|
Hujjat kuchini yo‘qotgan 01.08.2019
|
Oʻzbekiston Respublikasi Vazirlar Mahkamasining
qarori
Oliy harbiy taʼlim muassasalariga kirish uchun nomzodlarni tayyorlash tizimini yanada takomillashtirish chora-tadbirlari toʻgʻrisida
LexUZ sharhiMazkur qaror Oʻzbekiston Respublikasi Prezidentining 2019-yil 28-iyundagi PQ-4375-sonli “Oʻsmirlarni harbiy-vatanparvarlik ruhida tarbiyalash xamda Oʻzbekiston Respublikasi Qurolli Kuchlari va davlat xizmati uchun kadrlar zaxirasini tayyorlash tizimini takomillashtirishga oid qoʻshimcha chora-tadbirlar toʻgʻrisida”gi qaroriga asosan 2019-yil 1-avgustdan oʻz kuchini yoʻqotadi.
Oʻzbekiston Respublikasi Prezidentining “Oʻzbekiston Respublikasi Qurolli kuchlarini isloh qilish va yanada rivojlantirish vazifalarini amalga oshirish boʻyicha chora-tadbirlar dasturi toʻgʻrisida” 2017-yil 24-yanvardagi PQ-2738-son qarori ijrosini taʼminlash hamda oliy harbiy taʼlim muassasalariga kirish uchun nomzodlarni tayyorlash tizimini samarali tashkil etish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Oʻzbekiston Respublikasi Qurolli kuchlarini isloh qilish va yanada rivojlantirish vazifalarini amalga oshirish boʻyicha chora-tadbirlar dasturi toʻgʻrisida” 2017-yil 24-yanvardagi PQ-2738-son qarori bilan oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlari roʻyxati (keyingi oʻrinlarda — roʻyxat deb ataladi) tasdiqlanganligi maʼlumot uchun qabul qilinsin.
2. Quyidagilar:
Harbiy akademik litseylar hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlarining maxsus guruhlariga oʻquvchilar qabul qilish tartibi toʻgʻrisidagi nizom 1-ilovaga;
Oliy harbiy taʼlim muassasalariga kirish uchun nomzodlarni tayyorlash boʻyicha akademik litsey va kasb-hunar kollejlarining maxsus guruhlari toʻgʻrisidagi nizom 2-ilovaga;
Harbiy akademik litseylar hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litseylar va kasb-hunar kollejlari infratuzilmasini, ularning oʻquv va moddiy-texnika bazasini takomillashtirish dasturi 3-ilovaga muvofiq tasdiqlansin.
3. Belgilab qoʻyilsinki, roʻyxatga kiritilgan akademik litseylar va kasb-hunar kollejlarida:
har bir bosqichda oliy harbiy taʼlim muassasalariga kirish uchun nomzodlarni tayyorlash boʻyicha bittadan maxsus guruh (keyingi oʻrinlarda maxsus guruhlar deb ataladi) tashkil etiladi;
har bir bosqichda maxsus guruhlardagi oʻquvchilar soni 26 nafardan oshmasligi kerak;
maxsus guruhlarda chuqurlashtirilib oʻtiladigan fanlardan amaliy, laboratoriya va seminar mashgʻulotlari maxsus guruhlarni ikkita kichik guruhlarga boʻlgan holda oʻtkaziladi;
maxsus guruhlarda umumtaʼlim fanlarini chuqurlashtirib oʻtish bilan birga chaqiruvga qadar boshlangʻich tayyorgarlik va jismoniy tarbiya fanlaridan oʻrta maxsus, kasb-hunar taʼlimi muassasalari ixtiyoridagi soatlar hisobidan 100 soatgacha qoʻshimcha dars mashgʻulotlari, shuningdek, oʻquvchilarni vatanparvarlik ruhida tarbiyalashga qaratilgan toʻgaraklar mashgʻulotlari va qoʻshimcha tadbirlar oʻtkaziladi.
4. Oʻzbekiston Respublikasi Mudofaa vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi;
harbiy okruglar, oliy harbiy taʼlim muassasalari, mudofaa ishlari boʻyicha boshqarmalar, Oʻzbekiston Respublikasi Mudofaa vazirligi huzuridagi Jamoatchilik kengashi bilan birgalikda harbiy akademik litseylar, roʻyxatga kiritilgan akademik litsey va kasb-hunar kollejlariga yoshlarda oliy harbiy taʼlim muassasalari faoliyati hamda harbiy xizmat toʻgʻrisida tushunchalarni shakllantirishga, oʻquv dasturlarni ishlab chiqish hamda taalluqli fanlar boʻyicha taʼlim jarayonini sifatli tashkil etish va oʻtkazishda har tomonlama koʻmaklashsinlar;
roʻyxatga kiritilgan akademik litsey va kasb-hunar kollejlarida tashkil etiladigan maxsus guruhlarda oʻquv-metodik jarayonni tashkil etish uchun zarur sharoitlarni yaratish maqsadida oʻrta maxsus, kasb-hunar taʼlimi tizimining Davlat taʼlim standartlari, oʻquv rejalari va dasturlariga muvofiq ravishda jihozlash normativlarini ikki oy muddatda “Oʻzstandart” agentligi bilan hamkorlikda ishlab chiqsinlar va tasdiqlasinlar;
5. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Oʻzbekiston Respublikasi Mudofaa vazirligi bilan hamkorlikda 2017-yil 1-iyulga qadar, roʻyxatga kiritilgan akademik litsey va kasb-hunar kollejlari maxsus guruhlarining oʻquv rejalar va dasturlarini, shu jumladan “chaqiriqqa qadar boshlangʻich tayyorgarlik” fani oʻquv dasturini Davlat taʼlim standartlariga muvofiq ishlab chiqsin va tasdiqlasin.
6. Oʻzbekiston Respublikasi Sogʻliqni saqlash vazirligi Mudofaa vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda harbiy akademik litseylar hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlariga kirayotgan oʻquvchilarni tibbiy koʻrikdan oʻtkazish tartibi toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.
7. Oʻzbekiston Respublikasi Oliy va oʻrta maxsus taʼlim vazirligi Oʻzbekiston Respublikasi Mudofaa vazirligi, tasarrufida oliy taʼlim muassasalari mavjud boʻlgan manfaatdor vazirliklar va idoralar bilan birgalikda harbiy akademik litseylar hamda roʻyxatga kiritilgan akademik litsey va kasb-hunar kollejlarida yuqori sifatli oʻquv-tarbiya jarayonini taʼminlashda, shuningdek pedagoglar malakasini oshirishni tashkil etishda tizimli ravishda har tomonlama metodik va amaliy yordam koʻrsatib borsin.
8. Oʻzbekiston Respublikasi Moliya vazirligi har yili Oʻzbekiston Respublikasi Davlat budjeti parametrlarini shakllantirishda “Maorif” sohasiga yoʻnaltirilgan mablagʻlar doirasida ushbu qaror ijrosini taʼminlash bilan bogʻliq xarajatlarni qoplash uchun zarur mablagʻlar ajratilishini nazarda tutsin.
9. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi manfaatdor vazirliklar va idoralar bilan birgalikda, qabul qilingan normativ-huquqiy hujjatlarning ushbu qarorga muvofiqlashtirilishini ikki oy muddatda taʼminlasin.
10. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Taʼlim va ilm-fan masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 21-aprel,
227-son
Vazirlar Mahkamasining 2017-yil 21-apreldagi 227-son qaroriga
1-ILOVA
1-ILOVA
Harbiy akademik litseylar hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlarining maxsus guruhlariga oʻquvchilar qabul qilish tartibi toʻgʻrisida
NIZOM
1-bob. Umumiy qoidalar
1. Ushbu Nizom umumiy taʼlim maktablarining 9-sinflari bitiruvchilarini (keyingi oʻrinlarda nomzod deb ataladi) harbiy akademik litseylarga hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litseylar va kasb-hunar kollejlarining (keyingi oʻrinlarda taʼlim muassasalari deb ataladi) maxsus guruhlariga tanlovni tashkil etish va qabul qilish tartibini belgilaydi.
