Avtomobil transportida Oʻzbekiston Respublikasining bojxona chegarasi orqali oʻtkaziladigan tovarlar va transport vositalarini bojxonada rasmiylashtirishni yanada takomillashtirish va rasmiylashtirish vaqtini qisqartirish, shuningdek ular toʻgʻrisidagi axborotlarning ishonchliligini oshirish maqsadida Vazirlar Mahkamasi qaror qiladi:

1. Tashuvchilarga, bojxona brokyerlariga yoki boshqa manfaatdor shaxslarga (keyingi oʻrinlarda manfaatdor shaxslar deb ataladi) 2015-yil 1-dekabrdan boshlab avtomobil transportida Oʻzbekiston Respublikasining bojxona chegarasi orqali (shu jumladan tranzit shartlarida) oʻtkaziladigan tovarlar va transport vositalari toʻgʻrisida davlat bojxona xizmati organlarini elektron tarzda oldindan xabardor qilishni amalga oshirish huquqi berilsin.

2. Quyidagilar:

avtomobil transportida Oʻzbekiston Respublikasining bojxona chegarasi orqali (shu jumladan tranzit shartlarida) oʻtkaziladigan tovarlar va transport vositalari toʻgʻrisida elektron tarzda oldindan xabardor qilishda davlat bojxona xizmati organlariga taqdim etiladigan maʼlumotlar roʻyxati 1-ilovaga muvofiq;

davlat bojxona xizmati organlarini elektron tarzda oldindan xabardor qilish tartibotlarini amalga oshirish sxemasi 2-ilovaga muvofiq tasdiqlansin.

3. Belgilab qoʻyilsinki:

manfaatdor shaxslar avtomobil transportida Oʻzbekiston Respublikasining bojxona chegarasi orqali (shu jumladan tranzit shartlarida) oʻtkaziladigan tovarlar va transport vositalari toʻgʻrisida elektron tarzda oldindan xabardor qilishda davlat bojxona xizmati organlariga taqdim etiladigan maʼlumotlarni (keyingi oʻrinlarda elektron tarzda oldindan beriladigan axborotlarni deb ataladi) davlat bojxona xizmati organlariga taqdim etishning avtomatlashtirilgan tizimiga (keyingi oʻrinlarda avtomatlashtirilgan axborotlar tizimi deb ataladi) jahon Internet axborot tarmogʻi vositasida avtomobil transportida Oʻzbekiston Respublikasining bojxona chegarasi orqali tovarlar va transport vositalari (shu jumladan tranzit shartlarida) oʻtkazilgungacha yoki oʻtkazilish vaqtida joʻnatishlari mumkin;

elektron tarzda oldindan berilgan axborotlar tovar bilan birga yuboriladigan hujjatlarda koʻrsatilgan maʼlumotlarga muvofiq boʻlmagan taqdirda manfaatdor shaxslar elektron tarzda oldindan beriladigan axborotlarni avtomatlashtirilgan axborot tizimiga avtomobil transportida Oʻzbekiston Respublikasining bojxona chegarasi orqali tovarlar va transport vositalarini (shu jumladan tranzit shartlarida) oʻtkazish vaqtida joʻnatishlari mumkin;

elektron tarzda oldindan beriladigan axborotlarning mavjudligi avtomobil transportida Oʻzbekiston Respublikasining bojxona chegarasi orqali (shu jumladan tranzit shartlarida) oʻtkaziladigan tovarlar va transport vositalariga nisbatan bojxona nazorati shakllarini qoʻllash toʻgʻrisida qaror qabul qilishda hisobga olinadi;

avtomobil transportida Oʻzbekiston Respublikasining bojxona chegarasi orqali (shu jumladan tranzit shartlarida) tovarlar va transport vositalarini oʻtkazishda davlat bojxona xizmati organlari elektron tarzda oldindan berilgan axborotlarni ularning tovar bilan birga yuboriladigan hujjatlarda koʻrsatilgan maʼlumotlarga muvofiqligi yuzasidan tekshiradilar;

