954-сон 24.11.2018. Oʻzbekiston Respublikasida mehmonxona biznesini jadal rivojlantirishga doir qoʻshimcha chora-tadbirlar toʻgʻrisida

Oʻzbekiston Respublikasi Vazirlar Mahkamasining

qarori

Oʻzbekiston Respublikasida mehmonxona biznesini jadal rivojlantirishga doir qoʻshimcha chora-tadbirlar toʻgʻrisida

Respublika hududlarining turizm salohiyatidan foydalanish samaradorligini yanada oshirish, hududlarda zamonaviy turizm infratuzilmasining jadal rivojlanishini taʼminlash, mehmonxona xizmatlarini kengaytirish va sifatini yaxshilash, mehmonxona sohasiga investitsiyalarni keng jalb qilish, shuningdek, joylashtirish obyektlarining mavjud kamchiliklarini bartaraf etish maqsadida Vazirlar Mahkamasi qaror qiladi:

1. Oʻzbekiston Respublikasi Turizmni rivojlantirish davlat qoʻmitasi va Oʻzbekiston Respublikasi Qurilish vazirligining loyihalashning ijobiy xorijiy tajribasini, shu jumladan, birinchi navbatda Turkiya va Koreya respublikalari tajribasini hisobga olib namunaviy loyihalar boʻyicha ishlab chiqilgan sigʻimi 8 — 50 nomerli kichik mehmonxona va xostellar (keyingi oʻrinlarda namunaviy loyihalar boʻyicha mehmonxonalar deb ataladi) qurilishini amalga oshirish toʻgʻrisidagi takliflari maʼqullansin.

2. Kichik mehmonxonalar va xostellarning namunaviy loyihalarini ishlab chiqish doirasida:

Oʻzbekiston Respublikasi Turizmni rivojlantirish davlat qoʻmitasi — buyurtmachi;

“Qishloqqurilishloyiha” MCHJ — bosh loyihalash tashkiloti etib belgilansin.

Belgilansinki, kichik mehmonxona va xostellarning namunaviy loyihalari investorlarga — tadbirkorlarga bepul asosda beriladi.

3. Quyidagilar:

2018-2019-yillarda namunaviy loyihalar boʻyicha mehmonxonalar qurilishi moʻljallangan tumanlar va shaharlar roʻyxati 1-ilovaga muvofiq;

namunaviy loyihalar boʻyicha mehmonxonalarni qurish boʻyicha investorlarga — tadbirkorlarga amaliy yordam koʻrsatish boʻyicha Respublika ishchi guruhining tarkibi (keyingi oʻrinlarda Respublika ishchi guruhi deb ataladi) va hududiy ishchi guruhlarning namunaviy tarkibi (keyingi oʻrinlarda hududiy ishchi guruh deb ataladi) 2 va 3-ilovalarga muvofiq tasdiqlansin.

4. Quyidagilar:

a) Respublika ishchi guruhining asosiy vazifalari etib belgilansin:

namunaviy loyihalar boʻyicha mehmonxonalar qurilishiga xorijiy va mahalliy investorlar — tadbirkorlar jalb qilinishini taʼminlash;

Oldingi tahrirga qarang.

yer uchastkalarini berish, namunaviy loyihalar boʻyicha mehmonxona qurilishi boʻyicha investitsiya loyihalarini amalga oshirish bilan bogʻliq boʻlgan tashkiliy-texnik masalalarni hal etishda amaliy yordam koʻrsatish boʻyicha vazirliklar, idoralar, mahalliy ijro etuvchi hokimiyat organlari faoliyatini muvofiqlashtirish, shuningdek, byurokratizmga yoʻl qoʻymaslik boʻyicha tezkor choralar koʻrish;

(4-bandning toʻrtinchi xatboshisi Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qarori tahririda — Qonunchilik maʼlumotlari milliy bazasi, 16.12.2025-y., 09/25/791/1167-son)

namunaviy loyihalar boʻyicha mehmonxonalar qurilishi uchun elektron auksionga qoʻyilgan yer uchastkalari toʻgʻrisidagi maʼlumotlar investorlarga — tadbirkorlarga yetkazilishini tashkil etish;

Oldingi tahrirga qarang.