2. Taʼlim muassasalarga umumiy taʼlim maktablarini joriy yilda bitirgan, umumiy oʻrta taʼlim toʻgʻrisidagi shahodatnomaga ega boʻlgan, sogʻligʻi jihatidan oʻqishga yaroqli deb topilgan, tanlovdan muvaffaqiyatli oʻtgan nomzodlar oʻqishga qabul qilinadi.
3. Nomzodlar, ota-onalar yoki ularning oʻrnini bosuvchi shaxslarga Taʼlim muassasasiga tanlovni va qabul qilishni tashkil etish, ularning shaxsiy hujjatlar yigʻmajildi bilan ishlash, tashkiliy ishlarni bajarish, zarur materiallar va hisobotlarni tayyorlash har bir taʼlim muassasasida tashkil etiladigan maslahat markazi tomonidan taʼminlanadi.
4. Nomzodlarni taʼlim muassasalariga qabul qilish tanlov yoʻli bilan, teng huquqlilik va odillik tamoyillar asosida, qabul qilishning yagona tartibi va qoidalariga rioya qilgan holda amalga oshiriladi.
5. Taʼlim muassasalarida oʻquvchilar kontingentini sifatli va maqsadli butlash quyidagilarni oʻz ichiga oladigan bosqichma-bosqich kompleks tanlov amalga oshiriladi:
dastlabki tanlash;
harbiy-professional tanlash;
test sinovlari oʻtkazish.
6. Nomzodlarni qabul qilish taʼlim muassasasining maslahat markazi tomonidan amalga oshiriladi.
7. Maslahat markazi tarkibi har yili 25-maygacha Oʻzbekiston Respublikasi Mudofaa vazirligi hamda Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazining (keyingi oʻrinlarda OʻMKHT Markazi deb ataladi) qoʻshma qarori bilan tasdiqlanadi.
8. Harbiy akademik litsey maslahat markazi raisi etib Oʻrta maxsus, kasb-hunar taʼlimi hududiy boshqarmasi boshligʻi (keyingi oʻrinlarda OʻMKHT hududiy boshqarmasi deb ataladi), rais oʻrinbosari etib biriktirilgan oliy harbiy taʼlim muassasasining (keyingi oʻrinlarda OHTM deb ataladi) tavsiyasi asosida yuqori malakali va tajribali katta ofitserlar tarkibidan belgilanadi. Maslahat markazi tarkibiga shuningdek oliy taʼlim muassasasi va OHTMning ikki nafardan vakili, OʻMKHT hududiy boshqarmasining bir nafar vakili, taʼlim muassasasining ikki nafar vakili kiritiladi.
9. Oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kolleji maslahat markazi rahbari etib ularning direktorlari, rahbar oʻrinbosari etib harbiy okruglar qoʻmondonligi tavsiyasi asosida eng yuqori malakali va tajribali katta ofitserlar tarkibidagi shaxs tayinlanadi. Maslahat markazi tarkibiga shuningdek harbiy okrugning ikki nafardan, OʻMKHT hududiy boshqarmasining bir nafar, taʼlim muassasasining ikki nafar vakili kiritiladi.
10. Maslahat markaziga quyidagilar yuklanadi:
nomzodlarning shaxsiy hujjatlar yigʻmajildini oʻrganish natijalari asosida test sinovlariga qoʻyilgan nomzodlar roʻyxatlarini ularning yashash joylaridagi mudofaa ishlari boʻyicha boshqarmalar va Oʻzbekiston Respublikasi Vazirlar Mahkamasi huzuridagi Davlat test markaziga taqdim etish;
Oʻzbekiston Respublikasi Vazirlar Mahkamasi huzuridagi Davlat test markazi tomonidan test sinovlarini oʻtkazish uchun zarur sharoitlarni yaratish;
test sinovlari natijalari boʻyicha harbiy akademik litseylarga, taʼlim muassasalarining maxsus guruhlariga birinchi oʻquv yil uchun nomzodlarni oʻqishga qabul qilish roʻyxatini tayyorlash va buyruqqa kiritish uchun OʻMKHT Markaziga ularni taqdim etish;
nomzodlarni qabul qilish natijalari toʻgʻrisida hisobotlar tayyorlash (maslahat markazi bayonnomalari, taʼlim muassasalari birinchi bosqichiga oʻqishga qabul qilish uchun nomzodlar roʻyxati, test sinovlari natijalari boʻyicha umumiy roʻyxat) va OʻMKHT Markazi hamda Oʻzbekiston Respublikasi Mudofaa vazirligiga taqdim etish;
nomzodlar, ularning ota-onalari yoki ularni oʻrnini bosuvchi shaxslarni taʼlim muassasalariga oʻqishga qabul qilish masalalari boʻyicha shikoyatlarini qonunchilikda belgilangan tartibda koʻrib chiqish.
11. Tuman (shahar) mudofaa ishlari boʻlimi huzuridagi Jamoatchilik kengashi aʼzolari va ota-onalar vakillari nomzodlarni qabul qilish jarayonida kuzatuvchi sifatida ishtirok etadi.
12. Taʼlim muassasasi direktori maslahat markazining samarali faoliyat yuritishi uchun zarur sharoitlarni yaratadi.
13. Test sinovlarini oʻtkazishga tayyorgarlik jarayonida tashkiliy ishlarni amalga oshirishda (guruhlar roʻyxatlarini shakllantirish, tartib va intizom saqlash kabi ishlar) yordam berish uchun taʼlim muassasasi maslahat markazi rahbari tomonidan taʼlim muassasasi oʻqituvchilaridan vakillar jalb etilishi mumkin.
14. Nomzodlarni oʻqishga qabul qilish toʻgʻrisidagi arizalarni topshirish muddati va maslahat markaziga taqdim etiladigan zarur hujjatlar roʻyxatini OʻMKHT Markazi va Oʻzbekiston Respublikasi Mudofaa vazirligi birgalikda belgilaydi.
2-bob. Dastlabki tanlash
15. Oliy harbiy taʼlim muassasalariga kirib harbiy mutaxassislik olishni xohlagan shaxslarga nisbatan qoʻyilayotgan talablarga nomzodlarning sogʻligʻi, individual-psixologik xususiyatlari va jismoniy tayyorgarligi jihatidan javob berishini, barqaror ichki eʼtiqodga, yuksak intellektual va maʼnaviy-axloqiy salohiyatga ega boʻlgan nomzodlarni aniqlash dastlabki tanlashning asosiy maqsadi hisoblanadi.
16. Quyidagilar dastlabki tanlashning asosiy vazifalari hisoblanadi:
nomzodga tegishli hujjatlarni va uni tavsiflovchi maʼlumotlarni toʻplash;
nomzod toʻgʻrisidagi turli maʼlumotlarni aniqlashtirish (oilaviy ahvoli, ota-onalari va yaqin qarindoshlarining harbiy xizmatga munosabati va shu kabilar), ofitser kasbini tanlashining sabablarini, asoslarini aniqlash;
umumtaʼlim fanlari boʻyicha oʻzlashtirishini, sogʻligʻini va jismoniy tayyorgarlik holatini har tomonlama va xolisona baholash;
OHTMga kiruvchi nomzodlarning individual-psixologik xususiyatlarini oʻrganish.
17. Dastlabki tanlash nomzodlarning yashash joyidagi mudofaa ishlari boʻyicha boʻlimlar va boshqarmalarda oʻtkaziladi.
18. Nomzodlarga quyidagi hollarda rad javobi beriladi:
nomzod Oʻzbekiston Respublikasi fuqarosi boʻlmasa;
nomzodga nisbatan jinoiy ish yuritilganda, birlamchi tergov va surishtirish ishlari yuritilganda, sudda jinoiy ishi koʻrib chiqilayotganda;
jazo choralari yoki amnistiya qoʻllanilishidan qatʼi nazar, jinoyat sodir etilgani sababli ayblov eʼlon qilinganda;
yashash joyidan, ichki ishlar boʻlimlaridan salbiy tavsiyanomalar taqdim etilganda.
