Oʻzbekiston Respublikasi Prezidentining “Oʻzbekiston Tovar ishlab chiqaruvchilar va tadbirkorlar palatasini tashkil etish toʻgʻrisida”gi Farmoniga muvofiq Vazirlar Mahkamasi qaror qiladi:

1. Oʻzbekiston Tovar ishlab chiqaruvchilar va tadbirkorlar palatasining tashkiliy tuzilmasiga 1-ilovaga muvofiq rozilik berilsin.

Belgilab qoʻyilsinki, Oʻzbekiston Tovar ishlab chiqaruvchilar va tadbirkorlar palatasi Tovar ishlab chiqaruvchilar va tadbirkorlar hududiy palatalari tomonidan tashkil etiladi.

2. Oʻzbekiston Tovar ishlab chiqaruvchilar va tadbirkorlar palatasi boshqaruvining ijro etuvchi apparati tuzilmasiga 2, 2a-ilovalarga muvofiq va uning xodimlari cheklangan sonining 35 nafardan iborat boʻlishiga rozilik berilsin.

Maʼlumot uchun qabul qilinsinki, Palata raisi va uning oʻrinbosarlari Tovar ishlab chiqaruvchilar va tadbirkorlar palatasining yuqori organi — syezd tomonidan saylanadilar, Palataning ijro etuvchi apparatini mablagʻ bilan taʼminlash esa Palata qatnashchilari badallari, shuningdek uning oʻz mablagʻlari hisobiga amalga oshiriladi.

3. Tovar ishlab chiqaruvchilar va tadbirkorlar palatasi oʻziga yuklangan funksiyalar va vazifalarni amalga oshirish doirasida quyidagi huquqlarga egadir:

Palata aʼzolariga konsalting, auditorlik, yuridik, axborot xizmatlari, shuningdek kadrlar tayyorlash va ularning malakasini oshirishga doir xizmatlar koʻrsatish boʻyicha xoʻjalik hisobidagi tashkilotlar (markazlar, xizmatlar, firmalar) tashkil etish;

keyinchalik soliq va boshqa organlarga taqdim etish uchun Palata aʼzolari topshirigʻiga binoan buxgalteriya va moliya hisobotlari tuzish;

iqtisodiy tusdagi bahslar va nizolarni hal etuvchi komissiyalarga ega boʻlish.

4. Belgilab qoʻyilsinki, Tovar ishlab chiqaruvchilar va tadbirkorlar hududiy palatalari:

Tovar ishlab chiqaruvchilar va tadbirkorlar tuman (shahar) palatalarini birlashtiradilar, oʻzlariga berilgan funksiyalarning bajarilishi yuzasidan oʻz aʼzolari oldida javob beradilar;

Oʻzbekiston Tovar ishlab chiqaruvchilar va tadbirkorlar palatasi tarkibiga yuridik shaxs huquqi bilan kirgan holda, oʻz faoliyatini viloyat konferensiyasi tomonidan tasdiqlanadigan hududiy palata Ustaviga muvofiq amalga oshiradilar.

Hududiy palatalar raislari Oʻzbekiston Tovar ishlab chiqaruvchilar va tadbirkorlar palatasi prezidiumi bilan kelishgan holda konferensiyalarda saylanadilar.

Hududiy palataning namunaviy tuzilmasi 3-ilovaga muvofiq tasdiqlansin.

5. Kichik oʻrta va xususiy tadbirkorlikni qoʻllab-quvvatlashning asosiy boʻgʻini sifatida yuridik shaxs huquqlariga ega boʻlgan Tovar ishlab chiqaruvchilar va tadbirkorlarning tuman (shahar) palatalari tashkil etilsin.

Tovar ishlab chiqaruvchilar va tadbirkorlar tuman (shahar) palatasining namunaviy tuzilmasi 4-ilovaga muvofiq tasdiqlansin.

6. Belgilab qoʻyilsinki:

Tovar ishlab chiqaruvchilar va tadbirkorlar tuman (shahar) palatalari tarkibiga ishlab chiqarish va boshqa tadbirkorlik faoliyatini amalga oshiruvchi kichik, oʻrta va xususiy tadbirkorlikning xoʻjalik yurituvchi subyektlari kiradilar;

ijro etuvchi apparatni mablagʻ bilan taʼminlash, Tovar ishlab chiqaruvchilar va tadbirkorlar tuman (shahar) palatalari tomonidan boshqaruv funksiyalarini bajarish bilan bogʻliq boshqa xarajatlarni qoplash uning qatnashchilarining aʼzolik badallari, shuningdek oʻz mablagʻlari hisobiga amalga oshiriladi;

Tovar ishlab chiqaruvchilar va tadbirkorlar tuman (shahar) palatalari ijro etuvchi apparatining xodimlari soni 3 — 5 nafardan iborat boʻladi.

7. Tovar ishlab chiqaruvchilar va tadbirkorlar palatasi, Oʻzbekiston Respublikasi Davlat mulki qoʻmitasi, Moliya vazirligi Tovar ishlab chiqaruvchilar va tadbirkorlarni qoʻllab-quvvatlash fondi toʻgʻrisida Nizomni hamda Fond mablagʻlaridan foydalanish tartibini bir oy muddatda ishlab chiqsinlar va tasdiqlash uchun Vazirlar Mahkamasiga taqdim etsinlar.

8. Oʻzbekiston Respublikasi Davlat mulki qoʻmitasi “Biznes-fond” va “Madad” agentligi bilan birgalikda:

Oʻzbekiston Tovar ishlab chiqaruvchilar va tadbirkorlar palatasining taʼsis syezdini oʻtkazsin, unda respublika palatasi kengashi va prezidiumi tarkibini tasdiqlasin;

bir hafta muddatda Tovar ishlab chiqaruvchilar va tadbirkorlar hududiy palatalarining namunaviy ustavlarini ishlab chiqsin.

9. Moliya vazirligi, Davlat soliq qoʻmitasi “Oʻzistiqbolstat” davlat qoʻmitasi bilan birgalikda kichik va xususiy tadbirkorlik subyektlari uchun soliq solish, hisobga olish va hisobotning soddalashtirilgan tartibini joriy etish boʻyicha Hukumat qarori loyihasini 15 kun muddatda ishlab chiqsinlar va koʻrib chiqish uchun Vazirlar Mahkamasiga kiritsinlar.

10. Toshkent shahar hokimligi Oʻzbekiston Tovar ishlab chiqaruvchilar va tadbirkorlar palatasining ijro etuvchi apparatini Toshkent shahar, Furqat koʻchasidagi 1-uyga joylashtirsin.

11. Oʻzbekiston Respublikasi Aloqa vazirligi Tovar ishlab chiqaruvchilar va tadbirkorlar palatasini telefon va teleks aloqasi, shu jumladan hukumat ATSi aloqasi bilan taʼminlasin.

12. Yuqorida qayd etilgan Farmonning 4-bandiga muvofiq:

Vazirlar Mahkamasining 1995-yil 31-iyuldagi 273-f-son farmoyishi bilan tasdiqlangan Davlat mulki davlat tasarrufidan chiqarilganda va xususiylashtirilganda, obyektlar kimoshdi savdolarida, tanlovlar va birja savdolarida sotilganda haq toʻlashning, tushgan mablagʻlarni taqsimlash va hisobga olishning, ushbu mablagʻlarning tushishi va ulardan foydalanish ustidan nazorat qilishning Yagona tartibi 3-ilovasiga;

Vazirlar Mahkamasining 1996-yil 29-yanvardagi 54-f-son farmoyishining 2 va 3-ilovalariga qisman oʻzgartirishlar kiritilsin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari V.A. Chjen va M.Z. Usmonov zimmasiga yuklansin.

Qarorning qanday bajarilayotganligi 1996-yil iyul oyida va yil yakuni boʻyicha koʻrib chiqilsin.

Rahbariyat

Hududiy boʻlinmalar faoliyatini muvofiqlashtirish boshqarmasi

Bozor infrastrukturalarini rivojlantirish va kadrlar tayyorlash boshqarmasi

Tashqi iqtisodiy aloqalar va investitsiyalarni jalb qilish boʻlimi

Marketing, axborot va reklama boshqarmasi

Moliya, hisobga olish va hisobot boshqarmasi

Biznes-rejalarni, texnik-iqtisodiy asoslashlarni ishlab chiqish va ekspertiza boshqarmasi

Nizo komissiyasi

Konsalting, auditorlik va huquq boshqarmasi

Tovar ishlab chiqaruvchilar va tadbirkorlarni qoʻllab-quvvatlash fondi