|
Hujjat kuchini yo‘qotgan 14.08.2017
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI VAZIRLAR MAHKAMASI HUZURIDAGI KATTA VA ALOHIDA MUHIM SUV XOʻJALIGI OBYEKTLARINING TEXNIK HOLATINI HAMDA BEXATAR IShLAShINI NAZORAT QILISh DAVLAT INSPEKSIYASI (“DAVSUVXOʻJALIKNAZORAT” INSPEKSIYASI) FAOLIYATINI TAKOMILLAShTIRISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2017-yil 9-avgustdagi 606-sonli “Oʻzbekiston Respublikasi Favqulodda vaziyatlar vazirligi, Oʻzbekiston Respublikasi Favqulodda vaziyatlar vazirligi huzuridagi Gidrometeorologiya xizmati markazi va Oʻzbekiston Respublikasi Favqulodda vaziyatlar vazirligi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi toʻgʻrisidagi nizomlarni tasdiqlash haqida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF–3358-son Farmoniga muvofiq, shuningdek katta va alohida muhim suv xoʻjaligi obyektlarining texnik holati hamda bexatar ishlashi ustidan nazoratni kuchaytirish maqsadida Vazirlar Mahkamasi qaror qiladi:
1. Quyidagilar:
katta va alohida muhim suv xoʻjaligi obyektlari texnik holatining ishonchliligi hamda ularning bexatar ishlashi taʼminlanishi;
katta va alohida muhim suv xoʻjaligi obyektlari loyihalashtirilishi, qurilishi, ulardan foydalanilishi, ularning rekonstruksiya qilinishi va taʼmirlanishi, shu jumladan loyihalar ekspertizasi tashkil etilishi, qurilish sifatining va foydalanishga qabul qilib olishning nazorat qilinishi;
katta va alohida muhim suv xoʻjaligi obyektlarining ishonchli qoʻriqlanishi tashkil etilishi ustidan davlat nazoratini amalga oshirish Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi) faoliyatining asosiy vazifalari etib belgilansin.
2. Quyidagilar:
Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi) toʻgʻrisidagi nizom 3-ilovaga muvofiq tasdiqlansin.
3. “Davsuvxoʻjaliknazorat” inspeksiyasi markaziy apparati xodimlarining cheklangan umumiy soni 17 nafar, shu jumladan boshqaruv xodimlari soni 12 nafar etib belgilansin.
“Davsuvxoʻjaliknazorat” inspeksiyasi boshligʻiga, zaruriyat boʻlganda, xodimlarning belgilangan cheklangan umumiy soni doirasida “Davsuvxoʻjaliknazorat” inspeksiyasi markaziy apparati tuzilmasiga oʻzgartirishlar kiritish huquqi berilsin.
4. Quyidagilar:
Vazirlar Mahkamasining “Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi)ni tashkil etish va uning faoliyati masalalari toʻgʻrisida” 1999-yil 30-martdagi 143-son qarori 1-bandining uchinchi, toʻrtinchi xatboshi, qarorning 2-bandi va qarorga 2 va 3-ilovalar;
Vazirlar Mahkamasining “Gidrotexnika inshootlarining xavfsizligi toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 1999-yil 16-noyabrdagi 499-son qaroriga 3-ilovaning 3-bandi (Oʻzbekiston Respublikasi QT, 1999-y., 11-son, 66-modda) oʻz kuchini yoʻqotgan deb hisoblansin.
5. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2004-yil 20-aprel,
186-son
Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi)ning tashkiliy tuzilmasi
Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi) markaziy apparatining tuzilmasi
Vazirlar Mahkamasining
2004-yil 20-apreldagi 186-son qaroriga
3-ILOVA
2004-yil 20-apreldagi 186-son qaroriga
3-ILOVA
Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (“Davsuvxoʻjaliknazorat” inspeksiyasi) toʻgʻrisida
NIZOM
I. Umumiy qoidalar
1. Oʻzbekiston Respublikasi Vazirlar Mahkamasi huzuridagi Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish davlat inspeksiyasi (keyingi oʻrinlarda “Davsuvxoʻjaliknazorat” inspeksiyasi deb ataladi) gidrotexnika inshootlari xavfsizligi ustidan davlat nazorati sohasidagi maxsus vakolatli davlat boshqaruv organi hisoblanadi.
“Davsuvxoʻjaliknazorat” inspeksiyasi oʻz faoliyatida Oʻzbekiston Respublikasi Vazirlar Mahkamasiga hisob beradi.