19. Dastlabki tanlashda ishtirok etish uchun nomzodlar quyidagi hujjatlarni taqdim etadi:
a) mudofaa ishlari boʻyicha boʻlim boshligʻi nomiga ariza;
b) belgilangan shakldagi soʻrovnoma;
v) oʻqish joyi va mahalla fuqarolar yigʻinidan tavsifnoma;
g) taʼlim muassasasiga kirayotgan nomzodning tibbiy xulosalar qayd etilgan tibbiy daftarchasi (kartasi);
d) namuna asosida yozilgan batafsil tarjimai hol;
e) tugʻilganlik haqidagi guvohnoma yoki pasport nusxasi, mudofaa ishlari boʻlimlarida roʻyxatda turishi toʻgʻrisidagi maʼlumotnoma nusxasi;
j) fanlarni oʻzlashtirishi toʻgʻrisida oʻqish joyidan direktor tomonidan tasdiqlangan maʼlumotnoma;
z) psixonevrologik, silga qarshi va teri-tanosil kasalliklari dispanserlari, narkologik va odam immuniteti tanqisligi sindromiga (SPID) qarshi kurashish markazlaridan berilgan maʼlumotnoma, laboratoriya tekshirishlari natijalari (qon va peshobning umumiy tahlili, najasni gelmentologik tekshiruvi, koʻkrak qafasi flyuorografiyasi, elektrokardiografiya tekshiruvi (EKG), ultratovush tekshiruvi (UTT), endoskopik ezofagogastroeduodenoskopiya tekshiruvi (EFGDS) xulosalari) boʻyicha tibbiy maʼlumotnomalar;
i) nomzodga nisbatan jinoiy ish yuritilmaganligi, birlamchi tergov va surishtirish ishlari yuritilmaganligi, sudda nomzodga nisbatan jinoiy ish koʻrib chiqilmayotganligi, jazo choralari va amnistiya qoʻllanilishidan qatʼi nazar jinoyat sodir etilgani sababli ayblov eʼlon qilinganligi, nomzodning ichki ishlar organlarida roʻyxatga olinmaganligi holatlarini tasdiqlovchi maʼlumotnoma;
k) 4 dona 3,5 x 4,5 sm oʻlchamli va 6 dona 3 x 4 sm oʻlchamli rangli fotosuratlar.
20. Dastlabki va harbiy-kasbiy tanlash talablariga javob beruvchi, taʼlim muassasalariga tanlovsiz qabul qilinish huquqiga ega boʻlgan ayrim toifadagi nomzodlar qoʻshimcha ravishda quyidagi hujjatlarni taqdim etadilar:
a) tegishli ixtisos fanlari boʻyicha xalqaro olimpiadalar va respublika fan olimpiadalarining respublika bosqichi, shuningdek Oʻzbekiston Respublikasi Xalq taʼlimi vazirligi, Madaniyat vazirligi hamda Jismoniy tarbiya va sport davlat qoʻmitasi tomonidan oʻtkaziladigan tanlovlar va musobaqalar gʻoliblari OʻMKHT Markazining belgilangan namunadagi guvohnomalari;
b) oʻz xizmat vazifalarini bajarish chogʻida halok boʻlgan harbiy xizmatchilarning va huquqni muhofaza qilish organlari xodimlarining farzandlari:
mazkur bandning birinchi xatboshisida belgilangan bolalarni taʼlim muassasasiga tanlovdan tashqari qabul qilish toʻgʻrisidagi tegishli vazirlik va idoralar rahbarlarining iltimosnomasi;
vazifasini oʻtash davrida halok boʻlgan harbiy xizmatchi, huquqni muhofaza qilish organlari xodimining vafoti toʻgʻrisida xizmat tekshiruvi (maʼmuriy tekshiruv) xulosasining nusxasi;
tegishli harbiy qism yoki muassasa, huquqni muhofaza qilish organlari rahbarining buyrugʻidan koʻchirma;
oʻlim haqida guvohnoma nusxasi.
21. Tugʻilganlik toʻgʻrisida guvohnoma yoki pasport, chaqiriluvchining qayd etilganligi toʻgʻrisida guvohnoma, oʻqishga imtiyozli kirish huquqini tasdiqlovchi hujjatlarning (20-bandda koʻrsatilgan nomzodlar toifasi uchun) asl nusxalari nomzodlar tomonidan tegishli taʼlim muassasasiga kelganda maslahat markaziga shaxsan taqdim etiladi.
22. Har yili aprel oyida oʻtkaziladigan dastlabki tanlash davomida quyidagi ishlar amalga oshiriladi:
taqdim etilgan hujjatlarni oʻrganish;
nomzodlar bilan yakka tartibda suhbat oʻtkazish;
nomzodlarni dastlabki tibbiy koʻrikdan oʻtkazish.
23. Taqdim etilgan hujjatlarni oʻrganish nomzod toʻgʻrisidagi maʼlumotlarni rejali jamlash va tizimlashtirish, uning ijtimoiy faolligi va maʼnaviy-maʼrifiy fazilatlarini baholash yoʻli bilan oʻtkaziladi.
Nomzodlarning ijtimoiy faolligi va maʼnaviy-axloqiy fazilatlarini aniqlashda quyidagilarga eʼtibor qaratiladi:
mamlakatimizda amalga oshirilayotgan islohotlarning mohiyati va ahamiyatini, davlatni himoya qilish boʻyicha konstitutsiyaviy majburiyatlarni tushunishi;
yuqori darajadagi hushyorlik hamda yot mafkura va axloqqa nisbatan murosasizligi;
burchni his etishi, qatʼiyatliligi, ishchanligi, mehnatsevarligi;
jamoaning ijtimoiy hayotida faol ishtiroki;
oʻqishda va sport musobaqalarida erishgan natijalari.
24. Nomzodlar bilan yakka tartibdagi suhbat mudofaa ishlari boʻyicha boʻlimlar va boshqarmalar boshliqlari tomonidan Oʻzbekiston Respublikasi Mudofaa vazirligi huzuridagi Jamoatchilik kengashining hududiy boʻlinmalari vakillarini jalb etgan holda tashkil etiladi va oʻtkaziladi.
Yakka tartibdagi suhbat nomzodlar toʻgʻrisidagi turli maʼlumotlarni aniqlashtirish (oilaviy ahvoli, ota-onalari va yaqin qarindoshlarining harbiy xizmatga munosabati va shu kabilar), harbiy kasbni tanlashining sabablarini baholash maqsadida oʻtkaziladi.
25. Yakka tartibdagi suhbat natijasida quyidagi xulosalar beriladi:
taʼlim muassasasiga kirish uchun tavsiya etiladi;
taʼlim muassasasiga kirish uchun tavsiya etilmaydi.
Yakka tartibdagi suhbat natijalariga koʻra taʼlim muassasasiga kirish tavsiya etilmagan nomzodlar Dastlabki tanlashning keyingi bosqichlariga jalb etilmaydi.
26. Nomzodlarni dastlabki tibbiy koʻrikdan oʻtkazish mudofaa ishlari boʻyicha boʻlimlarda tashkil etilgan tibbiy komissiyalar tomonidan amalga oshiriladi. Tibbiy koʻrik natijalari boʻyicha nomzodning sogʻligʻi holatiga koʻra OHTMda oʻqishga yaroqliligi toʻgʻrisida xulosa beriladi.
27. Sogʻligʻi jihatidan OHTMda oʻqishga yaroqsiz deb topilgan nomzodlar harbiy-kasbiy tanlovga qoʻyilmaydi.
28. Dastlabki tanlash natijalariga koʻra taʼlim muassasasida oʻqishga tavsiya etilgan nomzodlarning shaxsiy hujjatlar yigʻmajildi mudofaa ishlari boʻyicha boʻlimlar tomonidan mudofaa ishlari boʻyicha boshqarmalarga har yili 30-aprelgacha taqdim etiladi.
3-bob. Harbiy-kasbiy tanlash
29. Oʻzining psixofiziologik xususiyatlariga va sogʻligʻiga koʻra harbiy mutaxassislikning zamonaviy talablariga javob beradigan, ofitser kasbini egallashning asoslariga, yetakchilik sifatlariga, ichki eʼtiqodiga, mustahkam maʼnaviy-axloqiy va intellektual salohiyatga ega boʻlgan nomzodlarni aniqlash harbiy-kasbiy tanlashning asosiy maqsadi hisoblanadi.
30. Harbiy-kasbiy tanlashning asosiy vazifalari quyidagilardan iborat:
taqdim etilgan hujjatlarni va nomzodni tavsiflovchi materiallarni oʻrganish;
nomzodlarni yakuniy tibbiy koʻrikdan oʻtkazish;
nomzodning (orfografik va punktuatsion) savodxonligi darajasini baholash;
nomzodlarning psixofiziologik xususiyatlarini oʻrganish;
nomzodlarning jismoniy tayyorlanganlik darajasini aniqlash;
yakka tartibdagi yakuniy suhbat oʻtkazish va nomzodni test sinovlarini topshirishga qoʻyish toʻgʻrisida uzil-kesil qaror qabul qilish.
31. Harbiy-kasbiy tanlash nomzodning yashash joyidagi mudofaa ishlari boʻyicha boshqarmalarda amalga oshiriladi.
32. Hujjatlarni oʻrganishda nomzod toʻgʻrisida taqdim etilgan hujjatlar va maʼlumotlarning belgilangan talablarga muvofiqligi tekshiriladi.
33. Nomzodlarni yakuniy tibbiy koʻrikdan oʻtkazish Oʻzbekiston Respublikasi Mudofaa vaziri va Sogʻliqni saqlash vazirining qoʻshma buyrugʻi bilan tasdiqlanadigan, tibbiyot mutaxassislaridan shakllantiriladigan harbiy-tibbiy komissiyalar tomonidan oʻtkaziladi.
34. Yakuniy tibbiy koʻrik Oʻzbekiston Respublikasi Sogʻliqni saqlash vazirligi, Mudofaa vazirligi hamda Oʻzbekiston Respublikasi Oliy va oʻrta maxsus taʼlim vazirligining OʻMKHT Markazining qoʻshma qarori bilan tasdiqlanadigan harbiy akademik litseylar va taʼlim muassasalarining maxsus guruhlariga kirayotgan nomzodlarni tibbiy koʻrikdan oʻtkazish tartibiga asosan oʻtkaziladi.
35. Yakuniy tibbiy koʻrikdan oʻtkazish natijalari boʻyicha sogʻligʻiga koʻra nomzodning taʼlim muassasasida oʻqishga yaroqliligi darajasi toʻgʻrisida qaror chiqariladi.
Sogʻligʻining holatiga koʻra taʼlim muassasasida oʻqishga yaroqsiz deb topilgan nomzodlar tanlashning keyingi tadbirlariga qoʻyilmaydi.
36. Nomzodlarning savodxonlik darajasi (orfografiya, punktuatsiya) diktant yozish yoʻli bilan aniqlanadi.
Diktantni oʻtkazish tartibi va baholash mezonlari Oʻzbekiston Respublikasi Mudofaa vazirligi va OʻMKHT Markazi tomonidan ishlab chiqiladi va tasdiqlanadi.
Diktant boʻyicha qoniqarsiz baho olgan nomzodlar tanlashning keyingi bosqichlarga qoʻyilmaydi.
37. Nomzodlarning psixofiziologik xususiyatlarini oʻrganish psixologik test sinovlari orqali, tegishli mutaxassislarni jalb etgan holda harbiy okruglar tomonidan oʻtkaziladi. Psixologik test sinovlarini oʻtkazish tartibi va psixologik testlar Oʻzbekiston Respublikasi Mudofaa vazirligi hamda OʻMKHT Markazi tomonidan ishlab chiqiladi va tasdiqlanadi.
Psixofiziologik xususiyatlarni oʻrganish natijalari yakka tartibdagi yakuniy suhbat davomida qaror qabul qilishda hisobga olinadi.
38. Psixofiziologik xususiyatlarni oʻrganish natijalariga asosan quyidagi xulosalar tuziladi:
taʼlim muassasasiga kirishga tavsiya etiladi;
taʼlim muassasasiga kirishga tavsiya etilmaydi.
Psixofiziologik xususiyatlarni oʻrganish natijalariga koʻra tanlashdan oʻta olmagan nomzodlar tanlashning keyingi bosqichlariga qoʻyilmaydi.
39. Nomzodlarning jismoniy tayyorlanganlik darajasi mudofaa ishlari boʻyicha boshqarmalar tomonidan aniqlanadi.
Jismoniy tayyorlanganlik darajasi boʻyicha belgilangan talabga javob bermaydigan nomzodlar tanlashning keyingi bosqichlariga qoʻyilmaydi.
40. Yakka tartibdagi yakuniy suhbat nomzodning OHTM oʻqishga kirishi sababini, yetakchilik sifatlarini, aqliy qobiliyatlari va boshqa muhim kasbiy fazilatlarini aniqlash maqsadida yagona metodika boʻyicha psixofiziologik oʻrganish va diktant yozish natijalari asosida oʻtkaziladi.
41. Yakka tartibdagi yakuniy suhbat kollegiallik tamoyillari boʻyicha mudofaa ishlari boʻyicha boshqarmalar tomonidan, Oʻzbekiston Respublikasi Mudofaa vazirligi huzuridagi Jamoatchilik kengashining hududiy boʻlinmalari vakillari ishtirokida oʻtkaziladi.
42. Yakka tartibdagi yakuniy suhbatni oʻtkazish metodikasi OHTMlari taʼlim yoʻnalishlarining xususiyatlarini hisobga olgan holda Oʻzbekiston Respublikasi Mudofaa vazirligi va OʻMKHT Markazi tomonidan ishlab chiqiladi va tasdiqlanadi.
43. Yakka tartibdagi yakuniy suhbat natijalari boʻyicha nomzodni Oʻzbekiston Respublikasi Vazirlar Mahkamasiga huzuridagi Davlat test markazi tomonidan oʻtkaziladigan test sinovlarini topshirishga qoʻyish toʻgʻrisida uzil-kesil qaror qabul qilinadi.
44. Yakka tartibdagi yakuniy suhbatdan oʻta olmagan nomzodlarning shaxsiy hujjatlari yigʻmajildi (va boshqa hujjatlar) dalolatnoma boʻyicha OʻMKHT hududiy boshqarmalari vakillari orqali nomzodlarni keyinchalik yashash joylaridagi akademik litsey va kasb-hunar kollejlarida oʻqitish bilan qamrab olish uchun yuboriladi.
45. Mudofaa ishlari boʻyicha boshqarmalar tomonidan nomzodlarning rasmiylashtirilgan shaxsiy hujjatlari yigʻmajildi mudofaa ishlari boʻyicha boshqarmalar tomonidan taʼlim muassasalarining maslahat markazlariga 20-iyungacha yuboriladi.
46. Nomzodlarning shaxsiy hujjatlari yigʻmajildini taʼlim muassasalarining maslahat markazlariga ushbu maqsadlar uchun vakolatga ega boʻlmagan boshqa shaxslar orqali yuborish qatʼiyan man etiladi.
47. Test sinovlarida qatnashishga ruxsat etilgan nomzodlarga mudofaa ishlari boʻyicha boshqarmalar tomonidan maʼlumotnoma beriladi. Ushbu maʼlumotnoma umumiy taʼlim maktabidan umumiy oʻrta taʼlim toʻgʻrisida shahodatnomani olish uchun asos boʻladi.
48. Taʼlim muassasalari maslahat markaziga taqdim etilgan shaxsiy hujjatlar yigʻmajildlarini oʻrganish natijasida test sinovlarida qatnashishga ruxsat etilgan nomzodlar roʻyxatlarini mudofaa ishlari boʻyicha boshqarmalarga yetkazish masʼuliyati yuklanadi.
