Isteʼmol tovarlari va xizmatlarning bozor narxlarini shakllantirish sharoitlarida aholi turmush darajasini qoʻllab-quvvatlash maqsadida:

1. 1994-yilning 1-noyabridan Oʻzbekiston Respublikasi aholisiga berilayotgan amaldagi har oylik kompensatsiya toʻlovlari 1,5 baravar — 100 soʻmdan 150 soʻmgacha koʻpaytirilsin.

2. Koʻrsatilgan kompensatsiyalarni toʻlashning amaldagi tartibi va shartlari saqlanib qolinsin.

3. Belgilab qoʻyilsinki, xoʻjalik hisobidagi korxonalar va tashkilotlarga kompensatsiyalar miqdori (150 soʻm)ning 50 foizi respublika budjeti hisobidan qoplanadi, daromad soligʻi boʻyicha budjet bilan hisob-kitoblar chogʻida ana shu miqdor istisno qilinadi.

4. Oʻzbekiston Respublikasi Moliya vazirligi uch kun muddatda mazkur Farmondan kelib chiqadigan oʻzgartirishlarni kompensatsiyalar toʻlashning muvaqqat tartibiga kiritsin va ularni vazirliklar, idoralar, konsernlar, korporatsiyalar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimlariga yetkazsin.

5. Oʻzbekiston Respublikasi Prezidentining 1994-yil 31-avgustdagi PF-940-son Farmonining 1 va 6-bandlari oʻz kuchini yoʻqotgan deb hisoblansin.

6. Mazkur Farmonning bajarilishini nazorat qilish Oʻzbekiston Respublikasi Vazirlar Mahkamasiga yuklansin.