175-сон 19.06.2012. Barkamol avlodni tarbiyalashda oila instituti va fuqarolarning oʻzini oʻzi boshqarish organlarining taʼlim muassasalari bilan oʻzaro hamkorligini yanada rivojlantirish chora-tadbirlari toʻgʻrisida

Hujjat kuchini yo‘qotgan 01.09.2024

Oʻzbekiston Respublikasi Vazirlar Mahkamasining

qarori

BARKAMOL AVLODNI TARBIYALASHDA OILA INSTITUTI VA FUQAROLARNING OʻZINI OʻZI BOSHQARISH ORGANLARINING TAʼLIM MUASSASALARI BILAN OʻZARO HAMKORLIGINI YANADA RIVOJLANTIRISH CHORA-TADBIRLARI TOʻGʻRISIDA

LexUZ sharhi

Mazkur qaror Oʻzbekiston Respublikasi Vazirlar Mahkamasining 2024-yil 6-maydagi 266-sonli “Oʻzbekiston Respublikasi Hukumatining ayrim qarorlarini oʻz kuchini yoʻqotgan deb hisoblash toʻgʻrisida”gi qaroriga asosan 2024-yil 1-sentabrdan oʻz kuchini yoʻqotadi.

Jismonan sogʻlom, maʼnaviy yetuk va har tomonlama rivojlangan barkamol avlodni tarbiyalashda oila instituti, ota-onalar va fuqarolarning oʻzini oʻzi boshqarish organlarining taʼlim muassasalari bilan oʻzaro hamkorligini mustahkamlash, shuningdek, Oʻzbekiston Respublikasi Prezidentining “Mustahkam oila yili” Davlat dasturi toʻgʻrisida” 2012-yil 27-fevraldagi PQ-1717-son qarorini bajarish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi hamda Respublika “Mahalla” Fondining Oʻzbekiston Respublikasi Xalq taʼlimi vazirligi huzurida “Oila-mahalla-taʼlim muassasasi” hamkorligi Jamoat kengashini (keyingi oʻrinlarda Jamoat kengashi deb ataladi) hamda Qoraqalpogʻiston Respublikasi Xalq taʼlimi vazirligi, Toshkent shahar va viloyatlar xalq taʼlimi boshqarmalari huzurida “Oila-mahalla-taʼlim muassasasi” hamkorligi hududiy jamoat kengashlarini (keyingi oʻrinlarda hududiy jamoat kengashlari deb ataladi) tuzish toʻgʻrisidagi takliflari;

Jamoat kengashining tarkibi 1-ilovaga*, shuningdek hududiy jamoat kengashlarining namunaviy tarkibi 2-ilovaga muvofiq maʼqullansin.

* 1-ilova berilmaydi.

2. Jamoat kengashining quyidagi muhim vazifalarni amalga oshirishi maʼlumot uchun qabul qilinsin:

oila, umumtaʼlim maktablari, oʻrta maxsus, kasb-hunar taʼlimi muassasalari (keyingi oʻrinlarda taʼlim muassasalari deb ataladi) va mahalla hamkorligining samaradorligi va natijadorligini taʼminlash;

oila, mahalla, taʼlim muassasalari hamkorligini yanada kuchaytirishga doir uslubiy asoslarni yaratishni tashkil etish;

ota-onalarning farzandlar tarbiyasidagi oʻrni, majburiyati, masʼuliyati va farzandlar bilan oʻzaro munosabatlarini mustahkamlashga koʻmaklashish;

taʼlim muassasalaridagi taʼlim-tarbiya sifatini oʻrganish va ularni yanada takomillashtirishga oid tadbirlarni amalga oshirish;

qonunchilik talablaridan kelib chiqib taʼlim muassasalariga yaqin hududlarda alkogolli va tamaki mahsulotlari sotilishiga yoʻl qoʻymaslik boʻyicha jamoatchilik nazoratini oʻrnatish;

taʼlim tizimidagi islohotlar haqida ota-onalar va keng jamoatchilikning uzviy maʼlumotga ega boʻlishlarini taʼminlash;

oʻquvchi-yoshlarning zararli odatlar yoʻliga kirishiga sabab boʻlayotgan omillarga qarshi manzilli profilaktik tadbirlarni amalga oshirish;

taʼlim-tarbiya jarayonini hamda ushbu sohaga oid normativ-huquqiy hujjatlarni takomillashtirish yuzasidan takliflarni belgilangan tartibda tegishli davlat organlariga kiritish;

hududiy jamoat kengashlari faoliyatini muvofiqlashtirib borish.