49. Nomzodlarning test sinovlarida qatnashish uchun nomzodlarning taʼlim muassasalariga oʻz vaqtida yetib kelishlarini taʼminlash masʼuliyati mudofaa ishlari boʻyicha boshqarmalar boshliqlari zimmasiga yuklanadi.
50. Nomzodlarni taʼlim muassasalariga kelib-ketishi, test sinovlariga tayyorlanish va ularni topshirish davrida yashashi, ovqatlanishi bilan bogʻliq barcha sarf-xarajatlar ularning ota-onalari yoki ularni oʻrnini bosuvchilar hisobidan qoplanadi.
4-bob. Test sinovlari
51. Test sinovlari belgilangan tartib asosida Oʻzbekiston Respublikasi Vazirlar Mahkamasi huzuridagi Davlat test markazi tomonidan Oʻzbekiston Respublikasi taʼlim muassasalariga qabul qilish boʻyicha Davlat komissiyasi belgilagan muddatlarda oʻtkaziladi.
52. Test sinovlari oʻtkaziladigan umumtaʼlim fanlari bloki Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan tasdiqlanadi.
Nomzodlar test sinovlarini oʻzlarining tanlovi boʻyicha uchta: davlat tili, rus tili va qoraqalpoq tillarining birida topshiradilar.
53. Test sinovlari natijalari Oʻzbekiston Respublikasi Vazirlar Mahkamasi huzuridagi Davlat test markazi tomonidan Oʻzbekiston Respublikasi taʼlim muassasalariga qabul qilish boʻyicha Davlat komissiyasi belgilagan muddatlarda Oʻzbekiston Respublikasi taʼlim muassasalariga qabul qilish boʻyicha Davlat komissiyasiga hamda tegishli taʼlim muassasasi maslahat markaziga taqdim etiladi.
54. Test sinovlariga belgilangan muddatda kelmagan nomzodlar uchun takroriy test sinovlari oʻtkazilmaydi.
55. Taʼlim muassasalariga qabul qilinmagan (tanlashdan oʻtmagan) nomzodlarning shaxsiy hujjatlari yigʻmajildi (va boshqa hujjatlar) dalolatnomaga asosan OʻMKHT hududiy boshqarmalari vakillariga nomzodlarni keyinchalik yashash joylaridagi boshqa akademik litsey va kasb-hunar kollejlarida oʻqitish bilan qamrab olish uchun beriladi.
5-bob. Nomzodlarga beriladigan imtiyozlar
56. Oʻzbekiston Respublikasi taʼlim muassasalariga qabul qilish boʻyicha Davlat komissiyasining qaroriga muvofiq boshlangʻich va harbiy-kasbiy tanlash natijalariga asosan quyidagi nomzodlar taʼlim muassasalariga tanlovdan tashqari va test sinovlarisiz qabul qilinadi:
tegishli ixtisos fanlari boʻyicha xalqaro olimpiadalar va fan olimpiadalarining respublika bosqichi, shuningdek Oʻzbekiston Respublikasi Xalq taʼlimi vazirligi, Madaniyat vazirligi hamda Jismoniy tarbiya va sport davlat qoʻmitasi tomonidan oʻtkaziladigan tanlovlar va musobaqalarda gʻolib boʻlib, OʻMKHT Markazining belgilangan namunadagi guvohnomasiga ega boʻlganlar;
oʻz xizmat vazifalarini bajarish chogʻida halok boʻlgan harbiy xizmatchilarning va huquqni muhofaza qilish organlari xodimlarining farzandlari — tegishli vazirlik va idoralar rahbarlarining iltimosnomasi mavjud boʻlganda.
6-bob. Qabul qilish tartibi
57. Taʼlim muassasalariga qabul qilish belgilangan tartibda belgilanadigan qabul kvotalari asosida amalga oshiriladi.
58. Nomzodlarni taʼlim muassasalari oʻquvchilari safiga qabul qilish Oʻzbekiston Respublikasi Vazirlar Mahkamasi huzuridagi Davlat test markazi tomonidan taqdim etilgan test sinovlari natijalariga asosan amalga oshiriladi.
59. Dastlabki va harbiy-kasbiy tanlashdan oʻtgan nomzodlar soni belgilangan qabul kvotalaridan kam boʻlgan taqdirda test sinovlari oʻtkazilmaydi va nomzodlar dastlabki va harbiy-kasbiy tanlash natijalariga asosan qabul qilinadi.
60. Bir nechta nomzodlarning oʻtish reyting ballari teng boʻlgan holatlarda ular taʼlim muassasasiga belgilangan kvotadan tashqari qabul qilinadi.
61. Test natijalari kelganidan soʻng taʼlim muassasasining maslahat markazi qabul qilingan nomzodlarning roʻyxatini tuzadi hamda birinchi bosqichga qabul qilish toʻgʻrisidagi bayonni rasmiylashtiradi. Mazkur hujjatlar maslahat markazi raisi va aʼzolari tomonidan imzolanadi va taʼlim muassasasi muhri bilan tasdiqlanadi.
62. Maslahat markazi bayoni nomzodlarni taʼlim muassasasiga oʻquvchilar safiga qabul qilish toʻgʻrisida buyruqni qabul qilishga asos boʻladi.
7-bob. Yakunlovchi qoidalar
63. Taʼlim muassasalari oʻquvchilarini oʻquvchilar safidan chiqarish va boshqa taʼlim muassasasiga oʻtkazish qonunchilikda belgilangan tartibda amalga oshiriladi.
64. Mazkur Nizomni qoʻllash bilan bogʻliq holda paydo boʻladigan kelishmovchiliklar qonun hujjatlariga muvofiq hal etiladi.
65. Ushbu Nizom talablari buzilishida aybdor boʻlgan davlat organlari va tashkilotlarning rahbarlari hamda boshqa mansabdor shaxslar qonun hujjatlariga muvofiq javob beradilar.
Vazirlar Mahkamasining 2017-yil 21-apreldagi 227-son qaroriga
2-ILOVA
2-ILOVA
Oliy harbiy taʼlim muassasalariga kirish uchun nomzodlarni tayyorlash boʻyicha akademik litsey va kasb-hunar kollejlarining maxsus guruhlari toʻgʻrisida
NIZOM
1 bob. Umumiy qoidalar
1. Ushbu Nizom Oʻzbekiston Respublikasi Prezidentining “Oʻzbekiston Respublikasi Qurolli Kuchlarini isloh qilish va yanada rivojlantirish vazifalarini amalga oshirish boʻyicha chora-tadbirlar dasturi toʻgʻrisida” 2017-yil 24-yanvardagi PQ-2738-son qaroriga muvofiq oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlari (keyingi oʻrinlarda taʼlim muassasalari deb ataladi) maxsus oʻquv guruhlarining (keyingi oʻrinlarda maxsus guruhlar deb ataladi) maqsadi, vazifalari, funksiyalari, maqomi va faoliyatining tashkiliy asoslarini belgilaydi.
2. Maxsus guruhlarda taʼlim jarayoni oʻrta maxsus, kasb-hunar taʼlimi Davlat taʼlim standartlariga muvofiq, Oʻrta maxsus, kasb-hunar taʼlimi markazi tomonidan Oʻzbekiston Respublikasi Mudofaa vazirligi bilan kelishilgan holda tasdiqlangan, oʻquvchilarni harbiy-kasbiy yoʻnaltirishni hamda ularning keyinchalik oliy harbiy taʼlim muassasalarida oʻqishini nazarda tutadigan oʻquv rejalari va oʻquv dasturlari asosida tashkil etiladi.
2-bob. Maxsus guruhlarning maqsadi va vazifalari
3. Oʻquvchilarni chuqurlashtirilgan kasbiy, tabaqalashtirilgan, kasbga yoʻnaltirilgan holda oʻqitish, ularning intellektual rivojlanishini, harbiy-vatanparvarlik tarbiyasini taʼminlash maxsus guruhlar faoliyatining maqsadi hisoblanadi.
