O‘zbekiston Respublikasining Bojxona kodeksiga muvofiq O‘zbekiston Respublikasi Davlat bojxona qo‘mitasi qaror qiladi:

1. Bojxona kirim orderining shakli va uni to‘ldirish qoidalari ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran uch oy o‘tgach kuchga kiradi.

Mazkur Qoidalar O‘zbekiston Respublikasining Bojxona kodeksiga muvofiq bojxona kirim orderining shakli va uni to‘ldirish qoidalarini belgilaydi.

1. Ushbu Qoidalarda quyidagi asosiy tushunchalar qo‘llaniladi:

O‘zbekiston Respublikasi Iqtisodiyot va moliya vazirligi huzuridagi Bojxona qo‘mitasining (bundan buyon matnda Bojxona qo‘mitasining deb yuritiladi) Bojxona kirim orderi avtomatlashtirilgan axborot tizimi (bundan buyon matnda — dastur deb yuritiladi) — bojxona kirim orderini elektron tarzda shakllantirish va ushbu hujjat asosida undirilgan bojxona to‘lovlarini hisobga olish uchun mo‘ljallangan axborot tizimi.

Bojxona kirim orderi (bundan buyon matnda BKO deb yuritiladi) — bojxona to‘lovlarini to‘lovchi shaxs tomonidan taqdim qilingan hujjatlar asosida bojxona xodimi tomonidan dasturda rasmiylashtiriladigan elektron hamda dastur orqali chop etiladigan qog‘oz shakldagi hujjat.

2. BKO quyidagi hollarda to‘ldiriladi:

jismoniy shaxslar tomonidan qo‘l yukida yoki kuzatib borilayotgan bagajida olib o‘tilayotgan tovarlarning, shuningdek xalqaro pochta va kuryerlik jo‘natmalarida yuborilayotgan shunday tovarlarning qiymati va (yoki) miqdori qonunchilik hujjatlarida belgilangan tovarlarni olib kirishning bojxona to‘lovlari undirilmaydigan cheklangan me’yoridan oshganda, ortiqcha qismiga yagona bojxona to‘lovi undirilishida;

tovarlar jismoniy shaxsning manziliga kelib tushganda (xalqaro pochta va kuryerlik jo‘natmalari bundan mustasno) bojxona to‘lovlari olib kirilayotgan tovarlarning butun summasidan, tovarlarni olib kirishning bojxona to‘lovlari undirilmaydigan cheklangan me’yori qo‘llanilmagan holda undirilishida;

yuridik shaxslarning manziliga xalqaro pochta va xalqaro kuryerlik jo‘natmalarida yuboriladigan, qiymati bazaviy hisoblash miqdorining o‘ttiz baravarigacha bo‘lgan miqdordagi tovarlar uchun bojxona to‘lovlari undirilishida;

O‘zbekiston Respublikasi Bojxona kodeksinig 260-moddasi “g” kichik bandida nazarda tutilgan hollarda bojxona to‘lovlari undirilishida;

qonunchilik hujjatlari bilan belgilangan bojxona yig‘imlari va boshqa yig‘imlarning undirilishida.

2¹. BKO O‘zbekiston Respublikasi Bojxona kodeksining 291-moddasida keltirilgan xatti-harakat yoki tartib-taomillarni bajargan bojxona organi tomonidan rasmiylashtiriladi.

3. Bir turdagi tovarni deklaratsiyalashda mazkur Qoidalarning 1-ilovasiga muvofiq shakldagi BKOning asosiy varag‘idan, ikki yoki undan ortiq turdagi tovarlarni deklaratsiyalashda BKOning asosiy varag‘idan hamda mazkur Qoidalarning 2-ilovaga muvofiq shakldagi BKOning qo‘shimcha varag‘idan foydalaniladi.

Bojxona rasmiylashtiruvi bilan bog‘liq bo‘lmagan bojxona yig‘imlari va bojxona organlari tomonidan undirilishi nazarda tutilgan boshqa yig‘imlarni undirishda mazkur Qoidalarning 3-ilovasiga muvofiq soddalashtirilgan shakldagi BKO shaklidan foydalaniladi.

4. Dastur texnik sabablarga ko‘ra vaqtincha ishlamagan hollarda bojxona xodimi tomonidan BKO qog‘oz shaklida rasmiylashtiriladi va keyinchalik dasturga kiritiladi.

5. BKOning asosiy varag‘ida bitta tovar to‘g‘risida, qo‘shimcha varag‘ida esa ko‘pi bilan uchta tovar to‘g‘risida ma’lumotlar ko‘rsatilishi mumkin (bir vaqtning o‘zida asosiy varaqqa ko‘pi bilan 33 ta qo‘shimcha varaq ilova qilinishi mumkin).

6. BKOning qo‘shimcha varag‘ida uchtadan kam tovar deklaratsiyalanayotgan bo‘lsa, to‘ldirilmagan qismidagi “tovarning nomi” grafasida diagonal chiziq tortiladi.

7. BKO bojxona to‘lovlarini to‘lovchi shaxs taqdim qilgan hujjatlardagi ma’lumotlar asosida bojxona xodimi tomonidan elektron tarzda ro‘yxatga olinib rasmiylashtiriladi va ikki nusxada chop etiladi hamda bojxona xodimining shaxsiy muhri va imzosi bilan tasdiqlanadi. BKOning birinchi nusxasi unga ilova qilingan hujjatlar bilan birga BKO rasmiylashtirilgan bojxona organida saqlanadi, ikkinchi nusxasi bojxona to‘lovlarini to‘lagan shaxsga topshiriladi (yuboriladi).

Bojxona xodimining elektron raqamli imzosi bilan tasdiqlangan BKOlarga hamda soddalashtirilgan shaldagi BKOlarga bojxona xodimi tomonidan muhr va imzo qo‘yilishi talab etilmaydi.

BKO bojxona to‘lovlarini to‘lovchi shaxs, ya’ni deklarant hamda bojxona brokeri (shu jumladan, bojxona rasmiylashtiruvi bo‘yicha mutaxassis) tomonidan Bojxona qo‘mitasining rasmiy saytida shaxsiy kabinet orqali elektron tarzda shakllantirilgan holda bojxona organlariga taqdim etilishi mumkin.

8. BKO asosida tovarlarning bojxona rasmiylashtiruvi bojxona organlarining axborot tizimidagi to‘lovchining shaxsiy hisobvarag‘i bo‘yicha bojxona to‘lovlari to‘langanligi to‘g‘risidagi xizmat ko‘rsatuvchi banklar (g‘aznachiliklar) tomonidan taqdim etiladigan ma’lumotlar mavjud bo‘lgan taqdirda amalga oshiriladi. Bojxona to‘lovlari bojxona postidagi bank kassasiga to‘langan taqdirda bojxona to‘lovlari to‘langanligini tasdiqlovchi hujjat bojxona xodimiga taqdim qilingandan so‘ng BKOni rasmiylashtirish amalga oshiriladi.

9. BKO rasmiylashtirilgan paytdan boshlab yuridik ahamiyatga molik faktlardan dalolat beruvchi hujjatga aylanadi.

10. Bojxona xodimi tomonidan grafalarning to‘ldirilishi:

Grafaning birinchi bo‘lmasida agar bojxona to‘lovlarini to‘lovchi shaxs:

jismoniy shaxs (shu jumladan yuridik shaxs tashkil etmasdan tadbirkorlik faoliyatini amalga oshirayotgan jismoniy shaxslar) bo‘lsa — “J”;

yuridik shaxs, shu jumladan doimiy muassasa bo‘lsa — “Yu” ko‘rsatiladi.

Grafaning ikkinchi bo‘lmasida:

bojxona hududiga olib kirilayotgan tovarlarga nisbatan — “IM”;

bojxona hududidan olib chiqilayotgan tovarlarga nisbatan — “EK”;

bojxona hududi orqali tranzit olib o‘tilayotgan tovarlarga nisbatan — “TR”.

Grafaning uchinchi bo‘lmasida:

qo‘l yukida yoki kuzatib borilayotgan bagajlarda olib o‘tilayotgan tovarlarga nisbatan — “KB”;

xalqaro pochta va kuryerlik jo‘natmalarida yuborilayotgan tovarlarga nisbatan — “XP”;

jismoniy shaxslarning manziliga kelib tushgan notijorat maqsadlardagi tovarlarga nisbatan — “MT” ko‘rsatiladi.

Grafaning birinchi bo‘lmasida varaqning tartib raqami, ikkinchi bo‘lmasida taqdim etilayotgan BKO varaqlarining umumiy soni (asosiy va qo‘shimcha varaqlari yig‘indisi) ko‘rsatiladi.

