Oʻzbekiston Respublikasi Prezidentining 2012-yil 25-dekabrdagi PQ-1887-son “Oʻzbekiston Respublikasining 2013-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2012-y., 52-son, 587-modda) muvofiq Oʻzbekiston Respublikasi Mehnat va aholini ijtimoiy muhofaza qilish vazirligi, Xalq taʼlimi vazirligi va Moliya vazirligi qaror qiladilar:

1. Uyda ijtimoiy yordam xizmati xodimlari hamda nogiron bolalarni uyida oʻqitganlik uchun umumtaʼlim maktablarining oʻqituvchilariga yoʻl haqi kompensatsiyasi tayinlash va toʻlash tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Ushbu Nizom Oʻzbekiston Respublikasi Prezidentining 2012-yil 25-dekabrdagi PQ-1887-son “Oʻzbekiston Respublikasining 2013-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2012-yil, 52-son, 587-modda) muvofiq uyda ijtimoiy yordam xizmati xodimlariga, shuningdek nogiron bolalarni va Oʻzbekiston Respublikasi Vazirlar Mahkamasining 1994-yil 29-sentabrdagi 490-son “Xalq taʼlimi xodimlari mehnatiga haq toʻlash shartlarini tartibga solish toʻgʻrisida”gi qaroriga koʻra uyda yakka tartibda oʻqitiladigan bolalarni (bundan buyon matnda – bolalar deb yuritiladi) uyida oʻqitganlik uchun umumtaʼlim maktablarining oʻqituvchilariga yoʻl haqi kompensatsiyasi tayinlash va toʻlash tartibini belgilaydi.

1. Uyda ijtimoiy yordam xizmati xodimlari hamda bolalarni uyida oʻqitganlik uchun umumtaʼlim maktablarining oʻqituvchilariga oylik yoʻl kompensatsiyasi miqdori eng kam oylik ish haqining 100 foizi miqdorida belgilanadi.

2. Kompensatsiya:

oʻzgalar yordamiga muhtoj yolgʻiz fuqarolarga uyida xizmat koʻrsatish bilan band boʻlgan tuman (shahar) bandlikka koʻmaklashish va aholini ijtimoiy muhofaza qilish markazlarining ijtimoiy xodimlariga (bundan buyon matnda – ijtimoiy xodimlar deb yuritiladi);

bolalarni uyida oʻqitadigan barcha turdagi umumtaʼlim maktablari, shu jumladan maktab-internatlarining oʻqituvchilariga (bundan buyon matnda – maktab oʻqituvchilari deb yuritiladi) tayinlanadi.

3. Kompensatsiyani tayinlash:

ijtimoiy xodimlarga – ish vaqti oylik meʼyorining amalda ishlangan vaqtidan kelib chiqib;

maktab oʻqituvchilariga – maktabdan oʻqitilayotgan oʻquvchining yashash joyigacha kamida 1,5 kilometr masofa boʻlganda uyda oʻqitilayotgan bir nafar oʻquvchi uchun eng kam oylik ish haqining 100 foizi miqdorida amalga oshiriladi.

Bir nafar uyda oʻqitilayotganga biriktirilgan bir nechta oʻqituvchilarga kompensatsiya ularning har oyda amalda oʻtkazadigan oʻquv soatlari ulushidan kelib chiqqan holda uyda oʻqitilayotganlarning oʻquv rejasidagi oʻquv soatlarining umumiy miqdoriga mutanosib ravishda belgilanadi.

Bunda, har bir ijtimoiy xodim yoki maktab oʻqituvchisi uchun kompensatsiyaning umumiy miqdori eng kam oylik ish haqining 100 foizidan oshmasligi lozim.

4. Uyda oʻqitiladigan bolalar roʻyxati, shuningdek ularning maktabga biriktirilishi xalq taʼlimi muassasalarini metodik taʼminlash va faoliyatini tashkil etish tuman (shahar) boʻlimlari tomonidan tasdiqlanadi.

Bunda, uyda oʻqitiladigan bolalar faqat ularning yashash joyi mikrouchastkasidagi maktablarga biriktiriladi.

5. Kompensatsiyani tayinlashga:

ijtimoiy xodimlar uchun – tuman (shahar) bandlikka koʻmaklashish va aholini ijtimoiy muhofaza qilish markazi direktorining ijtimoiy xodimga yolgʻiz fuqarolarni biriktirish toʻgʻrisidagi buyrugʻi;

maktab oʻqituvchilari uchun – maktab direktorining buyrugʻi asos boʻladi.

6. Kompensatsiyani toʻlash oʻtgan oy uchun oyning ikkinchi yarmi oylik ish haqini toʻlash bilan bir vaqtda, alohida toʻlov qaydnomasi boʻyicha amalga oshiriladi.

7. Ijtimoiy xodimlar va maktab oʻqituvchilari taʼtilda, shuningdek vaqtinchalik mehnatga layoqatsiz boʻlgan davr uchun kompensatsiya toʻlanmaydi.

8. Oʻzbekiston Respublikasi Soliq kodeksi 171-moddasi ikkinchi qismi 8-bandiga muvofiq (Oʻzbekiston Respublikasi qonun hujjatlari toʻplami, 2007-yil, 52 (I)-son) ushbu Nizomning 1-bandida belgilangan kompensatsiya miqdori chegarasida ijtimoiy xodimlar va maktab oʻqituvchilarining daromadi sifatida qaralmaydi va jismoniy shaxslardan olinadigan daromad soligʻi, yagona ijtimoiy toʻlov va fuqarolar sugʻurta badallari solinmaydi.

9. Kompensatsiyani toʻlash bilan bogʻliq boʻlgan xarajatlar budjet tashkilotlarining xarajatlar smetasida nazarda tutilgan Davlat budjeti mablagʻlari hisobidan amalga oshiriladi.

10. Kompensatsiyaning toʻgʻri tayinlanishi va toʻlanishini nazorat qilish Oʻzbekiston Respublikasi Moliya vazirligi Nazorat-taftish bosh boshqarmasi va uning joylardagi hududiy boshqarmalari tomonidan amalga oshiriladi.