Oʻzbekiston Respublikasi hududida darslik va oʻquv-metodik majmualarni nashr etish hamda ularni umumtaʼlim maktablarigacha yetkazib berishni tartibga solish maqsadida Vazirlar Mahkamasi qaror qiladi:

1. Vazirlar Mahkamasining 2018-yil 30-martdagi 249-son qarori bilan tasdiqlangan Narxlari (tariflari) davlat tomonidan tartibga solinadigan ijtimoiy ahamiyatli tovarlar (xizmatlar) va ularning strategik turlari roʻyxatiga ilovaga muvofiq qoʻshimchalar kiritilsin.

2. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Oʻzbekiston Respublikasi Xalq taʼlimi vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov va Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisining birinchi oʻrinbosari N.Sh. Sharipov zimmasiga yuklansin.

Quyidagi mazmundagi 22 va 23-bandlar qoʻshilsin:

“22. Umumiy oʻrta taʼlim muassasalariga tegishli umumtaʼlim fanlari boʻyicha darslik va oʻquv-metodik majmualarni nashr etish xizmatlari (Xalq taʼlimi vazirligining maxsus tasdiqlanadigan roʻyxati boʻyicha).

23. Oʻzbekiston Respublikasi Xalq taʼlimi vazirligining “Oʻquv taʼlim-taʼminot” davlat unitar korxonasi tomonidan koʻrsatiladigan xizmatlar.”.