elektron tarzda oldindan berilgan axborotlar mavjud boʻlganda va ular tovar bilan birga joʻnatiladigan hujjatlarda koʻrsatilgan maʼlumotlarga muvofiq boʻlganda bojxona nazorati va rasmiylashtirish tovar bilan birga joʻnatiladigan hujjatlar davlat bojxona xizmati organlariga taqdim etilgan vaqtdan boshlab bir soat mobaynida amalga oshiriladi;

manfaatdor shaxslar tomonidan elektron tarzda oldindan beriladigan axborotlar taqdim etilmaganda yoki ular tovar bilan birga yuboriladigan hujjatlarda koʻrsatilgan maʼlumotlarga muvofiq boʻlmaganda davlat bojxona xizmati organlari zarur maʼlumotlarni avtomobil transportida Oʻzbekiston Respublikasining bojxona chegarasi orqali tovarlar va transport vositalarini (shu jumladan tranzit shartlarida) oʻtkazish vaqtida avtomatlashtirilgan axborot tizimiga kiritishni mustaqil ravishda amalga oshiradilar.

4. Oʻzbekiston Respublikasi Davlat bojxona qoʻmitasi:

avtomatlashtirilgan axborot tizimini ikki oy muddatda ishlab chiqsin va joriy etsin;

Oʻzbekiston milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalari bilan birgalikda ushbu qaror qoidalarini keng yoritish va tushuntirishni tashkil etsin.

5. Oʻzbekiston Respublikasi Tashqi ishlar vazirligi Oʻzbekiston Respublikasida akkreditatsiya qilingan diplomatik vakolatxonalarni va konsullik muassasalarini ushbu qarorning qoidalari toʻgʻrisida xabardor qilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Tovarlar tashilayotgan avtotransport vositasi toʻgʻrisidagi maʼlumotlar (davlat raqami, roʻyxatdan oʻtkazgan mamlakat).

2. Tashuvchi toʻgʻrisidagi maʼlumotlar (nomi va manzili).

3. Tovar tashish uchun qabul qilingan joy (mamlakat) hamda yetkazib berish moʻljallangan joy (mamlakat) toʻgʻrisidagi maʼlumotlar.

4. Tovar joʻnatilgan mamlakat hamda tovar yetkazib beriladigan mamlakatning nomi.

5. Tovarni joʻnatuvchi hamda oluvchining nomi va manzili.

6. Tovarlarni tavsiflash va kodlashning uygʻunlashtirilgan tizimiga muvofiq tovarlarning nomi va kodi toʻgʻrisidagi maʼlumotlar, kamida oltita belgi darajasida.

7. Yuk joylarining soni toʻgʻrisidagi maʼlumotlar.

8. Tovarlarning brutto ogʻirligi (kilogramm), shuningdek oʻlchovlarning qoʻshimcha oʻlchov birliklari soni (ushbu maʼlumotlar mavjud boʻlganda), tovarning koʻrsatilgan har bir kodi boʻyicha fakturadagi qiymati toʻgʻrisidagi maʼlumotlar.

9. Konteynerning identifikatsiya tartib raqami toʻgʻrisidagi maʼlumotlar.

10. Tovar bilan birga yuboriladigan hujjatlarga muvofiq tovarlarni yetkazib berish punkti toʻgʻrisidagi maʼlumotlar.

11. Tovarlarning Oʻzbekiston Respublikasining bojxona hududiga yetib kelish vaqti (taxminan) va joyi toʻgʻrisidagi axborot.

12. Yuklar MDP kitobchalari qoʻllangan holda tashilgan taqdirda MDP kitobchalarini qoʻllagan holda yuklarni xalqaro tashish toʻgʻrisidagi Konvensiyaga (Jeneva shahri, 1975-yil 14-noyabr) muvofiq MDP (CARNET TIR) kitobchasining tartib raqami.