2. “Davsuvxoʻjaliknazorat” inspeksiyasi tizimiga mahalliy davlat boshqaruv organlaridan mustaqil boʻlgan va bevosita “Davsuvxoʻjaliknazorat” inspeksiyasiga hisob beradigan hududiy inspektorlar kiradi.
3. “Davsuvxoʻjaliknazorat” inspeksiyasi oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.
4. “Davsuvxoʻjaliknazorat” inspeksiyasi oʻz faoliyatini davlat boshqaruvining boshqa organlari, huquqni muhofaza qilish organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.
5. “Davsuvxoʻjaliknazorat” inspeksiyasi va uning hududiy boʻlinmalarining moddiy-texnik taʼminoti, shuningdek “Davsuvxoʻjaliknazorat” inspeksiyasi tizimi xodimlari mehnatiga haq toʻlash “Davsuvxoʻjaliknazorat” inspeksiyasiga budjetdan ajratiladigan mablagʻlar doirasida Oʻzbekiston Respublikasi Davlat budjeti mablagʻlari hisobiga amalga oshiriladi.
(5-band Oʻzbekiston Respublikasi Vazirlar Mahkamasining 2016-yil 26-apreldagi 122-sonli qarori tahririda — OʻR QHT, 2016-y., 17-son, 176-modda)
6. “Davsuvxoʻjaliknazorat” inspeksiyasi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.
II. “Davsuvxoʻjaliknazorat” inspeksiyasining vazifalari va funksiyalari
7. Quyidagilar:
katta va alohida muhim suv xoʻjaligi obyektlari texnik holatining ishonchliligi va ularning bexatar ishlashi taʼminlanishi;
katta va alohida muhim suv xoʻjaligi obyektlarining loyihalashtirilishi, qurilishi, ulardan foydalanilishi, ularning rekonstruksiya qilinishi va taʼmirlanishi, shu jumladan loyihalar ekspertizasi tashkil etilishi, qurilish sifatining va foydalanishga qabul qilib olishning nazorat qilinishi;
katta va alohida muhim suv xoʻjaligi obyektlarining ishonchli qoʻriqlanishi tashkil etilishi ustidan davlat nazoratini amalga oshirish “Davsuvxoʻjaliknazorat” inspeksiyasining asosiy vazifalari hisoblanadi.
8. “Davsuvxoʻjaliknazorat” inspeksiyasi oʻziga yuklangan vazifalarning bajarilishi uchun quyidagi funksiyalarni amalga oshiradi:
tegishli vazirliklar va idoralar bilan birgalikda kapitalligi I, II, III klass boʻlgan gidrotexnika inshootlarining texnik holati hamda bexatar ishlashi bilan bogʻliq hodisalarning oldini olishga doir takliflarni ishlab chiqadi;
manfaatdor vazirliklar va idoralar bilan birgalikda gidrotexnika inshootlari texnik holatining ishonchliligini hamda bexatar ishlashini ekspertizadan oʻtkazadi;
gidrotexnika inshootlarining texnik va xavfsizlik holatining ishonchliligi bilan bogʻliq idoralararo va davlatlararo komissiyalar ishida qatnashadi;
gidrotexnika inshootlarining xavfsizlik qoidalari va mezonlari ishlab chiqilishi va tasdiqlanishini tashkil etadi;
gidrotexnika inshootlarini joylashtirishda, gidrotexnika inshootlarini loyihalash uchun topshiriqlarni kelishishda, ularni qurish va rekonstruksiya qilish loyihalarini kelishishda, gidrotexnika inshootlarini qurish sifatini nazorat qilishda, ularni foydalanishga qabul qilishda, shuningdek gidrotexnika inshootlaridan foydalanish qoidalarini kelishishda qatnashadi;
xoʻjalik faoliyatini yoki boshqa faoliyatni amalga oshirish uchun gidrotexnika inshootlari hududlari, daryolar oʻzanlari va ularga tutash toʻgʻonning quyi va yuqori hududlaridan (suv muhofazasi zonalarida yer uchastkalari berish bundan mustasno) foydalanishni kelishadi;
gidrotexnika inshootlarining xavfsizligi sohasida normativ-huquqiy hujjatlar loyihalarini ishlab chiqishda qatnashadi;
gidrotexnika inshootlarining holatini va ular holatining xavfsizlik deklaratsiyalariga muvofiqligini tekshirishni tashkil etadi;
gidrotexnika inshootlarining xavfsizlik deklaratsiyalarini belgilangan tartibda tasdiqlaydi;
gidrotexnika inshootlarining texnik holatini naturada kuzatish va diagnostikani amalga oshiradi;
gidrotexnika inshootlarining kadastrini yuritadi;
vakolatli organlarga suv muhofazasi zonalarini, suv omborlari, daryolar, kanallar va kollektorlarning qirgʻoqboʻyi polosalarini belgilash ishlarini tashkil etishda koʻmaklashadi, ushbu zonalar va polosalarga qoʻyiladigan talablarning bajarilishi ustidan nazoratni amalga oshiradi;
respublikaning tegishli vazirliklari va idoralari bilan birgalikda davlatlararo va chegaraboʻyi suv xoʻjaligi obyektlaridan foydalanish masalalarini chegaradosh davlatlar bilan tartibga solishda qatnashadi.
