Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi qatnashchilari boʻlgan korxonalar sonini kengaytirish, shuningdek raqobatbardosh mahsulotlar ishlab chiqarishni taʼminlaydigan yangi loyihalarni kiritish tartib-qoidalarini tartibga solish maqsadida Vazirlar Mahkamasi qaror qiladi:

1. Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga tuzatishlar kiritish tartibi toʻgʻrisidagi nizom ilovaga muvofiq tasdiqlansin.

2. Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish kompleks dasturini amalga oshirishni taʼminlash boʻyicha maxsus komissiya Vazirlar Mahkamasining tegishli komplekslari ishtirokida Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi roʻyxatlari va parametrlariga tuzatishlar kiritish masalalari boʻyicha Vazirlar Mahkamasiga tushgan takliflarni, zaruriyatga koʻra, biroq yilning har choragida kamida bir marta koʻrib chiqsin.

3. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

1. Mazkur Nizom Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi (keyingi oʻrinlarda matnda Mahalliylashtirish dasturi deb yuritiladi) roʻyxatlari va parametrlariga tuzatishlar kiritish boʻyicha takliflarni tasdiqlash uchun Vazirlar Mahkamasiga kiritish tartibini belgilab beradi.

2. Mahalliylashtirish dasturiga tuzatishlar kiritish:

Mahalliylashtirish dasturiga kiritilgan loyihalarning ayrim parametrlarini oʻzgartirish;

Mahalliylashtirish dasturiga kiritilgan loyihalarni chiqarib tashlash yoki shunday maqsaddagi muqobil loyihalar bilan almashtirish;

respublika korxonalarida ishlab chiqarish-texnika va isteʼmol maqsadlaridagi materiallar va buyumlar ishlab chiqarishni oʻzlashtirish boʻyicha yangi loyihalarni kiritish boʻyicha asoslangan takliflar asosida amalga oshirilishi mumkin;

3. Davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, mahalliylashtirish loyihalari tashabbuskorlari boʻlgan xoʻjalik yurituvchi subyektlar Mahalliylashtirish dasturiga tuzatish kiritish boʻyicha ishlab chiqilgan takliflarni Oʻzbekiston Respublikasi Vazirlar Mahkamasining Iqtisodiyot va tashqi iqtisodiy aloqalar masalalari yigʻma axborot-tahlil departamentiga (keyingi oʻrinlarda matnda Departament deb yuritiladi) kiritadilar.

4. Departament loyihaning maqsadlaridan, uni moliyalashtirish manbalaridan va taklif etilayotgan tuzatishning mohiyatidan kelib chiqib tushgan materiallarni quyidagi tegishli vakolatli ekspertiza organlariga koʻrib chiqish uchun yuboradi:

a) Oʻzbekiston Respublikasi Iqtisodiyot vazirligiga:

loyihaning Mahalliylashtirish dasturi maqsadlari va vazifalariga muvofiqligi;

loyihani amalga oshirish imkoniyatlari;

ishlab chiqariladigan mahsulotning talab etilishi;

mahalliylashtirishning taklif etilayotgan darajasiga erishish imkoniyatlari;

loyihaning ayrim parametrlarini chiqarib tashlash yoki oʻzgartirishning maqsadga muvofiqligi yuzasidan loyihani amalga oshirishning umumiy iqtisodiy maqsadga muvofiqligini baholash uchun;

b) Oʻzbekiston Respublikasi Moliya vazirligiga (loyiha moliyalashtirishning markazlashtirilgan manbalari hisobiga amalga oshirilgan hollarda) — iqtisodiy samaradorlikni kelishish uchun;

v) Oʻzbekiston Respublikasi Tashqi iqtisodiy aloqalar, investitsiyalar va savdo vazirligiga:

taklif etilayotgan marketing konsepsiyasi;

mahalliylashtirilayotgan mahsulotni sotish, shu jumladan uni eksport qilish istiqbollari;

texnologiya darajasi va eksport qilinadigan texnologik asbob-uskunalar, xomashyo va materiallar hamda xizmatlar narxlarining cheklangan parametrlari;

loyihaning ayrim parametrlarini chiqarib tashlash yoki oʻzgartirishning maqsadga muvofiqligi asosida loyihani amalga oshirishning samaradorligi va imkoniyatlarini baholash uchun;

g) vakolatli bankka (loyiha moliyalashtirishning markazlashtirilgan manbalari hisobiga amalga oshirilgan yoki tijorat banklarining kreditlari jalb etilgan hollarda) — loyihaning iqtisodiy asoslanganligini, moliyalashtirishning taklif etilayotgan sxemasi maqbulligini, tavakkalchiliklarni baholash va kreditning qaytarilishini aniqlash uchun.