3. Oʻzbekiston Respublikasi Xalq taʼlimi vazirligi, Oʻrta maxsus, kasb-hunar taʼlimi markazi va Respublika “Mahalla” Fondi:

bir oy muddatda Jamoat kengashining nizomini ishlab chiqsinlar va tasdiqlasinlar;

bir oy muddatda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda hududiy jamoat kengashlarining namunaviy nizomini hamda tarkibini tasdiqlasinlar.

4. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi, Respublika “Mahalla” Fondi, Oʻzbekiston Xotin-qizlar qoʻmitasi, Respublika “Oila” ilmiy-amaliy markazi, “Kamolot” yoshlar ijtimoiy harakati tomonidan tegishli vazirlik va idoralar bilan birgalikda ishlab chiqilgan “Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar majmuasi 3-ilovaga muvofiq tasdiqlansin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

har bir tuman (shahar) hokimliklari tomonidan “Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar majmuasida belgilangan vazifalarning toʻliq, sifatli va oʻz vaqtida bajarilishi yuzasidan tizimli nazorat oʻrnatsinlar;

hududiy jamoat kengashlari faoliyatini samarali tashkil etishga koʻmaklashsinlar.

Oldingi tahrirga qarang.

6. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Kasb-hunar taʼlimi markazi, “Mahalla” xayriya jamoat fondi, Oʻzbekiston Xotin-qizlar qoʻmitasi, Vazirlar Mahkamasi huzuridagi “Oila” ilmiy-amaliy tadqiqot markazi, Oʻzbekiston yoshlar ittifoqi, tegishli vazirliklar va idoralar “Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar majmuasida belgilangan vazifalarning bajarilishi yuzasidan oʻz tizimlarida monitoring oʻrnatsinlar, ularning ijrosini yarim yil va yil yakunlari boʻyicha majlislarda muhokama qilib borsinlar.

(6-band Oʻzbekiston Respublikasi Vazirlar Mahkamasining 2018-yil 3-maydagi 327-sonli qarori tahririda — Qonun hujjatlari maʼlumotlari milliy bazasi, 14.05.2018-y., 09/18/327/1173-son)

7. Oʻzbekiston milliy teleradiokompaniyasi, Milliy axborot agentligi va boshqa ommaviy axborot vositalariga oila, mahalla va taʼlim muassasalari hamkorligida amalga oshirilayotgan ishlarni keng yoritish tavsiya etilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 19-iyun,

175-son

Vazirlar Mahkamasining 2012-yil 19-iyundagi 175-son qaroriga
2-ILOVA

Qoraqalpogʻiston Respublikasi Xalq taʼlimi vazirligi, Toshkent shahar va viloyatlar xalq taʼlimi boshqarmalari huzuridagi “Oila-mahalla-taʼlim muassasasi” hamkorligi hududiy jamoat kengashlarining namunaviy

TARKIBI

Oldingi tahrirga qarang.

1.‎	Qoraqalpogʻiston Respublikasi Xalq taʼlimi vaziri, viloyatlar ‎va Toshkent shahar xalq taʼlimi boshqarmalari boshligʻi, hududiy ‎Jamoat kengashi raisi‎
2.‎	Qoraqalpogʻiston Respublikasi, viloyatlar va Toshkent shahar ‎oʻrta maxsus, kasb-hunar taʼlimi boshqarmasi boshligʻi, hududiy ‎Jamoat kengashi hamraisi‎
3.‎	“Mahalla” xayriya jamoat Fondi Qoraqalpogʻiston Respublikasi, ‎viloyatlar va Toshkent shahar boʻlimi boshqaruvi raisi‎
4.‎	Qoraqalpogʻiston Respublikasi Sogʻliqni saqlash vaziri, viloyatlar ‎va Toshkent shahar sogʻliqni saqlash boshqarmasi boshligʻi‎
5.‎	Qoraqalpogʻiston Respublikasi, viloyatlar va Toshkent shahar ‎Xotin-qizlar qoʻmitasi raisining oʻrinbosari‎
6.‎	Qoraqalpogʻiston Respublikasi Ichki ishlar vaziri, viloyatlar ‎va Toshkent shahar ichki ishlar boshqarmasi boshligʻi oʻrinbosari‎
7.‎	Qoraqalpogʻiston Respublikasi, viloyatlar va Toshkent shahar ‎hududiy teleradiokompaniyasi direktori‎
8.‎	Qoraqalpogʻiston Respublikasi, viloyatlar va Toshkent shahar ‎Matbuot va axborot boshqarmasi boshligʻi‎
9.‎	“Kamolot” yoshlar ijtimoiy harakati Qoraqalpogʻiston Respublikasi, ‎viloyatlar va Toshkent shahar kengashi raisi‎
10.‎	Respublika Maʼnaviyat va maʼrifat markazining hududiy boʻlimi rahbari
11.‎	Qoraqalpogʻiston Respublikasi Xalq taʼlimi vaziri, viloyatlar ‎va Toshkent shahar xalq taʼlimi boshqarmasi boshligʻining oʻrinbosari‎
12.‎	Jamoatchilik vakillari‎
13.‎	Qoraqalpogʻiston Respublikasi Xalq taʼlimi vazirligi, viloyatlar ‎va Toshkent shahar xalq taʼlimi boshqarmasi maʼnaviy-axloqiy ‎tarbiya boʻlimi boshligʻi, Kengash kotibi‎

Izoh: hududiy Jamoat kengashi aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoxud zimmasiga tegishli funksiyalarni bajarish yuklangan shaxslar kiritiladi.

(2-ilova Oʻzbekiston Respublikasi Vazirlar Mahkamasining 2017-yil 16-sentabrdagi 731-sonli qarori tahririda — OʻR QHT, 2017-y., 38-son, 1040-modda)

Vazirlar Mahkamasining 2012-yil 19-iyundagi 175-son qaroriga
3-ILOVA

“Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar

MAJMUASI

Oldingi tahrirga qarang.

T/r‎	Tadbirlar‎	Masʼullar‎	Amalga oshirish mexanizmi‎	Ijro muddati‎
‎‎I. Oila, mahalla, taʼlim muassasalari hamkorligini yanada kuchaytirishga qaratilgan metodologik asoslarni yaratish
1.‎	Ota-onalarning farzandlar tarbiyasidagi oʻrni, majburiyati, masʼuliyati va farzandlar bilan oʻzaro munosabatlarini mustahkamlashga doir uslubiy qoʻllanma va tavsiyalarni tayyorlash, joylarga yetkazish.‎	“Oila” ilmiy-amaliy markazi, Maʼnaviyat targʻibot markazi, Milliy gʻoya va mafkura ilmiy- amaliy markazi, “Mahalla” Fondi, Xotin-qizlar qoʻmitasi, Respublika bolalar ijtimoiy moslashuvi markazi (RBIMM), “Kelajak ovozi” YOTM, “Kamolot” YOIH, manfaatdor vazirliklar va idoralar‎	1. Uslubiy qoʻllanma va tavsiyalar loyihasini tayyorlash. ‎2. Tayyorlangan loyihalarni oʻrnatilgan tartibda kelishuvdan oʻtkazish. ‎3. Chop etish va joylarga taqsimot asosida yetkazish. ‎	2012-yil 20-iyul ‎ ‎2012-yil 1-avgust ‎ ‎2012-yil 30-avgust ‎
2.‎	Umumiy oʻrta taʼlim maktablari 1 — 4-sinflarida “Bola tarbiyasi — kelajak mevasi”, 5 — 7-sinflarida “Ilm ol — hunar oʻrgan!”, 8-9-sinflarida va Oʻrta maxsus kasb-hunar taʼlim muassasalari 1-bosqichlarida “Tanlagan kasbing — sening kelajaging!” hamda 2-3-bosqichlarida “Yetuk mutaxassis — kelajak mevasi!” mavzularida “Otalar majlisi”ni oʻtkazish tartibini ishlab chiqish va joriy etish. ‎	Xalq taʼlimi vazirligi (XTV), Oʻrta maxsus, kasb-hunar taʼlimi markazi (OʻMKHTM), “Mahalla” Fondi, Xotin-qizlar qoʻmitasi, “Kamolot” YOIH manfaatdor vazirliklar va idoralar‎	1. Tanlangan mavzular boʻyicha “Otalar majlisi”ni oʻtkazish tartibi loyihalarini tayyorlash. ‎2. Oʻrnatilgan tartibda tasdiqlash va ijroga yoʻnaltirish. ‎	2012-yil 1-avgust ‎ ‎2012-yil sentabr ‎
3.‎	Yoshlarning psixologik xususiyatlaridan kelib chiqqan holda, pedagoglar, psixologlar va huquqshunoslar hamkorligida oʻquvchilarning huquqiy bilimlarini mustahkamlashga qaratilgan huquqiy axborotlarni oʻz ichiga olgan buklet, maʼlumotnoma va tarqatma materiallar ishlab chiqish va joylarga yetkazish.‎	XTV, OOʻMTV, OʻMKHTM, Adliya vazirligi, Ichki ishlar vazirligi, Respublika Maʼnaviyat targʻibot markazi, Milliy gʻoya va mafkura ilmiy-amaliy markazi, Davlat boshqaruvi akademiyasi (DBA), RBIMM, “Kelajak ovozi” YOTM, “Oila” ilmiy-amaliy markazi ‎	Huquqiy bilimlarni oshirishga doir buklet, maʼlumotnoma va tarqatma materiallarni ishlab chiqish va joylarga yetkazish. ‎	2012-yil 30-avgust ‎
4.‎	Qizlar orasida sogʻlom turmush tarzini targʻib qilish, salomatlik masalalari va balogʻat davri oʻzgarishlari toʻgʻrisidagi maʼlumotlar asosida “Orasta qiz yon daftarchasi” nomli qoʻllanmani ishlab chiqish va amaliyotga joriy etish.‎	“Oila” ilmiy-amaliy markazi, Xotin-qizlar qoʻmitasi, Sogʻliqni saqlash vazirligi (SSV), “Sogʻlom avlod uchun” xalqaro Fondi, “Kamolot “ YOIH, Adliya vazirligi, XTV, OOʻMTV, OʻMKHTM ‎	1. “Orasta qiz yon daftarchasi” nomli qoʻllanma loyihasini tayyorlash. ‎2. Manfaatdor vazirliklar va idoralar bilan kelishish, chop etib joylarga yetkazish. ‎	2012-yil 20-avgust ‎ ‎2012-yil sentabrdan boshlab ‎
II. “Oila-mahalla-taʼlim muassasasi” Jamoat kengashlarini shakllantirish va ularning faoliyatini tashkil etish ‎‎
5.‎	“Oila-mahalla-taʼlim muassasasi” hamkorligi Jamoat kengashlarini tuzish.‎	XTV, OOʻMTV, OʻMKHTM, IIV, SSV, “Mahalla” Fondi, Xotin-qizlar qoʻmitasi, “Kamolot” YOIH, “Oila” ilmiy-amaliy markazi, Respublika Maʼnaviyat targʻibot markazi, Milliy gʻoya va mafkura ilmiy-amaliy markazi, “Kelajak ovozi” YOTM, QR Vazirlar Kengashi,viloyatlar va Toshkent shahar hokimliklari ‎	1. Oʻzbekiston Respublikasi Xalq taʼlimi vazirligi huzurida “Oila-mahalla-taʼlim muassasasi” hamkorligi Jamoat kengashini tuzish. ‎2. Qoraqalpogʻiston Respublikasi Xalq taʼlimi vazirligi, Toshkent shahar va viloyatlar xalq taʼlimi boshqarmalari huzurida “Oila-mahalla-taʼlim muassasasi” hamkorligi hududiy jamoat kengashlarini tuzish.	2012-yil iyul ‎
6.‎	Jamoat kengashi, ota-onalar tomonidan taʼlim muassasalaridagi taʼlim-tarbiya sifatini oʻrganish va ularni yanada takomillashtirishga doir tadbirlarni amalga oshirishdagi faolligini oshirish. ‎	“Mahalla” Fondi, XTV, OOʻMTV, Kasb-hunar taʼlimi markazi, Xotin-qizlar qoʻmitasi, Yoshlar ittifoqi, “Oila” ilmiy-amaliy tadqiqot markazi, manfaatdor vazirliklar va idoralar ‎	1. Taʼlim muassasalaridagi taʼlim-tarbiya sifatini tubdan oʻrganish. ‎2. Oʻrganish natijalariga koʻra taʼlim muassasalaridan takliflar olish va ishlarni takomillashtirish choralarini koʻrish. ‎3. Ota-onalarning taʼlim-tarbiya sifatini oshirishga doir tadbirlarni amalga oshirishda faol qatnashishini taʼminlash. ‎	2012-yil 30-avgust ‎ ‎2012-yil sentabr ‎ ‎ ‎ ‎muntazam ravishda ‎
7.‎	Taʼlim muassasalaridagi taʼlim-tarbiya jarayoni samaradorligini oshirish, oʻquvchilar davomatini yaxshilash bilan bogʻliq masalalarda Jamoat kengashi va mahallaning oʻrnini kuchaytirish.‎	XTV, OOʻMTV, Kasb-hunar taʼlimi markazi, IIV, “Mahalla” Fondi, “Oila” ilmiy-amaliy tadqiqot markazi, Yoshlar ittifoqi	1. Taʼlim muassasalari rahbarlari, Jamoat kengashi, mahalla va ota-onalar hamkorligida taʼlim-tarbiya jarayoni samaradorligini oshirish yoʻllari va oʻquvchilarning darsga qatnash davomatini uzviy tahlil qilib borish. ‎2. Dars qoldirgan, oʻqishga qatnamaydigan oʻquvchilar, ularning ota-onalari bilan tushuntirish va sogʻlomlashtirish ishlarini olib borish. ‎	2012-yil sentabrdan boshlab ‎ ‎ ‎ ‎ ‎ ‎ ‎muntazam ravishda ‎
8.‎	Fuqarolarning oʻzini oʻzi boshqarish organlari huzuridagi yoshlar bilan ishlash komissiyalari faoliyati samaradorligini yanada oshirish.‎	“Mahalla” Fondi, Yoshlar ittifoqi, OOʻMTV, XTV, OʻMKHTM, Madaniyat va sport ishlari vazirligi‎	1. Fuqarolarning oʻzini oʻzi boshqarish organlari huzuridagi yoshlar bilan ishlash komissiyasi faoliyatini tanqidiy-tahliliy oʻrganish, vazifalarini aniq belgilash va samaradorligini yanada oshirish. ‎2. Tashabbuskor yoshlarni taʼlim-tarbiya masalalarini oʻrganishga jalb qilish va hisobotlarini eshitishni yoʻlga qoʻyish. ‎	2012-yil 20-iyuldan ‎muntazam ravishda ‎ ‎ ‎ ‎ ‎‎har chorakda ‎
9.‎	Taʼlim tizimidagi yutuqlar va islohotlar haqida ota-onalarning keng maʼlumotga ega boʻlishlarini taʼminlash maqsadida “Ota-onalar universiteti” faoliyatini kuchaytirish.‎	XTV, Kasb-hunar taʼlimi markazi, “Mahalla” Fondi, “Oila” ilmiy-amaliy tadqiqot markazi, Yoshlar ittifoqi, QR Vazirlar Kengashi, viloyatlar va Toshkent shahar hokimliklari ‎	1. “Ota-onalar universiteti” faoliyati samaradorligini oshirish choralarini belgilash. ‎2. “Ota-onalar universiteti” faoliyatiga oid hisobotlarni eshitishni yoʻlga qoʻyish. ‎	2012-yil 20-avgust ‎ ‎ ‎2012-yil sentabrdan boshlab ‎muntazam ravishda ‎
10.‎	Taʼlim muassasalari va mahallalarda “Oila — muqaddas tushuncha”, “Oilaviy anʼanalar”, “Mahalla va oila maʼnaviyatining mustahkamligi”, “Ota va ona — oila tayanchi”, “Oilada sharqona sadoqat” mavzularida suhbatlar va savol-javob kechalarini tashkil etish.	“Mahalla” Fondi, XTV, OOʻMTV, Kasb-hunar taʼlimi markazi, “Nuroniy” jamgʻarmasi, Xotin-qizlar qoʻmitasi, RBIMM, “Kelajak ovozi” YOTM, Yoshlar ittifoqi, Respublika Maʼnaviyat va maʼrifat markazi, “Oila” ilmiy-amaliy tadqiqot markazi‎	1. Soha mutaxassislari, malakali professor-oʻqituvchilar, oliy taʼlim muassasalarining iqtidorli talabalari hamda namunali oilalar vakillaridan iborat targʻibot guruhlarini shakllantirish. ‎2. Targʻibot guruhlari uchun oʻquv seminari tashkil qilish. Ularni zarur qoʻllanma va maʼruza matnlari bilan taʼminlash. ‎3. Targʻibot guruhlari aʼzolarini hududlar boʻyicha taqsimlash va targʻibot ishlarini tashkil etish. ‎4. Tadbirlarni OAVlarda keng yoritish. ‎	2012-yil 30-iyun ‎ ‎ ‎ ‎ ‎ ‎2012-yil 30-iyul ‎ ‎ ‎ ‎2012-yil avgust ‎ ‎ ‎muntazam ravishda ‎
III. Oʻquvchi-yoshlar oʻrtasida gʻayriijtimoiy harakatlarning vujudga kelish sabablari va shart-sharoitlarini oʻrganish, ularni bartaraf etishga qaratilgan chora-tadbirlarni belgilash va amalga oshirish ‎‎
11.‎	Mahallalarda noqobil, notinch oilalarda tarbiyalanayotgan bolalarning taʼlim-tarbiyasi hamda ularga har tomonlama ijtimoiy koʻmaklashish koʻlamini kengaytirish.‎	“Mahalla” Fondi, XTV, Kasb-hunar taʼlimi markazi, IIV, Xotin-qizlar qoʻmitasi, RBIMM, Yoshlar ittifoqi , “Oila” ilmiy-amaliy tadqiqot markazi‎	1. Mahallalarda faol, el orasida hurmat qozongan ziyoli insonlarni hamda tegishli idoralar vakillarini jalb qilgan holda oilalarni oʻrganish, mavjud muammolarni aniqlash. ‎2. Muammolarning yechimini topishda koʻmaklashish hamda notinch oila farzandlarini oʻquv jarayoniga toʻliq jalb etish choralarini koʻrish. ‎	2012-yil 30-avgust ‎ ‎ ‎ ‎ ‎ ‎ ‎muntazam ravishda ‎
12.‎	Oʻquvchi-yoshlarning boʻsh vaqtlarini mazmunli tashkil etish va ularni qiziqishlari boʻyicha kasb-hunarga yoʻnaltirish.‎	XTV, Kasb-hunar taʼlimi markazi, “Mahalla” Fondi, Xotin-qizlar qoʻmitasi, RBIMM, “Kelajak ovozi” YOTM, Yoshlar ittifoqi, SSV, Davlat soliq qoʻmitasi, IIV, QR Vazirlar Kengashi, viloyatlar va Toshkent shahar hokimliklari‎	1. Mahallalar va taʼlim muassasalarida oʻquvchi-yoshlar uchun tashkil etilgan fan toʻgaraklari, sport seksiyalari faoliyatini oʻrganish, tarmogʻini kengaytirish orqali ommaviylikni taʼminlash. ‎2. Oʻquvchi-yoshlarni, ayniqsa qizlarni hududdagi usta-hunarmandlarga biriktirish, va ularni kasb-hunarga oʻrgatish ishlarini takomillashtirish. ‎3. Oʻquvchi-yoshlar tomonidan toʻgaraklarda tayyorlangan mahsulotlarning koʻrgazma savdosini tashkil etish, shu orqali ularda tadbirkorlik boʻyicha bilim va koʻnikmalarini rivojlantirish. ‎4. Toʻgaraklarda egallangan bilim va koʻnikmalar asosida ularni kasb-hunar taʼlimi muassasalariga jalb etish tizimini mustahkamlash. ‎	2012-yil sentabrdan boshlab muntazam ravishda ‎
13.‎	Voyaga yetmaganlar oʻrtasida nazoratsizlik, jinoyatchilik, huquqbuzarlik yoki boshqa noijtimoiy harakatlar sodir etilishining oldini olish boʻyicha keng tushuntirish ishlarini amalga oshirish.‎	XTV, Kasb-hunar taʼlimi markazi, IIV, Adliya vazirligi, RBIMM, “Mahalla” Fondi, Xotin-qizlar qoʻmitasi, Yoshlar ittifoqi, QR Vazirlar Kengashi, viloyatlar va Toshkent shahar hokimliklari ‎	1. Oʻquvchilar oʻrtasida huquqbuzarlik, jinoyatchilik va giyohvandlikni oldini olish borasida profilaktik suhbatlar, uchrashuvlar oʻtkazish jadvalini ishlab chiqish hamda ijroga yoʻnaltirish. ‎2. Profilaktik tadbirlarga Jamoat kengashi, tegishli idoralar vakillari, ota-onalarni jalb etish. ‎ 3. Tadbirlarning natijaviyligini taʼminlash boʻyicha monitoring yuritish. ‎	2012-yil 20-avgust ‎ ‎ ‎ ‎ ‎ ‎ ‎2012-yil sentabrdan boshlab ‎ ‎muntazam ravishda ‎
14.‎	Dars vaqtida maktabga bormasdan bemaqsad yurgan, masjidlarga qatnayotgan, bozorlarda turli yumushlar hamda jamoat transportlarida chipta sotish bilan shugʻullanayotgan oʻquvchilarni aniqlash va ularni oʻqishga qaytarish maqsadida “Oʻquvchi” reydlarini oʻtkazish.‎	XTV, Kasb-hunar taʼlimi markazi, IIV, “Mahalla” Fondi, Yoshlar ittifoqi, Xotin-qizlar qoʻmitasi, QR Vazirlar Kengashi, viloyatlar va Toshkent shahar hokimliklari ‎	1. Vazirlik va idoralar vakillaridan iborat Ishchi guruhini tuzish. ‎2. Reyd oʻtkaziladigan manzillarni aniqlash va Ishchi guruhga qoʻshimcha jamoatchilik vakillarini jalb etish. ‎3. Reydda aniqlanib roʻyxatga olingan oʻquvchi-yoshlarni taʼlimga qaytarish choralarini koʻrish, doimiy monitoring yuritish. ‎	2012-yil sentabr ‎ ‎muntazam ravishda ‎ ‎ ‎ ‎reja asosida ‎
15.‎	Oʻquvchi-yoshlarning dars va tungi vaqtlarda “Internet-kafe”lar va “Kompyuter klublari”da boʻlishi, maʼnaviy-axloqiy buzuqlikni targʻib etuvchi saytlarga kirishi holatlarini aniqlash va ularga barham berish boʻyicha vakolatli tashkilotlar bilan hamkorlikda reydlar tashkil etish.‎	OʻzAAA, “Mahalla” Fondi, XTV, Kasb-hunar taʼlimi markazi, IIV, Xotin-qizlar qoʻmitasi, Yoshlar ittifoqi, QR Vazirlar Kengashi, viloyatlar va Toshkent shahar hokimliklari ‎	1. Vazirlik va idoralar vakillaridan iborat Ishchi guruhini tuzish. ‎2. Reyd oʻtkaziladigan manzillarni hamda dars vaqtida maktabga bormasdan “Internet — kafe” va “Kompyuter klublari”da bemaqsad yurgan oʻquvchilarni aniqlash, ularni oʻqishga qaytarish choralarini koʻrish. ‎3. Reyd vaqtida aniqlangan salbiy holatlar boʻyicha ularning rahbarlariga nisbatan qonunda belgilangan tartibda keskin choralar koʻrish. ‎	2012-yil sentabrdan boshlab muntazam ravishda ‎ ‎ ‎ ‎ ‎ ‎reyd kuni ‎
16.‎	Erta turmush qurish hamda yaqin qarindoshlar oʻrtasidagi nikohlarning oldini olish, ularni inson sogʻligʻiga zararlari, huquqiy javobgarliklari mavzularida mahallalarda ota-onalar oʻrtasida mutaxassislar ishtirokida tushuntirish ishlarini amalga oshirish. ‎	Xotin-qizlar qoʻmitasi, “Mahalla” Fondi, Yoshlar ittifoqi, Oʻzbekiston musulmonlar idorasi‎	1. Erta turmush qurish holatlarining oldini olishga qaratilgan uchrashuv, suhbat va tushuntirish ishlarini tashkil etish boʻyicha hamkorlik jadvalini ishlab chiqish va amalga oshirish. ‎2. Voyaga yetmagan qizlar oʻrtasida aniqlangan homiladorlik holatlari yuzasidan qizlar va ota-onalar ishtirokida yakka tartibda tushuntirish ishlarini amalga oshirish. ‎	2012-yil sentabrdan boshlab ‎ ‎ ‎ ‎ ‎ ‎muntazam ravishda ‎
17.‎	Oʻquvchi-yoshlar orasida turli milliy mentalitetimizga zid boʻlgan salbiy holatlarning oldini olish boʻyicha hamda profilaktik nazoratda turuvchi oʻquvchilarni tarbiyalashda ota-onalar, mahalla, huquq-tartibot idoralari davlat va nodavlat tashkilotlarining hamkorligini kuchaytirish.‎	“Mahalla” Fondi, IIV, XTV, Kasb-hunar taʼlimi markazi, Xotin-qizlar qoʻmitasi, RBIMM, Yoshlar ittifoqi Adliya vazirligi, Oʻzbekiston musulmonlar idorasi, QR Vazirlar Kengashi, viloyatlar va Toshkent shahar hokimliklari ‎	1. Turli milliy mentalitetimizga zid boʻlgan salbiy holatlarning oldini olish. ‎2. Ichki ishlar profilaktik hisobiga va taʼlim muassasalarining ichki nazoratiga olingan oʻquvchi-yoshlar bilan yakka yoki ommaviy tarzda maqsadli ishlarni olib borish. ‎3. Ichki ishlar profilaktik nazoratiga va taʼlim muassasalarining ichki nazoratiga olingan oʻquvchi-yoshlarni toʻgaraklarga jalb etish, ularga masʼullarni biriktirish. ‎4. Taʼlim-tarbiya jarayonida ijobiy oʻzgarishlarga erishgan oʻquvchi-yoshlarni roʻyxatdan chiqarish. ‎5. Farzandlar tarbiyasiga eʼtiborsiz ota-onalarga nisbatan qonunda belgilangan tartibda intizomiy choralar qoʻllash. ‎	2012-yil 1-iyuldan boshlab muntazam ravishda ‎
18.‎	Oʻquvchi-yoshlarning zararli odatlar yoʻliga kirishiga sabab boʻlayotgan omillarga qarshi manzilli profilaktik tadbirlarni amalga oshirish.‎	XTV, Kasb-hunar taʼlimi markazi, OOʻMTV, “Mahalla” Fondi, Xotin-qizlar qoʻmitasi, RBIMM, Yoshlar ittifoqi	1. Taʼlim muassasalariga yaqin hududlarda alkogolli va tamaki mahsulotlari sotilishining oldini olish boʻyicha Jamoatchilik kengashi nazoratini kuchaytirish. ‎ 2. Oʻquvchi-yoshlar, pedagog-xodimlar va ota-onalar oʻrtasida tamaki mahsulotlari va spirtli ichimliklarning zarari haqidagi tushunchalari va ularga munosabatini oʻrganish boʻyicha soʻrovnoma oʻtkazish. ‎3. Oʻquvchilar oʻrtasida tamaki mahsulotlari va spirtli ichimliklarning zarari, ular bilan bogʻliq huquqbuzarliklarning oldini olish hamda ularning ogʻir asoratlari toʻgʻrisida mutaxassislar ishtirokida davra suhbatlari va uchrashuvlar tashkil etish. ‎	2012-yil 1-iyuldan boshlab 2012-yil sentabr Muntazam ravishda jadval asosida ‎
IV. Barkamol avlodni tarbiyalashga doir maʼnaviy-maʼrifiy tadbirlarni samaradorligini oshirish va ularni mazmunan yanada takomillashtirish ‎‎
19.‎	“Bir bolaga yetti qoʻshni ota-ona” maʼnaviy-maʼrifiy tadbirlarining mazmun-mohiyatini keng targʻib etish.‎	“Mahalla” Fondi, Xotin-qizlar qoʻmitasi, Respublika “Oila” ilmiy-amaliy tadqiqot markazi, Respublika Maʼnaviyat va maʼrifat markazi, Yoshlar ittifoqi, XTV, OOʻMTV, Kasb-hunar taʼlimi markazi ‎	1. Jamoat kengashi ishtirokida taʼlim muassasalarida taʼlim-tarbiya jarayoniga oid masalalarni muhokama etishni yoʻlga qoʻyish. ‎2. Mahallalarda jamoatchilik asosida “Ota-onalar universiteti”ni tashkil etish. ‎3. Yoshlarni hayotga ruhiy-maʼnaviy jihatdan toʻliq tayyorlash, ularda hayotga masʼuliyat hissini uygʻotish yuzasidan ibratli oilalar bilan uchrashuvlar va davra suhbatlari oʻtkazish. ‎	2012-yil muntazam ravishda alohida reja asosida muntazam ravishda ