1997-1-сон 11.08.2015. Sud hujjatlari va boshqa organlar hujjatlarini ijro etishdan boʻyin tovlayotgan shaxslarning Oʻzbekiston Respublikasidan chiqishini vaqtincha cheklash hamda Sud departamenti, ichki ishlar idoralari va Davlat chegarasini qoʻriqlash organlarining hamkorligi tartibi toʻgʻrisidagi nizomning 1-bandiga qoʻshimcha kiritish toʻgʻrisida

Hujjat kuchini yo‘qotgan 12.11.2019

OʻZBEKISTON RESPUBLIKASI ADLIYA VAZIRLIGI
OʻZBEKISTON RESPUBLIKASI IChKI IShLAR VAZIRLIGI
OʻZBEKISTON RESPUBLIKASI MILLIY XAVFSIZLIK XIZMATINING

Qarori

Sud hujjatlari va boshqa organlar hujjatlarini ijro etishdan boʻyin tovlayotgan shaxslarning Oʻzbekiston Respublikasidan chiqishini vaqtincha cheklash hamda Sud departamenti, ichki ishlar idoralari va Davlat chegarasini qoʻriqlash organlarining hamkorligi tartibi toʻgʻrisidagi nizomning 1-bandiga qoʻshimcha kiritish toʻgʻrisida

[Oʻzbekiston Respublikasi Adliya vazirligi tomonidan 2015-yil 11-avgustda roʻyxatdan oʻtkazildi, roʻyxat raqami 1997-1]

LexUZ sharhi

Mazkur qaror Oʻzbekiston Respublikasi Bosh prokuraturasi, Ichki ishlar vazirligi va Davlat xavfsizlik xizmatining 2019-yil 23-oktabrdagi 52, 82, 27-sonli “Sud hujjati asosida berilgan ijro hujjatini yoki ijro hujjati boʻlgan sud hujjatini uzrsiz sabablarga koʻra ijro etmagan qarzdor jismoniy shaxsning Oʻzbekiston Respublikasidan chiqishini vaqtincha cheklashni taʼminlash yuzasidan Oʻzbekiston Respublikasi Bosh prokuraturasi huzuridagi Majburiy ijro byurosi, Ichki ishlar vazirligi va Davlat xavfsizlik xizmati Chegara qoʻshinlarining hamkorligi tartibi toʻgʻrisidagi nizomni tasdiqlash haqida”gi qaroriga (roʻyxat raqami 3196, 12.11.2019-y.) asosan oʻz kuchini yoʻqotgan.

Oʻzbekiston Respublikasining “Sud hujjatlari va boshqa organlar hujjatlarini ijro etish toʻgʻrisida”gi Qonuniga muvofiq Oʻzbekiston Respublikasi Adliya vazirligi, Ichki ishlar vazirligi va Milliy xavfsizlik xizmati qaror qiladi:

1. Oʻzbekiston Respublikasi Adliya vazirligi, Ichki ishlar vazirligi va Milliy xavfsizlik xizmatining 2009-yil 20-avgustdagi 9, 11, 76-son qarori (roʻyxat raqami 1997, 2009-yil 25-avgust) (Oʻzbekiston Respublikasi qonun hujjatlari toʻplami, 2009-y., 35-son, 389-modda) bilan tasdiqlangan Sud hujjatlari va boshqa organlar hujjatlarini ijro etishdan boʻyin tovlayotgan shaxslarning Oʻzbekiston Respublikasidan chiqishini vaqtincha cheklash hamda Sud departamenti, ichki ishlar idoralari va Davlat chegarasini qoʻriqlash organlarining hamkorligi tartibi toʻgʻrisidagi nizomning 1-bandi quyidagi mazmundagi xatboshi bilan toʻldirilsin:

“Mazkur Nizom talablari eksklav hududlarda doimiy yashovchi qarzdorlarga nisbatan ular doimiy yashash joyidan Oʻzbekiston Respublikasining asosiy hududiga oʻtishlarida va qaytishlarida qoʻllanilmaydi.”.

2. Mazkur qaror Oʻzbekiston Respublikasi Parvozlar xavfsizligini nazorat qilish davlat inspeksiyasi va Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

Adliya vaziri M. IKRAMOV

Toshkent sh.,

2015-yil 11-avgust,

1-son

Ichki ishlar vaziri A. AXMEDBAYEV

Toshkent sh.,

2015-yil 11-avgust,

25-son

Milliy xavfsizlik xizmati raisi R. INOYATOV

Toshkent sh.,

2015-yil 11-avgust,

81-son

Kelishildi:

Davavianazorat inspeksiyasi boshligʻi oʻrinbosari O. LIM

2015-yil 11-avgust

Oʻzdavtemiryoʻlnazorat inspeksiyasi boshligʻi R. IKRAMOV

2015-yil 11-avgust

(Oʻzbekiston Respublikasi qonun hujjatlari toʻplami, 2015-y., 32-son, 434-modda)