1.09.00.00.00 Tadbirkorlik va xo‘jalik faoliyati / 09.20.00.00 Energetika / 09.20.01.00 Umumiy qoidalar]
[TSZ:
1.Iqtisodiyot / Energetika]
Elektr energetikada nazorat bo‘yicha davlat inspeksiyasi O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasining
Qarori
Qo‘llaniladigan texnologiyalar va asbob-uskunalarning energiya jihatdan samaradorlik ko‘rsatkichlariga muvofiqligi, shuningdek, yoqilg‘ining muqobil turlaridan foydalanish to‘g‘risida xulosalar berish tartibi to‘g‘risidagi nizomni tasdiqlash haqida
[O‘zbekiston Respublikasi Adliya vazirligi tomonidan 2018-yil 3-aprelda ro‘yxatdan o‘tkazildi, ro‘yxat raqami 2991]
O‘zbekiston Respublikasi Prezidentining 2018-yil 17-yanvardagi PQ-3479-son “Mamlakat iqtisodiyotining tarmoqlarini talab yuqori bo‘lgan mahsulot va xomashyo turlari bilan barqaror ta’minlash chora-tadbirlari to‘g‘risida”gi qaroriga muvofiq Elektr energetikada nazorat bo‘yicha davlat inspeksiyasi va O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasi qaror qiladi:
1. Qo‘llaniladigan texnologiyalar va asbob-uskunalarning energiya jihatdan samaradorlik ko‘rsatkichlariga muvofiqligi, shuningdek, yoqilg‘ining muqobil turlaridan foydalanish to‘g‘risida xulosalar berish tartibi to‘g‘risidagi nizom ilovaga muvofiq tasdiqlansin.
2. Mazkur qaror rasmiy e’lon qilingan kundan e’tiboran kuchga kiradi.
Elektr energetikasida nazorat bo‘yicha davlat inspeksiyasi boshlig‘i D. ISAKULOV
Toshkent sh.,
2018-yil 29-mart,
5-son
Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasi boshlig‘i N. AGZAMOV
Toshkent sh.,
2018-yil 29-mart,
7-son
Elektr energetikada nazorat bo‘yicha davlat inspeksiyasi hamda O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasining 2018-yil 29-martdagi 5, 7-son qaroriga ILOVA
Qo‘llaniladigan texnologiyalar va asbob-uskunalarning energiya jihatdan samaradorlik ko‘rsatkichlariga muvofiqligi, shuningdek yoqilg‘ining muqobil turlaridan foydalanish to‘g‘risida xulosalar berish tartibi to‘g‘risidagi
NIZOM
Mazkur Nizom O‘zbekiston Respublikasi Prezidentining 2018-yil 17-yanvardagi PQ-3479-son “Mamlakat iqtisodiyotining tarmoqlarini talab yuqori bo‘lgan mahsulot va xomashyo turlari bilan barqaror ta’minlash chora-tadbirlari to‘g‘risida”gi qaroriga muvofiq qo‘llaniladigan texnologiyalar va asbob-uskunalarning energiya jihatidan samaradorlik ko‘rsatkichlariga muvofiqligi, shuningdek, yoqilg‘ining muqobil turlaridan foydalanish to‘g‘risida xulosalar berish tartibini belgilaydi.
1-bob. Umumiy qoidalar
1. O‘zbekiston Respublikasi Vazirlar Mahkamasining 2017-yil 28-dekabrdagi 1025-son “Tabiiy gaz va elektr energiyasi yetkazib berish va realizatsiya qilish tizimini yanada takomillashtirish chora-tadbirlari to‘g‘risida”gi qarorining 3-bandiga asosan Elektr energetikada nazorat bo‘yicha davlat inspeksiyasi (bundan buyon matnda “O‘zdavenergonazorat” deb yuritiladi) hamda O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasi (bundan buyon matnda “O‘zdavneftgazinspeksiya” deb yuritiladi) “Energiyani tejash milliy kompaniyasi” AJ bilan birgalikda ushbu qarorga ilovada ko‘rsatilgan tashkilotlarga (bundan buyon matnda tashkilot deb yuritiladi) ular tomonidan qo‘llaniladigan texnologiyalar va asbob-uskunalarning energiya jihatidan samaradorlik ko‘rsatkichlariga muvofiqligi, shuningdek yoqilg‘ining muqobil turlaridan foydalanish to‘g‘risida xulosalar (bundan buyon matnda xulosa deb yuritiladi) berilishini ta’minlaydi.
2. Xulosalar tashkilot tomonidan qo‘llaniladigan texnologiyalar va asbob-uskunalarning energiya jihatidan samaradorlik ko‘rsatkichlari nazarda tutilgan standartlashtirishga doir normativ hujjatlar (bundan buyon matnda standartlashtirishga doir normativ hujjat deb yuritiladi) mavjud bo‘lganda beriladi.
