O‘zbekiston Respublikasi Vazirlar Mahkamasining “Vazirlar Mahkamasining Umumiqtisodiyot kompleksi ishlari samaradorligini oshirish chora-tadbirlari to‘g‘risida” 2000-yil 29-dekabrdagi 517-son qaroriga qo‘shimchalar kiritish haqida” 2003-yil 5-sentabrdagi 386-son qaroriga muvofiq Vazirlar Mahkamasi qaror qiladi:

1. Quyidagilar:

Yoqilg‘i-energetika resurslarini tejash komissiyasining yangilangan tarkibi 1-ilovaga* muvofiq;

Yoqilg‘i-energetika resurslarini tejash komissiyasi to‘g‘risidagi nizom 2-ilovaga muvofiq tasdiqlansin.

2. Quyidagilar Komissiya faoliyatining asosiy yo‘nalishlari etib belgilansin:

iqtisodiyot tarmoqlarida va ijtimoiy sohada energetika resurslaridan samarali foydalanish bo‘yicha doimiy monitoringni amalga oshirish, energetika resurslaridan samarasiz va noqonuniy foydalanish hollarini aniqlash hamda ularga barham berish yuzasidan tezkor va qat’iy chora-tadbirlar ko‘rish;

iqtisodiyot tarmoqlarida energiyani tejovchi texnologiyalar va mexanizmlarning joriy etilishini ta’minlovchi dasturlar va tadbirlarni ishlab chiqish va amalga oshirish, energiyani tejovchi loyihalarni, shu jumladan xorijiy investitsiyalar hamda xalqaro tashkilotlar ishtirokida amalga oshirish;

energetikada energiya yaratuvchi quvvatlarni rivojlantirish va rekonstruksiya qilish dasturlari amalga oshirilishini nazorat qilish, iqtisodiyot tarmoqlarini va ijtimoiy sohani energetika resurslaridan oqilona va tejamli foydalanishni ta’minlovchi, resurslarni ehtiyotlovchi zamonaviy texnologiyalarga bosqichma-bosqich o‘tkazish;

yoqilg‘i-energetika kompleksini rivojlantirish istiqbollaridan kelib chiqqan holda respublikani iqtisodiy va ijtimoiy rivojlantirishning qisqa muddatli, o‘rta muddatli va uzoq muddatli prognozlarini shakllantirishda qatnashish;

yoqilg‘i-enegetika resurslaridan samarali foydalanish ustidan nazoratni amalga oshiruvchi organlar, shuningdek yoqilg‘i-energetika resurslarini tejash bo‘yicha hududiy komissiyalar faoliyatini muvofiqlashtirish.

3. O‘zbekiston Respublikasi Hukumatining 3-ilovaga muvofiq qarorlariga o‘zgartirish va qo‘shimchalar kiritilsin.

4. O‘zbekiston Respublikasi Hukumatining 4-ilovaga muvofiq qarorlari o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.

1. Yoqilg‘i-energetika resurslarini tejash komicsiyasi (keyingi o‘rinlarda “Komissiya” deb yuritiladi) davlat boshqaruvi organlari va mulkchilik shakllaridan qat’i nazar, xo‘jalik yurituvchi subyektlarning yoqilg‘i, energiya va energiya manbalarini qazib olish, hosil qilish, qayta ishlash, saqlash, tashish va sarflash (keyingi o‘rinlarda “hosil qilish va sarflash deb yuritiladi) sohasidagi faoliyatini muvofiqlashtiruvchi organ hisoblanadi.

2. Komissiya o‘z faoliyatida O‘zbekiston Respublikasi qonunlariga, O‘zbekiston Respublikasi Oliy Majlisining qarorlariga va boshqa hujjatlariga, O‘zbekiston Respublikasi Prezidentining farmonlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga hamda mazkur Nizomga amal qiladi.

3. Komissiya o‘z faoliyati to‘g‘risida O‘zbekiston Respublikasi Vazirlar Mahkamasiga hisobot beradi.

Komissiyaning shaxsiy tarkibi Vazirlar Mahkamasi tomonidan tasdiqlanadi.