Masalan, agar BKO ikkita qo‘shimcha varaqlarga ega bo‘lsa BKOning asosiy varag‘ida “1/3”; birinchi qo‘shimcha varag‘ida “2/3”; ikkinchi qo‘shimcha varag‘ida esa “3/3” ko‘rsatiladi. Agar BKO qo‘shimcha varaqlarga ega bo‘lmasa “1/1” ko‘rsatiladi.

BKO ro‘yxat raqami quyidagi bo‘lmalarda ko‘rsatiladi:

birinchi bo‘lmada Bojxona yuk deklaratsiyasini to‘ldirish tartibi to‘g‘risidagi yo‘riqnomaning (bundan buyon matnda Yo‘riqnoma deb yuritiladi) (ro‘yxat raqami 2773, 2016-yil 6-aprel) 4-ilovasiga muvofiq BKOni rasmiylashtirishni amalga oshiradigan bojxona postining beshta raqamli kodi;

ikkinchi bo‘lmada BKO rasmiylashtirilgan kun, oy, yil;

uchinchi bo‘lmada dastur tomonidan avtomatik tarzda beriladigan tartib raqam ko‘rsatiladi.

Masalan: 27001/01.01.2016/0000001.

Grafaning birinchi qismida bojxona to‘lovlarini to‘lovchi shaxs to‘g‘risidagi ma’lumot ko‘rsatiladi.

Agarda to‘lovchi jismoniy shaxs bo‘lsa, u holda grafada uning familiyasi, ismi, otasining ismi, doimiy ro‘yxatdan o‘tgan manzili, shaxsni tasdiqlovchi hujjat haqidagi ma’lumotlar ko‘rsatiladi.

Agarda to‘lovchi yuridik shaxs bo‘lsa, uning nomi va joylashgan joyi (yuridik manzili) ko‘rsatiladi.

Grafaning ikkinchi qismida:

a) to‘lovchining STIRi ko‘rsatiladi. Agar to‘lovchining STIRi bo‘lmasa 999999991 raqami ko‘rsatiladi, bundan yuridik shaxs va yuridik shaxs tashkil etmasdan tadbirkorlik faoliyatini amalga oshirayotgan jismoniy shaxslar mustasno;

b) to‘lovni qabul qilib olgan bankning MFOsi/bankning to‘liq nomi;

v) to‘lovchining O‘zbekiston Respublikasi milliy valyutasidagi hisobvarag‘i raqami ko‘rsatiladi. Bunda bojxona to‘lovlari to‘lovchi jismoniy shaxs bo‘lsa, ushbu ustun to‘ldirilmaydi.

Deklaratsiyalanayotgan tovarlarning AQSh dollaridagi umumiy bojxona qiymati ko‘rsatiladi. Bunda tovarlarning umumiy bojxona qiymati bir nechta tovarlarning bojxona qiymatlari yig‘indisidan tashkil topadi.

O‘zbekiston Respublikasi Markaziy banki tomonidan belgilangan, BKO rasmiylashtirilgan kundagi AQSh dollarining O‘zbekiston Respublikasi milliy valyutasiga nisbatan kursi ko‘rsatiladi.

Grafada deklaratsiyalanayotgan tovarning O‘zbekiston Respublikasi tashqi iqtisodiy faoliyatining Tovar nomenklaturasiga (bundan buyon matnda TIF TN deb yuritiladi) muvofiq to‘liq kodi ko‘rsatiladi. Ushbu kod bo‘sh joysiz (probelsiz) va boshqa ajratuvchi belgilarsiz yoziladi.

Grafada deklaratsiyalanayotgan tovarning kilogrammdagi brutto og‘irligi ko‘rsatiladi. Bunda tovarning brutto og‘irligiga uning barcha turdagi o‘ramlari bilan birgalikdagi og‘irligi kiradi.

Agar tovarning umumiy og‘irligi bir kilogrammdan kam bo‘lsa, brutto og‘irligi verguldan keyingi uch belgigacha aniqlikda ko‘rsatiladi.

Grafada deklaratsiyalanayotgan tovarning TIF TNda keltirilgan O‘lchov birliklari jadvaliga muvofiq tovarning miqdori ko‘rsatiladi.

