“Mahsulot taqsimotiga oid bitimlar toʻgʻrisida”gi Qonunning 17-moddasiga muvofiq va mahsulot taqsimotiga oid bitimlar doirasida xorijiy investordan mol-mulkning Oʻzbekiston Respublikasiga oʻtkazishning yagona tartibini belgilash maqsadida Vazirlar Mahkamasi qaror qiladi:

1. Maʼlumot uchun quyidagilar qabul qilinsin, yaʼni Oʻzbekiston Respublikasining qonun hujjatlariga hamda konlarni aniqlash, qidirish, neft va gaz xomashyosini qazib olishga nisbatan mahsulot taqsimotiga oid bitimlar (keyingi oʻrinlarda MTB deb yuritiladi) shartlariga muvofiq:

investor tomonidan yangi yaratilgan yoki sotib olingan, MTB boʻyicha ishlarni bajarish uchun foydalaniladigan mol-mulk, agar MTBda boshqacha qoida nazarda tutilgan boʻlmasa, investorning mulki hisoblanadi;

xorijiy investor MTBning amal qilish muddati davomida MTBni amalga oshirish boʻyicha vakolatli organning ruxsatisiz MTB doirasida yangi yaratilgan yoki sotib olingan mol-mulkni Oʻzbekiston Respublikasidan tashqariga olib chiqish, sotish, ayirboshlash yoki boshqa yoʻl bilan begonalashtirishga haqli emas;

MTB doirasida yangi yaratilgan yoki sotib olingan mol-mulkka egalik huquqi xorijiy investordan koʻrsatilgan mol-mulk qiymati toʻliq qoplangan kundan boshlab yoki MTB bekor qilingan kundan boshlab yoxud yoxud taraflar tomonidan kelishilgan boshqa kundan eʼtiboran MTBda nazarda tutilgan shartlar va tartibda Oʻzbekiston Respublikasiga ixtiyoriga oʻtadi;

MTBning amal qilish muddati davomida xorijiy investorga ushbu MTB boʻyicha ishlarni bajarish uchun bunday mol-mulkdan bepul asosda (tekinga) foydalanish mutlaq huquqi beriladi hamda xorijiy investor uning foydalanishidagi mol-mulkni saqlashga doir chiqimlar hamda uning tasodifan nobud boʻlishi yoki tasodifan buzilishi ehtimoli xavfini oʻz zimmasiga oladi;

xorijiy investor MTB bilan belgilangan tartibda MTB boʻyicha ishlarni davom ettirish uchun yakuniy balans egasi (foyda oluvchi) tomonidan unga berilgan mol-mulkni modernizatsiya va rekonstruksiya qilishga haqli.

2. Shunday tartib belgilansinki, unga koʻra:

investor tomonidan MTB doirasida yangi yaratilgan yoki sotib olingan mol-mulk (MTB bilan beriladigan mol-mulk) MTB tugatilganda, shu jumladan undan foydalanishning asoslangan zarurati boʻlmagan hollarda va boshqa sabablarga koʻra, xorijiy investor yoki MTBni amalga oshirish boʻyicha vakolatli organ tashabbusiga koʻra, beriladigan mol-mulkning qiymati toʻliq qoplangan taqdirda Oʻzbekiston Respublikasi Vazirlar Mahkamasining qarori asosida yakuniy foyda oluvchiga (benefitsiarga) oʻtkaziladi;

MTB bilan beriladigan mol-mulkning yakuniy foyda oluvchisini aniqlash yoki belgilangan tartibda tegishli mahalliy ijro etuvchi hokimiyat organlariga keyingi amalga oshirish uchun berish toʻgʻrisidagi qarorlar MTBni amalga oshirish boʻyicha vakolatli organning investor bilan birgalikda taqdim etilgan MTB bilan beriladigan mol-mulk va unga oid barcha zarur hujjatlar va maʼlumotlar roʻyxati asosida tayyorlangan Oʻzbekiston Respublikasi Davlat aktivlarini boshqarish agentligining taklifiga binoan Oʻzbekiston Respublikasi Vazirlar Mahkamasi tomonidan qabul qilinadi;

