Oʻzbekiston paxta tolasining jahon bozoridagi raqobatbardoshligini taʼminlash maqsadida, xorijiy isteʼmolchilarning paxta tolasi toylarining tashqi koʻrinishiga va oʻralishiga nisbatan tavsiyalarini hisobga olgan holda Vazirlar Mahkamasi qaror qiladi:

1. “Oʻzpaxtasanoat” uyushmasi tomonidan:

“Paxtasanoat Ilmiy Markazi” masʼuliyati cheklangan jamiyat mutaxassislari bilan birgalikda mamlakatimizda va chet elda ishlab chiqarilgan oʻrash va bogʻlash materiallarini izlash, sinovdan oʻtkazish va parametrlarini maqbullashtirish boʻyicha kompleks ishlar amalga oshirilganligi;

“Nantong Yufeng Plastic Packing Co., Ltd” kompaniyasi (XXR) tomonidan ishlab chiqarilgan oʻrash va bogʻlash materiallarining sinovlari ijobiy natijalar berganligi hamda ularni respublika hududida ishlab chiqarishni mahalliylashtirish boʻyicha texnik va texnologik parametrlarni ishlab chiqish tugallanganligi maʼlumot uchun qabul qilinsin.

2. Quyidagilarning:

“Mustaqil Oʻzbekistonning 5 yilligi nomli Yangiyoʻl paxta tozalash zavodi” ochiq aksiyadorlik jamiyati va “Chinoz paxta tozalash zavodi” ochiq aksiyadorlik jamiyati aksiyadorlari umumiy yigʻilishining “Mustaqil Oʻzbekistonning 5 yilligi nomli Yangiyoʻl paxta tozalash zavodi” ochiq aksiyadorlik jamiyatini “Chinoz paxta tozalash zavodi” ochiq aksiyadorlik jamiyatiga birlashtirish yoʻli bilan “Mustaqil Oʻzbekistonning 5 yilligi nomli Yangiyoʻl paxta tozalash zavodi” ochiq aksiyadorlik jamiyatini qayta tashkil etish, “Chinoz paxta tozalash zavodi” ochiq aksiyadorlik jamiyatining ustav fondida kamida 51 foiz davlat ulushini saqlab qolish va uni “Toshkentpaxtasanoat” hududiy aksiyadorlik birlashmasining ustav fondiga berish;

“Oʻzpaxtasanoat” uyushmasi, Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi va “Chinoz paxta tozalash zavodi” ochiq aksiyadorlik jamiyatining “Mustaqil Oʻzbekistonning 5 yilligi nomli Yangiyoʻl paxta tozalash zavodi” ochiq aksiyadorlik jamiyatining mol-mulkining bir qismi negizida 2013-yilning 1-choragidan boshlab polietilenteraftolat lenta va yumshoq polietilen konteynyerlar ishlab chiqarish boʻyicha masʼuliyati cheklangan jamiyat shaklida yuridik shaxs tashkil etish;

“Oʻzpaxtasanoat” uyushmasi, Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligining “Oʻzsanoatmashimpeks” davlat-aksiyadorlik tashqi kompaniyasi tomonidan respublika hududida polietilenteraftolat lenta va yumshoq polietilen konteynyerlarni ishlab chiqarish boshlangunga qadar 2012-yil noyabr — 2013-yil yanvar oylarida paxta tozalash korxonalarini oʻrash va bogʻlash materiallari bilan taʼminlash uchun 13,226 mln AQSh dollari qiymatidagi 2,3 million dona sarflash materiallari (polietilenteraftolat lenta va yumshoq polietilen konteynyerlar va paxta tolasi toylarini paketlash uchun uskunalar), majburiy tartibda yuklasholdi inspeksiyasi oʻtkazgan holda yetkazib berishga “Nantong Yufeng Plastic Packing Co., Ltd” kompaniyasi (XXR) bilan kontrakt tuzish toʻgʻrisidagi taklifiga rozilik berilsin.

3. Quyidagilar:

ushbu qaror 2-bandining uchinchi xatboshida koʻrsatilgan, tashkil etilayotgan yuridik shaxsning muassislari etib, — “Oʻzpaxtasanoat” uyushmasi, “Paxtasanoat” hududiy aksiyadorlik birlashmalari va “Chinoz paxta tozalash zavodi” ochiq aksiyadorlik jamiyati;

ushbu qaror 2-bandining uchinchi xatboshida koʻrsatilgan, tashkil etilayotgan yuridik shaxs ustav fondini moliyalashtirish manbalari etib, — “Oʻzpaxtasanoat” uyushmasi, “Paxtasanoat” hududiy aksiyadorlik birlashmalarining oʻz mablagʻlari;

ushbu qaror 2-bandining toʻrtinchi xatboshida koʻrsatilgan sarflash materiallarini import qilish boʻyicha xaridlarni moliyalashtirish manbalari etib, — “Oʻzpaxtasanoat” uyushmasining milliy valyutadagi oʻz mablagʻlari belgilansin.

4. Oʻzbekiston Respublikasi Markaziy bankiga “Agrobank” aksiyadorlik-tijorat banki bilan birgalikda “Oʻzpaxtasanoat” uyushmasi tomonidan taqdim etiladigan buyurtmalarga muvofiq import boʻyicha sarflash materiallari uchun hisob-kitoblarni amalga oshirishga “Oʻzpaxtasanoat” uyushmasining soʻm mablagʻlari oʻz vaqtida konvertatsiya qilinishini taʼminlash tavsiya etilsin.

5. Mazkur qarorning bajarilishini nazorat qilish Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.