4. Quyidagilar Komissiyaning asosiy vazifalari va faoliyat yo‘nalishlari hisoblanadi:

“Energiyadan oqilona foydalanish to‘g‘risida”gi O‘zbekiston Respublikasi Qonuni so‘zsiz amalga oshirilishini ta’minlovchi chora-tadbirlarni ro‘yobga chiqarish;

iqtisodiyot tarmoqlarida va ijtimoiy sohada energetika resurslaridan samarali foydalanishini doimiy monitoring qilish, energiya resurslaridan samarasiz va noqonuniy foydalanish hollarini aniqlash va ularga barham berish yuzasidan tezkor va qat’iy chora-tadbirlar ko‘rish;

iqtisodiyot tarmoqlarida energiyani tejaydigan texnologiyalar va mexanizmlar joriy etilishini ta’minlovchi dasturlar va chora-tadbirlarni ishlab chiqish va amalga oshirish, energiyani tejaydigan loyihalarni, shu jumladan xorijiy investitsiyalar va xalqaro tashkilotlar ishtirokida amalga oshirish;

energetikada quvvatlar hosil qiluvchi ishlab chiqarishni rivojlantirish va rekonstruksiya qilish, iqtisodiyot tarmoqlari va ijtimoiy sohani energetika resurslaridan oqilona va tejamli foydalanishni ta’minlaydigan zamonaviy resurslarni tejaydigan texnologiyalarga bosqichma-bosqich o‘tkazish dasturlari amalga oshirilishini nazorat qilish;

yoqilg‘i-energetika kompleksini rivojlantirish istiqbollaridan kelib chiqib respublikani iqtisodiy va ijtimoiy rivojlantirishning qisqa muddatli, o‘rta muddatli va uzoq muddatli prognozlarini shakllantirishda qatnashish;

yoqilg‘i-energetika resurslaridan samarali foydalanishni nazorat qiluvchi organlar, shuningdek yoqilg‘i-energetika resurslarini tejash hududiy komissiyalari faoliyatini muvofiqlashtirish;

yoqilg‘i va energiyani hosil qilish va ulardan oqilona foydalanish sohasidagi qonun hujjatlari va normativ baza shakllantirilishida faol ishtirok etish.

5. Komissiya quyidagi huquqlarga ega:

normativ-texnik hujjatlarni, energiya sarfi hamda yoqilg‘i va elektr energiyasining texnik nobudgarchiligi normativlari ishlab chiqilishini tashkil etish, ishlab chiqilgan normativ hujjatlarni ekspertizadan o‘tkazish va kelishish;

vazirliklarda, idoralarda, ularning tarkibiy bo‘linmalarida, muassasalar, tashkilotlar va xo‘jalik yurituvchi subyektlarda yoqilg‘i va energiyadan oqilona foydalanish masalalari o‘rganib chiqilishini belgilangan tartibda tashkil etish;

energiya resurslaridan oqilona foydalanish masalalari bo‘yicha amaldagi qonun hujjatlariga rioya etilishini nazorat qilish masalalarida “O‘zdavneftgazinspeksiya” va “O‘zdavenergonazorat” agentligining, shuningdek yoqilg‘i-energetika resurslarini tejash bo‘yicha hududiy komissiyalarning faoliyatini muvofiqlashtirish;

o‘z majlislarida Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, korxonalar, tashkilotlar va muassasalar rahbarlarining yoqilg‘i va energiyadan oqilona foydalanish, mahsulotlar, ishlar va xizmatlarga energiya sarfini kamaytirish masalalari bo‘yicha hisobotlarini eshitish, resurslardan samarasiz foydalanish hollarini bartaraf etishga qaratilgan tegishli qarorlar qabul qilish;

harakati yoki harakatsizligi yoqilg‘i va energiyadan oqilona foydalanish sohasidagi qonun hujjatlari buzilishiga olib kelgan rahbarlar va mansabdor shaxslarga nisbatan chora ko‘rish to‘g‘risida tavsiyalar berish;

davlat boshqaruvi organlari, korxonalar, tashkilotlar va muassasalardan Komissiya vakolatiga kiruvchi masalalar bo‘yicha axborot olish.

Komissiyaning o‘z vakolati doirasida qabul qilgan qarorlari joylardagi davlat hokimiyati organlari, vazirliklar, idoralar, mulkchilik shakllaridan qat’i nazar, korxonalar va tashkilotlar, xo‘jalik yurituvchi subyektlar, shu jumladan xorijiy korxonalar va tashkilotlar, xo‘jalik yurituvchi subyektlarning bajarishi uchun majburiydir.

Energiya ishlab chiqarish va iste’mol qilish sohasida normativ hujjatlar qabul qilish zarur bo‘lganda Komissiya tegishli davlat organlariga takliflar kiritadi.

6. Komissiya o‘ziga yuklangan vazifalarga muvofiq:

energiya tejash davlat dasturini ishlab chiqish va ekspertizadan o‘tkazishni, shuningdek uning bajarilishi monitoringini tashkil etadi;

energiyani tejash tadbirlarini, iqtisodiyot tarmoqlarida va ijtimoiy sohada energiyadan oqilona foydalanishga ko‘maklashuvchi energiya hosil qilish va uni sarflashning energetika jihatidan samaradorligi, ilg‘or ilmiy-tadqiqotlar yutuqlarini joriy etish bo‘yicha tarmoq dasturlari va loyihalarini ishlab chiqish va amalga oshirish yuzasidan vazirliklar, idoralar, muassasalar, tashkilotlar va xo‘jalik yurituvchi subyektlar faoliyatini muvofiqlashtiradi;

energetika faoliyatining atrof muhitga salbiy ta’sirini kamaytirish chora-tadbirlari tashkil etilishi va amalga oshirilishiga, energiyadan samarali foydalanuvchi va ekologik sof texnologiyalar, mahsulotlar va materiallar joriy etilishi, ikkilamchi energiya resurslari, shu jumladan xorijiy investitsiyalar va xalqaro tashkilotlar ishtirokida ishlatilishi bo‘yicha loyihalar amalga oshirilishiga, xalqaro bitimlarda nazarda tutilgan chora-tadbirlar ro‘yobga chiqarilishiga ko‘maklashadi;

energetika jihatidan samaradorlik masalalarini o‘rganish uchun vazirliklar, idoralar, korxonalar va tashkilotlarning mutaxassislarini ularning rahbarlari roziligi bilan, shuningdek mustaqil ekspertlarni jalb etadi, Komissiya vakolatiga kiruvchi masalalarni chuqur tahliliy ishlab chiqish uchun ulardan ekspert guruhlar tashkil etadi;

qayta tiklanadigan va an’anaviy bo‘lmagan energiya manbalaridan foydalanilgan texnologiyalar joriy etilishiga ko‘maklashadi, energiyadan, shu jumladan qayta tiklanadigan, an’anaviy bo‘lmagan, ekologik xavfsiz energiya manbalaridan foydalaniladigan texnologiyalardan oqilona foydalanishga doir chet el tajribasini o‘rganadi, ularni amalga oshirish yuzasidan tavsiyalar tayyorlaydi;

energiyani hisobga olish, nazorat qilish va boshqarish priborlari, energetika jihatidan samarali va ekologik xavfsiz energetika qurilmalarini ishlab chiqarish bo‘yicha sanoat bazasini rivojlantirishga ko‘maklashadi;

davlat boshqaruvi organlari, korxonalar, muassasalar va tashkilotlarning energiya hosil qilish va uni sarflashda energiyadan oqilona foydalanish, energetika tadqiqotlarini tashkil etish va o‘tkazish masalalari bo‘yicha faoliyatini muvofiqlashtiradi;

vazirliklar, idoralar, ularning tarkibiy bo‘linmalari, muassasalar, tashkilotlar va xo‘jalik yurituvchi subyektlar tomonidan yoqilg‘i va energiyadan oqilona foydalanish masalalarini belgilangan tartibda o‘rganib chiqish ishlarini tashkil etadi;

