Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmoniga muvofiq va Sanoatda, gaz taʼminoti hamda kon nazorati sohasida boshqaruv tuzilmasini yanada takomillashtirish va ishlarning bexatar olib borilishini nazorat qilish samaradorligini taʼminlash maqsadida:

1. Sanoatda va konchilikda ishlarning bexatar olib borilishini nazorat qilish agentligi Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi (“Sanoatkontexnazorat” davlat inspeksiyasi)ga aylantirilsin,

2. Quyidagilar Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasining asosiy vazifalari etib belgilansin:

yuridik va jismoniy shaxslar tomonidan Sanoatda ishlarni bexatar olib borish, gaz taʼminoti va undan foydalanish, yer osti boyliklaridan foydalanish va ularni muhofaza qilish, mineral xomashyolarni qayta ishlash va metallurgiya jihatidan ishlov berish, shuningdek konchilikda ishlarning geologiya-marksheyderlik taʼminoti boʻyicha qonun hujjatlari va normativ-texnik hujjatlar talablariga rioya etilishi yuzasidan davlat nazoratini amalga oshirish;

Sanoatda va kon nazoratini taʼminlash sohasida ishlarning bexatar olib borilishini oldini olish chora-tadbirlarini ishlab chiqish va amalga oshirish;

respublika gaz xoʻjaligi tizimida hamda koʻp kvartirali uylar va kommunal-maishiy obyektlarning gaz taʼminotida xavfsizlikni taʼminlash yuzasidan nazoratni amalga oshirish;

texnik xavfsizlik va yer osti boyliklarini muhofaza qilish masalalari boʻyicha ilmiy-texnik dasturlarni ishlab chiqishda ishtirok etish;

iqtisodiyotning tegishli sektorda ishlarning bexatar olib borilishini taʼminlash tizimini takomillashtirish yuzasidan takliflar tayyorlash;

Oʻzbekiston Respublikasining harbiylashtirilgan kon-qutqarish qismiga tezkor va uslubiy rahbarlik qilish.

3. Belgilab qoʻyilsinki, Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi qayta tashkil etilayotgan Sanoatda va konchilikda ishlarning bexatar olib borilishini nazorat qilish agentligining huquqiy vorisi hisoblanadi.

4. Oʻzbekiston Respublikasi Prezidentining “Oʻzbekiston Respublikasi Sanoatda va konchilikda ishlarning bexatar olib borilishini nazorat qilish davlat qoʻmitasini Sanoatda va konchilikda ishlarning bexatar olib borilishini nazorat qilish agentligiga aylantirish toʻgʻrisida” 2000-yil 7-fevraldagi PF–2535-son Farmoni oʻz kuchini yoʻqotgan deb hisoblansin.

5. Oʻzbekiston Respublikasi Vazirlar Mahkamasi bir hafta muddatda Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi faoliyatini tashkil etish masalalari boʻyicha qaror qabul qilsin.

6. Mazkur Farmonning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklansin.