Oʻzbekiston Respublikasi Prezidentining

Qarori

Oʻzbekiston davlat konservatoriyasi faoliyatini yanada rivojlantirish va takomillashtirish chora-tadbirlari toʻgʻrisida

Mamlakatimizda mustaqillik yillarida madaniyat sohasini izchil rivojlantirish, jahon miqyosidagi ijobiy tajriba va tendensiyalar, yutuq va natijalarni har tomonlama chuqur oʻrganish asosida madaniyat va sanʼat muassasalari faoliyatini samarali yoʻlga qoʻyish, ularning tarmogʻini kengaytirish, moddiy-texnik bazasi, kadrlar salohiyatini mustahkamlash masalalariga alohida eʼtibor berilmoqda.

Ayni shu maqsadda 2002-yilda qabul qilingan Oʻzbekiston Respublikasi Prezidentining farmoniga binoan Toshkent davlat konservatoriyasi uchun yangi bino qurilib, u zamonaviy talablar asosida jihozlandi. Ushbu oliy oʻquv yurtining nufuzi va maqomini oshirish uchun unga “Oʻzbekiston davlat konservatoriyasi” nomi berildi, konservatoriya qoshida iqtidorli yoshlar uchun akademik musiqa litseyi ham tashkil etildi.

Oʻzbekiston davlat konservatoriyasi faoliyatining tanqidiy tahlili oʻtgan davr mobaynida ushbu oliy taʼlim muassasasi tomonidan akademik va milliy musiqa sanʼati yoʻnalishlarida yuqori malakali kadrlar tayyorlash, oʻquv-pedagogik va ilmiy-ijodiy ishlarni tashkil etish borasida muayyan yutuqlarga erishilganini, shu bilan birga, bir qator jiddiy kamchilik va nuqsonlarga ham yoʻl qoʻyilganini koʻrsatmoqda.

Mutasaddi tashkilotlar, birinchi navbatda Madaniyat vazirligi, Oliy va oʻrta maxsus taʼlim vazirligi tomonidan yetarli darajada amaliy yordam va koʻmak berilmagani, tegishli nazorat olib borilmagani, masʼuliyat va talabchanlik boʻshashtirib yuborilgani oqibatida Oʻzbekiston davlat konservatoriyasi mamlakatimiz madaniy hayotidagi oʻzining yetakchi oʻrni, obroʻ-eʼtibori va taʼsirini yoʻqotib borayotgani, uning faoliyati bugungi zamon talablaridan orqada qolayotgani, bu borada kechiktirmasdan hal qilish zarur boʻlgan bir qancha jiddiy muammolar mavjudligi yaqqol koʻzga tashlanmoqda.

Jumladan, taʼlim-tarbiya ishlarining zamonaviy standartlar va sohaning oʻziga xos xususiyatlari asosida toʻgʻri tashkil etilmagani, oʻquv dasturlari va metodikasining mukammal emasligi, darslik va qoʻllanmalarning yetishmasligi, professor-oʻqituvchilar, ilmiy va ijodiy xodimlarning salohiyati aksariyat hollarda talabga javob bermasligi, konservatoriyaning moddiy-texnik bazasi nochor ahvolga kelib qolgani tashvish uygʻotmasdan qolmaydi. Oʻzbekiston davlat konservatoriyasida oʻqishga qabul qilish kvotalarida nomutanosiblik vujudga kelgani, xususan, 700 nafar oʻquv oʻrni mavjud boʻlgani holda, amalda 1346 nafar talaba tahsil olayotganini albatta normal holat sifatida baholab boʻlmaydi.

Mana shunday kamchilik va muammolar oʻz navbatida ushbu oliy taʼlim muassasasi oldiga qoʻyilgan vazifalarni toʻlaqonli va samarali amalga oshirishga, madaniyat sohasi uchun yuqori malakali mutaxassislar tayyorlash sifatiga salbiy taʼsir koʻrsatmoqda.

Xalqimiz, xususan, yoshlarimizning dunyoqarashi, maʼnaviy saviyasi va estetik tarbiyasini yuksaltirishda gʻoyat muhim oʻrin va ahamiyatga ega boʻlgan musiqa sanʼatini har tomonlama rivojlantirish, boy musiqiy merosimizni chuqur oʻrganish, yosh avlodni milliy va jahon musiqa sanʼatining mumtoz namunalariga muhabbat ruhida tarbiyalash, soha uchun yuqori malakali kadrlar tayyorlash tizimini yanada takomillashtirish maqsadida:

1. Quyidagilar:

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturi (keyingi oʻrinlarda — Dastur deb ataladi) 1-ilovaga;

Oldingi tahrirga qarang.

(1-bandning uchinchi xatboshisi Oʻzbekiston Respublikasi Prezidentining 2022-yil 2-fevraldagi PQ-112-sonli qaroriga asosan chiqarilgan — Qonunchilik maʼlumotlari milliy bazasi, 03.02.2022-y., 07/22/112/0099-son)

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturini amalga oshirish boʻyicha Respublika komissiyasi tarkibi 3-ilovaga muvofiq tasdiqlansin.

2. Dasturning asosiy yoʻnalishlari etib quyidagilar belgilansin:

oʻzbek xalqining milliy musiqiy merosi va jahon musiqa madaniyati durdonalari negizida musiqa sanʼatini rivojlantirish, musiqiy taʼlim tizimini sifat jihatidan yanada koʻtarish;

aholimiz, birinchi navbatda yoshlarni milliy va umumbashariy musiqa sanʼatining eng yaxshi namunalaridan bahramand etish, shu asosda ularning madaniy saviyasini yuksaltirish, maʼnaviy yetuk va barkamol shaxslarni tarbiyalash;

mulkiy yoki idoraviy mansubligidan qatʼi nazar, musiqa sanʼati, musiqa taʼlimi yoʻnalishi uchun kadrlar tayyorlash, normativ-huquqiy hujjatlar loyihalarini ishlab chiqish va ularni joriy etish boʻyicha kelishuvlarda Oʻzbekiston davlat konservatoriyasi metodik va ijodiy jihatdan tayanch oliy taʼlim muassasasi ekanini eʼtirof etish;

Oʻzbekiston davlat konservatoriyasining moddiy-texnik bazasini yanada mustahkamlash, jumladan, konsert zallari, auditoriyalar va maxsus xonalarni taʼmirlash va zamon talablari darajasida jihozlash;

konservatoriyada faoliyat koʻrsatayotgan professor-oʻqituvchilarning ilmiy-pedagogik mahoratini oshirish, oʻquv jarayoni sifati va saviyasini tubdan yaxshilash, musiqa sanʼati sohasida jahonning yetakchi oliy taʼlim muassasalari, ijodiy markazlar, taniqli kompozitor, musiqachi va ijrochilar bilan hamkorlikni yoʻlga qoʻyish, jumladan, xorijiy mutaxassislarni mamlakatimizga taklif etish bilan bir qatorda respublikamizda yuqori natijalarga erishgan musiqachi va pedagoglarning mahorat darslarini chet davlatlarda tizimli tashkil etish;

Oʻzbekiston davlat konservatoriyasining yosh pedagog kadrlarini moddiy va maʼnaviy qoʻllab-quvvatlash maqsadida zarur maishiy sharoitlar yaratish, ipoteka kreditlari asosida uy-joy bilan taʼminlash boʻyicha aniq chora-tadbirlar ishlab chiqish va amalga oshirish;

Konservatoriya va uning tarkibidagi Iqtidorli bolalar akademik litseyi professor-oʻqituvchilari hamda talabalarining ijodiy faolligini yanada oshirish, yozgi taʼtil davomida yoshlarning boʻsh vaqti mazmunli oʻtishi uchun Toshkent viloyati Boʻstonliq tumanida joylashgan sanatoriyni “Musiqa oromgohi” degan nom bilan konservatoriya tasarrufiga oʻtkazish.

Oldingi tahrirga qarang.

(3-band Oʻzbekiston Respublikasi Prezidentining 2022-yil 2-fevraldagi PQ-112-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 03.02.2022-y., 07/22/112/0099-son)

4. Oʻzbekiston Respublikasi Madaniyat vazirligi:

Oʻzbekiston davlat konservatoriyasida oʻquv binolari yetishmaganligi sababli hamda talabalar kontingenti sezilarli darajada ortganini inobatga olib, 2018/2019 oʻquv yilidan boshlab Toshkent shahar hokimligi bilan birgalikda bir oy muddatda Mirzo Ulugʻbek tumanidagi, Mustaqillik prospekti, 31-uyda joylashgan V. Uspenskiy nomidagi respublika ixtisoslashtirilgan musiqa akademik litseyiga tegishli boʻlgan binoni Oʻzbekiston davlat konservatoriyasiga oʻrnatilgan tartibda berilishini taʼminlasin;

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi va Toshkent shahar hokimligi bilan birgalikda bir oy muddatda Toshkent shahri, Buxoro koʻchasi, 10-uyda joylashgan binoni Oʻzbekiston davlat konservatoriyasi tasarrufiga oʻtkazish va ushbu binoda jahon andozalariga toʻliq mos boʻlgan, akademik jamoalarning badiiy dasturlari namoyish etiladigan, jonli ijroga moʻljallangan zamonaviy konsert zalini barpo etish boʻyicha Oʻzbekiston Respublikasi Vazirlar Mahkamasiga taklif kiritsin.

