Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qarori ijrosini taʼminlash, zamonaviy talablarga javob beradigan yangi normativ-huquqiy va boshqa hujjatlarni qabul qilish hamda umummajburiy idoraviy hujjatlar oʻz kuchini yoʻqotayotganligi sababli qonunchilikda huquqiy boʻshliq kelib chiqishini oldini olish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq 2019-yil 1-yanvardan Oʻzbekiston Respublikasi hududida 1993-yil 17-iyungacha qabul qilingan va Oʻzbekiston Respublikasi Adliya vazirligida roʻyxatdan oʻtmagan umummajburiy idoraviy hujjatlar, shu jumladan sobiq SSSRning idoraviy hujjatlari oʻz kuchini yoʻqotayotganligi maʼlumot uchun qabul qilinsin.

2. Oʻz kuchini yoʻqotayotgan umummajburiy idoraviy hujjatlarning oʻrniga yangi normativ-huquqiy va boshqa hujjatlarni tayyorlash boʻyicha chora-tadbirlar rejasi (keyingi oʻrinlarda Reja deb yuritiladi) ilovaga* muvofiq tasdiqlansin.

3. Vazirlik va idoralarning rahbarlariga Rejada koʻrsatilgan normativ-huquqiy va boshqa hujjatlarni oʻz vaqtida va sifatli tayyorlanishi, ekspertiza qilinishi va kelishishi uchun shaxsiy javobgarlik yuklansin.

4. Rejada koʻrsatilgan masʼul ijrochilar har oyning 25-kunidan kechiktirmasdan Oʻzbekiston Respublikasi Adliya vazirligiga Rejaning ijro holati toʻgʻrisida axborot kiritib borsin.

Oʻzbekiston Respublikasi Adliya vazirligi hisobot oyidan keyingi oyning 5-kunidan kechiktirmasdan Oʻzbekiston Respublikasi Vazirlar Mahkamasiga Rejaning ijro holati yuzasidan umumlashtirilgan axborot kiritib borsin.

5. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari va Oʻzbekiston Respublikasi adliya vaziri R.Q. Davletovga yuklansin.