yuridik shaxslarning yoqilg‘i-energetika resurslaridan foydalanish buzilganligi uchun nazorat organlari tomonidan ularga nisbatan iqtisodiy jazolar qo‘llanilganligi holatlari bo‘yicha arizalarini ko‘rib chiqadi;

energetika jihatidan samarali va ekologik xavfsiz texnologiyalarni joriy etish tadbirlarini mablag‘ bilan ta’minlash, ushbu sohada ilmiy tadqiqotlarni faollashtirish, energiyaning qayta tiklanadigan va an’anaviy bo‘lmagan manbalarini qo‘llash, energiyadan samarasiz foydalanilganligi uchun iqtisodiy jazolar qo‘llashdan tushgan mablag‘lar hisobiga tashkil etilgan respublika tarmoqlararo energiyani tejash hisob raqamidagi mablag‘lardan maqsadli foydalanishga doir qarorlar qabul qiladi.

7. Komissiya o‘z ishlarini Komissiya raisi tomonidan tasdiqlanadigan yillik reja asosida tashkil qiladi.

Komissiya majlislari yil choragida kamida bir marta o‘tkaziladi.

8. Komissiyaning ish rejasiga muvofiq energiya hosil qilish va uni sarflashning energetika jihatidan samaradorligini va energiyadan oqilona foydalanishni, energiya ta’minotining yoqilg‘i va energiya ishlab chiqaruvchi, hosil qiluvchi va sarflash asbob-uskunalari, tizimlari va tarmoqlarining texnik holatini o‘rganish masalalari, shuningdek Komissiya funksiyalariga muvofiq boshqa masalalar belgilangan tartibda ko‘rib chiqiladi.

Masalalarni o‘rganib chiqish Komissiya a’zolaridan biri boshchilik qiladigan ishchi guruh tomonidan tashkil etiladi. Ishchi guruh tarkibi Komissiya raisi tomonidan tasdiqlanadi. Ishchi guruhlar energetika jihatidan samaradorlik masalasini joylarga borib o‘rganib chiqadi va uning natijalari bo‘yicha Komissiyaga ushbu masala yuzasidan Komissiyaning kelishilgan qarori loyihasi bilan birgalikda umumlashtirilgan ma’lumotnoma loyihasini taqdim etadi.

9. Masalalar Komissiya majlisida Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, ularning tarkibiy bo‘linmalari, mulkchilik shakllaridan qat’i nazar, korxonalar, muassasalar, tashkilotlar va xo‘jalik yurituvchi subyektlar rahbarlari taklif etilgan holda ko‘rib chiqiladi.

10. Qabul qilingan qarorlar Komissiya majlisi protokoli bilan rasmiylashtiriladi va tegishli ijrochilarga yetkaziladi.

11. Energiyani tejaydigan tadbirlar, dasturlar va loyihalarni mablag‘ bilan ta’minlash uchun maxsus respublika energiyani tejaydigan tarmoqlararo hisob raqamidan mablag‘ ajratiladigan vazirliklar, idoralar, muassasalar, tashkilotlar va xo‘jalik yurituvchi subyektlar har yili mablag‘lardan maqsadli foydalanilishi to‘g‘risida Komissiyaga va O‘zbekiston Respublikasi Moliya vazirligiga hisobot taqdim etadilar.

12. Komissiya kotibi:

Komissiyaning ish rejasi ishlab chiqilishini, uning bajarilishi nazorat qilinishini, shuningdek tasdiqlangan rejaga muvofiq Komissiyaning joriy ishlari tashkil etilishini;

joylarda energetika jihatidan samaradorlik to‘g‘risidagi masalani o‘rganuvchi ishchi guruhlar bilan birgalikda Komissiya majlisiga materiallar tayyorlanishini;

vazirliklar, idoralar, joylardagi hokimiyat organlari bilan birgalikda Komissiya tomonidan qabul qilingan qarorlar bajarilishi nazorat qilinishini, Komissiya raisiga tegishli axborot va takliflar kiritilishini;

tushadigan xat-xabarlar ko‘rib chiqilishini va Komissiya vakolatiga kiradigan masalalar bo‘yicha qarorlar tayyorlanishini;

energetika resurslaridan oqilona foydalanilishini ta’minlash bo‘yicha takliflar tayyorlanishini va Vazirlar Mahkamasiga kiritilishini ta’minlaydi.

Komissiya kotibi o‘z funksiyalarini amalga oshirish uchun:

vazirliklar, idoralar, korxonalar, tashkilotlar va muassasalardan Komissiya faoliyati bilan bog‘liq energetika samadorligi masalalari yuzasidan axborotni so‘rab olish;

vazirliklar, idoralar, korxonalar, muassasalar, hokimliklarda Komissiya vakolatiga kiruvchi masalalar bo‘yicha materiallar bilan tanishish, shuningdek ulardan Komissiya faoliyatini amalga oshirish, energetika samaradorligi bo‘yicha ko‘rib chiqilayotgan masalalar uchun zarur bo‘lgan axborot va materiallarni olish huquqiga egadir.

1. Vazirlar Mahkamasining “O‘zbekiston Respublikasi Vazirlar Mahkamasi komplekslari rahbariyati tuzilmasiga o‘zgartirishlar kiritish to‘g‘risida” 2000-yil 5-avgustdagi 310-son qaroriga 2-ilovada:

a) ilova nomidagi “Makroiqtisodiyot va statistika” so‘zlari “Iqtisodiyot” so‘zi bilan almashtirilsin;

b) I bo‘limda:

“Makroiqtisodiyot va statistika” so‘zlari “Iqtisodiyot” so‘zi bilan almashtirilsin;

“Mehnat vazirligi” va “Ijtimoiy ta’minot vazirligi” so‘zlari chiqarib tashlansin;

“Mehnat va aholini ijtimoiy muhofaza qilish vazirligi” so‘zlari qo‘shilsin;

v) II bo‘lim quyidagi mazmundagi xatboshilar bilan to‘ldirilsin:

“Davlat mulkini xorijiy investorlarga sotish bo‘yicha tender savdolari o‘tkazuvchi Davlat komissiyasi;

“Sog‘lom avlod, ayollar sog‘lig‘ini mustahkamlash va oilaning tibbiy madaniyatini oshirish masalalari bo‘yicha Hukumat komissiyasi;

“Yoqilg‘i-energetika resurslarini tejash komissiyasi”.

2. Vazirlar Mahkamasining 2001-yil 19-yanvardagi 42-son qarori (O‘zbekiston Respublikasi QT., 2001-y., 1-son, 4-modda) bilan tasdiqlangan O‘zbekiston Respublikasi Iqtisodiyot vazirligi huzuridagi Birlashgan hay’at to‘g‘risida nizomning (qarorga 2-ilova) 3.1-bandi quyidagi tahrirda bayon qilinsin:

“3.1. Ko‘rsatib o‘tilgan vazifalarga muvofiq Birlashgan hay’atga quyidagi funksiyalar yuklanadi:

iqtisodiyotni rivojlantirish va isloh qilishning ustuvorliklari va strategik vazifalari yuzasidan qabul qilinayotgan qarorlarning kollegialligini ta’minlash;

balanslar tizimi, maqsadli kompleks dasturlar, jahon iqtisodiy rivojlanishining vujudga kelayotgan tendensiyalari asosida hamda yoqilg‘i-energetika kompleksini rivojlantirish istiqbollaridan kelib chiqqan holda respublikani iqtisodiy va ijtimoiy rivojlantirishning qisqa muddatli, o‘rta muddatli va uzoq muddatli prognozlarini ishlab chiqish, shakllantirish, ekspert baholash, shuningdek ularni kelishilgan holda Hukumatning ko‘rib chiqishi uchun kiritish;

yoqilg‘i-enegetika kompleksi tarmoqlarini, respublika iqtisodiyotini barqaror rivojlantirish va eksport potensialini kengaytirish uchun baza sifatida uning roli va ahamiyatini hisobga olgan holda istiqbolli, strategik rivojlantirish muammolarini hal etish bo‘yicha aniq chora-tadbirlar va amaliy tavsiyanomalar ishlab chiqish;