bojxona toʻlovlaridan ozod qilingan holda, MTB doirasida olib kirilayotgan mol-mulkdan u xorijiy investordan yakuniy foyda oluvchi timsolida Oʻzbekiston Respublikasining mulkiga berilgan taqdirda, bojxona toʻlovlari undirilmaydi;

yakuniy foyda oluvchi MTB doirasida yangi yaratilgan yoki sotib olingan mol-mulkning bir qismi boʻyicha mulk soligʻini toʻlashdan xorijiy investorga ushbu mol-mulkdan MTB boʻyicha ishlarni davom ettirish uchun foydalanishga mutlaq huquq berilgan muddatga ozod qilinadi. Bunda, MTBning amal qilish muddati davomida xorijiy investorda ushbu mol-mulk joylashgan yer uchastkalari uchun yer soligʻini toʻlash majburiyati saqlanib qoladi.

3. Mahsulot taqsimotiga oid bitimlar doirasida sotib olingan yoki yangi yaratilgan mol-mulkni xorijiy investor tomonidan oʻtkazish (berish) tartibi toʻgʻrisidagi Nizom ilovaga muvofiq tasdiqlansin.

4. MTBni amalga oshirish boʻyicha vakolatli organlar va Oʻzbekiston Respublikasi Davlat aktivlarini boshqarish agentligi tomonidan MTB doirasida yangi yaratilgan yoki sotib olingan mol-mulkni qabul qilish va topshirish tartibotlarini amalga oshirishda tasdiqlangan Nizom normalariga qatʼiy rioya etilsin.

5. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari G.I. Ibragimov zimmasiga yuklansin.

1. Mazkur Nizom xorijiy investor (keyingi oʻrinlarda investor deb yuritiladi) tomonidan konlarni aniqlash, qidirish, neft va gaz xomashyosini qazib olishga nisbatan mahsulot taqsimotiga oid bitimlar doirasida u tomonidan MTB boʻyicha ishlarni bajarish uchun foydalaniladigan yoki foydalanilgan yangi yaratilgan yoki sotib olingan mol-mulkka egalik huquqining Oʻzbekiston Respublikasiga oʻtishi va amalda Oʻzbekiston Respublikasiga oʻtishi tartibini belgilaydi.

2. MTB bilan mol-mulkga egalik huquqi investordan davlatga koʻrsatilgan mol-mulkning qiymati toʻliq qoplangan kundan boshlab yoki bitim bekor qilingan kundan boshlab yoxud taraflar tomonidan kelishilgan boshqa kundan eʼtiboran MTBda nazarda tutilgan shartlar va tartibda oʻtadi;

3. Investor MTBning amal qilish muddati davomida MTBni amalga oshirish boʻyicha vakolatli organning ruxsatisiz MTB doirasida yangi yaratilgan yoki sotib olingan mol-mulkni Oʻzbekiston Respublikasidan tashqariga olib chiqish, sotish, ayirboshlash yoki boshqa yoʻl bilan begonalashtirishga haqli emas.

4. Investor MTB doirasida yangi yaratilgan yoki sotib olingan mol-mulkni Oʻzbekiston Respublikasiga MTB amal qilish muddatining tugash sanasiga holat boʻyicha, shu jumladan uning amal qilish muddati tugagan, fors-major holatlari yuzaga kelgan, investor tomonidan MTB shartlarini jiddiy ravishda buzilishi holatlari boʻyicha, shu jumladan, MTB bekor qilish sanasida investorning qoplanmagan harajatlarni qoplash huquqini yoʻqotish holatlarida MTB bekor qilinishining barcha holatlarida oʻtkazishi shart.

5. Investor tomonidan MTB doirasida yangi yaratilgan yoki sotib olingan mol-mulk (MTB bilan beriladigan mol-mulk) MTB bekor qilinishining barcha holatlarida, shu jumladan undan foydalanishning asoslangan zarurati boʻlmagan hollarda va boshqa sabablarga koʻra, xorijiy investor yoki MTBni amalga oshirish boʻyicha vakolatli organ tashabbusiga koʻra, beriladigan mol-mulkning qiymati toʻliq qoplangan taqdirda Oʻzbekiston Respublikasi Vazirlar Mahkamasining qarori asosida yakuniy foyda oluvchiga oʻtkaziladi.

