Qurilishda iqtisodiy islohotlarni chuqurlashtirishning 1998 — 2000-yillarga moʻljallangan Dasturiga muvofiq, shuningdek, kapital qurilishda boshqarish tizimini yanada takomillashtirish, qurilish sohasidagi boshqaruv tuzilmalarini monopoliyadan chiqarish va ixchamlashtirish, pudrat ishlari bozorini shakllantirish maqsadida:

1. Kapital qurilishda iqtisodiy islohotlar oʻtkazilishini muvofiqlashtiruvchi Respublika komissiyasi, Oʻzbekiston Respublikasi Davlat mulki qoʻmitasi, tegishli qurilish korporatsiyasi, uyushmasi va birlashmasi muassislarining quyidagilarni tugatish toʻgʻrisidagi taklifi qabul qilinsin:

Oʻzbekiston sanoat va xoʻjalik qurilishi — “Oʻzsanoatxoʻjalikqurilish” davlat korporatsiyasi;

Oʻzbekiston Respublikasi Vazirlar Mahkamasi huzuridagi Respublika ishlab chiqarish davlat-kooperativ qurilish birlashmasi — “Oʻzdehqonchilikqurilish”;

Oʻzbekiston Respublikasi Vazirlar Mahkamasi huzuridagi Respublika ishlab chiqarish davlat-kooperativ korxonalari uyushmasi — “Oʻzjamoaqurilish”.

Kapital qurilishda iqtisodiy islohotlar oʻtkazilishini muvofiqlashtiruvchi Respublika komissiyasi ikki hafta muddatda “Oʻzsanoatxoʻjalikqurilish” korporatsiyasini, “Oʻzdehqonchilikqurilish” birlashmasini va “Oʻzjamoaqurilish” uyushmasini tugatish boʻyicha belgilangan tartibda tugatuvchi komissiyalarni tuzsin.

2. Belgilab qoʻyilsinki, tugatilayotgan “Oʻzsanoatxoʻjalikqurilish” korporatsiyasi, “Oʻzdehqonchilikqurilish” birlashmasi va “Oʻzjamoaqurilish” uyushmasi tarkibiga kiruvchi pudrat qurilish trestlari, boshqarmalar, birlashmalar, sanoat va transport korxonalari hamda boshqa xoʻjalik yurituvchi subyektlar mustaqil yuridik shaxslar sifatida saqlab qolinadi va ular xoʻjalik faoliyatini belgilangan tartibda amalga oshiradilar.

3. Kapital qurilishda iqtisodiy islohotlarni oʻtkazilishini muvofiqlashtiruvchi Respublika komissiyasi tegishli hududiy komissiyalar bilan birga ikki hafta muddatda hududlar boʻyicha qurilish tashkilotlari tizimi va tuzilmasini takomillashtirishga oid takliflarni Vazirlar Mahkamasiga kiritsin, bunda ortiqcha boʻgʻinlar va boʻlinmalarni tugatishni, ishlab turgan pudrat qurilish tashkilotlarining tashkiliy tuzilmasini maʼqullangan namunaviy boshqaruv tuzilmasiga muvofiq holga keltirishni, keng koʻlamda aksiyalashni taʼminlangan holda ularni tashkiliy-huquqiy shakllari bundan buyon ham oʻzgartirib borilishini nazarda tutsin.

4. Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklari:

tegishli loyiha hujjatlari boʻlmagan va moliyalash manbalari tasdiqlanmagan obyektlar qurilishiga yoʻl qoʻymasinlar, qurilish qiymati oshib ketishiga olib keladigan unumsiz xarajatlarini keskin qisqartirish choralarini koʻrsinlar;

obyektlar qurilishiga, shu jumladan obyektlarni toʻliq qurib topshirish sharti bilan, buyurtmalarni tender (tanlov) asosida joylashtirish tizimi keng joriy etilishini taʼminlasinlar;

xususiy qurilish firmalari, kichik pudrat qurilish tashkilotlari barpo etish va ularning faoliyat koʻrsatishiga, pudrat ishlari bozori, qurilish mollari ulgurji bozorlarini shakllantirishga butun choralar bilan koʻmak bersinlar.

5. Oʻzbekiston Respublikasi Prezidentining “Oʻzbekiston sanoat va xoʻjalik qurilishi davlat korporatsiyasi (“Oʻzsanoatxoʻjalikqurilish”)ni tashkil qilishi toʻgʻrisida” 1992-yil 25-dekabrdagi PF-519-son Farmoni oʻz kuchini yoʻqotgan deb hisoblansin.

6. Oʻzbekiston Respublikasi Vazirlar Mahkamasi ikki hafta muddatda ushbu Farmonni amalga oshirish yuzasidan qaror qabul qilsin.