respublika iqtisodiyotining barcha tarmoqlari va sektorlari bilan yoqilg‘i-enegetika kompleksini rivojlantirishning mutanosibligini ta’minlash bo‘yicha takliflar ishlab chiqish;

geologiya qidiruv ishlari dasturlarini amalga oshirish, yoqilg‘i-energetika kompleksi tarmoqlarini rivojlantirish, kompleks korxonalarini zamonaviylashtirish, rekonstruksiya qilish va texnika bilan qayta jihozlash uchun xorijiy investitsiyalarni, ayniqsa to‘g‘ridan to‘g‘ri investitsiyalarni jalb etishga yordam ko‘rsatish;

yoqilg‘i-energetika kompleksi tarmoqlari va korxonalarining moliyaviy barqarorligi ustidan doimiy monitoring olib borish, moliyaviy oqimlarning mutanosibligini va korxonalar ishlarining barqarorligini ta’minlovchi kompleks chora-tadbirlarni amalga oshirish, jalb qilinayotgan kredit resurslarini qaytarish bo‘yicha majburiyatlarni o‘z vaqtida bajarish;

Umumiqtisodiyot kompleksi vazirliklari va idoralari tomonidan iqtisodiyotni erkinlashtirish va isloh qilish bo‘yicha ustuvor vazifalarni amalga oshirish yuzasidan ularga yuklangan vazifalar va funksiyalarning, shuningdek Birlashgan hay’at tomonidan qabul qilingan qarorlarning bajarilishini muntazam nazorat qilish va monitoringini olib borish;

iqtisodiy idoralar faoliyati samaradorligi va ularning iqtisodiyotni rivojlantirish va isloh qilish vazifalarini amalga oshirishdagi hissasini tahlil qilish va baholash”.

1. Vazirlar Mahkamasining “O‘zbekiston Respublikasi Hukumatining qarorlari bilan tashkil etilgan Respublika komissiyalari tarkibiga o‘zgartirishlar kiritish to‘g‘risida” 1999-yil 5-martdagi 101-son qarori.

2. Vazirlar Mahkamasining “O‘zbekiston Respublikasining Bosh vaziri va Bosh vaziri o‘rinbosarlari o‘rtasida vazifalarni taqsimlash to‘g‘risida” 1999-yil 11-martdagi 109-son qarori.

3. Vazirlar Mahkamasining “O‘zbekiston Respublikasi Hukumatining qarorlari bilan tashkil etilgan Respublika komissiyalari tarkibiga o‘zgartirishlar kiritish to‘g‘risida” 1999-yil 5-martdagi 101-son hamda “O‘zbekiston Respublikasining Bosh vaziri va Bosh vaziri o‘rinbosarlari o‘rtasida vazifalarni taqsimlash to‘g‘risida” 1999-yil 11-martdagi 109-son qarorlariga o‘zgartirishlar kiritish haqida” 1999-yil 4-avgustdagi 375-son qarori.

4. Vazirlar Mahkamasining “Yoqilg‘i-energetika resurslarini tejash komissiyasining yangi tarkibini va Komissiya to‘g‘risidagi nizomni tasdiqlash haqida” 2000-yil 20-apreldagi 157-son qarori.

5. Vazirlar Mahkamasining “O‘zbekiston Respublikasi Prezidentining farmonlari va Vazirlar Mahkamasining qarorlari bilan tashkil etilgan Respublika komissiyalari va kengashlari rahbarlari tarkibi to‘g‘risida” 2000-yil 5-avgustdagi 308-son qaroriga 1-ilovaning “O‘zbekiston Respublikasi Bosh vazirining o‘rinbosari V.Y.Otayev boshchilik qiladigan komissiyalar” bo‘limi.

6. Vazirlar Mahkamasining “O‘zbekiston Respublikasi Hukumatining qarorlari bilan tashkil etilgan Komissiyalar va Kengashlar tarkiblarini tasdiqlash to‘g‘risida” 2000-yil 30-sentabrdagi 374-son qaroriga 27-ilova.