Oʻzbekiston Respublikasi Madaniyat vazirligi mazkur loyihalarni amalga oshirishda xorijiy mutaxassislar bilan hamkorlikda konservatoriyaning loyihalashtirish, qurilish va taʼmirlash ishlarida masʼul etib belgilansin.

Uch oy muddatda Oʻzbekiston davlat konservatoriyasi binosida “Noyob cholgʻular davlat kolleksiyasi”ni tashkil etish boʻyicha Oʻzbekiston Respublikasi Vazirlar Mahkamasiga taklif kiritsin;

toʻrt oy muddatda Oʻzbekiston davlat konservatoriyasiga abituriyentlarni oʻqishga qabul qilish boʻyicha oʻtkaziladigan kasbiy (ijodiy) kirish imtihonlari tartibiga oʻzgartirishlar kiritish yuzasidan Oʻzbekiston Respublikasi Vazirlar Mahkamasiga takliflar kiritsin;

2018-yilning 1-martiga qadar Oʻzbekiston davlat konservatoriyasi muassisligida musiqa sanʼati taʼlim-tarbiyasi boʻyicha “Musiqa” ilmiy-uslubiy jurnali faoliyatini tashkil etsin;

respublikadagi eng yaxshi bolalar musiqa va sanʼat maktablari, madaniyat va sanʼat kollejlarida konservatoriyaning tayanch ijodiy markazlarini tashkil etsin hamda ularga konservatoriyaning yetakchi professor-oʻqituvchilarini yuborib, “Mahorat maktabi” mashgʻulotlarini oʻtkazishni yoʻlga qoʻysin;

noyob va murakkab cholgʻu sozlarini yanada puxta oʻzlashtirishlari uchun har yili yosh ijrochilar va texnogen sanʼat turlari mutaxassislarini xorijdagi nufuzli musiqa akademiyalari va konservatoriyalariga kelishuv shartnomalari asosida Madaniyat vazirligi qoshidagi budjetdan tashqari Madaniyat va sanʼatni rivojlantirish jamgʻarmasi mablagʻlari hisobidan qisqa muddatli (2-3 oygacha) oʻqishga yuborsin;

iqtidorli oʻquvchi va talabalarning mamlakatimizda, xorijiy davlatlarda oʻtkazib kelinayotgan nufuzli tanlov, festival va ilmiy-ijodiy konferensiyalarda Madaniyat vazirligi qoshidagi budjetdan tashqari Madaniyat va sanʼatni rivojlantirish jamgʻarmasi mablagʻlari hisobidan muntazam ishtirok etishlarini taʼminlasin.

5. Quyidagilar Dasturni amalga oshirishning moliyaviy manbalari etib belgilansin:

Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari — 2018-2019-yillarda Oʻzbekiston davlat konservatoriyasi qoshida musiqa sohasi pedagoglarini qayta tayyorlash va malakasini oshirish markazi va 400 oʻrinli yotoqxona binolarini qurish va jihozlash qismida;

Oʻzbekiston Respublikasi Tashqi iqtisodiy faoliyat milliy bankining tashabbusi bilan xayriya asosida ajratiladigan mablagʻlar — Toshkent shahar, Shayxontohur tumani, Olmazor koʻchasi, 1-uy manzilida joylashgan Oʻzbekiston davlat konservatoriyasining bino va inshootlarining moddiy-texnik bazasini modernizatsiya qilish qismida;

Oʻzbekiston Respublikasi Madaniyat vazirligi huzuridagi budjetdan tashqari Madaniyat va sanʼatni rivojlantirish jamgʻarmasi mablagʻlari — “Noyob cholgʻular davlat kolleksiyasi”ni, “Musiqa” ilmiy-uslubiy jurnali faoliyatini tashkil etish, yosh ijrochilar va texnogen sanʼat turlari mutaxassislarini xorijdagi nufuzli musiqa akademiyalari va konservatoriyalariga oʻqishga yuborish, iqtidorli oʻquvchi va talabalarning mamlakatimizda, xorijiy davlatlarda oʻtkazib kelinayotgan nufuzli tanlov, festival va ilmiy-ijodiy konferensiyalarda ishtirok etishlarini taʼminlash qismida;

yuridik va jismoniy shaxslarning homiylik xayriyalari, qonun hujjatlarida taqiqlanmagan boshqa mablagʻlar — boshqa tadbirlarni bajarish qismida.

Oldingi tahrirga qarang.

