Sud hokimiyatining mustaqilligini ta’minlash, sudyalarni tanlash va joy-joyiga qo‘yish ishlarini yanada takomillashtirish, sudyalik lavozimlariga yetuk, bilimdon va pok mutaxassislarni tavsiya etishda qonunchilik va ijtimoiy adolat tamoyillariga rioya etish maqsadida:

1. O‘zbekiston Respublikasi Prezidenti huzurida sudyalarni tanlash va lavozimlarga tavsiya etish bo‘yicha Oliy malaka Komissiyasi tuzilsin.

Uning tarkibi va Nizomi 1*, 2-ilovalarga muvofiq tasdiqlansin.

2. Komissiya o‘z faoliyatini O‘zbekiston Respublikasi Konstitutsiyasi, “Sudlar to‘g‘risida”gi Qonun, O‘zbekiston Respublikasi Prezidentining kadrlar siyosatini ro‘yobga chiqarishga qaratilgan farmon va farmoyishlari hamda mazkur Nizom asosida amalga oshiradi.

Komissiyaning asosiy vazifalari sudyalik lavozimlariga kadrlarni tanlash va joy-joyiga qo‘yishning demokratik asoslarini takomillashtirish, sudyalarni lavozimlarga tayinlash masalalarini hal etish chog‘ida qonunchilik va ijtimoiy adolat kafolatlarini, shuningdek sud hokimiyatining mustaqilligini ta’minlashdan iborat deb belgilansin.

3. Ushbu Farmon qabul qilinishi munosabati bilan O‘zbekiston Respublikasi Prezidentining 1999-yil 30-iyuldagi F-1038-sonli Farmoyishi o‘z kuchini yo‘qotgan deb hisoblansin.

4. Mazkur Farmonning bajarilishini nazorat qilish Davlat maslahatchisi O‘. Komilov zimmasiga yuklatilsin.