4. Quyidagilar maxsus guruhlarning vazifalari hisoblanadi:
oʻquvchilarni oʻrta maxsus, kasb-hunar taʼlimi davlat taʼlim standarti talablariga muvofiq sifatli oʻqitishni tashkil etish;
yoshlarni Vatanga sadoqat, yuksak fuqarolik hamda demokratiya, mustaqillik gʻoyalariga, oʻz xalqining maʼnaviy va tarixiy qadriyatlariga sodiqlik ruhida tarbiyalash;
oʻquvchilarga qonunchilikni toʻgʻri tushunishni va ularga ongli rioya qilishni taʼminlaydigan yuksak madaniyatni, koʻnikmalarni, faol ijtimoiy-fuqarolik xulq-atvorni singdirish;
oʻquvchilarning tegishli mutaxassisliklar boʻyicha oliy harbiy taʼlim muassasalarida oʻqishni davom ettirishlari uchun zarur va yetarli boʻlgan, chuqurlashtirilgan nazariy va kasbiy tayyorgarligini taʼminlash;
oʻquvchilarda jismoniy chidamlilik, kuch, chaqqonlik va tezkorlikni rivojlantirish.
3-bob. Oʻquv-tarbiyaviy jarayonni tashkil etish
5. Maxsus guruhlarda oʻqish davlat, qoraqalpoq va rus tillarida olib boriladi.
6. Oʻquv rejasi, oʻquv jarayoni jadvali, auditoriya va auditoriyadan tashqari oʻquv-tarbiyaviy ishlar, shuningdek oʻquv-tarbiya jarayonini tashkil etishning boshqa masalalari Oʻrta maxsus, kasb-hunar taʼlimi davlat taʼlim standartlari talablaridan kelib chiqib, taʼlim muassasalarining oʻziga xosligi hisobga olingan holda belgilanadi.
7. Oʻquvchilarni tarbiyalash va oʻqitish jarayonida auditoriya va auditoriyadan tashqari mashgʻulotlar oʻtkazishning turli zamonaviy shakllari va usullaridan, jumladan oʻqitilayotgan fanlar boʻyicha fakultativ va toʻgarak mashgʻulotlari hamda oʻquvchilarni Vatanga sadoqat va muhabbat ruhida tarbiyalash tadbirlaridan foydalaniladi.
8. Oʻqitish, mehnat qilish, dam olish va turli tadbirlarni qoʻshib olib borishning tibbiy-pedagogik asoslanishini taʼminlaydigan kun tartibi oʻquvchilarning harbiy akademik litseyda kecha-kunduz boʻlishini hisobga olgan holda tuziladi va Pedagogik kengashning qarori bilan tasdiqlanadi.
9. Oʻqish tamom boʻlgandan keyin har bir bosqichda reyting nazorati va attestatsiya natijalari boʻyicha maxsus guruh oʻquvchilarini maxsus guruh tarkibida navbatdagi bosqichga oʻtkazish toʻgʻrisida qaror qabul qilinadi.
10. Attestatsiya va reyting nazorati boʻyicha qoniqarsiz natijalar koʻrsatgan maxsus guruh oʻquvchilari taʼlim muassasasining umumiy guruhlarida oʻqishini davom ettirish uchun keyingi bosqichga oʻtkaziladi.
11. Oʻquvchilarning bosqichdan-bosqichga oʻtishi taʼlim muassasasi direktorining buyrugʻi bilan amalga oshiriladi.
4-bob. Maxsus guruhlar oʻquvchilari
12. Maxsus guruhlar oʻquvchilarining huquq va majburiyatlari oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlarining umumiy guruhlari oʻquvchilari huquq va majburiyatlari bilan bir xil boʻlib, taʼlim muassasasining tegishli tartibda tasdiqlangan ustavi bilan belgilanadi.
13. Maxsus guruhlarga oʻqishga qabul qilingan shaxslar oʻquvchilar deb ataladi, ularga belgilangan namunadagi oʻquvchi bileti va fanlarni oʻzlashtirish daftarchasi beriladi.
14. Maxsus guruhlar oʻquvchilarini oʻquvchilar safidan chiqarish va oʻqishini boshqa taʼlim muassasasiga koʻchirish qonunchilikda belgilangan tartibda amalga oshiriladi.
15. Maxsus guruhlarda oʻqish muddati — uch yil. Maxsus guruhlarda oʻquvchilar soni har bir bosqichda 26 nafardan, uch bosqichda 78 nafardan oshmasligi lozim.
16. Oʻquv rejasi va oʻquv dasturlari talablarini toʻliq bajargan maxsus guruh oʻquvchilari yakuniy davlat attestatsiyasiga qoʻyiladi.
17. Taʼlim muassasalarining maxsus guruhlarida oʻqishni yakunlagan bitiruvchilarga oʻrta maxsus, kasb-hunar maʼlumoti olganligi toʻgʻrisida davlat namunasidagi diplom beriladi.
5-bob. Rahbar va pedagog kadrlar, maxsus guruhlarni boshqarish
18. Oliy maʼlumotli, taʼlim muassasalari oʻqituvchilariga qoʻyiladigan malaka talablariga javob beruvchi, yuksak axloqiy sifatlarga ega boʻlgan shaxslar maxsus guruhlarda pedagogik faoliyat bilan shugʻullanish huquqiga egadirlar.
19. Maxsus guruhlarda dars berayotgan pedagog kadrlarni attestatsiyadan oʻtkazish qonunchilikda belgilangan tartibda amalga oshiriladi.
20. Taʼlim muassasasining rahbariyati oʻquvchilarning qonun hujjatlarida belgilangan oʻqish, mehnat qilish va dam olish sharoitlariga rioya etishi yuzasidan javob beradi.
21. Direktor maxsus guruhlar faoliyatini nazorat qiladi, oʻquvchilarning sifatli oʻqitilishi va tarbiyalanishi, oʻquv rejalari va dasturlarining bajarilishi, maxsus guruhlarning oʻquv-metodik va moliya-xoʻjalik faoliyatining zarur darajada amalga oshirilishi yuzasidan javob beradi, maxsus guruhlar boʻyicha qonunchilikda belgilangan tartib asosida buyruqlar chiqaradi.
22. Taʼlim muassasasining Pedagogik kengashi maxsus guruhlarda taʼlim-tarbiya jarayonini tashkil etish va takomillashtirishda amaliy yordam koʻrsatadi.
23. Taʼlim muassasasining rahbariyati pedagog va muhandis-pedagoglarning pedagogik, kasbiy va psixologik mahoratlarini muntazam ravishda takomillashtirish hamda ularning malakalarini oshirish va qayta tayyorlash uchun masʼuldirlar.
6-bob. Maxsus guruhlarda taʼlim jarayonini tashkil etish va boshqarish boʻyicha davlat organlarining vazifalari
24. Quyidagilar Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining vazifalari hisoblanadi:
Oʻzbekiston Respublikasi Mudofaa vazirligi bilan kelishilgan holda, Oʻrta maxsus, kasb-hunar taʼlimi davlat taʼlim standartlariga muvofiq maxsus guruhlarning oʻquv rejalari va oʻquv dasturlarini ishlab chiqish va tasdiqlash;
pedagog kadrlarning malakasini oshirish va ularni qayta tayyorlashni tashkil etish;
oʻquv-tarbiya jarayonini tashkil etish, ilgʻor pedagogik va axborot texnologiyalarini taʼlim dasturlariga hamda oʻquv jarayoniga joriy etish boʻyicha ilmiy-metodik yordam koʻrsatish;
oʻquv, oʻquv-metodik adabiyotlar va koʻrgazmali qoʻllanmalar ishlab chiqish, nashr etishni hamda maxsus guruhlarni ular bilan taʼminlashni tashkil etish;
oʻquvchilarni harbiy-vatanparvarlik, huquqiy, maʼnaviy-axloqiy va estetik tarbiyalashni taʼminlaydigan kompleks maʼnaviy-maʼrifiy va tarbiyaviy ishlarni tashkil etish va amalga oshirish;
Oʻzbekiston Respublikasi Mudofaa vazirligi bilan birgalikda oʻquvchilarni aniq maqsadni koʻzlagan holda kasbga yoʻnaltirish va oliy harbiy taʼlim muassasalariga kirish uchun tayyorlash, ularda maxsus guruhdagi oʻqitish yoʻnalishlariga muvofiq kiritilgan maxsus fanlar boʻyicha kasbiy mahorat va koʻnikmalarni shakllantirish;
harbiy akademik litseylarga birkitilgan oliy taʼlim muassasalari bilan oʻzaro samarali hamkorlik qilishni tashkil etish va nazorat qilish, birkitilgan oliy taʼlim muassasalarining maxsus guruhlar oʻquvchilarini oliy harbiy taʼlim muassasalariga sifatli tayyorlashdagi roli va masʼuliyatini oshirish, shuningdek bevosita ishtirokini taʼminlash;
maxsus guruhlarning oʻquv-moddiy bazasini oʻqitishning zamonaviy texnik vositalari, kompyuter texnikasi va tegishli oʻquv-laboratoriya asbob-uskunalari bilan jihozlash;
maxsus guruhlarning maʼmuriy, moliyaviy va xoʻjalik faoliyatini, shuningdek moddiy-texnik taʼminotini belgilangan tartibda muvofiqlashtirish va nazorat qilish;
davlat yakuniy attestatsiyasini tashkil etish va maxsus guruhlar bitiruvchilariga diplomlar berish.