6. Toshkent shahar hokimligi Oʻzbekiston davlat konservatoriyasida faoliyat yuritayotgan yuqori malakali xodimlar, jumladan, iqtidorli yosh mutaxassislar uchun munosib turarjoy sharoitlarini yaratish maqsadida ipoteka kreditlari asosida Toshkent shahrida quriladigan koʻp qavatli uylardan uy-joylar ajratilishini taʼminlasin.

(6-band Oʻzbekiston Respublikasi Prezidentining 2021-yil 11-martdagi PF-6186-sonli Farmoni tahririda — Qonun hujjatlari maʼlumotlari milliy bazasi, 11.03.2021-y., 06/21/6186/0200-son)

7. Oʻzbekiston Respublikasi Vazirlar Mahkamasi mazkur qaror ijrosini taʼminlash boʻyicha Hukumatning tegishli qarorini qabul qilsin.

8. Oʻzbekiston Respublikasi Madaniyat vazirligi Oʻzbekiston Respublikasi Adliya vazirligi bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisida Oʻzbekiston Respublikasi Vazirlar Mahkamasiga takliflar kiritsin.

9. Mazkur qarorning ijrosini nazorat qilish Oʻzbekiston Respublikasi Bosh vaziri A. Aripov, Oʻzbekiston Respublikasi Prezidentining Davlat maslahatchilari X. Sultonov va A. Yunusxodjayev zimmasiga yuklansin.

LexUZ sharhi

Ushbu qaror “Xalq soʻzi” gazetasining 2017-yil 9-avgustdagi 156 (6850)-sonida eʼlon qilingan.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 8-avgust,

PQ-3178-son

Oʻzbekiston Respublikasi Prezidentining 2017-yil 8-avgustdagi PQ-3178-sonli qaroriga
1-ILOVA