6. Mazkur Nizomda quyidagi asosiy tushunchalar foydalaniladi:

kontraktdan (shartnomadan) tashqari maydon — tegishli ishlab chiqish dasturlarida va (yoki) yillik ishchi dasturlarda nazarda tutilgan yer qaʼridan foydalanish bilan bogʻliq boʻlmagan (baholash, qidirish, konlarini ishlab chiqish, neft va gaz xomashyosini ajratish va qazib olish va boshqalar) neft va gaz operatsiyalarini yuritishni taʼminlash uchun investor yoki operatorga muddatli (vaqtincha) foydalanish uchun ajratilgan, shu jumladan, neft va gaz xomashyosini tayyorlash, yuklash va tashish obyektlarini joylashtirish maqsadlari hamda maʼmuriy ehtiyojlar uchun shartnoma (kontrakt) maydonidan tashqarida joylashgan bir yoki bir nechta yer uchastkalari;

qoplanadigan xarajatlar — investor va (yoki) operatorning MTB boʻyicha ishlarni bajarish davomida sarflagan, MTB shartlariga muvofiq investorga qoplanishi shart boʻlgan Oʻzbekiston Respublikasi qonunchiligiga koʻra asoslangan va hujjatlar bilan tasdiqlangan ruxsat etilgan xarajatlarni anglatadi;

MTB mol-mulki — investor va (yoki) operator tomonidan neft va gaz operatsiyalarini oʻtkazish maqsadlarida yangi yaratilgan yoki sotib olingan, ular tomonidan nazorat qilinadigan va ekspluatatsiya qilinadigan (foydalaniladigan) hamda kontrakt maydoni chegarasida yoki kontraktdan tashqari maydonda joylashgan mol-mulk, shuningdek marketing kompaniyasi tomonidan sotish uchun harajatlar tarkibiga kiritilgan qazib olingan (ishlab chiqarilgan) mahsulotlarni birgalikda sotish maqsadida sotib olingan, mol-mulk, qazib olingan (ishlab chiqarilgan) mahsulot bundan mustasno;

investor — konlarni aniqlash, qidirish va neft va gaz xomashyosini qazib olishga oʻzining, qarzga olingan yoki jalb qilingan mablagʻlarini (mulk va/yoki mulkiy huquqlarni) investitsiya qiluvchi MTB tarafi, shuningdek, bunday tarafning huquqiy vorislari va ruxsat etilgan sessionariylari. Mazkur Nizomga nisbatan “investor” tushunchasining taʼrifi shuningdek MTB boʻyicha ishlarni bajarish uchun operator, agar MTB shartlari bilan birgalikda sotish nazarda tutilgan boʻlsa, investor tomonidan qazib olingan (ishlab chiqarilgan) mahsulotlarni sotish maqsadlarida yaratilgan marketing kompaniyasi ham tushunilishi mumkin;

kontrakt maydoni — qidirish va qazib olish, shu jumladan, Oʻzbekiston Respublikasi hududidagi yer qaʼri uchastkalari, tavsifi va fazoviy chegaralari MTB bilan belgilangan yer yuzasi bilan chegaralangan (MTB amal qilish muddati davomida har qanday vaqtda yer yuzasidan burgʻulash yoʻli bilan texnik jihatdan erishish mumkin boʻlgan har qanday chuqurlikgacha) hududlarni anglatadi.

kompensatsiya mahsuloti — MTB doirasida neft va gaz operatsiyalarini amalga oshirish bilan bogʻliq xarajatlarni qoplash uchun MTB bilan oʻrnatilgan tartibda investorning mol-mulkiga oʻtkaziladigan ishlab chiqarilgan (qazib olinayotgan) mahsulotning bir qismi;

yakuniy foyda oluvchi — Oʻzbekiston Respublikasi Vazirlar Mahkamasining qarori bilan vakolat berilgan davlat organi yoki davlat nomidan MTB mol-mulkini qabul qiluvchi boshqa tashkilot;

neft va gaz operatsiyalari — MTBda belgilangan kontrakt maydoni va kontraktdan tashqari maydonga nisbatan konlarni qidirish, qoʻshimcha qidirish, baholash, loyihalash, oʻzlashtirish va ularni ishlab chiqish, kontrakt maydonida neft va gaz xom ashyosini ajratib olish, qazib olish, barqarorlashtirish, tayyorlash (shu jumladan, tabiiy gazni tayyorlash), qoʻzgʻatish, quyish, yigʻish, saqlash, yuklash, joʻnatish, yetkazib berish nuqtasigacha (punktigacha) tashish (shu jumladan magistral quvur liniyasidan foydalanish bilan), kontrakt maydoni bilan bogʻliq vaqtinchalik konservatsiyalash operatsiyalari bilan bogʻliq har qanday faoliyat, shuningdek ushbu operatsiyalar bilan bevosita bogʻliq boʻlgan va MTB doirasida va bajarish maqsadlarida amalga oshiriladigan boshqa faoliyat;

qoplanmaydigan xarajatlar — investorning MTBda belgilangan kompensatsiya mahsulotlari hisobiga qoplanishi shart boʻlmagan xarajatlarini anglatadi;

boshqaruv qoʻmitasi — MTBni amalga oshirish jarayonida taraflarning oʻzaro hamkorligini taʼminlash maqsadida investor va vakolatli organ tomonidan taraflarning har biridan teng vakillik asosida maxsus tuzilgan yuqori boshqaruv organi;

vakolatli organ — davlat boshqaruv organi yoki davlat korxonasi yoxud ustav fondida ellik bir foizdan kam boʻlmagan miqdorda davlat ulushiga ega Oʻzbekiston Respublikasining qonun hujjatlarida Oʻzbekiston Respublikasi nomidan MTBni amalga oshirish boʻyicha vakolatli organ sifatida belgilangan korxona.

7. Mazkur Nizom maqsadlari uchun MTB bilan oʻtkaziladigan mol-mulk quyidagilarga boʻlinadi:

investor tomonidan ishlab chiqarish maqsadli barcha obyektlar tegishli boʻlgan yangi yaratilgan mol-mulk, asosiy vositalarga tegishli boʻlgan, nazorat qilinadigan va ekspluatatsiya qilinadigan (foydalaniladigan) va kontrakt maydoni yoki kontraktdan tashqari maydon chegarasida joylashgan koʻchmas mulk, shu jumladan binolar, inshootlar, GQIZ, GDTQ, KKS, quduqlar, quvurlar va boshqa obyektlar (keyingi oʻrinlarda sanoat ahamiyatli obyektlar deb yuritiladi);

koʻchar mulk (transport vositalari, orgtexnika, inventar va boshqalar), nomoddiy aktivlar (dasturiy mahsulotlar va boshqalar) va sanoat obyektlaridan tashqari (bundan buyon matnda boshqa mulk deb yuritiladi) boshqa mol-mulkni oʻz ichiga olgan sotib olingan mol-mulk.

8. Mazkur Nizomning amal qilishi MTB doirasida uzatiladigan investor tomonidan MTB boʻyicha ishlarni olib borish davomida olingan geologik maʼlumotlarga tatbiq etilmaydi.

9. MTB mol-mulkini oʻtkazish jarayonini boshlash investor yoki vakolatli organ tomonidan amalga oshiriladi:

a) MTB bilan belgilangan MTBni tugatish oqibatlarini hisobga olgan holda MTB tugatilgan sanada, shu jumladan investor tomonidan MTB tugatilgan sanaga qoplanmagan xarajatlarni qoplash huquqidan mahrum boʻlgan hollarda;

b) oʻtkaziladigan mol-mulkning qiymati qoplangan hollarda boshqaruv qoʻmitasining qaroriga muvofiq MTB va mazkur Nizom bilan nazarda tutilgan shartlar va tartibda MTB taraflari tomonidan kelishilgan boshqa kunda.