Qoraqalpogʻiston Respublikasi Vazirlar Kengashi va viloyatlar hokimliklari tomonidan mehmonxonalar qurilishi uchun ajratilgan kamida 5 ta yer uchastkasini har oyda “E-auksion” elektron savdo platformasiga qoʻyilishini taʼminlash;

(4-band “a” kichik bandining beshinchi xatboshisi Oʻzbekiston Respublikasi Vazirlar Mahkamasining 2022-yil 12-yanvardagi 18-sonli qarori tahririda — Qonunchilik maʼlumotlari milliy bazasi, 13.01.2022-y., 09/22/18/0019-son)

namunaviy loyihalar boʻyicha mehmonxonalar qurilishining tizimli monitoringini olib borish;

Oʻzbekiston Respublikasi Prezidentining “2018-2019-yillarda turizm sohasini rivojlantirish boʻyicha birinchi navbatdagi chora-tadbirlar toʻgʻrisida” 2017-yil 16-avgustdagi PQ-3217-son qarori bilan tashkil etilgan Turizmni rivojlantirish boʻyicha muvofiqlashtiruvchi kengashga namunaviy loyihalar boʻyicha mehmonxonalar qurilishi boʻyicha loyihalarning amalga oshirilishi jarayoni toʻgʻrisidagi maʼlumotlarni har chorakda kiritish.

b) hududiy ishchi guruhning asosiy vazifalari etib belgilansin:

namunaviy loyihalar boʻyicha mehmonxonalar qurilishi uchun elektron auksionga qoʻyilgan yer uchastkalari toʻgʻrisidagi maʼlumotlarni Respublika ishchi guruhiga taqdim etish;

namunaviy loyihalar boʻyicha mehmonxonalar qurilishiga xorijiy va mahalliy investorlar-tadbirkorlarni jalb qilishni taʼminlash;

potensial investorlar bilan muzokaralar va uchrashuvlar oʻtkazish choralarini koʻrish;

namunaviy loyihalar boʻyicha mehmonxonalar qurilishi uchun ajratilgan yer uchastkalarini elektron auksionga qoʻyish bilan bogʻliq masalalar jadal hal qilinishini taʼminlash;

namunaviy loyihalar boʻyicha mehmonxonalar qurilishi uchun ajratiladigan yer uchastkalarining infratuzilmasini tizimli asosda oʻrganish.

Belgilansinki, Respublika ishchi guruhi va hududiy ishchi guruhlar faoliyatni Oʻzbekiston Respublikasi Prezidentining 2018-yil 11-sentabrdagi PQ-3939-son qaroriga muvofiq tashkil etilgan Hududlarda tadbirkorlikni qoʻllab-quvvatlash va rivojlantirish komissiyasi va tadbirkorlikni qoʻllab-quvvatlash va rivojlantirish boʻyicha hududiy guruhlar bilan uzviy hamkorlikda amalga oshiradilar.

Belgilansinki, Oʻzbekiston Respublikasi Turizmni rivojlantirish davlat qoʻmitasi va uning hududiy boʻlinmalari tegishli ravishda Respublika ishchi guruhi va hududiy ishchi guruhlarning ishchi organlari hisoblanadi.

5. Belgilansinki, yer uchastkalarini investorlarga — tadbirkorlarga ajratish Oʻzbekiston Respublikasi Vazirlar Mahkamasining 2018-yil 30-iyundagi 493-son qarori bilan tasdiqlangan Tadbirkorlik va shaharsozlik faoliyatini amalga oshirish uchun yer uchastkalarini elektron auksion orqali doimiy foydalanishga berish tartibi toʻgʻrisidagi nizom talablariga muvofiq amalga oshiriladi.

Oldingi tahrirga qarang.

Elektron auksion oʻtkazishning umumiy muddati “E-auksion” elektron savdo platformasida amalga oshiriladigan barcha tartibotlar bilan birga istisno tariqasida 10 kundan oshmasligi kerak.

(5-bandning ikkinchi xatboshisi Oʻzbekiston Respublikasi Vazirlar Mahkamasining 2024-yil 15-maydagi 282-sonli qarori tahririda — Qonunchilik maʼlumotlari milliy bazasi, 15.05.2024-y., 09/24/282/0347-son)

6. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar, tumanlar va shaharlar hokimlari:

a) Oʻzbekiston Respublikasi Yer resurslari, geodeziya, kartografiya va davlat kadastri boʻyicha davlat qoʻmitasi bilan birgalikda bir oy muddatda ushbu qarorga 1-ilovada nazarda tutilgan hududlarda namunaviy loyihalar boʻyicha mehmonxonalar qurish uchun yer uchastkalari roʻyxatini, ular toʻgʻrisida tegishli maʼlumotlar bergan holda tasdiqlasinlar;

b) qurilishni amalga oshirish davrida namunaviy loyihalar boʻyicha mehmonxonalar qurish uchun ajratilgan yer uchastkalari, shuningdek, investorlar — tadbirkorlarning hisobi yuritilishini taʼminlasinlar;

v) har oyda Respublika ishchi guruhiga:

elektron auksionga qoʻyilgan, tasdiqlangan yer uchastkalari;

namunaviy loyihalar boʻyicha mehmonxonalar qurish tashabbusi bilan chiqqan investorlar — tadbirkorlar;

ushbu qarorga 1-ilovada koʻrsatib oʻtilgan hududlarda mehmonxonalarga boʻlgan ehtiyoj va ularning soni, ularning nomer fondi toʻgʻrisida maʼlumot bersinlar.