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar

dasturi

T/R	Tadbirlar nomi	Ijro muddati	Masʼul ijrochilar
I. Oʻzbekiston davlat konservatoriyasi moddiy-texnik bazasini mustahkamlash
1	Musiqa sanʼati taʼlim muassasalarini maxsus adabiyotlar bilan taʼminlash, ularni muntazam nashr qilib borish maqsadida konservatoriya huzurida ixtisoslashtirilgan musiqa nashriyoti va bosmaxona tashkil etish, mavjud ovoz yozish studiyasining moddiy-texnik bazasini mustahkamlash.	2018-yil II chorak	Madaniyat vazirligi, Oliy va oʻrta maxsus taʼlim vazirligi, Oʻzbekiston matbuot va axborot agentligi, Toshkent shahar hokimligi, Oʻzbekiston davlat konservatoriyasi
2	Oʻzbekiston davlat konservatoriyasi qoshidagi “Milliy cholgʻu” ilmiy-ishlab chiqarish eksperimental laboratoriyasi qoshidagi “Musiqa cholgʻulari muzeyi” faoliyatini yaxshilash, “Konservatoriya tarixi muzeyi”ni moddiy taʼminlash.	2018-yil II chorak	Madaniyat vazirligi, Oʻzbekiston davlat konservatoriyasi
3	2018/2019 oʻquv yilidan boshlab Oʻzbekiston davlat konservatoriyasi qoshida musiqa sohasi pedagoglarini qayta tayyorlash va malakasini oshirish Markazini tashkil etish, shu maqsadda yangi oʻquv binosi va tinglovchilar uchun turar joyi qurish hamda talabalar va malaka oshirish uchun kelgan tinglovchilarning boʻsh vaqtlarini mazmunli oʻtkazish, jismonan sogʻlom boʻlishi maqsadida konservatoriya hududiga tutash sport maydonchasini tashkil etish.	2018/2019 oʻquv yilidan boshlab	Madaniyat vazirligi, Iqtisodiyot vazirligi, Moliya vazirligi, Arxitektura va qurilish davlat qoʻmitasi
4	Oʻzbekiston davlat konservatoriyasi binosini akustik talablarni inobatga olgan holda kapital taʼmirlash, mamlakatimizda va xorijda ishlab chiqarilayotgan musiqa cholgʻulari, texnik vositalar, inventar va zamonaviy uskunalar bilan jihozlash.	2019-yil mobaynida	Toshkent shahar hokimligi, Madaniyat vazirligi, Iqtisodiyot vazirligi, Tashqi iqtisodiy faoliyati milliy banki
5	Konservatoriyada talabalar mustaqil shugʻullanishlari uchun yetarli repetitoriylar tashkil etish, mustaqil mashgʻulot oʻtkazishlari uchun xonalar ajratish va yaxshi sozlangan cholgʻular bilan jihozlash, shuningdek, konservatoriya yotoqxonasida ham shunday sharoitlarni yaratish.	2019-yil mobaynida	Toshkent shahar hokimligi, Madaniyat vazirligi, Iqtisodiyot vazirligi, Tashqi iqtisodiy faoliyati milliy banki
6	Oʻzbekiston davlat konservatoriyasida oʻrnatilgan noyob organ cholgʻusini taʼmirlash, doimiy texnik xizmat koʻrsatishni tashkil etish va organ zalini avtomatik haroratni saqlab turish uskunalari bilan taʼminlash.	2019-yil mobaynida	Madaniyat vazirligi, Tashqi iqtisodiy aloqalar va investitsiyalar vazirligi, Iqtisodiyot vazirligi, Tashqi iqtisodiy faoliyati milliy banki
7	Oʻzbekiston davlat konservatoriyasida musiqiy adabiyotlar, oʻquv uslubiy majmualar hamda nota matnlarini chop etishga ixtisoslashtirilgan maxsus bosmaxona tashkil etish.	2018-yil mobaynida	Madaniyat vazirligi, Davlat nashriyot va matbaa qoʻmitasi, Toshkent shahar hokimligi
8	Oʻzbekiston davlat konservatoriyasi tarkibidagi Musiqali teatr-studiyasining moddiy-texnik bazasini mustahkamlash, oʻquv ishlab-chiqarish jamoalari hisoblangan simfonik orkestr, xalq cholgʻulari orkestri va xor artistlarining maosh razryadlar?ni respublika professional badiiy jamoalar xodimlari maosh razryadlarini oʻrganib, tegishli xulosalarni tayyorlash.	2018-2019 oʻquv yilidan	Toshkent shahar hokimligi, Madaniyat vazirligi, Iqtisodiyot vazirligi, Moliya vazirligi, Bandlik va mehnat munosabatlari vazirligi, Adliya vazirligi
9.	2017-yil oktabr oyiga qadar Oʻzbekiston davlat konservatoriyasi binosini issiqlik bilan taʼminlash boʻyicha lokal isitish qozonxonasini oʻrnatish.	2017-yil oktabr	Madaniyat vazirligi, “Tashissiqlikquvvat”,Moliya vazirligi, Toshkent shahar hokimligi,
II. Oʻzbekiston davlat konservatoriyasida oʻquv-uslubiy va meʼyoriy-huquqiy hujjatlarini takomillashtirish
10.	Oʻzbekiston davlat konservatoriyasi bitiruvchilari diplomida Davlat attestatsiyasi komissiyasining qaroriga binoan qayd etiladigan malaka talablari, shuningdek, taʼlim muassasasining bakalavriat yoki magistratura bosqichlari uchun moʻljallangan normativ-huquqiy hujjatlarini tanqidiy oʻrganib chiqib, ularni takomillashtirish choralarini koʻrish.	2017-yilidan muntazam	Madaniyat vazirligi, Oliy va oʻrta maxsus taʼlim vazirligi, Taʼlim sifatini nazorat qilish davlat inspeksiyasi, Bandlik va mehnat munosabatlari vazirligi, Oʻzbekiston davlat konservatoriyasi
11.	Konservatoriyaning mutaxassislik yoʻnalishida kasbiy (ijodiy) kirish imtihonlarini tashkil etishni tubdan oʻzgartirish boʻyicha takliflarni ishlab chiqib, Davlat qabul komissiyasiga kiritish.	2017-yilidan muntazam	Madaniyat vazirligi, Oliy va oʻrta maxsus taʼlim vazirligi, Taʼlim sifatini nazorat qilish davlat inspeksiyasi, Bandlik va mehnat munosabatlari vazirligi, Oʻzbekiston davlat konservatoriyasi
12.	Musiqa taʼlimi uzviyligi va uzluksizligini taʼminlash maqsadida bolalar musiqa va sanʼat maktablari, oʻrta maxsus va oliy taʼlim muassasalari fanlararo bogʻliqligi va integratsiyasini takomillashtirish.	muntazam	Madaniyat vazirligi, Oliy va oʻrta maxsus taʼlim vazirligi
13.	Oʻzbekiston davlat konservatoriyasida oliy taʼlimdan keyingi taʼlim turida ijrochilar uchun assistentura-stajirovka taʼlimini qayta tiklash, Konservatoriyada musiqa sanʼati boʻyicha falsafa doktori (PhD) ilmiy darajasini beradigan ixtisoslashtirilgan ilmiy kengash faoliyatini yoʻlga qoʻyish.	2018-yilidan boshlab	Vazirlar Mahkamasi huzuridagi OAK, Madaniyat vazirligi, Oliy va oʻrta maxsus taʼlim vazirligi, Oʻzbekiston Fanlar akademiyasi
III. Musiqa taʼlimi muassasalarini ilmiy-pedagogik kadrlar bilan taʼminlash, qayta tayyorlash, ularni malakasini oshirish va moddiy ragʻbatlantirish
14.	Oʻzbekiston davlat konservatoriyasi huzurida bolalar musiqa va sanʼat maktablari, akademik litsey va kollejlari oʻqituvchilarining malakasini oshirish va qayta tayyorlash boʻyicha meʼyoriy-huquqiy hujjatlarni ishlab chiqish va belgilangan tartibda tasdiqlash.	2018-yildan boshlab muntazam	Madaniyat vazirligi, Oliy va oʻrta maxsus taʼlim vazirligi, Oʻzbekiston davlat konservatoriyasi
15.	Oʻzbekiston davlat konservatoriyasi professor-oʻqituvchilari ilmiy-ijodiy salohiyatidan samarali foydalanishni tashkil etish maqsadida bolalar musiqa va sanʼat maktablari, akademik litsey va kollejlarida ijodiy uchrashuvlar,”Ustoz saboqlari” mashgʻulotlari, seminar-treninglarni muntazam tashkil etish.	2018-yildan boshlab muntazam	Madaniyat vazirligi, Oliy va oʻrta maxsus taʼlim vazirligi, Oʻzbekiston kompozitorlari va bastakorlari uyushmasi
16.	Konservatoriyaning asosiy kvotasiga qoʻshimcha ravishda, 2018/2019 oʻquv yilidan boshlab bolalar musiqa va sanʼat maktablari uchun pedagoglar kadrlar tayyorlash kvotasini iqtisodiyotning real sektori talab va ehtiyojni oʻrgangan holda viloyatlar kesimida maqsadli shakllantirish.	2018/2019 oʻquv yilidan boshlab	Madaniyat vazirligi, Oliy va oʻrta maxsus taʼlim vazirligi, Davlat test markazi
IV. Oʻzbekiston davlat konservatoriyasining hamkorlik aloqalarini takomillashtirish
17.	Oʻzbekiston davlat konservatoriyasi va xorijiy turdosh oliy taʼlim muassasalari bilan hamkorlik aloqalarini yanada mustahkamlash, 2021-yilda fortepiano, torli va damli hamda urma zarbli musiqa cholgʻulari xalqaro tanlovini muntazam ravishda har uch yilda bir oʻtkazish boʻyicha chora-tadbirlar rejasini ishlab chiqib Vazirlar Mahkamasiga takliflar kiritish.	muntazam ravishda	Madaniyat vazirligi, Tashqi ishlar vazirligi, Iqtisodiyot vazirligi
18.	Oʻzbekiston davlat konservatoriyasida professor-oʻqituvchilari uchun mahorat darslari, ilmiy-amaliy konferensiyalarga xorijiy mutaxassislarning ishtirokini taʼminlash, xorijiy davlatlardagi taniqli sanʼatkorlar bilan hamkorlikda konsert dasturlarini tashkil qilish.	2018-yildan muntazam ravishda	Madaniyat vazirligi, Tashqi ishlar vazirligi, Iqtisodiyot vazirligi

