Hujjat kuchini yo‘qotgan 21.04.2016

Oʻzbekiston Respublikasi Davlat bojxona qoʻmitasining

“Bojxona ombori” bojxona rejimi toʻgʻrisidagi nizomga oʻzgartirishlar kiritish haqida

[Oʻzbekiston Respublikasi Adliya vazirligi tomonidan 2013-yil 27-sentabrda roʻyxatdan oʻtkazildi, roʻyxat raqami 1318-2]

LexUZ sharhi

Mazkur qaror Oʻzbekiston Respublikasi Davlat bojxona qoʻmitasining 2016-yil 29-fevraldagi 01-02/15-08-sonli “Oʻzbekiston Respublikasi Davlat bojxona qoʻmitasi tomonidan qabul qilingan ayrim normativ-huquqiy hujjatlarni oʻz kuchini yoʻqotgan deb topish toʻgʻrisida”gi qaroriga (roʻyxat raqami 2774, 06.04.2016-y.) asosan oʻz kuchini yoʻqotgan.

Oʻzbekiston Respublikasi “Davlat bojxona xizmati toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda) 6-moddasi va “Tadbirkorlik faoliyati sohasidagi ruxsat berish tartib-taomillari toʻgʻrisida”gi Qonuniga (Oʻzbekiston Respublikasi Oliy Majlisi palatalarining Axborotnomasi, 2012-y., 12-son, 332-modda) muvofiq Oʻzbekiston Respublikasi Davlat bojxona qoʻmitasi qaror qiladi:

1. Oʻzbekiston Respublikasi Davlat bojxona qoʻmitasining 2004-yil 20-yanvardagi 01-02/12-3-son qarori (roʻyxat raqami 1318, 2004-yil 27-fevral) (Oʻzbekiston Respublikasi qonun hujjatlari toʻplami, 2004-y., 8-son, 103-modda) bilan tasdiqlangan “Bojxona ombori” bojxona rejimi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Davlat bojxona qoʻmitasi raisi Z. DUSANOV

Toshkent sh.,

2013-yil 26-avgust,

01-02/12-22-son

Oʻzbekiston Respublikasi Davlat bojxona qoʻmitasining 2013-yil 26-avgustdagi 01-02/12-22-son qaroriga
ILOVA

“Bojxona ombori” bojxona rejimi toʻgʻrisidagi nizomga kiritilayotgan oʻzgartirishlar

1. Muqaddima quyidagi tahrirda bayon etilsin:

“Mazkur Nizom Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda) va Vazirlar Mahkamasining 2003-yil 20-noyabrdagi 523-son “Bojxona ombori, erkin ombor va boj olinmaydigan savdo doʻkoni faoliyatini litsenziyalash toʻgʻrisidagi nizomlarni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2003-y., 22-son, 224-modda) muvofiq, tovarlarni bojxona ombori rejimiga joylashtirishda, bojxona omborida saqlashda va chiqarishda bojxona operatsiyalarini amalga oshirish hamda bojxona toʻlovlarini toʻlash tartibini belgilaydi.”.

2. 6-band quyidagi tahrirda bayon etilsin:

“6. Bojxona ombori rejimiga joylashtiriladigan tovarlar, mazkur Nizomning 1-ilovasida keltirilgan xususiyatlarni inobatga olgan holda Bojxona yuk deklaratsiyasini toʻldirish tartibi toʻgʻrisidagi yoʻriqnomaga (roʻyxat raqami 834, 1999-yil 3-noyabr) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 1999-y., 12-son) muvofiq deklaratsiyalanishi lozim.”.

3. 10-band quyidagi tahrirda bayon etilsin:

“10. Quyidagi hujjatlar bojxona yuk deklaratsiyasi rasmiylashtiriladigan bojxona postiga taqdim etilgan taqdirda, oʻz tashqi oʻlchamlari (gabaritlari) va xususiyatlaridan kelib chiqib, bojxona omboriga joylashtirish imkoniyati boʻlmagan tovarlar bojxona ombori rejimida bojxona ombori maqomiga ega boʻlmagan binolar va (yoki) ochiq maydonchalarga joylashtiriladi:

tovarlarning nomi va miqdori, ularni saqlash uchun moʻljallangan joy (aniq manzili) va saqlash uchun javobgar shaxslar (mansabi, familiyasi, ismi, otasining ismi) toʻgʻrisidagi maʼlumotlar aks ettirilgan xat;

tovarlarning yuk va tovar kuzatuv hujjatlari (yuk xati, konosament, spetsifikatsiya, hisob-faktura, invoys va hokazo);

bojxona yuk deklaratsiyasi;

Oʻzbekiston Respublikasi Bojxona kodeksining 111-moddasiga muvofiq bojxona toʻlovlari toʻlanishi taʼminlanganligini tasdiqlovchi hujjat (harbiy yuklar, insonparvarlik yordami, texnikaviy koʻmak sifatida va Oʻzbekiston Respublikasining xalqaro shartnomalari boʻyicha xalqaro, chet el hukumati moliya tashkilotlari tomonidan berilgan qarz (kredit) mablagʻlari, shuningdek grantlar hisobiga olib kelinayotgan tovarlar va Oʻzbekiston Respublikasining milliy valyutasi, xorijiy valyuta, qimmatbaho qogʻozlar bundan mustasno);

tovarlar saqlanadigan joyning chizmasi va fotosuratlari.

Tovarlar saqlanishi moʻljallangan binolar va (yoki) ochiq maydonchalar saqlanayotgan tovarlar va transport vositalariga nisbatan bojxona nazorati amalga oshirilishi, tovarlar va transport vositalari saqlanishi taʼminlanadigan tarzda joylashtirilgan boʻlishi, jihozlanishi va asbob-uskunalar bilan taʼminlanishi kerak hamda quyidagilarni istisno etishi lozim:

tovarlar saqlanayotgan hududga va tovarlarga begona shaxslarning (ombor xodimlari boʻlmagan, tovarlarga nisbatan vakolatlarga ega boʻlmagan shaxslarning) yaqinlashishi;

tovarlarning bojxona nazoratidan tashqariga tushirilishi va olib qoʻyilishi.

Bojxona rejimidagi tovarlarni saqlash uchun moʻljallangan bojxona ombori maqomiga ega boʻlmagan binolar va (yoki) ochiq maydonchalarga, ushbu Nizom bilan bojxona omborlariga qoʻyilgan talab va qoidalar tatbiq etiladi, mazkur Nizomning V va VIII boblari talab va qoidalari bundan mustasno.”.

4. 13-band quyidagi tahrirda bayon etilsin:

“13. 12-bandda koʻrsatilgan operatsiyalar bojxona organini xabardor qilgan holda bojxona ombori egasi ishtirokida oʻtkaziladi.”.

5. 18-bandning birinchi xatboshisidagi “bojxona organining ruxsatisiz” degan soʻzlar “tegishli bojxona rejimiga rasmiylashtirilmasdan” degan soʻzlar bilan almashtirilsin.

6. 26-band quyidagi tahrirda bayon etilsin:

“26. Tovarlarni bojxona ombori rejimida saqlash muddatlari qonun hujjatlari bilan belgilangan muddatlar doirasida bojxona omboriga tovar joylashtirgan shaxsning yozma soʻrovnomasi boʻyicha bojxona posti tomonidan uzaytiriladi. Soʻrovnoma belgilangan muddat oʻtishidan oʻn kun oldin berilishi lozim.”.

7. 29-band oʻz kuchini yoʻqotgan deb hisoblansin.

8. 34-band quyidagi tahrirda bayon etilsin:

“34. Tovarlarni bir bojxona omboridan boshqa bojxona omboriga olib oʻtish yuklarni bojxona nazorati ostida tashishga oid qonun hujjatlariga muvofiq amalga oshiriladi.”.

9. 36-banddan “bojxona organi bilan kelishib” degan soʻzlar chiqarib tashlansin.

10. 1-ilova ushbu oʻzgartirishlarning ilovasiga muvofiq tahrirda bayon etilsin.

“Bojxona ombori” bojxona rejimi toʻgʻrisidagi nizomga kiritilayotgan oʻzgartirishlarga
ILOVA

“Bojxona ombori” bojxona rejimi toʻgʻrisidagi nizomga
1-ILOVA

“Bojxona ombori” bojxona rejimiga tovarlarni joylashtirishda bojxona yuk deklaratsiyasining ayrim ustunlarini toʻldirishning xususiyatlari

Bojxona ombori bojxona rejimiga tovarlarni joylashtirishda deklarant bojxona yuk deklaratsiyasining quyidagi ustunlarini toʻldiradi:

1, 2, 3, 5, 6, 8, 13, 14, 15, 15a, 18, 19, 21, 22, 23, 25, 26, 28, 29, 31, 32, 33, 35, 36, 37, 38, 40, 41, 42, 44, 45, 46, 47, 49, 50, 53, 54, V va S.