|
Hujjat kuchini yo‘qotgan 22.02.2021
|
Oʻzbekiston Respublikasi Vazirlar Mahkamasining
qarori
Shisha idishlar ishlab chiqarish zavodi qurilishini tugallash va foydalanishga topshirishga oid qoʻshimcha chora-tadbirlar toʻgʻrisida
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Jahon standartlariga javob beradigan shisha idishlar ishlab chiqarishni taʼminlash, mana shu asosda raqobatbardoshli meva-sabzavot va vino-aroq mahsulotlari ishlab chiqarish hajmini koʻpaytirish, tarmoqning eksport salohiyatini kengaytirish, shuningdek shisha idishlar zavodi qurilishini tugallash va foydalanishga topshirish maqsadida Vazirlar Mahkamasi qaror qiladi:
1. “Oʻzvinosanoat-xolding” XKning “Asl Oyna” OAJ (Toshkent shahri) ustav fondining 80 foizi miqdoridagi oʻziga tegishli aksiyalarini xaridor tomonidan quyidagilar boʻyicha investitsiya majburiyatlari qabul qilinishi sharti bilan “Mehnat” (Toshkent viloyati) agrofirmasi MChJga nominal qiymati boʻyicha sotish toʻgʻrisidagi taklifiga rozilik berilsin:
1-ilovaga* muvofiq jadvalga binoan shisha idishlar zavodi qurilishini tugallash va uni 2009-yil avgust oyida foydalanishga topshirish uchun 6,8 mlrd soʻm mablagʻni investitsiya qilish;
2010-yilga borib sifatli shisha idish ishlab chiqarish hajmini bir yilda 124,6 mln shisha idishga, tayyor mahsulot eksportini — ishlab chiqarish hajmining 50 foizigacha yetkazish va 190 ta ish oʻrni tashkil etish;
2 va 3-ilovalarga* muvofiq jadvallarga binoan Oʻzbekiston Respublikasi Tashqi iqtisodiy faoliyat milliy bankining krediti va “Oʻzvinosanoat-xolding” XKning qarzi qaytarilishini taʼminlash.
2. Oʻzbekiston Respublikasi Tashqi iqtisodiy faoliyat milliy banki:
“Asl Oyna” OAJning 21,9 mln yevro summasidagi kredit boʻyicha va 2,95 mln yevro summasidagi hisoblangan foizlar boʻyicha majburiyatlarini 10 yil muddatga restrukturizatsiya qilsin, kredit restrukturizatsiya qilingan paytda hosil boʻlgan muddati oʻtkazib yuborilgan asosiy qarzga foizlar hisoblanmaydigan 3 yillik imtiyozli davr ham shu jumlaga kiradi;
xorijiy bankka boʻlajak toʻlovlarning yetishmayotgan qismi boʻyicha shakllangan zaxira hisobiga haq toʻlanishini taʼminlasin, keyinchalik ular 2-ilovaga* muvofiq jadvalga binoan “Mehnat” agrofirmasi MChJ tomonidan qaytariladi.
3. Belgilab qoʻyilsinki, “Mehnat” agrofirmasi MChJ uchun “Asl Oyna” OAJdan sotib olinadigan aksiyalarga mulkchilik huquqi:
shisha idishlar zavodi uchun investitsiyalar kiritilgandan, 1-ilovadagi jadvalga muvofiq uni qurish hamda sanoat yoʻli bilan ishga tushirish amalga oshirilgandan;
“Oʻzvinosanoat-xolding” Xolding kompaniyasining qarzi 3-ilovaga muvofiq uzilgandan keyin boshlanadi.
* 1 — 3-ilovalar rus tilidagi matnda berilgan.
4. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2008-yil 20-noyabr,
251-son