2-bob. Xulosani rasmiylashtirish va berish
3. Tashkilot xulosa olish uchun tegishliligicha “O‘zdavenergonazorat” yoki “O‘zdavneftgazinspeksiya”ning hududiy bo‘limiga ariza bilan murojaat qiladi.
Bunda arizaga standartlashtirishga doir normativ hujjatning nusxasi ilova qilinishi shart.
Ariza an’anaviy yoxud elektron shaklda yuborilishi mumkin.
4. “O‘zdavenergonazorat” yoxud “O‘zdavneftgazinspeksiya”ning hududiy bo‘limi arizani qabul qilib olgan kunning o‘zida arizani hamda unga ilova qilingan hujjatlarni 2 nusxada ko‘paytirilishini hamda ularning bir nusxasini “Energiya tejash milliy kompaniyasi” AJga, ikkinchi nusxasini esa — tegishlicha “O‘zdavenergonazorat” yoki “O‘zdavneftgazinspeksiya”ning hududiy bo‘limiga yuborilishini ta’minlaydi.
5. O‘zdavenergonazorat” hamda “O‘zdavneftgazinspeksiya”ning hududiy bo‘limlari mutaxassislari ariza berilgan kundan boshlab 5 kun ichida arizani bergan tashkilotga borgan holda tashkilotda qo‘llaniladigan texnologiyalar va asbob-uskunalarning energiya jihatidan samaradorlik ko‘rsatkichlariga muvofiqligi, shuningdek yoqilg‘ining muqobil turlaridan foydalanilayotganligini standartlashtirishga doir normativ hujjatga muvofiqligini o‘rganadi.
6. O‘rganishda:
“O‘zdavenergonazorat”ning hududiy bo‘limi mutaxassisi ishlab chiqarish bilan shug‘ullanuvchi tashkilotda mahsulot birligiga sarflanayotgan elektr energiyasining standartlashtirishga doir normativ hujjatdagi ko‘rsatkichlarga muvofiqligini, shuningdek faoliyati ishlab chiqarish bilan bog‘liq bo‘lmagan tashkilotda asbob-uskunalarning elektr energiyasining sarfi standartlashtirishga doir normativ hujjatdagi ko‘rsatkichlarga muvofiqligini;
“O‘zdavneftgazinspeksiya”ning hududiy bo‘limi mutaxassisi ishlab chiqarish bilan shug‘ullanuvchi tashkilotda mahsulot birligiga sarflanayotgan gazning standartlashtirishga doir normativ hujjatdagi ko‘rsatkichlarga muvofiqligini, shuningdek faoliyati ishlab chiqarish bilan bog‘liq bo‘lmagan tashkilotda asbob-uskunalarning gaz sarfi standartlashtirishga doir normativ hujjatdagi ko‘rsatkichlarga muvofiqligini o‘rganadi.
Mutaxassislar tashkilotda sertifikatlangan va energiya jihatidan samarali uskunalar va priborlar qo‘llanilayotganini ham o‘rganadi.
Mutaxassislar tomonidan mazkur bandda nazarda tutilmagan masalalar o‘rganilishi taqiqlanadi.
7. O‘zdavenergonazorat” hamda “O‘zdavneftgazinspeksiya”ning hududiy bo‘limlari mutaxassislari tomonidan tashkilotda o‘tkazilgan o‘rganish natijalari yuzasidan 2 nusxada ma’lumotnoma tuziladi.
O‘rganish jarayonida tashkilotda mazkur Nizomga asosan o‘rganish predmetiga kiradigan masalalar mavjud bo‘lmaganda, bu haqda ma’lumotnomada ko‘rsatiladi.
Ma’lumotnoma “O‘zdavenergonazorat” hamda “O‘zdavneftgazinspeksiya”ning hududiy bo‘limlari mutaxassislari, tashkilotning rahbari yoki vakili tomonidan imzolanadi.
8. “O‘zdavenergonazorat” hamda “O‘zdavneftgazinspeksiya”ning hududiy bo‘limlari mutaxassislari tomonidan o‘rganish natijalari yuzasidan tuzilgan ma’lumotnoma u imzolangan kunning o‘zida (biroq, ariza berilgan kundan boshlab 5 kundan kechiktirmay) “Energiya tejash milliy kompaniyasi” AJga yuboriladi.
9. “Energiya tejash milliy kompaniyasi” AJ “O‘zdavneftgazinspeksiya” va “O‘zdavenergonazorat”ning hududiy bo‘limlari mutaxassislari tomonidan o‘rganish natijalari yuzasidan tuzilgan ma’lumotnomani u yuborilgan kundan boshlab 10 kun ichida o‘rganib chiqadi.
