtan gaz kimyo majmuasi” MChJ bosh direktori, Vasiylik kengashi raisining oʻrinbosari
3.	U. Begimkulov	—	Oliy va oʻrta maxsus taʼlim vazirining oʻrinbosari, Vasiylik kengashi raisining oʻrinbosari
4.	Sh. Mutalov	—	Toshkent kimyo-texnologiya instituti rektori
5.	O. Qurbonov	—	“Dexqonobod kaliyli oʻgʻitlar zavodi” MChJ bosh direktori v.b.
6.	Sh. Shamsiyev	—	“Muborak gazni qayta ishlash zavodi” MChJ bosh direktori
7.	F. Alimov	—	“Qarshi yogʻ ekstraksiya” AJ boshqaruvi raisi
8.	A. Abdumavlyanov	—	“Koson yogʻ ekstraksiya” AJ boshqaruvi raisi oʻrinbosari
9.	H. Karimov	—	“Qashqadaryodonmahsulotlari” AJ boshqaruvi raisi
10.	A. Xudoyberdiyev	—	“Don xalq rizqi” AJ boshqaruvi raisi
11.	S. Roʻziyev	—	“Shahrisabz vino-aroq” MChJ direktori
12.	A. Avloqulov	—	“Agromir Kitob” MChJ direktori
13.	lavozimi boʻyicha	—	Toshkent kimyo-texnologiya institutining Shahrisabz filiali direktori, Vasiylik kengashi kotibi

Izoh: Vasiylik kengashi aʼzolari boshqa ishga oʻtganda uning tarkibiga mazkur lavozimlarga yangidan tayinlangan yoki zimmasiga tegishli vazifalarni bajarish yuklangan shaxslar kiritiladi.

(Qonun hujjatlari maʼlumotlari milliy bazasi, 13.06.2019-y., 09/19/489/3283-son; Qonunchilik maʼlumotlari milliy bazasi, 16.12.2021-y., 09/21/752/1166-son, 05.04.2022-y., 09/22/153/0266-son)