Oldingi tahrirga qarang.

(2-ilova Oʻzbekiston Respublikasi Prezidentining 2022-yil 2-fevraldagi PQ-112-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 03.02.2022-y., 07/22/112/0099-son)

Oʻzbekiston Respublikasi Prezidentining 2017-yil 8-avgustdagi PQ-3178-sonli qaroriga
3-ILOVA

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturini amalga oshirish boʻyicha Respublika komissiyasi

tarkibi

Oldingi tahrirga qarang.

A. Aripov	—	Oʻzbekiston Respublikasining Bosh vaziri, Respublika komissiyasi rahbari
lavozimi boʻyicha	—	Oʻzbekiston Respublikasi Prezidentining maslahatchisi, Respublika komissiyasi rahbari oʻrinbosari
A. Abduvaxitov	—	Oʻzbekiston Respublikasi Prezidentining maslahatchisi
R. Usmonov	—	Toshkent shahri hokimi
M. Muratov	—	Oʻzbekiston Respublikasi madaniyat vaziri, Respublika komissiyasi kotibi
A. Kamilov	—	Oʻzbekiston Respublikasi tashqi ishlar vaziri
G. Saidova	—	Oʻzbekiston Respublikasi iqtisodiyot vaziri
B. Xodjayev	—	Oʻzbekiston Respublikasi moliya vaziri
I. Majidov	—	Oʻzbekiston Respublikasi oliy va oʻrta-maxsus taʼlim vaziri
B. Zakirov	—	“Davarxitektqurilish” qoʻmitasi raisi
R. Gulyamov	—	Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi
B. Alixonov	—	Oʻzbekiston Milliy teleradiokompaniyasi raisi v. b.
A. Qodirov	—	Respublika Maʼnaviyat va maʼrifat markazi rahbari
R. Abdullayev	—	Oʻzbekiston Bastakorlar uyushmasi raisi
M. Ahmedov	—	Oʻzbekiston Yozuvchilar uyushmasi raisi
Z. Murodova	—	Oʻzbekiston Fanlar akademiyasi Sanʼatshunoslik ilmiy-tadqiqot instituti boʻlim mudiri, sanʼatshunoslik fanlari nomzodi, musiqashunos
A. Mansurov	—	Oʻzbekiston davlat konservatoriyasi professori
S. Gʻofurova	—	Oʻzbekiston davlat konservatoriyasi Oʻquv ishlari boʻyicha prorektori.