5. Takliflarning yuqorida koʻrsatib oʻtilgan vakolatli organlar tomonidan baholanishi ariza beruvchi (loyiha tashabbuskori) tomonidan quyidagi hujjatlar:

a) Mahalliylashtirish dasturiga kiritish taklif etilayotgan loyihalar uchun — Mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish kompleks dasturini amalga oshirishni taʼminlash boʻyicha maxsus komissiya (keyingi oʻrinlarda matnda Maxsus komissiya deb yuritiladi) tomonidan tasdiqlangan shakl boʻyicha tuzilgan loyihaning pasporti;

b) Mahalliylashtirish dasturiga kiritilgan loyihalarning ayrim parametrlariga tuzatish kiritish uchun — ayrim parametrlarga tuzatish kiritish zarurligini asoslaydigan qaydnoma, tahliliy va jadval materiallari bilan birgalikda;

v) Mahalliylashtirish dasturidan chiqarib tashlash taklif etilayotgan loyihalar uchun — loyihani Mahalliylashtirish dasturidan chiqarish zarurligi asoslangan qaydnoma, tahliliy va jadval materiallari va, mavjud boʻlgan taqdirda, uni muqobil loyiha bilan almashtirish imkoniyati toʻgʻrisidagi takliflar bilan birgalikda rasman kiritilgandan keyin ikki hafta muddatda amalga oshiriladi.

6. Koʻrsatib oʻtilgan muddat mobaynida vakolatli ekspertiza organlari loyihalarning tashabbuskorlari bilan birgalikda taqdim etilgan hujjatlarni koʻrib chiqadilar va iqtisodiy jihatdan maqsadga muvofiq loyihalarning hujjatlarida noaniqliklar aniqlangan taqdirda, ularni puxta ishlashda ariza beruvchiga koʻmaklashadilar.

7. Loyiha tashabbuskorlaridan loyiha pasportida nazarda tutilmagan qoʻshimcha axborot taqdim etilishini talab etishga yoʻl qoʻyilmaydi.

8. Departament tushgan takliflarni vakolatli organlarning ijobiy xulosalari bilan birgalikda umumlashtiradi va ularni koʻrib chiqish uchun Maxsus komissiyaga kiritadi.

Bir yoki undan ortiq vakolatli ekspertiza organlarining xulosasi salbiy boʻlgan taqdirda, Departament koʻrib chiqish uchun Maxsus komissiyaga tegishli xulosa kiritadi.

9. Maxsus komissiya Vazirlar Mahkamasining tegishli komplekslari ishtirokida oʻzining, zaruriyatga koʻra, biroq yilning har choragida kamida bir marta oʻtkaziladigan majlislarida tushgan takliflarni koʻrib chiqadi hamda Mahalliylashtirish dasturiga oʻzgartirish va qoʻshimchalar kiritishning maqsadga muvofiqligi toʻgʻrisida majlis qarori qabul qiladi.

10. Maxsus komissiyaning majlis qarori asosida Departament tomonidan Mahalliylashtirish dasturi roʻyxatiga tuzatishlar kiritish toʻgʻrisida Oʻzbekiston Respublikasi Vazirlar Mahkamasining qarori loyihasi kiritiladi.

Vazirlar Mahkamasining Mahalliylashtirish dasturi roʻyxatiga tuzatishlar kiritish toʻgʻrisidagi qarori Oʻzbekiston Respublikasining Bosh vaziri tomonidan imzolanadi.

Mahalliylashtirish dasturi loyihalari parametrlariga tuzatishlar kiritish Maxsus komissiya raisi tomonidan tasdiqlangan Maxsus komissiya protokoli asosida amalga oshiriladi.

11. Loyiha Mahalliylashtirish dasturidan chiqarib tashlangan taqdirda, loyihani amalga oshiruvchi korxona Oʻzbekiston Respublikasi Vazirlar Mahkamasining loyihani Mahalliylashtirish dasturidan chiqarib tashlash toʻgʻrisidagi qarori kuchga kirgan paytdan boshlab tegishli soliq va bojxona imtiyozlaridan mahrum etiladi.