9. “Davsuvxoʻjaliknazorat” inspeksiyasi oʻziga yuklangan vazifalar va funksiyalarni bevosita, shuningdek oʻziga boʻysunuvchi hududiy inspektorlar orqali hal qiladi.
III. “Davsuvxoʻjaliknazorat” inspeksiyasining huquqlari va javobgarligi
10. “Davsuvxoʻjaliknazorat” inspeksiyasi oʻziga yuklangan vazifalar va funksiyalarni bajarish uchun quyidagi huquqlarga ega:
gidrotexnika inshootlariga belgilangan tartibda kirish, gidrotexnika inshootlarining xavfsizligi va texnik nazoratni tashkil etish masalalariga doir materiallar bilan tanishib chiqish;
oʻz vakolati doirasida va qonun hujjatlarida belgilangan tartibda gidrotexnika inshootlaridan foydalanilishi, ularning texnik va xavfsizlik holati ustidan nazoratni amalga oshirish uchun vazirliklar, idoralar, xoʻjalik birlashmalari, korxonalar, muassasalar va tashkilotlar ishini tekshirish;
gidrotexnika inshootlari texnik holatining ishonchliligi, ulardan foydalanish va ularning xavfsizligini taʼminlash bilan bogʻliq masalalar boʻyicha vazirliklar va idoralarning, shuningdek, korxonalar va tashkilotlar rahbarlarining maʼruzalarini, axborotlarini va xabarlarini eshitish;
tegishli vazirliklar, idoralar, korxonalar va tashkilotlardan gidrotexnika inshootlari texnik holatining ishonchliligi, ulardan foydalanish va ularning xavfsizligini taʼminlash bilan bogʻliq masalalar boʻyicha meʼyoriy hujjatlar, tadbirlar rejalari, buyruqlar, yoʻriqnomalar, hujjatlar, maʼlumotlar va materiallarni talab qilish va olish, zaruriyat boʻlganda, respublikaning tegishli vazirliklari va idoralari mutaxassislarini jalb qilish;
gidrotexnika inshootlarining xavfsizligini taʼminlash toʻgʻrisida yozma koʻrsatmalar berish, shuningdek gidrotexnika inshootlari xavfsizligi normalari va qoidalari qoʻpol ravishda buzilgan hollarda xavfliligi yuqori boʻlgan obyektlar jumlasiga kiruvchi gidrotexnika inshootlarini loyihalashtirish, qurish va ulardan foydalanish boʻyicha faoliyatni amalga oshirish uchun berilgan litsenziyalarning amal qilishini toʻxtatib turish va toʻxtatish toʻgʻrisida takliflar kiritish;
suv xoʻjaligi obyektlaridan foydalanish yoxud daryolar oʻzanlari va ularga tutash toʻgʻonning quyi va yuqori hududlarida xoʻjalik faoliyatini va boshqa faoliyatni amalga oshirayotgan tashkilotlar faoliyatini, agar mazkur faoliyat gidrotexnika inshootlarining xavfsizligiga salbiy taʼsir koʻrsatishi mumkin boʻlsa, belgilangan tartibda taqiqlash yoki cheklash.
“Davsuvxoʻjaliknazorat” inspeksiyasi Oʻzbekiston Respublikasi qonun hujjatlariga muvofiq boshqa huquqlarga ham ega boʻlishi mumkin.
11. “Davsuvxoʻjaliknazorat” inspeksiyasi oʻziga yuklangan vazifalarning samarali bajarilishi uchun javob beradi.
12. “Davsuvxoʻjaliknazorat” inspeksiyasining mansabdor shaxslari va uning hududiy inspektorlari oʻz xizmat vazifalarini zarur darajada bajarmaganliklari uchun qonun hujjatlarida belgilangan tartibda javob beradilar.
