Vazirlar Mahkamasi qayd etadiki, sogʻliqni saqlashni isloh qilish, respublikada kechiktirib boʻlmaydigan tibbiy yordam tizimini shakllantirish yuzasidan koʻrilayotgan chora-tadbirlarga qaramay, tezkor tibbiy yordam xizmatini tashkil etish va uning faoliyati masalalariga ayniqsa Toshkent shahrida yetarlicha eʼtibor berilmayapti.

Toshkent shahri tezkor tibbiy yordam stansiyasi, uning tuman boʻlinmalari ixtisoslashtirilgan avtotransport bilan yetarli miqdorda taʼminlanmagan, zamonaviy aloqa vositalariga ega emas. Tezkor tibbiy yordamning koʻplab ixtisoslashtirilgan brigadalari zamonaviy tibbiy uskunalar, zarur dori-darmonlar bilan taʼminlanmagan. Bir qancha viloyatlarda keyingi yillarda ixtisoslashtirilgan avtotransport parki yangilanmadi. Bularning barchasi aholiga koʻrsatilayotgan birinchi shoshilinch tibbiy yordam tezkorligi va sifatiga salbiy taʼsir koʻrsatmoqda.

Aholiga birinchi tibbiy yordam koʻrsatishning sifat darajasini va tezkorligini oshirish, tezkor tibbiy yordam xizmatining moddiy-texnika bazasini mustahkamlash, chet el investitsiyalarini ushbu sohaga keng jalb etish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vaziri F.Gʻ. Nazirovga tezkor tibbiy yordam xizmatlarini maxsus avtotransport va aloqa vositalari bilan jihozlash masalalarini hal etishda yetarlicha faollik koʻrsatmayotganligi koʻrsatib oʻtilsin. U tezkor tibbiy yordamning zamonaviy talablarga muvofiq tashkil etilishi, jihozlanishi va rivojlantirilishining ahvoli uchun shaxsan javobgar ekanligi toʻgʻrisida ogohlantirilsin.

2. Sogʻliqni saqlash tizimini isloh qilish Davlat dasturiga muvofiq Toshkent shahridagi Tez tibbiy yordam respublika markazidan hamda uning barcha viloyatlardagi va Qoraqalpogʻiston Respublikasidagi filiallaridan, markaziy tuman va shahar kasalxonalaridagi 167 tez tibbiy yordam boʻlimlaridan iborat zamonaviy tashxis uskunalari va tibbiy uskunalar bilan jihozlangan, sifat jihatidan yangi tez tibbiy yordam xizmati respublikada amalda tashkil etilganligi, oliy toifali tibbiyot hamshiralari tayyorlash tizimi tashkil etilganligi maʼlumot uchun qabul qilinsin.

3. Oʻzbekiston Respublikasi Sogʻliqni saqlash vazirligi Toshkent shahar hokimligi bilan birgalikda 2002-yilda tezkor tibbiy yordam shahar stansiyasi 1-ilovaga* muvofiq ixtisoslashtirilgan avtotransport va radiotelefon aloqasi uchun texnik uskunalar bilan jihozlanishini taʼminlasin.

Oʻzbekiston Respublikasi Moliya vazirligi Davlat budjeti parametrlarining 2002-yilga tasdiqlangan doiralarida ixtisoslashtirilgan avtotransport hamda radiotelefon aloqasi uchun asbob-uskunalar sotib olish yuzasidan xarajatlarni mablagʻ bilan taʼminlashga zarur miqdorda budjet mablagʻlari ajratsin.

4. Pochta va telekommunikatsiyalar agentligi va Oʻzbekiston Respublikasi Sogʻliqni saqlash vazirligi tomonidan ishlab chiqilgan Toshkent shahridagi tezkor tibbiy yordam xizmatini 2-ilovaga* muvofiq xorijiy grantlar hisobiga zamonaviy aloqa vositalari bilan jihozlash chora-tadbirlari maʼqullansin.

5. Oʻzbekiston Respublikasi Sogʻliqni saqlash vazirligi Makroiqtisodiyot va statistika vazirligi, Moliya vazirligi bilan birgalikda ikki oy muddatda 2003 — 2005-yillar davrida shoshilinch tibbiy yordam xizmati bilan oʻzaro hamkorlikda tezkor tibbiy yordam xizmatini rivojlantirish va jihozlashning oʻrta muddatli dasturini ishlab chiqsin va tasdiqlash uchun Vazirlar Mahkamasiga kiritsin. Unda:

tezkor tibbiy yordam stansiyalarini rivojlantirish va mustahkamlash, ularni zarur ixtisoslashtirilgan avtotransport, aloqa vositalari, zamonaviy tibbiyot uskunalari va asboblari, dori-darmonlar bilan jihozlash boʻyicha aniq chora-tadbirlar;

tezkor tibbiy yordam xizmatiga yuqori malakali vrachlar va oʻrta tibbiyot xodimlarini jalb etishni ragʻbatlantirish chora-tadbirlari;

mablagʻ bilan taʼminlashning zarur hajmlari va manbalarini, shu jumladan budjet mablagʻlarini, jalb etilayotgan imtiyozli xorijiy kreditlarni, homiylik mablagʻlarini aniq belgilash;

tezkor tibbiy yordam xizmatini qayta jihozlash uchun xorijiy mamlakatlar va xalqaro moliya institutlarining grantlarini jalb etish nazarda tutilsin.

6. Toshkent shahar hokimligi:

Oʻzbekiston Respublikasi Sogʻliqni saqlash vazirligi va Ichki ishlar vazirligi bilan birgalikda Toshkent shahar, Markaz-4 mavzesi, 17-a uyda joylashgan “03” markaziy dispetcherlik xizmati qisman egallab turgan binoni Toshkent shahar tezkor tibbiy yordam stansiyasi balansiga toʻliq oʻtkazish masalasini bir hafta muddatda koʻrib chiqsin va belgilangan tartibda hal etsin;

Toshkent shahar tezkor tibbiy yordam stansiyasining kichik stansiyalari uchun alohida binolar ajratsin;

Toshkent shahar tezkor tibbiy yordam stansiyasi huzurida Toshkent shahar hokimligiga qarashli avtobazalarni qayta tashkil etish yoʻli bilan sanitariya avtomashinalari uchun avtobaza tashkil etsin.

7. Oʻzbekiston Respublikasi Makroiqtisodiyot va statistika vazirligi Moliya vazirligi bilan birgalikda Toshkent shahar tezkor tibbiy yordam stansiyalari va kichik stansiyalari egallab turgan binolarni rekonstruksiya qilish va mukammal taʼmirlash uchun 2003-yilga kapital qoʻyilmalar zarur limitlarini va budjet mablagʻlarini nazarda tutsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va H.S. Karomatov zimmasiga yuklansin.