7. Belgilansinki:

namunaviy loyihalar boʻyicha mehmonxonalar hududiga muhandislik-kommunikatsiya tarmoqlarini tortib kelish bilan bogʻliq xarajatlar tegishli tumanlarning (shaharlarning) mahalliy budjetlari hamda qonun hujjatlarida taqiqlanmagan boshqa manbalar hisobiga moliyalashtiriladi;

namunaviy loyihalar boʻyicha mehmonxonalarni tashqi muhandislik-kommunikatsiya tarmoqlariga ulash bilan bogʻliq xarajatlar investorlar –tadbirkorlarning oʻz mablagʻlari hisobiga moliyalashtiriladi.

8. Oʻzbekiston Respublikasi Turizmni rivojlantirish davlat qoʻmitasi:

ikki oy muddatda mehmonxonalarning bandligini taʼminlash hamda bron qilishning samarali tizimini joriy qilgan, koʻrsatilayotgan xizmatlarni targʻib qilgan va mehmonxona xodimlarini oʻqitgan holda ular faoliyatini yanada rivojlantirish boʻyicha marketing ishlari rejasini ishlab chiqsin;

turizm sohasidagi tadbirkorlik subyektlari bilan birgalikda ommaviy axborot vositalari vakillari uchun axborot va media turlar tashkil etsin.

9. Respublika ishchi guruhini va ushbu qaror doirasida namunaviy loyihalar boʻyicha mehmonxonalarni qurish boʻyicha investitsiya loyihalarini amalga oshiruvchi investorlar — tadbirkorlarni har tomonlama qoʻllab-quvvatlash hamda yuzaga keladigan muammolarni hal qilish uchun vazirliklar va idoralar rahbarlariga shaxsiy masʼuliyat yuklansin.

10. Oʻzbekiston Milliy teleradiokompaniyasi, Oʻzbekiston Milliy axborot agentligi, Oʻzbekiston Matbuot va axborot agentligi va “Dunyo” axborot agentligiga ushbu qarorning mohiyati va vazifalarini keng yoritish tavsiya etilsin.

11. Mazkur qarorning bajarilishini nazorat qilish Bosh vazirning birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari A.A. Abduhakimov va Oʻzbekiston Respublikasi Turizmni rivojlantirish davlat qoʻmitasining raisi zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 24-noyabr,

954-son

Vazirlar Mahkamasining 2018-yil 24-noyabrdagi 954-son qaroriga
1-ILOVA

2018-2019-yillarda namunaviy loyihalar boʻyicha mehmonxonalar qurilishi moʻljallangan tumanlar va shaharlar

ROʻYXATI

T/r	Tuman/shahar nomi	Mehmonxona soni
Qoraqalpogʻiston Respublikasi
1.	Nukus shahri	15
2.	Moʻynoq tumani	5
3.	Ellikqala tumani	5
Andijon viloyati
4.	Andijon shahri	15
5.	Xonobod shahri	10
Buxoro viloyati
6.	Buxoro shahri	20
7.	Kogon shahri	15
8.	Gʻijduvon tumani	5
9.	Romiton tumani	5
10.	Shofirkon tumani	5
Jizzax viloyati
11.	Zomin tumani	10
12.	Baxmal tumani	5
13.	Forish tumani	5
14.	Arnasoy tumani	5
15.	Gʻallaorol tumani	5
Qashqadaryo viloyati
16.	Qarshi shahri	5
17.	Kitob tumani	5
18.	Shahrisabz tumani	20
Navoiy viloyati
19.	Karmana tumani	5
20.	Qiziltepa tumani	5
21.	Nurota tumani	5
Namangan viloyati
22.	Pop tumani	10
23.	Chortoq tumani	5
24.	Yangiqoʻrgʻon tumani	5
Samarqand viloyati
25.	Samarqand shahri	20
26.	Urgut tumani	5
27.	Samarqand tumani	5
Surxondaryo viloyati
28.	Boysun tumani	15
29.	Termiz shahri	5
30.	Sariosiyo tumani	5
31.	Sherobod tumani	5
Sirdaryo viloyati
32.	Guliston shahri	5
Toshkent viloyati
33.	Boʻstonliq tumani	30
34.	Oxangaron tumani	5
35.	Parkent tumani	5
36.	Angren shahri	5
Fargʻona viloyati
37.	Fargʻona shahri	10
38.	Qoʻqon shahri	5
39.	Margʻilon shahri	5
Xorazm viloyati
40.	Xiva shahri	25
41.	Urganch shahri	15

