|
Hujjat kuchini yo‘qotgan 22.02.2021
|
Oʻzbekiston Respublikasi Vazirlar Mahkamasining
qarori
Muhammad Rizo Erniyozbek oʻgʻli - Ogahiy tavalludining 190 yilligini nishonlash toʻgʻrisida
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Xalqimizning milliy madaniyati, maʼnaviyati va maʼrifati taraqqiyotiga ulkan hissa qoʻshgan atoqli shoir, tarixnavis, tarjimon, davlat arbobi Muhammad Rizo Erniyozbek oʻgʻli - Ogahiyning adabiy-ilmiy merosini yanada keng targʻib qilish maqsadida Vazirlar Mahkamasi qaror qiladi:
1. Oʻzbekiston Fanlar akademiyasi, respublika “Maʼnaviyat va maʼrifat” jamoatchilik markazi, Oʻzbekiston Yozuvchilar uyushmasi va Xorazm viloyati hokimligining 1999-yilda respublikamizda Muhammad Rizo Erniyozbek oʻgʻli - Ogahiy tavalludining 190 yilligini keng nishonlash haqidagi taklifi qabul qilinsin.
Ogahiy tavalludining 190 yilligiga tayyorgarlik koʻrish va uni oʻtkazish boʻyicha respublika tashkiliy qoʻmitasi tarkibi ilovaga muvofiq tasdiqlansin.
Tashkiliy qoʻmita tegishli vazirliklar, idoralar, tashkilotlar bilan birgalikda bir oy muddatda yubileyga tayyorgarlik koʻrish, uni oʻtkazish tadbirlari rejasini ishlab chiqsin va amalga oshirishga kirishsin.
2. Oʻzbekiston Fanlar Akademiyasi:
Xorazm Maʼmun akademiyasi bilan birgalikda 1999-yil dekabr oyida “Sharq xalqlarining maʼnaviy-maʼrifiy taraqqiyotida Ogahiy adabiy-ilmiy merosining ahamiyati” mavzuida ilmiy-amaliy anjuman oʻtkazsin;
Oʻzbekiston Respublikasi Davlat matbuot qoʻmitasi va tegishli vazirliklar bilan birgalikda 1998-1999-yillar davomida shoirning badiiy, ilmiy-tarixiy merosidan “Tanlangan asarlari”ni hamda Ogahiy haqidagi risola, maqolalar toʻplamini tayyorlasin va chop etsin.
3. Xorazm viloyati hokimligi Oʻzbekiston Respublikasi Madaniyat ishlari vazirligi, Oʻzbekiston Yozuvchilar uyushmasi, “Maʼnaviyat va maʼrifat” jamoatchilik markazi bilan birgalikda 1999-yil dekabr oyida Urganch shahrida Ogahiy yubileyiga bagʻishlangan tantanalarni tashkil qilsin va oʻtkazsin.
4. Xorazm viloyati hokimligi Oʻzbekiston Respublikasi Madaniyat ishlari vazirligi hamda tegishli idoralar bilan birgalikda mahalliy budjet va homiylarning mablagʻlari hisobiga Ogahiy nomi bilan ataluvchi majmua tarkibiga kirgan inshootlarni, jumladan, Xiva tumanidagi shoir maqbarasini, muzey hamda bogʻini taʼmirlash, yangi eksponatlar bilan boyitish, obodonlashtirish ishlarini amalga oshirsin.
5. Oʻzbekiston pochta va telekommunikatsiyalar agentligi Ogahiy surati tasvirlangan pochta markalari, konvertlar chiqarishni tashkil etsin.
6. “Oʻzteleradio” kompaniyasi va boshqa ommaviy axborot vositalariga Ogahiyning oʻzbek adabiyoti va tarix ilmini rivojlantirishga qoʻshgan ulkan hissasi, hayot yoʻli aks etgan koʻrsatuvlar, eshittirishlar tashkil etish, maqolalar uyushtirish hamda shoir asarlari asosida videofilmlar yaratish topshirilsin.
7. Belgilab qoʻyilsinki, Ogahiy yubileyini oʻtkazish bilan bogʻliq xarajatlar vazirliklar va idoralarning rejadagi oʻz, mahalliy budjet va homiylar mablagʻlari hisobiga qoplanadi.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Azizxoʻjayev zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1998-yil 23-sentabr,
407-son
Muhammad Rizo Erniyozbek oʻgʻli - Ogahiy tavalludining 190 yilligiga tayyorgarlik koʻrish va uni oʻtkazish boʻyicha tashkiliy qoʻmita
TARKIBI
| Azizxoʻjayev A. | — | Oʻzbekiston Respublikasi Bosh vazirining oʻrinbosari, tashkiliy qoʻmita raisi | |
| Joʻrayev N. | — | Oʻzbekiston Respublikasi Prezidentining Davlat maslahatchisi, tashkiliy qoʻmita raisining oʻrinbosari (kelishuvga muvofiq) | |
| Yusupov I. | — | | Xorazm viloyati hokimi, tashkiliy qoʻmita raisining oʻrinbosari |
| Joʻrayev X. | — | Madaniyat ishlari vaziri, tashkiliy qoʻmita raisining oʻrinbosari | |
| Joʻrayev T. | — | Oʻzbekiston Fanlar akademiyasining prezidenti | |
| Oripov A. | — | Yozuvchilar uyushmasining raisi | |
| Aminov N. | — | | Respublika “Maʼnaviyat va maʼrifat” jamoatchilik markazi rahbari |
| Gʻulomov S. | — | Respublika oliy va oʻrta maxsus taʼlim vaziri | |
| Yoʻldoshev J. | — | | Xalq taʼlimi vaziri |
| Koʻchimov A. | — | “Oʻzteleradio” kompaniyasi raisi | |
| Sayfiddinov J. | — | Moliya vaziri | |
| Shogʻulomov R. | — | Davlat mabuot qoʻmitasi raisi | |
| Yunusov T. | — | “Oʻzbekkino” DAK raisi | |
| Qoʻziyev T. | — | | Badiiy akademiya raisi |
| Nazarov A. | — | “Oʻzbeknavo” gastrol-konsert birlashmasi bosh direktori | |
| Abduqunduzov M. | — | “Oʻzbekteatr” ijodiy-ishlab chiqarish birlashmasi bosh direktori | |
| Toʻxtaboyev X. | — | “Oltin meros” jamgʻarmasi raisi |