Izoh:

Komissiya aʼzolari boshqa ishga oʻtgan taqdirda uning tarkibiga koʻrsatilgan lavozimlarga yangidan tayinlangan shaxslar yoki tegishli funksiyalarni bajarish zimmasiga yuklangan shaxslar kiritiladi.

(3-ilova Oʻzbekiston Respublikasi Prezidentining 2019-yil 1-fevraldagi PF-5650-sonli Farmoni tahririda)

Oʻzbekiston Respublikasi Prezidentining “Oʻzbekiston davlat konservatoriyasi faoliyatini yanada rivojlantirish va takomillashtirish chora-tadbirlari toʻgʻrisida”gi qaroriga

SHARH

Bugungi kunda mamlakatimizda madaniyat va sanʼat sohasini izchil rivojlantirish, jahon miqyosidagi ijobiy tajriba va tendensiyalar, yutuq va natijalarni har tomonlama chuqur oʻrganish asosida madaniyat va sanʼat muassasalari faoliyatini samarali yoʻlga qoʻyish, ularning tarmogʻini kengaytirish, moddiy-texnik bazasi, kadrlar salohiyatini mustahkamlash masalalariga ustuvor ahamiyat berilmoqda.

Oʻzbekiston Respublikasi Prezidenti Shavkat Mirziyoyevning yaqinda Oʻzbekiston ijodkor ziyolilari bilan boʻlgan uchrashuvda soʻzlagan maʼruzasida bu boradagi vazifalar yanada aniq-ravshan belgilanib, madaniyat, adabiyot va sanʼat sohasini rivojlantirish boʻyicha muhim taklif va tashabbuslar ilgari surildi. Ularning ijrosini taʼminlash boʻyicha davlatimiz rahbari tomonidan bir qator farmon va qarorlar qabul qilinmoqda.

Bu borada, ayniqsa, “Oʻzbekiston davlat konservatoriyasi faoliyatini yanada rivojlantirish va takomillashtirish chora-tadbirlari toʻgʻrisida”gi qaror alohida ahamiyatga ega.

Qarorda xalqimiz, xususan, yoshlarimizning dunyoqarashi, maʼnaviy saviyasi va estetik tarbiyasini yuksaltirishda gʻoyat muhim oʻrin va ahamiyatga ega boʻlgan musiqa sanʼatini har tomonlama rivojlantirish, boy musiqiy merosimizni chuqur oʻrganish, yosh avlodni milliy va jahon musiqa sanʼatining mumtoz namunalariga muhabbat ruhida tarbiyalash, soha uchun yuqori malakali kadrlar tayyorlash tizimini yanada takomillashtirish maqsadida muhim vazifalar belgilandi.

Prezidentimiz tomonidan imzolangan ushbu muhim hujjatga muvofiq, Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturi, mazkur bilim yurtining yangi tarkibiy tuzilmasi, konservatoriya faoliyatini yanada rivojlantirish va takomillashtirishga doir chora-tadbirlar dasturini amalga oshirish boʻyicha Respublika komissiyasi tarkibi tasdiqlandi.

Mazkur dasturda bugungi kunda maʼnaviy hayotimiz uchun muhim ahamiyatga ega boʻlgan bir qancha masalalarga alohida eʼtibor qaratish zarurligi taʼkidlangan.

Jumladan, yoshlarning madaniy saviyasini yuksaltirish, ularni milliy va umumbashariy madaniyatning eng yaxshi namunalaridan bahramand etish, maʼnaviy yetuk, milliy gʻoya va mafkuramizga sadoqat bilan xizmat qiladigan barkamol shaxslarni tarbiyalash, oʻzbek xalqining milliy musiqiy merosi negizida, jahon musiqa madaniyati durdonalaridan andoza olgan holda, musiqa sanʼatini rivojlantirish, musiqiy taʼlim tizimini sifat jihatidan yanada koʻtarish boʻyicha aniq chora-tadbirlar dasturda aks etishi lozimligiga urgʻu berilgan.

Shuningdek, mulkiy yoki idoraviy boʻysunuvidan qatʼi nazar, musiqa sanʼati, musiqa taʼlimi yoʻnalishi uchun kadrlar tayyorlash, normativ-huquqiy hujjatlar loyihalarini ishlab chiqish va ularni joriy etishda Oʻzbekiston davlat konservatoriyasi metodik va ijodiy tomondan koʻmaklashadigan tayanch oliy taʼlim muassasasi ekaniga alohida urgʻu berilgan.

Oʻzbekiston davlat konservatoriyasining moddiy-texnik bazasini yanada mustahkamlash, jumladan, konsert zallari, oʻquv auditoriyalari, maxsus mashgʻulot xonalarini taʼmirlash va zamon talablari darajasida jihozlashga katta eʼtibor qaratilgan.

Ayni vaqtda konservatoriyada faoliyat koʻrsatayotgan professor-oʻqituvchilarning pedagogik mahoratini yanada oshirish, oʻquv jarayoni sifati va saviyasini tubdan yaxshilash, musiqa sanʼati sohasida jahonning yetakchi oliy taʼlim muassasalari, ijodiy markazlar, taniqli kompozitor, musiqachi va ijrochilar bilan hamkorlikni yoʻlga qoʻyish, jumladan, xorijiy mutaxassislarni mamlakatimizga taklif etish bilan bir qatorda respublikamizda yuqori natijalarga erishgan musiqachi va pedagoglarning mahorat darslarini chet davlatlarda tizimli tashkil etish zarurligi qayd etilgan.

Oʻzbekiston davlat konservatoriyasining yosh pedagog kadrlarini moddiy va maʼnaviy qoʻllab-quvvatlash maqsadida ular uchun zarur maishiy sharoitlar yaratish, ipoteka kreditlari asosida uy-joylar bilan taʼminlash boʻyicha aniq chora-tadbirlar ishlab chiqish va amalga oshirish masalalari ham dasturda oʻz ifodasini topishi kerakligi belgilangan.

Hozirgi vaqtda Oʻzbekiston davlat konservatoriyasida oʻquv binolari yetishmasligi, talabalar soni sezilarli darajada koʻpaygani taʼlim-tarbiya jarayonlarini yuqori darajada va sifatli olib borishda muammo tugʻdirmoqda. Qarorda ana shu masalani samarali hal etish choralari belgilangan. Shu maqsadda mutasaddi tashkilotlarga 2018/2019 oʻquv yilidan boshlab Mirzo Ulugʻbek tumani, Mustaqillik shoh koʻchasi, 31-uyda joylashgan V. Uspenskiy nomidagi respublika ixtisoslashtirilgan musiqa akademik litseyiga tegishli boʻlgan binoni Oʻzbekiston davlat konservatoriyasiga oʻrnatilgan tartibda berish hamda Toshkent shahri, Buxoro koʻchasi, 10-uyda joylashgan binoni Oʻzbekiston davlat konservatoriyasi tasarrufiga oʻtkazish va ushbu binoda jahon andozalariga toʻliq mos keladigan, akademik jamoalarning badiiy dasturlari namoyish etiladigan, jonli ijroga moʻljallangan zamonaviy konsert zalini barpo etish vazifasi topshirilgan.

Konservatoriyaning madaniy hayotimizdagi oʻrni va nufuzini oshirish maqsadida Oʻzbekiston Respublikasi madaniyat vaziri bir vaqtning oʻzida konservatoriya rektori vazifasini ham bajarishi qarorda belgilab berilgan.

Shu bilan birga, oʻqituvchi va talaba yoshlarning ilmiy salohiyatidan unumli foydalanish uchun Oʻzbekiston davlat konservatoriyasi muassisligida “Musiqa” ilmiy-uslubiy jurnali faoliyatini yoʻlga qoʻyish vazifasi belgilangan.

Bir soʻz bilan aytganda, mazkur qaror Prezidentimiz tomonidan milliy musiqa sanʼatimiz rivojiga koʻrsatilayotgan yuksak eʼtiborning yana bir amaliy namunasi boʻlib, u Oʻzbekiston davlat konservatoriyasi faoliyatini tubdan takomillashtirish, musiqa sanʼati sohasida yuqori malakali kadrlar tayyorlash darajasini sifat jihatidan yangi bosqichga koʻtarishga qaratilgani bilan gʻoyat muhim ahamiyatga egadir.

(Oʻzbekiston Respublikasi qonun hujjatlari toʻplami, 2017-y., 33-son, 835-modda; Qonun hujjatlari maʼlumotlari milliy bazasi, 11.03.2021-y., 06/21/6186/0200-son; Qonunchilik maʼlumotlari milliy bazasi, 03.02.2022-y., 07/22/112/0099-son)