Grafada deklaratsiyalanayotgan tovarning kilogrammdagi netto og‘irligi ko‘rsatiladi. Bunda tovarning netto og‘irligiga uning faqat birlamchi qadog‘ini hisobga olgan holdagi og‘irligi, ya’ni tovarning iste’mol xususiyatlaridan kelib chiqqan holda shunday qadoqda chakana savdoga chiqarilgan va (yoki) tovarni sotishda uning saqlanishini ta’minlaydigan birlamchi qadoqni tovarning iste’mol xususiyatlarini buzmagan holda, tovarni iste’mol qilgunga qadar undan ajratib bo‘lmaydigan qismi bilan birgalikdagi og‘irligi kiradi.

Agar tovarning umumiy og‘irligi bir kilogrammdan kam bo‘lsa, netto og‘irligi verguldan keyingi uch belgigacha aniqlikda ko‘rsatiladi.

Grafada deklaratsiyalanayotgan tovar haqida ma’lumotlar, ya’ni tovarning nomi (savdo, tijorat yoki boshqa an’anaviy nomi), tovar belgilari, markalari, modellari, boshqa texnik va tijorat tavsiflari to‘g‘risidagi ma’lumotlar ko‘rsatiladi.

Agarda BKO tovarlarni bojxona rasmiylashtiruvi bilan bog‘liq bo‘lmagan hollarda qo‘llanilsa, ushbu grafada holat aks ettiriladi.

Masalan, avtotransport vositasini bojxona kuzatuviga olganlik uchun bojxona yig‘imlarini undirish maqsadida BKO to‘ldirilsa, unda avtotransport vositasi to‘g‘risidagi ma’lumot va uning soni ko‘rsatiladi.

Grafada deklaratsiyalanayotgan tovarning tartib raqami ko‘rsatiladi. Bitta turdagi tovar deklaratsiyalanayotgan bo‘lsa, grafada “1” raqami ko‘rsatiladi. Bittadan ortiq turdagi tovarlar deklaratsiyalangan bo‘lsa raqamlar ketma-ketlikda ko‘rsatiladi, ya’ni 1,2,3...100.

Grafada deklaratsiyalanayotgan tovarning AQSh dollaridagi bojxona qiymati ko‘rsatiladi. Bunda tovarning bojxona qiymati O‘zbekiston Respublikasi Bojxona kodeksining 164-moddasi va 169-moddasining beshinchi qismi talablariga muvofiq bojxona xodimi tomonidan aniqlanadi.

Grafada Yo‘riqnomaning 5-ilovasiga muvofiq tovarlar jo‘natilgan mamlakatning qisqa nomi ko‘rsatiladi.

Grafada Yo‘riqnomaning 5-ilovasiga muvofiq tovarlar jo‘natilgan mamlakatning raqamli kodi ko‘rsatiladi.

Grafada Yo‘riqnomaning 5-ilovasiga muvofiq tovar kelib chiqish mamlakatining qisqa nomi ko‘rsatiladi.

Agarda BKOni to‘ldirishda tovarning kelib chiqish mamlakati noma’lum bo‘lsa, grafada “noma’lum” deb ko‘rsatiladi.

Grafada Yo‘riqnomaning 5-ilovasiga muvofiq kelib chiqish mamlakatining raqamli kodi ko‘rsatiladi.

Agarda BKOni to‘ldirishda tovarning kelib chiqish mamlakati noma’lum bo‘lsa, “000” kodi qo‘yiladi.

Agar tovarni kelib chiqish sertifikatida Yevropa ittifoqining aniq mamlakati ko‘rsatilmagan bo‘lib, tovarning kelib chiqish mamlakati sifatida Yevropa ittifoqi ko‘rsatilgan bo‘lsa, lotin harflari bilan ikki harfdan iborat “EU” kodi qo‘yiladi.

Grafada BKO to‘ldirishga asos bo‘ladigan hujjatlar:

a) cheklar, kvitansiyalar, hisobvaraq-faktura (invoys) Umumjahon pochta ittifoqining hujjatlarida nazarda tutilgan hujjatlar va boshqa tijorat hujjatlari (masalan, INV № 005 05.01.2016-y.);

b) tovarlarni bojxona hududiga olib kiriladigan joygacha yetkazib berish xarajatlarini tasdiqlovchi hujjatlar;

v) boshqa hujjatlar (tovarning kelib chiqish sertifikati raqami va sanasi, shaxs tomonidan ma’lum qilingan tovarlarning qiymati bo‘yicha ma’lumoti);

g) deklaratsiyalanayotgan tovarga normativ-huquqiy hujjatlarda nazarda tutilgan holatlarda, boshqa vakolatli organlar tomonidan taqdim etiladigan ruxsatnomalar, xulosalar va boshqa hujjatlarning ro‘yxat raqami va berilgan sanasi (masalan, SST № UZ.SMT.01.065.1783700, 15.10.2015-y., FTSS № 431771, 04.11.2015-y.).

Grafada bojxona to‘lovlari summasini hisoblash BKO asosiy varag‘i va qo‘shimcha varaqlarining 11-grafalarida ko‘rsatilgan har bir tovar bo‘yicha alohida amalga oshiriladi, bundan BKOning asosiy varag‘ida ko‘rsatiladigan bojxona rasmiylashtiruvi uchun undiriladigan yig‘imlar mustasno.

Grafaning:

“To‘lov turi” ustunida Yo‘riqnomaning 13-ilovasiga muvofiq bojxona to‘lov turining kodi ko‘rsatiladi;

“Hisoblash asosi” ustunida bojxona to‘lovini hisoblashning asosi ko‘rsatiladi. Bunda hisoblash asosi O‘zbekiston Respublikasi milliy valyutasida ko‘rsatiladi;

“Stavka” ustunida bojxona to‘lovi summasini hisoblashda qo‘llaniladigan bojxona to‘lovlari stavkasining belgilangan miqdori ko‘rsatiladi;

“Summa” ustunida bojxona to‘lovining O‘zbekiston Respublikasi milliy valyutasi so‘mda hisoblangan summasi ko‘rsatiladi;

“To‘lov usuli” ustunida to‘langan bojxona to‘lovlari qay tarzda to‘langanligi ko‘rsatilgan holda ikki belgili harfli kod bilan ko‘rsatiladi:

“BN” — bank orqali naqd pulsiz hisob-kitob;

“KT” — bojxona to‘lovlari summasini naqd pul bilan to‘lash.

“Hisob-kitob tafsiloti” ustunida BKOning asosiy va qo‘shimcha varaqlari bo‘yicha to‘lov kodi va undiriladigan umumiy bojxona to‘lovlari summasi turi bo‘yicha hamda ularning yig‘indisi, ya’ni to‘lanadigan bojxona to‘lovlari umumiy summasi “Jami” degan yozuvdan keyin ko‘rsatiladi.

Qog‘oz shakldagi BKO bojxona xodimi tomonidan uning imzosi, shaxsiy raqamli muhri, elektron shakldagi BKO esa, bojxona xodimining elektron raqamli imzosi bilan tasdiqlanadi.

11. To‘lov qabul qiluvchi va to‘lovchi tomonidan grafalarning tasdiqlanishi:

Bojxona to‘lovlari bojxona postidagi bank kassasiga to‘langan taqdirda grafada bank kassasi mas’ul xodimining familiyasi, ismi, otasining ismi ko‘rsatiladi va uning imzosi hamda bank kassasi muhri bilan tasdiqlanadi.

Bojxona to‘lovlari bojxona postidagi bank kassasiga to‘lanmagan taqdirda grafa to‘ldirilmaydi.

Grafa bojxona to‘lovlarini to‘lovchi jismoniy shaxsning hamda yuridik shaxs vakilining imzosi bilan tasdiqlanadi.

13. Bojxona xodimi tomonidan grafalarning to‘ldirilishi:

Grafada BKOning qo‘shimcha varag‘i tartib raqami ko‘rsatiladi.

Masalan, BKOga ikkita qo‘shimcha varaq to‘ldirilsa, birinchi qo‘shimcha varaqda “2/3”; ikkinchi qo‘shimcha varaqda esa “3/3” ko‘rsatiladi.

BKO asosiy varag‘ining 3-grafasida ko‘rsatilgan ro‘yxat raqami ko‘rsatiladi.

14. Bojxona xodimi tomonidan BKO qo‘shimcha varag‘i 7 — 13, 17 hamda 19-grafasining “To‘lov turi”, “Hisoblash asosi”, “Stavka”, “Summa”, “To‘lov usuli” ustunlari BKO asosiy varag‘i 7 — 13, 17 hamda 19-grafasining “To‘lov turi”, “Hisoblash asosi”, “Stavka”, “Summa”, “To‘lov usuli” ustunlarini to‘ldirish tartibiga muvofiq to‘ldiriladi.

14¹. Bojxona xodimi tomonidan bojxona rasmiylashtiruvi bilan bog‘liq bo‘lmagan hollarda soddalashtirilgan shakldagi BKO to‘ldiriladi.

14². Soddalashtirilgan shakldagi BKOning 2-grafasi BKO asosiy varag‘i 4-grafasiga, soddalashtirilgan shakldagi BKOning 4 va 5-grafalari BKO asosiy varag‘i 19 va 20-grafalariga muvofiq to‘ldiriladi. Bojxona to‘lovlarini to‘lovchi shaxs tomonidan soddalashtirilgan shakldagi BKOning 6-grafasi BKO asosiy varag‘i 22-grafasiga muvofiq to‘ldiriladi.

Bojxona yig‘imlari Bojxona qo‘mitasining rasmiy saytida shaxsiy kabinet orqali elektron tarzda shakllantirilgan BKO asosida undirilganda soddalashtirilgan shakldagi BKOning 6-grafasi elektron raqamli imzo bilan tasdiqlanadi.

14³. Bojxona xodimi tomonidan grafalarning to‘ldirilishi:

1) 1-grafa. “BKO ro‘yxat raqami”.

BKO ro‘yxat raqami quyidagi bo‘lmalarda ko‘rsatiladi:

birinchi bo‘lmada:

a) bojxona posti tomonidan BKO rasmiylashtirilishida Yo‘riqnomaning 4-ilovasiga muvofiq bojxona postining kodi;

b) bojxona postidan boshqa tarkibiy tuzilmalar tomonidan amalga oshirilgan harakatlar bo‘yicha dastur tomonidan avtomatik tarzda qo‘yiladigan kod;

ikkinchi bo‘lmada BKO rasmiylashtirilgan kun, oy, yil;

uchinchi bo‘lmada dastur tomonidan avtomatik tarzda beriladigan tartib raqam ko‘rsatiladi.

Masalan: Bojxona posti tomonidan rasmiylashtirilgan hollarda — 27001/01.01.2022/0000001.

Bojxona qo‘mitasi va uning hududiy boshqarmalari hamda “Toshkent-AERO” ixtisoslashtirilgan bojxona kompleksining mas’ul tarkibiy tuzilmalari tomonidan rasmiylashtirilgan hollarda — 1727/01.01.2022/0000001.

2) 3-grafa. “Taqdim etiladigan hujjatlar/qo‘shimcha ma’lumotlar”.

Grafada BKO to‘ldirishga asos bo‘ladigan hujjatlar:

a) dastlabki qarorni olish uchun taqdim etilgan ariza raqami va sanasi;

b) egasi bojxona organi bo‘lgan bojxona omborida yoki chegara bojxona postida vaqtincha tovarlarni saqlash uchun asos bo‘lgan hujjat raqami va sanasi;

v) transport vositasini bojxona kuzatuvini amalga oshirish yoki bojxona nazorati ostida tashilayotgan tovar va transport vositalari uchun belgilangan yetkazib berish muddati o‘tkazib yuborilgan holatda tranzit deklaratsiyasi raqami va sanasi (masalan, TR № 27001/01.01.2022/0000105);

g) avtotransport vositasini bir kalendar yil davomida to‘qson kalendar kundan ortiq muddatga vaqtinchalik olib kirganlikda transport vositasini qaytarib olib chiqish majburiyatnomasi raqami va sanasi;

d) qonunchilikda nazarda tutilgan boshqa yig‘imlarni undirish uchun asos bo‘lgan hujjat raqami va sanasi.

15. Rasmiylashtirilgan BKOning bir nusxasi va unga ilova qilingan hujjatlar, shu jumladan uning dasturdagi elektron shakli tovarlar bojxona nazorati ostida turgan tovar maqomini yo‘qotgan yoki bojxona organi tomonidan mazkur Qoidalarda belgilangan xatti-harakat va tartib-taomillar amalga oshirilgan yildan keyingi yildan e’tiboran bevosita BKO rasmiylashtirilgan bojxona organida uch yil davomida saqlanadi.

16. Mazkur Qoidalar talablarini buzilishida aybdor bo‘lgan shaxslar qonunchilik hujjatlarida belgilangan tartibda javobgarlikka tortiladi.