10. Sanoat ahamiyatli obyektlarni investordan Oʻzbekiston Respublikasiga oʻtkazish bunday obyektlar qonun hujjatlarida va mazkur Nizom bilan belgilangan tartibda foydalanishga (ekspluatatsiyaga) topshirilgandan keyingina amalga oshirilishi mumkin, vakolatli organ tomonidan boshlangan, shuningdek mazkur Nizomning 9-bandi “a” kichik bandi bilan nazarda tutilgan hollar bundan mustasno.

11. Investor tomonidan Oʻzbekiston Respublikasiga MTB mol-mulkini oʻtkazish jarayoni boshlangan taqdirda, investor vakolatli organga mol-mulkni oʻtkazish zaruratini asoslash hamda tegishli maʼlumotlar va hujjatlarni taqdim etish bilan xabarnoma, shuningdek mazkur Nizomning 1-ilovasiga muvofiq shakl boʻyicha jadvalni yuboradi. Bunda, har bir bunday murojaat boʻyicha yuborilgan xabarnomaga muvofiq barcha oʻtkazilishi rejalashtirilgan MTB mol-mulkining boshlangʻich qiymati kamida 2 mlrd. soʻmni tashkil etishi kerak.

Xorijiy investor tomonidan mahsulot taqsimotiga oid bitimlar doirasida yangidan yaratilgan yoki sotib olingan mol-mulkni yakuniy foyda oluvchi timsolida Oʻzbekiston Respublikasiga oʻtkazish mazkur Nizomning 2-ilovasiga muvofiq sxema boʻyicha amalga oshiriladi.

12. Investor tomonidan Oʻzbekiston Respublikasiga oʻtkazilayotgan MTB mol-mulki boʻyicha berilgan maʼlumotlar va hujjatlar investordan tegishli barcha maʼlumotlar va hujjatlar bilan birgalikda uning mol-mulkni Oʻzbekiston Respublikasiga oʻtkazish niyati toʻgʻrisidagi xabarnomani olgan kundan boshlab uch oydan ortiq boʻlmagan muddatda vakolatli organ tomonidan koʻrib chiqilishi kerak.

13. Vakolatli organ tomonidan investordan Oʻzbekiston Respublikasiga MTB mol-mulkini oʻtkazish jarayoni boshlangan taqdirda, investor vakolatli organning murojaatiga koʻra uch oydan ortiq boʻlmagan muddat davomida tegishli maʼlumotlar va hujjatlarni, shuningdek ushbu Nizomning 1-ilovasiga muvofiq shakldagi jadvalni tayyorlaydi va vakolatli organga topshiradi.

14. Vakolatli organ investor tomonidan oʻtkazilayotgan MTB mol-mulki boʻyicha taqdim etilgan maʼlumotlar va hujjatlarni koʻrib chiqish davomida investorga, davlat va xoʻjalik boshqaruvi organlariga, mahalliy davlat hokimiyati organlariga, xoʻjalik yurituvchi subyektlariga oʻtkazilayotgan MTB mol-mulki toʻgʻrisida qoʻshimcha maʼlumotlar va hujjatlarni taqdim etish hamda dastlabki hujjatlarni oʻrganish (koʻrib chiqish) uchun soʻrovlar yuborishga haqli.

15. Vakolatli organning MTB mol-mulkini investor tomonidan oʻtkazish maqsadga muvofiqligini aniqlash boʻyicha vakolatiga quyidagilar kiradi:

oʻtkazilayotgan MTB mol-mulki roʻyxatini investor tomonidan taqdim etilgan maʼlumotlar va hujjatlarning muvofiqligiga, shuningdek, birlamchi hujjatlarni oʻrganish (koʻrib chiqish)ni hisobga olgan holda, oʻtkazilayotgan MTB mol-mulkini sotib olish uchun xarajatlarning qoplangan (qoplanadigan) xarajatlarga tegishliligiga koʻrib chiqish;

Oʻzbekiston Respublikasi qonun hujjatlariga muvofiq oʻtkaziladigan MTB mol-mulkining jismoniy va maʼnaviy eskirish darajasini, shuningdek, boshqaruv qoʻmitasi tomonidan tasdiqlangan jismoniy va maʼnaviy eskirishlarni aniqlash metodotikasi yordamida aniqlash.

