“Ichki ishlar organlari toʻgʻrisida”gi Oʻzbekiston Respublikasi Qonuniga muvofiq Oʻzbekiston Respublikasi Adliya vazirligi va Ichki ishlar vazirligi qaror qiladi:

1. Oʻzbekiston Respublikasi Adliya vazirligi va Ichki ishlar vazirligining 2007-yil 12-yanvardagi 2/1, 2-son qarori (roʻyxat raqami 1654, 2007-yil 15-yanvar) (Oʻzbekiston Respublikasi qonun hujjatlari toʻplami, 2007-y., 3-son, 30-modda) bilan tasdiqlangan Sudga kelishdan bosh tortgan shaxslarni majburiy keltirish boʻyicha sud topshiriqlarini ijro etish tartibi toʻgʻrisidagi yoʻriqnomaning 12-bandi quyidagi tahrirda bayon etilsin:

“12. Qonuniy talablarga qarshilik koʻrsatilganda yoki ashaddiy boʻysunmaslik holatlarida ichki ishlar organlari xodimlari “Ichki ishlar organlari toʻgʻrisida”gi Oʻzbekiston Respublikasi Qonuniga muvofiq jismoniy kuch, maxsus vosita va oʻqotar qurolni qoʻllash huquqiga ega. Mazkur holda bayonnoma tuziladi va unda huquqbuzarlikning xususiyati, vaqti va joyi hamda shaxsga nisbatan qoʻllanilgan choralar koʻrsatiladi. Bayonnoma qonunda nazarda tutilgan choralar qoʻllanilganligi toʻgʻrisidagi bildirgi bilan birga ichki ishlar organi boʻlim boshligʻiga taqdim etiladi. Bu haqda ajrimi boʻyicha majburiy keltirish amalga oshirilgan sudya xabardor qilinadi.

Jismoniy kuch ishlatilganligi va maxsus vositalar qoʻllanilganligi natijasida jismoniy yoxud yuridik shaxslarning hayotiga, sogʻligʻiga yoki mol-mulkiga zarar yetkazilgan har bir holat haqida, shuningdek oʻqotar qurol qoʻllanilgan barcha hollar toʻgʻrisida prokurorga darhol xabar beriladi”.

2. Mazkur qaror Oʻzbekiston Respublikasi Oliy sudi bilan kelishilgan.

3. Mazkur qaror 2017-yil 17-martdan kuchga kiradi.