toggle_night_mode
Hujjat kuchini yo‘qotgan 22.02.2021
OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING
qarori
OʻZBEKISTON RESPUBLIKASI ADVOKATLAR KOLLEGIYALARIDA ADVOKATLIK AMALIYOTI BILAN ShUGʻULLANUVChI FUQAROLARNI IJTIMOIY HIMOYA QILISh ChORA-TADBIRLARI TOʻGʻRISIDA
 LexUZ sharhi
Mazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Fuqarolarning yuridik yordam olishga boʻlgan konstitutsion huquqlarini taʼminlash maqsadida yakka tartibdagi amaliyot bilan shugʻullanuvchi shaxslarning ixtiyoriy birlashishi sifatida advokatlar kollegiyasi faoliyatining xususiyatlarini hisobga olib, shuningdek, advokatlarni ijtimoiy himoya qilish maqsadida Vazirlar Mahkamasi qaror qiladi:
1. Respublika fuqarolarining pensiya taʼminoti toʻgʻrisida Oʻzbekiston Respublikasi Qonuni qabul qilingunga qadar vaqtincha, 1992-yil 1-yanvardan boshlab advokatlar kollegiyasi Oʻzbekiston Respublikasining advokaturasi toʻgʻrisidagi Nizomning 31-moddasida nazarda tutilgan kollegiyaning umumiy ehtiyojlari uchun zarur boʻlgan summa advokatlardan ushlab qolinganidan keyin ularning ish haqi (daromadlari)dan 7 foiz miqdorida davlat ijtimoiy taʼminoti va sugʻurtasiga badal toʻlashi belgilansin.
2. Vazirlar Mahkamasi huzuridagi Davlat soliq boshqarmasi, Oʻzbekiston Respublikasi Moliya vazirligi Oʻzbekiston respublika Pensiya fondi boʻlimi, Oʻzbekiston Kasaba uyushmalari Federatsiyasi Kengashi bilan birgalikda mazkur qarorning 1-bandiga muvofiq korxonalar, muassasalar va tashkilotlar xodimlaridan davlat ijtimoiy sugʻurtasiga badal undirish va uni hisobga olishning amaldagi tartibiga oʻzgartish va qoʻshimchalar kiritsinlar.
3. Mazkur qarorning bajarilishini nazorat qilish Oʻzbekiston Respublikasi Adliya vazirligiga yuklatilsin.
Oʻzbekiston Respublikasining Bosh vaziri A. MUTALOV
Toshkent sh.,
1992-yil 23-yanvar,
27-son