16. Vakolatli organ investor tomonidan oʻtkazilayotgan MTB mol-mulki boʻyicha taqdim etilgan maʼlumotlar va hujjatlarni oʻrganish va koʻrib chiqish va birlamchi hujjatlarni oʻrganish (koʻrib chiqish) natijalari boʻyicha quyidagi mumkin boʻlgan (ehtimolli) takliflarni hisobga olgan holda boshqaruv qoʻmitasining kun tartibiga kiritish uchun oʻz takliflarini tayyorlaydi va investorga yuboradi:

a) MTB mol-mulkini Oʻzbekiston Respublikasiga oʻtkazish butun roʻyxat boʻyicha maqsadga muvofiqdir;

b) MTB mol-mulkini Oʻzbekiston Respublikasiga oʻtkazilishi faqat qisman maqsadga muvofiqdir;

v) MTB mol-mulkini (mulkning bir qismini) oʻtkazish maqsadga muvofiq emas va MTBning bunday mol-mulki (mulkning bir qismi) investor tomonidan kelgusida foydalanilishi kerak;

g) MTB mol-mulkini (mulkning bir qismini) oʻtkazish maqsadga muvofiq emas va bunday MTB mol-mulkini (mulkning bir qismi) investor tomonidan utilizatsiya qilinishi kerak.

17. Vakolatli organ boshqaruv qoʻmitasi tomonidan koʻrib chiqilish uchun oʻtkazilayotgan MTB mol-mulkiga nisbatan takliflarni tayyorlashda Oʻzbekiston Respublikasi qonunchiligiga va iqtisodiy jihatdan maqsadga muvofiqligiga, shu jumladan quyidagi qoidalarga amal qiladi:

a) agar oʻtkazilayotgan MTB mol-mulki maʼnaviy eskirgan boʻlsa yoki texnik shartlar bilan nazarda tutilgan muddatdan kamroq muddat davomida ekspluatatsiya qilingan, lekin ekspluatatsiya qilishga (foydalanishga) yaroqli boʻlsa, uni Oʻzbekiston Respublikasiga oʻtkazishning maqsadga muvofiqligi toʻgʻrisida tavsiyanoma chiqariladi yohud investor tomonidan bunday mol-mulkdan keyingi foydalanish toʻgʻrisida tavsiyanoma chiqariladi;

b) agar oʻtkazilayotgan mol-mulk jismonan eskirgan boʻlsa va uni taʼmirlash iqtisodiy jihatdan maqsadga muvofiq boʻlmasa, shuningdek, agar investor tomonidan MTB boʻyicha ishlarni oʻtkazishda texnologiyalarni buzganligi va (yoki) Oʻzbekiston Respublikasi qonunchiligini buzganligi sababli uskuna yaroqsiz holga kelgan boʻlsa va taʼmirlanishi mumkin boʻlmasa, bunday mol-mulkni investor hisobidan utilizatsiya qilinishi toʻgʻrisida taklif chiqariladi. Investor tomonidan MTB mol-mulkini utilizatsiya qilish/tugatishdan daromad olingan taqdirda, ushbu daromad investorning boshqa daromadlariga tegishli boʻladi va qoplanadigan xarajatlarni tegishli miqdorga kamaytiradi. Investorda qoplanadigan xarajatlar boʻlmagan taqdirda, investor tomonidan mol-mulkni utilizatsiya qilish/tugatishdan olingan daromadning butun summasi respublika budjeti daromadlariga yoʻnaltirilishi lozim;

v) oʻtkazilishi rejalashtirilgan mol-mulk tarkibida texnik shartlar bilan nazarda tutilgan muddatdan kamroq muddatda foydalanishda boʻlgan mol-mulk mavjud boʻlganda, bunday mol-mulkni Oʻzbekiston Respublikasiga oʻtkazishning maqsadga muvofiqligi yoki bunday mol-mulkdan investor tomonidan keyingi foydalanilishi toʻgʻrisida tavsiyanoma chiqariladi;

g) oʻtkazilishi rejalashtirilgan mol-mulk tarkibida investor tomonidan ortiqcha miqdorda sotib olingan mol-mulk mavjud boʻlganda, investor tomonidan bunday mol-mulkdan joriy budjetdan shunga oʻxshash tovarlarni (mol-mulkni) sotib olishni tegishli ravishda chiqarib tashlagan holda keyingi foydalanilishi toʻgʻrisida yoki ushbu mol-mulk qiymatini qoplanmagan xarajatlar tarkibiga kiritish toʻgʻrisida tavsiyanoma chiqariladi;

d) oʻtkazilishi rejalashtirilgan mol-mulk tarkibida investor tomonidan qasddan huquqbuzarlik sodir etilishi natijasida foydalanishga yaroqsiz mol-mulk aniqlangan taqdirda, bunday mol-mulk Oʻzbekiston Respublikasiga oʻtkazilmasligi toʻgʻrisida tavsiyanoma chiqariladi, investorning bunday mol-mulkka nisbatan qilgan xarajatlari qoplanmaydigan xarajatlar tarkibiga kiritiladi.

18. Boshqaruv qoʻmitasi tomonidan tasdiqlangan Oʻzbekiston Respublikasiga oʻtkaziladigan mol-mulki roʻyxati vakolatli organ tomonidan Oʻzbekiston Respublikasi Davlat aktivlarini boshqarish agentligiga sanoat ahamiyatli obyektlari va boshqa mol-mulkni koʻrsatgan holda ushbu mol-mulk toʻgʻrisidagi barcha zarur hujjatlar va maʼlumotlarni bilan ulardan keyingi foydalanish boʻyicha takliflarni tayyorlash uchun yuborilishiga asos boʻladi.

19. Investor boshqaruv qoʻmitasi tomonidan qaror qabul qilingan paytdan boshlab bunday mol-mulkni qabul qilish va yakuniy foyda oluvchiga topshirish dalolatnomasi rasmiylashtirilgunga qadar MTB mol-mulkining saqlanlaganligi uchun javobgar boʻladi.

20. Oʻzbekiston Respublikasi Davlat aktivlarini boshqarish agentligi vakolatli organdan oʻtkaziladigan MBT mol-mulki roʻyxati va bunday mol-mulk toʻgʻrisidagi barcha zarur hujjatlarni hamda maʼlumotlarni olgandan keyin zarur hollarda investorga, davlat va xoʻjalik boshqaruvi organlariga, mahalliy davlat hokimiyati organlariga, xoʻjalik yurituvchi subyektlarga berilgan oʻtkazilayotgan MTB mol-mulkiga nisbatan qoʻshimcha maʼlumotlar va hujjatlarni taqdim etish toʻgʻrisida talablarni, shuningdek, yakuniy foyda oluvchi sifatida bunday mol-mulkni olish uchun ularning ehtiyojlarini yuborishga haqli.

21. Vakolatli organ tomonidan yuborilgan barcha hujjatlarni koʻrib chiqish natijalari boʻyicha Oʻzbekiston Respublikasi Davlat aktivlarini boshqarish agentligi vakolatli organdan hujjatlar olingan kundan boshlab 30 kundan kechiktirmay sanoat ahamiyatli obyektlarga va boshqa mol-mulkka nisbatan yakuniy foyda oluvchilari toʻgʻrisida qaror qabul qilish uchun Oʻzbekiston Respublikasi Vazirlar Mahkamasiga takliflar yuboradi.

22. Yakuniy foyda oluvchi, sanoat ahamiyatli obyektlarini unga oʻtkazish shartlari, shu jumladan ulardan foydalanish maqsadlari Oʻzbekiston Respublikasi Davlat aktivlarini boshqarish agentligi va vakolatli organning taklifiga binoan Oʻzbekiston Respublikasi Vazirlar Mahkamasining qarori bilan belgilanadi.