10. “Energiya tejash milliy kompaniyasi” AJ o‘rganish natijasida tashkilotda qo‘llanilayotgan texnologiyalar va asbob-uskunalar energiya jihatidan samaradorlik ko‘rsatkichlariga muvofiq (yoqilg‘ining muqobil turlaridan foydalaniladi), deb topganda mazkur Nizomning ilovasiga muvofiq shaklda xulosani rasmiylashtiradi va uni shu kunning o‘zida tegishlicha “O‘zdavneftgazinspeksiya” yoki “O‘zdavenergonazorat”ning hududiy bo‘limiga keyinchalik tashkilotga berish uchun yuboradi.
11. “O‘zdavneftgazinspeksiya” yoki “O‘zdavenergonazorat”ning hududiy bo‘limi “Energiya tejash milliy kompaniyasi” AJ tomonidan rasmiylashtirilgan xulosani u kelib tushgan kunning o‘zida tashkilotga yuborilishini ta’minlaydi.
12. Xulosa “Energiya tejash milliy kompaniyasi” AJ rahbari hamda “O‘zdavneftgazinspeksiya” va “O‘zdavenergonazorat”ning hududiy bo‘limlari rahbarlari tomonidan imzolangan va mazkur tashkilotlarning muhri bilan tasdiqlangan bo‘lishi lozim.
Xulosaga uni asoslantiruvchi ma’lumotlar ilova qilinadi.
Xulosa 5 yil muddatga beriladi.
13. Tashkilotda qo‘llanilayotgan texnologiyalar va asbob-uskunalar energiya jihatidan samaradorlik ko‘rsatkichlariga muvofiq emas, deb topilganda murojaat etuvchi shaxsga asoslantirilgan javob xati tayyorlanadi va uni murojaat etuvchiga taqdim etish uchun tegishlicha “O‘zdavneftgazinspeksiya” yoki “O‘zdavenergonazorat”ning hududiy bo‘limiga yuboradi.
3-bob. Yakuniy qoida
14. Mazkur Nizom O‘zbekiston Respublikasi Iqtisodiyot vazirligi, O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi, O‘zbekiston standartlashtirish, metrologiya va sertifikatlashtirish agentligi, O‘zbekiston Respublikasi Savdo-sanoat palatasi, “Energiya tejash milliy kompaniyasi” AJ, “O‘ztransgaz” AJ va “O‘zbekenergo” AJ bilan kelishilgan.
Iqtisodiyot vaziri B. XODJAYEV
2018-yil 29-mart
Xususiylashtirilgan korxonalarga ko‘maklashish va raqobatni rivojlantirish davlat qo‘mitasi raisi R. GULYAMOV
2018-yil 28-mart
O‘zbekiston standartlashtirish, metrologiya va sertifikatlashtirish agentligi bosh direktori A. KARIMOV
2018-yil 27-mart
Savdo-sanoat palatasi raisi A. IKRAMOV
2018-yil 26-mart
“Energiya tejash milliy kompaniyasi” AJ boshqaruv raisi B. GANIYEV
2018-yil 26-mart
“O‘ztransgaz” AJ boshqaruv raisi A. MUSTAFAYEV
2018-yil 24-mart
“O‘zbekenergo” AJ boshqaruv raisi U. MUSTAFOYEV
2018-yil 23-mart
Qo‘llaniladigan texnologiyalar va asbob-uskunalarning energiya jihatdan samaradorlik ko‘rsatkichlariga muvofiqligi, shuningdek yoqilg‘ining muqobil turlaridan foydalanish to‘g‘risida xulosalar berish tartibi to‘g‘risidagi nizomga ILOVA
Qo‘llaniladigan texnologiyalar va asbob-uskunalarning energiya jihatdan samaradorlik ko‘rsatkichlariga muvofiqligi, shuningdek yoqilg‘ining muqobil turlaridan foydalanishi to‘g‘risidagi XULOSA
______-son
20__ yil “___” ____________
Ushbu xulosa __________________________________________________________________________________ ning (o‘rganish o‘tkazilgan tashkilotning nomi) _______________________________________________________________________________________________ da (o‘rganish o‘tkazilgan obyektning manzili)
joylashgan obyektda: qo‘llanilayotgan texnologiyalarning; quyidagi asbob-uskunalarning: ________________________________________________________________________________________________; _________________________________________________________________________________________________ energiya jihatidan samaradorlik ko‘rsatkichlariga muvofiqligini tasdiqlaydi. Tashkilotda yoqilg‘ining quyidagi muqobil turlaridan foydalaniladi: _________________________________________________________________________________________________; _________________________________________________________________________________________________. Ushbu xulosaga ilova qilinayotgan asoslantiruvchi ma’lumotlar uning ajralmas qismi hisoblanadi. Ilova ____ varaqda.
