Milliy maʼnaviyatimiz, madaniy merosimiz va umuminsoniy qadriyatlar zaminida yuksak vatanparvarlik tuygʻusini va mehnatsevarlik fazilatlarini oʻzida mujassamlashtirgan, Vatanimiz obroʻsini, shon-shuhrati va sharafini yuksaltirish yoʻlida xizmat qilayotgan, Oʻzbekistonda kelajagi buyuk davlat barpo etishda hamda mamlakatimiz ichki va tashqi hayotida faol ishtirok etayotgan fuqarolarni ragʻbatlantirish maqsadida:

1. “Oʻzbekiston belgisi” koʻkrak nishoni taʼsis etilsin.

2. “Oʻzbekiston belgisi” koʻkrak nishoni toʻgʻrisidagi Nizom tasdiqlansin (ilova qilinadi).

3. “Oʻzbekiston belgisi” koʻkrak nishoni tavsifi tasdiqlansin (ilova qilinadi).

1. “Oʻzbekiston belgisi” koʻkrak nishoni milliy maʼnaviyatimiz, madaniy merosimiz va umuminsoniy qadriyatlar zaminida yuksak vatanparvarlik tuygʻusini va mehnatsevarlik fazilatlarini oʻzida mujassamlashtirgan, Vatanimiz obroʻsini, shon-shuhrati va sharafini yuksaltirish yoʻlida xizmat qilayotgan, Oʻzbekistonda kelajagi buyuk davlat barpo etishda hamda mamlakatimiz ichki va tashqi hayotida faol ishtirok etayotgan fuqarolarga beriladi.

2. “Oʻzbekiston belgisi” koʻkrak nishoni, Oʻzbekiston Respublikasi fuqarosi boʻlmagan shaxslarga ushbu Nizomning birinchi bandida koʻrsatilgan xizmatlari uchun berilishi mumkin.

3. “Oʻzbekiston belgisi” koʻkrak nishoniga taqdim etish hokimiyat, vazirlik va idoralar hamda respublika jamoat tashkilotlari tomonidan amalga oshiriladi.

4. “Oʻzbekiston belgisi” koʻkrak nishoni Oʻzbekiston Respublikasi Prezidentining farmoni asosida beriladi.

5. “Oʻzbekiston belgisi” koʻkrak nishoni koʻkrakning chap tomoniga taqiladi.

6. “Oʻzbekiston belgisi” koʻkrak nishoni takroran berilmaydi.

7. “Oʻzbekiston belgisi” koʻkrak nishoni va guvohnomasi tantanali va oshkoralik vaziyatida Oʻzbekiston Respublikasi Prezidenti yoki uning nomidan tegishli rahbar xodimlar tomonidan topshiriladi.

“Oʻzbekiston belgisi” koʻkrak nishoni 1,0 mikron qalinlikdagi oltin bilan qoplangan 925 probali kumushdan tayyorlanadi va diametri 22 millimetrni tashkil etadigan halqadan iborat boʻladi.

Nishonning markazida mustaqillik ramzi — kumush tusdagi Humo qushi tasviri aks ettiriladi. Humo qushi ortidagi rangli emal bilan ishlangan fon Oʻzbekistonning goʻzalligi va boyligini ifodalaydi.

Yuqorida, Humo qushining tepasida Oʻzbekiston Davlat gerbining ramzi — musamman aks ettiriladi. Uning markazida diametri 2,5 millimetrli fianit kristali joylashtiriladi.

Humo qushini dafna novdalari oʻrab turadi.

Belgining ostki qismida, Humo qushining tagidagi oq fonda “O'ZBEKISTON” yozuvi bitilgan Oʻzbekiston Respublikasining bayrogʻi aks ettiriladi. Harflarning balandligi 0,8 millimetr.

Nishonning orqa tomoni tekis boʻlib, oʻrtasida burab mahkamlanadigan murvati bor.

Uning pastki qismida nishonning tartib raqami 1,0 millimetrli harflar bilan bitib qoʻyiladi.