|
Hujjat kuchini yo‘qotgan 22.02.2021
|
Oʻzbekiston Respublikasi Vazirlar Mahkamasining
qarori
IXTISOSLAShTIRILGAN “OʻZAUKSIONSAVDO” TAShKILOTINI TUGATISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Mahsulotlarni sotish bozor prinsiplari va mexanizmlarini joriy qilish jarayonini yanada chuqurlashtirish, markazlashtirilgan ixtisoslashtirilgan taqsimot tizimini bartaraf etish maqsadida Vazirlar Mahkamasi qaror qiladi:
1. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar agentligi, Davlat mulki qoʻmitasi, Markaziy banki, Oʻzbekiston tovar-xomashyo birjasining Oʻzbekiston tovar-xomashyo birjasi tarkibidagi ixtisoslashtirilgan “Oʻzauksionsavdo” tashkilotini tugatish toʻgʻrisidagi taklifi qabul qilinsin.
2. Ixtisoslashtirilgan “Oʻzauksionsavdo” tashkilotini tugatish bilan bogʻliq ishlarni muvofiqlashtirish uchun ilovaga muvofiq tarkibda tugatish komissiyasi tashkil etilsin.
Tugatish komissiyasi ixtisoslashtirilgan “Oʻzauksionsavdo” tashkilotini tugatish bilan bogʻliq masalalarni qonun hujjatlarida belgilangan tartibda koʻrib chiqsin va hal qilsin.
3. Oʻzbekiston tovar-xomashyo birjasi ikki hafta muddatda respublika norezidentlariga erkin muomaladagi valyutaga xomashyo, materiallar va tayyor mahsulotlar (tovarlar) sotish boʻyicha birja savdolari oʻtkazish uchun savdo maydonchasi tashkil etsin.
4. Oʻzbekiston Respublikasi Mehnat va aholini ijtimoiy muhofaza qilish vazirligi tugatish komissiyasi bilan birgalikda ixtisoslashtirilgan “Oʻzauksionsavdo” tashkilotining tugatilishi munosabati bilan boʻshab qoladigan xodimlarni ishga joylashtirish chora-tadbirlarini koʻrsin.
5. Vazirlar Mahkamasining “Yuqori likvidli mahsulotlarni kim oshdi savdosida sotishni tashkil etish chora-tadbirlari toʻgʻrisida” 2001-yil 12-iyuldagi 298-son qarori (Oʻzbekiston Respublikasi QT, 2001-y., 7-son, 40-modda) hamda “Mahsulotlarni kimoshdi savdolarida sotish mexanizmini takomillashtirish toʻgʻrisida” 2004-yil 22-apreldagi 193-son qarori (Oʻzbekiston Respublikasi QT, 2004-y., 4-son, 40-modda) oʻz kuchini yoʻqotgan deb hisoblansin.
6. Oʻzbekiston Respublikasi Adliya vazirligi, Oʻzbekiston tovar-xomashyo birjasi manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsinlar.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2005-yil 11-yanvar,
13-son
Ixtisoslashtirilgan “Oʻzauksionsavdo” tashkilotini tugatish boʻyicha komissiya
tarkibi
tarkibi
| Yakovlev I. G. | — | Davlat mulki qoʻmitasi raisining birinchi oʻrinbosari, komissiya raisi |
| Najimov N. E. | — | Tashqi iqtisodiy aloqalar agentligi raisining birinchi oʻrinbosari |
| Toshmurodov Sh. M. | — | Markaziy bank raisining oʻrinbosari |
| Musayev D.A. | — | Moliya vazirining oʻrinbosari |
| Toʻxtabayev T.R. | — | Oʻzbekiston tovar-xomashyo birjasining raisi |
| Yusupov U.G. | — | “Oʻzauksionsavdo” shuʼba korxonasining direktori |
| Hikmatov S.S. | — | “Oʻzauksionsavdo” shuʼba korxonasining iqtisodchi-buxgalteri |
(Oʻzbekiston Respublikasi qonun hujjatlari toʻplami, 2005-y., 2-son 7-modda)