Oʻzbekiston Respublikasi Vazirlar Mahkamasining qarori asosida sanoat ahamiyatli obyektlarni investordan yakuniy foyda oluvchiga oʻtkazish bir tomondan yakuniy foyda oluvchining, ikkinchi tomondan investorning vakolatli vakillari tomonidan imzolanadigan qabul qilish-topshirish dalolatnomasi bilan rasmiylashtiriladi hamda investor va foyda oluvchi, Oʻzbekiston Respublikasi Davlat aktivlarini boshqarish agentligi va vakolatli organ uchun bittadan nusxada toʻrtta bir xil nusxada rasmiylashtiriladi.

23. MTB doirasida yangi yaratilgan yoki sotib olingan mol-mulkka egalik huquqi yakuniy foyda oluvchiga oʻtgandan keyin bunday mol-mulkka nisbatan xarajatlar qoplangan taqdirda, zarur hollarda investorga MTB doirasida faoliyatni amalga oshirishi uchun MTBning amal qilish muddati davomida bunday mol-mulkdan tekinga foydalanishning mutlaq huquqi beriladi, va investor uning foydalanishida boʻlgan mol-mulkni saqlashga doir chiqimlarni hamda uning tasodifan nobud boʻlishi yoki tasodifan buzilishi ehtimoli xavfini oʻz zimmasiga oladi. Bunda, investor MTB bilan belgilangan tartibda yakuniy foyda oluvchi tomonidan unga berilgan mol-mulkni modernizatsiya va rekonstrutsiya qilishga haqli. Investorning bunday ishlarni oʻtkazish uchun sarflagan xarajatlari qoplanishi mumkin boʻlgan xarajatlarga kiradi.

24. Oʻzbekiston Respublikasi Vazirlar Mahkamasining qarori bilan sanoat ahamiyatli obyektlarga taalluqli boʻlmagan boshqa MTB mol-mulki kelgusida amalga oshirish uchun belgilangan tartibda quyidagilarga oʻtkaziladi:

a) Oʻzbekiston Respublikasi Davlat budjetidan moliyalashtiriladigan tashkilotlarga — tekinga (bepul asosda);

b) xoʻjalik yurituvchi subyektlarga — mazkur xoʻjalik yurituvchi subyektlarning ustav fondidagi davlat ulushini belgilangan tartibda koʻpaytirish hisobiga;

v) mahalliy ijro etuvchi hokimiyat organlariga.

Boshqa mol-mulk ushbu bandda koʻrsatilgan yuridik shaxslarga oʻtkazilgan taqdirda, bunday mol-mulkka egalik huquqini oʻtkazish bir tomondan yakuniy foyda oluvchining, ikkinchi tomondan investorning vakolatli vakillari tomonidan imzolanadigan qabul qilish-topshirish dalolatnomasi bilan rasmiylashtiriladi hamda investor va foyda oluvchi, Oʻzbekiston Respublikasi Davlat aktivlarini boshqarish agentligi va vakolatli organ uchun bittadan nusxada toʻrtta bir xil nusxada rasmiylashtiriladi.

25. MTB mol-mulkini oʻtkazish bilan bogʻliq nizolar va kelishmovchiliklar MTB va Oʻzbekiston Respublikasi qonun hujjatlariga muvofiq hal qilinadi.

4. “Uskunalar va inventarlarning holati” ustuniga quyidagi baholar qoʻyiladi: “Aʼlo”, “Yaxshi”, “Qoniqarli”, “Ishga yaroqsiz”. Bunda, vakolatli organ oʻtkazilishi rejalashtirilgan barcha mol-mulkni inventarizatsiya qilish huquqini oʻzida saqlab qoladi.

5. 16-ustunda, agar uskuna toʻliq eskirgan va hisobdan chiqarilgan boʻlsa, hisobdan chiqarishni oʻtkazish sanasi koʻrsatiladi.