Vazirlar Mahkamasining 2018-yil 24-noyabrdagi 954-son qaroriga
2-ILOVA

Namunaviy loyihalar boʻyicha mehmonxonalar qurish boʻyicha tadbirkor — investorlarga amaliy yordam koʻrsatish boʻyicha Respublika ishchi guruhi

TARKIBI

1.	A.A. Abduhakimov	—	Oʻzbekiston Respublikasi Bosh vazirining oʻrinbosari, Respublika ishchi guruhi rahbari
2.	A.U. Akkulov	—	Turizmni rivojlantirish davlat qoʻmitasi raisi vazifasini vaqtincha bajaruvchi, Respublika ishchi guruhi rahbari oʻrinbosari
3.	B.I. Zakirov	—	Qurilish vazirining birinchi oʻrinbosari
4.	D.S. Azimov	—	Uy-joy kommunal xizmat koʻrsatish vazirining birinchi oʻrinbosari
5.	O.M. Umarov	—	Axborot texnologiyalari va kommunikatsiyalarini rivojlantirish vazirining birinchi oʻrinbosari
6.	T.M. Abdullayev	—	Yer resurslari, geodeziya, kartografiya va davlat kadastri boʻyicha davlat qoʻmitasi raisining birinchi oʻrinbosari
7.	X.S. Bekenov	—	Investitsiyalar boʻyicha davlat qoʻmitasi raisining birinchi oʻrinbosari
8.	U.M. Mustafayev	—	“Oʻzbekenergo” AJ boshqaruvi raisi
9.	Lavozimi boʻyicha	—	“Oʻztransgaz” AJ boshqaruvi raisi
10.	Lavozimi boʻyicha	—	Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining investitsiyalar, innovatsiyalar, sanoatni rivojlantirish, xususiylashtirilgan korxonalarga koʻmaklashish va turizm masalalari boʻyicha oʻrinbosarlari — tegishli hududlarning masalalari qismida
11.	Lavozimi boʻyicha	—	Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarlari — tegishli hududlar masalalariga oid qismi boʻyicha
12.	Lavozimi boʻyicha	—	Samarqand, Xorazm, Buxoro va Toshkent viloyatlarining turizmni rivojlantirish masalalari boʻyicha oʻrinbosarlari — tegishli hududlar masalalariga oid qismi boʻyicha
13.	A.A. Nazarmuxamedov	—	Vazirlar Mahkamasi apparati Turizmni rivojlantirish masalalari shuʼbasining mudiri vazifasini bajaruvchi, Respublika ishchi guruhining masʼul kotibi

Izoh. Ishchi guruh aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan yoki zimmasiga tegishli funksiyalar yuklangan shaxslar kiritiladi.

Vazirlar Mahkamasining 2018-yil 24-noyabrdagi 954-son qaroriga
3-ILOVA

Namunaviy loyihalar boʻyicha mehmonxonalar qurish boʻyicha investorlar — tadbirkorga amaliy yordam koʻrsatish boʻyicha hududiy ishchi guruhlarning

NAMUNAVIY TARKIBI

1. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, hududiy ishchi guruh rahbari

2. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining investitsiyalar, innovatsiyalar, sanoatni rivojlantirish, xususiylashtirilgan korxonalarga koʻmaklashish va turizm masalalari boʻyicha oʻrinbosarlari, hududiy ishchi guruh rahbarining oʻrinbosari

3. Samarqand, Xorazm, Buxoro va Toshkent viloyatlarining turizmni rivojlantirish masalalari boʻyicha oʻrinbosarlari, hududiy ishchi guruh rahbarining oʻrinbosari

4. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarlari

5. Turizmni rivojlantirish davlat qoʻmitasi hududiy boshqarmalarining boshliqlari

6. Qurilish vazirligining hududiy boshqarmasi boshligʻi

7. Axborot texnologiyalari va kommunikatsiyalarini rivojlantirish vazirligining hududiy boshqarmasi boshligʻi

8. Yer resurslari, geodeziya, kartografiya va davlat kadastri boʻyicha davlat qoʻmitasining hududiy boshqarmasi boshligʻi

9. Investitsiyalar boʻyicha davlat qoʻmitasining hududiy boshqarmasi boshligʻi

10. “Oʻzbekenergo” AJ hududiy boshqarmasi rahbari

11. “Oʻztransgaz” AJ hududiy boshqarmasi rahbari

12. Tuman (shahar) hokimlarining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarlari, hududiy ishchi guruh kotibi

Izoh. Ishchi guruh aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan yoki zimmasiga tegishli funksiyalar yuklangan shaxslar kiritiladi.

(Qonun hujjatlari maʼlumotlari milliy bazasi, 27.11.2018-y., 09/18/954/2225-son; Qonunchilik maʼlumotlari milliy bazasi, 13.01.2022-y., 09/22/18/0019-son; 15.05.2024-y., 09/24/282/0347-son; 16.12.2025-y., 09/25/791/1167-son)