25. Quyidagilar Oʻzbekiston Respublikasi Mudofaa vazirligining vazifalari hisoblanadi:
oʻquv-tarbiya jarayonini sifatli tashkil etishda, harbiy mavzudagi ilgʻor pedagogik va axborot texnologiyalarini taʼlim dasturlariga va oʻquv jarayoniga joriy etishda zarur yordam koʻrsatish;
Oʻzbekiston Respublikasi yoshlarini harbiy xizmatga chaqirishgacha dastlabki tayyorlash dasturiga muvofiq maxsus guruhlarni harbiy-muhandislik asbob-uskunalari va kimyoviy muhofaza vositalari, harbiy mavzudagi oʻquv va koʻrgazmali qoʻllanmalar bilan taʼminlashda belgilangan tartibda yordam koʻrsatish;
maxsus guruhlar oʻquvchilari bilan Oʻzbekiston Respublikasi Mudofaa vazirligining oliy harbiy taʼlim muassasalari va serjantlar tayyorlash maktablari bazalarida taktik, oʻq otish, maxsus tayyorgarlik boʻyicha (shu jumladan dala sharoitlarida ham) amaliy mashgʻulotlarni tashkil etish va oʻtkazishga koʻmaklashish;
maxsus guruhlar oʻqituvchilarini samarali kasbiy yoʻnaltirilishini taʼminlash maqsadida taʼlim muassasalarini harbiy qismlarga, mudofaa ishlari boʻyicha boʻlimlarga biriktirish, oliy harbiy taʼlim muassasalariga, serjantlar tayyorlash maktablariga, harbiy qismlarga va Oʻzbekiston Respublikasi Mudofaa vazirligining malaka oshirish muassasalariga borishlarini tashkil etish;
Oʻzbekiston Respublikasi Mudofaa vazirligining malaka oshirish muassasalarida chaqiruvga qadar boshlangʻich tayyorgarlik boʻyicha rahbarlar va pedagog kadrlarning malakasini oshirishni tashkil etish va oʻtkazish;
Oʻzbekiston Respublikasi Oliy va oʻrta maxsus taʼlim vazirligi bilan birgalikda Oʻzbekiston Respublikasi yoshlarini harbiy xizmatga qadar dastlabki tayyorlash dasturini takomillashtirish;
oʻqishga qabul qilish komissiyalari va maxsus guruhlar bitiruvchilarining davlat yakuniy attestatsiyasini oʻtkazish komissiyalari ishida qatnashish.
26. Taʼlim muassasalariga birkitilgan oliy harbiy va oliy taʼlim muassasalari oʻquv-tarbiya jarayonini tashkil etishda, ilgʻor pedagogik va axborot-kommunikatsiya texnologiyalarini taʼlim dasturlariga va oʻquv jarayoniga joriy etishda zarur ilmiy-metodik yordam koʻrsatadilar, shuningdek oʻquvchi yoshlarni kasbga yoʻnaltirishni, sifatli tanlashni va pedagog kadrlar malakasini oshirishning samarali tashkil etilishini taʼminlaydilar.
27. Oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litsey va kasb-hunar kollejlariga biriktirilgan oliy taʼlim muassasalari rektorlari koʻrsatib oʻtilgan vazifalarning bajarilishini nazorat qiladilar.
7-bob. Moliyalashtirish va moddiy-texnik taʼminlash
28. Taʼlim muassasalari, jumladan maxsus guruhlar faoliyatini moliyalashtirish qonun hujjatlariga muvofiq quyidagilar hisobiga amalga oshiriladi:
Oʻzbekiston Respublikasi Davlat budjetidan ajratiladigan mablagʻlar;
taʼlim xizmatlari koʻrsatishdan, ilmiy-pedagogik, ishlab chiqarish va taʼlim muassasasining ustavdagi vazifalariga muvofiq boʻlgan faoliyatning boshqa turlaridan olingan daromadlar;
yuridik va jismoniy shaxslarning ixtiyoriy ehsonlari.
29. Moliyaviy mablagʻlar taʼlim muassasalari tasarrufida boʻladi hamda ulardan qonun hujjatlariga va ularning ustaviga muvofiq foydalaniladi.
30. Taʼlim muassasalarining, jumladan maxsus guruhlarning oʻquv-laboratoriyalarini, kabinetlarini va boshqa obyektlarini jihozlash Oʻrta maxsus, kasb-hunar taʼlimining davlat taʼlim standartlari talablariga muvofiq oʻrta maxsus, kasb-hunar taʼlimi jarayonini moddiy-texnik taʼminlashning namunaviy normativlarida belgilanadi.
8-bob. Yakunlovchi qoida
31. Ushbu Nizom talablarining buzilishida aybdor boʻlgan shaxslar qonunchilikda belgilangan tartibda javob beradilar.
Vazirlar Mahkamasining 2017-yil 21-apreldagi 227-son qaroriga
3-ILOVA
3-ILOVA
Harbiy akademik litseylar hamda oliy harbiy taʼlim muassasalariga kirish uchun nomzodlarni tayyorlash boʻyicha qoʻshimcha vazifalar yuklangan akademik litseylar va kasb-hunar kollejlarining infratuzilmasini, oʻquv va moddiy-texnika bazasini takomillashtirish
DASTURI
|
T/r |
Tadbirlar nomi |
Bajarish muddati |
Masʼul ijrochilar |
|
Moddiy-texnik bazani mustahkamlash | |||
|
1. |
Oʻrta maxsus, kasb-hunar taʼlimi Davlat taʼlim standarti talablariga muvofiq akademik litseylar va kasb-hunar kollejlari maxsus guruhlarini jihozlash normativlarini ishlab chiqish, maxsus guruhlar uchun zarur moddiy-texnika shart-sharoitlarini yaratish, nomzodlarni oliy harbiy taʼlim muassasalariga kirish uchun tayyorlash jarayonini sifatli tashkil etishni taʼminlash. |
2017-yil aprel — iyun |
Mudofaa vazirligi, “Oʻzstandart”agentligi, OʻMKHTM, Sogʻliqni saqlash vazirligi, vazirliklar va idoralar |
|
2. |
Oʻquv binolari, sport majmualari,auditoriya va laboratoriya xonalarining oʻquv-moddiy, texnika bazasi mulkiy taʼminlanishini, sport jihozlari va anjomlarini ishlab chiqilgan taʼminlash normativlariga muvofiqligini hatlovdan oʻtkazish. |
2017-yil iyul —avgust |
OʻMKHTM, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, vazirliklar va idoralar |
|
3. |
Oʻzbekiston Respublikasi investitsiya dasturiga kiritish uchun maxsus guruhlar tashkil etilishini inobatga olgan holda rekonstruksiya va mukammal taʼmirlash talab etiladigan akademik litseylar va kasb-hunar kollejlarining manzilli dasturlarini ishlab chiqish va tasdiqlash, shuningdek, tasdiqlangan taʼminlash normativlariga muvofiq zarur oʻquv jihozlari va inventarlar, oʻqitishning texnik vositalari bilan qoʻshimcha taʼminlash. |
har yili 1-avgustgacha |
OʻMKHTM,Iqtisodiyot vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari |
|
Oʻquv reja va dasturlarini takomillashtirish, darsliklar va oʻquv-metodik qoʻllanmalar bilan taʼminlash | |||
|
4. |
Maxsus guruhlarning faoliyatini samarali tashkil etish uchun oʻquv reja va oʻquv dasturlarini ishlab chiqish va takomillashtirish, jumladan: oʻquv-normativ hujjatlarni qayta koʻrib chiqish; “Chaqiriqqa qadar boshlangʻich tayyorgarlik” fani boʻyicha oʻquv dasturini qayta koʻrib chiqish va mazmunini takomillashtirish; boshlangʻich harbiy va jismoniy tayyorgarlik boʻyicha qoʻshimcha mashgʻulotlar tashkil etish va oʻtkazish; umumtaʼlim fanlari boʻyicha toʻgarak va qoʻshimcha mashgʻulotlar tashkil etish; oʻquvchilarning vatanparvarlik tarbiyasi boʻyicha tadbirlar tashkil etishni nazarda tutish. |
2017/2018 oʻquv yili boshlangunga qadar Oʻquv jarayoni jadvaliga muvofiq |
OʻMKXTM, Mudofaa vazirligi, Mudofaa vazirligi huzuridagi Jamoatchilik kengashi, harbiy okruglar va qismlar, oliy harbiy taʼlim muassasalari |
|
5. |
Harbiy mavzular boʻyicha maxsus oʻquv-metodik qoʻllanmalar va koʻrsatmalar ishlab chiqish, nashr etish, nomzodlarni oliy harbiy taʼlim muassasalariga kirishga tayyorlash uchun akademik litseylar va kasb-hunar kollejlarining kutubxona fondini lugʻatlar, ensiklopediyalar, maʼlumotnomalar, badiiy adabiyotlar bilan toʻldirish. |
2017/2018 oʻquv yili |
Mudofaa vazirligi, Harbiy okruglar, OʻMKHTM |
|
6. |
Akademik litseylar va kasb-hunar kollejlarni ZiyoNET tarmogʻiga ulash, oʻqituvchi va oʻquvchilarni taʼlim va oʻqitish tizimiga doir statistik, metodik maʼlumotlarni olishga, axborotlar bazasi va zamonaviy axborot-qidiruv tizimlaridan foydalanishga imkoniyatlar yaratish. |
2017/2018 oʻquv yili |
Axborot texnologiyalari va kommunikatsiyalarini rivojlantirish vazirligi, OʻMKHTM, Mudofaa vazirligi |
|
7. |
Maxsus guruhlarning har bir oʻquvchisini umumtaʼlim fanlari boʻyicha darsliklar va oʻquv qoʻllanmalari bilan taʼminlash. |
Har yili 1-sentabrgacha |
OʻMKHTM, Mudofaa vazirligi, harbiy okruglar |
|
8. |
Maxsus guruhlarda oʻqitiladigan fanlar boʻyicha maqsadli oʻqu�-metodik majmualarni va ularning elektron shakllarini yaratish. |
Xar yili 1-sentabrgacha |
OʻMKHTM, Mudofaa vazirligi |
|
9. |
Oliy harbiy taʼlim muassasalariga kirishni xohlovchi eng iqtidorli 9-sinf bitiruvchilarini tanlab olish, umumtaʼlim maktablarida kasbga yoʻnaltirish va oʻquvchilarni keng xabardor qilish boʻyicha ishlarni izchil va maqsadli amalga oshirish. |
Har yili, oʻquv yili davomida |
XTV, OʻMKHTM, Mudofaa vazirligi, harbiy okruglar |
|
Oʻquvchilarni tayyorlash, tibbiy koʻrikdan oʻtkazish tizimini takomillashtirish, harbiy vatanparvarlik va jismoniy tarbiya boʻyicha tadbirlar tashkil qilish | |||
|
10. |
Maxsus guruhlarda dars berishga va tarbiyalash faoliyatiga pedagogik ish staji 5 yildan kam boʻlmagan eng tajribali va malakali oʻqituvchilarni, jumladan harbiy xizmatchilar va safarbarlik zaxirasidan belgilangan tartibda jalb etish. |
2017-yil avgust |
OʻMKHTM, Mudofaa vazirligi |
|
11. |
Kadrlar tomonidan eng yuqori samarali murabbiylikni taʼminlash maqsadida chaqiriqqa qadar boshlangʻich tayyorgarlik fani boʻyicha rahbar va oʻqituvchi lavozimiga harbiy xizmatchilar rezervi va safarbarlik zaxirasi tarkibidan tajribali va bilimdon, Oʻzbekiston Respublikasi Qurolli Kuchlari tizimida oʻqituvchilik lavozimida kamida 10 yil xizmat qilgan shaxslarni belgilangan tartibda tayinlash choralarini koʻrish. |
2017/2018 oʻquv yilidan |
OʻMKHTM, Mudofaa vazirligi |
|
12. |
Oʻzbekiston Respublikasi Mudofaa vazirligining harbiy okruglarida oʻrta maxsus, kasb-hunar taʼlimi muassasalarining chaqiriqqa qadar boshlangʻich tayyorgarlik boʻyicha rahbar va oʻqituvchilari uchun oʻquv-metodik yigʻinlar tashkil etish va oʻtkazish. |
2018-yildan boshlab har yili |
Harbiy okruglar qoʻmondonligi |
|
13. |
Maxsus guruhlar oʻquvchilarining vaqtlarini oqilona tashkil etish maqsadida akademik litseylar va kasb-hunar kollejlari maxsus guruhlari uchun oʻzaro muvozanatli jismoniy, psixologik, maʼnaviy-axloqiy rivojlanishni taʼminlovchi ilmiy asoslangan, yagona mazmunli kun tartibini ishlab chiqish va joriy etish. |
2017/2018 oʻquv yilidan boshlab |
OʻMKHTM, Mudofaa vazirligi |
|
14. |
Yosh avlod muhitida oliy harbiy taʼlim muassasalarining faoliyati va umumiy harbiy xizmat toʻgʻrisida obyektiv va ijobiy taassurotni shakllantirish, maxsus guruhlar oʻquvchilarini harbiy-vatanparvarlik ruhida tarbiyalash boʻyicha amalga oshirilayotgan ishlarning maqsadi, mazmuni va mohiyatini tushuntirishga yoʻnaltirilgan tadbirlar majmuasini tashkil etish va oʻtkazish. |
Har yili, oʻquv yili davomida |
Mudofaa vazirligi, Mudofaa vazirligi huzuridagi Jamoatchilik kengashi, harbiy okrug va qismlar, oliy harbiy taʼlim muassasalari, OʻMKHTM |
|
15. |
Belgilangan normativlarga muvofiq, doimiy ravishda maxsus guruhlar oʻquvchilarining jismoniy tayyorgarligini amalga oshirish. |
2017/2018 oʻquv yilidan boshlab |
OʻMKHTM, Mudofaa vazirligi |
|
16. |
Harbiy akademik litseylarda kecha-kunduz tibbiy xizmat koʻrsatilishini tashkil etish. |
2017/18 oʻquv yilidan boshlab |
Sogʻliqni saqlash vazirligi, Mudofaa vazirligi |
|
17. |
Harbiy akademik litseylar, akademik litseylar va kasb-hunar kollejlari maxsus guruhlarining oʻquvchilarining fan olimpiadalarida, kasblar boʻyicha musobaqalarda, harbiy-sport musobaqalarida qatnashishga keng jalb etilishini taʼminlash. |
Har yili, jadval asosida |
OʻMKHTM |
(Oʻzbekiston Respublikasi qonun hujjatlari toʻplami, 2017-y., 17-son, 295-modda)