IV. “Davsuvxoʻjaliknazorat” inspeksiyasi faoliyatini tashkil etish
Oldingi tahrirga qarang.
13. “Davsuvxoʻjaliknazorat” inspeksiyasiga belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan boshliq boshchilik qiladi.
(13-bandning birinchi xatboshi Oʻzbekiston Respublikasi Vazirlar Mahkamasining 2010-yil 5-iyundagi 108-sonli qarori tahririda — OʻR QHT, 2010-y., 23-son, 183-modda)
“Davsuvxoʻjaliknazorat” inspeksiyasi xodimlari maqomiga va mehnatga haq toʻlash shartlari boʻyicha:
boshliq — vazirga;
boshqaruv apparati katta mutaxassislari — vazirliklarning mustaqil boshqarmasi boshliqlariga;
mutaxassislar — vazirliklarning boʻlim boshliqlariga;
hududiy inspektorlar — viloyat hokimliklarining tegishli mustaqil boʻlimlari rahbarlariga tenglashtiriladi.
14. “Davsuvxoʻjaliknazorat” inspeksiyasi boshligʻi:
“Davsuvxoʻjaliknazorat” inspeksiyasi faoliyatiga yakka boshchilik asosida umumiy rahbarlik qiladi, “Davsuvxoʻjaliknazorat” inspeksiyasiga yuklangan vazifalar va funksiyalarning bajarilishi uchun shaxsan javob beradi;
“Davsuvxoʻjaliknazorat” inspeksiyasi markaziy apparati tuzilmasiga xodimlarning belgilangan umumiy soni doirasida oʻzgartirishlar kiritadi, shtat jadvalini, shuningdek “Davsuvxoʻjaliknazorat” inspeksiyasi markaziy apparati xarajatlari smetasini tasdiqlaydi;
“Davsuvxoʻjaliknazorat” inspeksiyasi markaziy apparati xodimlarini, hududiy inspektorlarni belgilangan tartibda lavozimga tayinlaydi va lavozimdan ozod qiladi.
Boshliq qonun hujjatlariga muvofiq boshqa vakolatlarni amalga oshiradi.
15. “Davsuvxoʻjaliknazorat” inspeksiyasida yirik gidrotexnika va boshqa muhandislik inshootlarini loyihalash, qurish va ulardan foydalanish sohasidagi yetakchi mutaxassislardan iborat Ekspert kengashi tuziladi.
“Davsuvxoʻjaliknazorat” inspeksiyasining boshligʻi lavozimiga koʻra Ekspert kengashining raisi hisoblanadi. Ekspert kengashining shaxsiy tarkibi Oʻzbekiston Respublikasi Vazirlar Mahkamasi bilan kelishiladi.
Ekspert kengashi gidrotexnika inshootlaridan bexatar foydalanish va ularning ishonchli ishlashining eng muhim masalalarini koʻrib chiqadi, gidrotexnika inshootlarining barqaror va bexatar ishlashi uchun ularni rekonstruksiya qilish va qayta jihozlash boʻyicha kechiktirib boʻlmaydigan ishlarni amalga oshirish yuzasidan tavsiyanomalar beradi.
Ekspert kengashining qarorlari, qoidaga koʻra, “Davsuvxoʻjaliknazorat” inspeksiyasi boshligʻining buyruqlari bilan amalga oshiriladi.
Ekspert kengashi majlislariga alohida vazirliklar va idoralar, korxonalar, muassasalar va tashkilotlarning manfaatlariga tegishli masalalarni hal qilish uchun ularning vakillari taklif etiladi.
16. “Davsuvxoʻjaliknazorat” inspeksiyasining inspektorlari gidrotexnika inshootlarining texnik holati va bexatar ishlashi ustidan nazorat oʻrnatish yuzasidan joylarda oʻz faoliyatini “Davsuvxoʻjaliknazorat” inspeksiyasi tomonidan tasdiqlangan tadbirlarga muvofiq amalga oshiradilar.
17. “Davsuvxoʻjaliknazorat” inspeksiyasini qayta tashkil etish va tugatish qonun hujjatlarida belgilangan tartibda amalga oshiriladi.
(Oʻzbekiston Respublikasi qonun hujjatlari toʻplami, 2004-y.,16-son, 185-modda; 2010-y., 23-son, 183-modda; 2016-y., 17-son, 176-modda)
