Bozor munosabatlari shakllanayotgan sharoitda bolali oilalarga davlat yoʻli bilan madad berishni kuchaytirish, yosh avlodni tarbiyalash muammolarini hal etishda ijtimoiy kafolatlarni taʼminlash va bolalarni har tomonlama kamol toptirish maqsadida:

1. 1994-yil 1-sentabrdan boshlab bolali oilalarga davlat ijtimoiy yordamining amaldagi tizimi oʻrniga quyidagi nafaqa turlaridan iborat yagona tizim joriy etilsin:

16 yoshgacha bolalari boʻlgan barcha oilalarga har oylik nafaqa;

bola tugʻilganda eng kam ish haqining ikki baravari miqdorida bir yoʻla beriladigan nafaqa;

2. Belgilab qoʻyilsinki, barcha oilalarga ulardagi bolalarning soniga qarab quyidagi miqdorlarda har oylik nafaqalar toʻlanadi:

bir bolali oilaga eng kam ish haqining 10 foizi;

ikki bolali oilaga eng kam ish haqining 20 foizi;

uch va toʻrt bolali oilaga eng kam ish haqining 40 foizi;

besh va undan ortiq bolali oilaga eng kam ish haqining 50 foizi.

3. Quyidagilar pul bilan taʼminlashning asosiy manbalari etib belgilansin:

16 yoshgacha bolalari boʻlgan barcha oilalarga har oylik nafaqalar uchun — respublika va mahalliy budjetlarning mablagʻlari;

bola tugʻilganda bir yoʻla beriladigan nafaqa uchun — Oʻzbekiston Respublikasi Davlat budjeti mablagʻlari;

bola ikki yoshga yetguncha uni parvarishlashga onalar uchun beriladigan har oylik nafaqalar:

ishlovchi onalar uchun — korxonalar, muassasalar va tashkilotlarning mablagʻlari;

ishlamaydigan onalar uchun — respublika va mahalliy budjetlarning mablagʻlari.

4. Qoraqalpogʻiston Respublikasi Vazirlar Kengashiga, viloyatlar va Toshkent shahri hokimliklariga, korxonalar va tashkilotlarga:

mavjud mablagʻlar doirasida bolali oilalarga beriladigan nafaqalarning belgilangan turlariga qoʻshimcha pul va qoʻshimcha imtiyozlar belgilash, ushbu maqsadlar uchun ijtimoiy jamgʻarma mablagʻlaridan toʻlaroq foydalanish;

jamoat, xayriya tashkilotlarining har xil ijtimoiy yordam koʻrsatishga oid faoliyatini har tomonlama qoʻllab-quvvatlash va ragʻbatlantirish, jamiyatda insonparvarlik, xayr-ehson va rahm-shavqat gʻoyalarini yoyishga koʻmaklashish tavsiya qilinsin.

5. Oʻzbekiston Respublikasi Vazirlar Mahkamasi bir hafta muddat ichida ushbu Farmonni roʻyobga chiqarishga doir qaror qabul qilinsin.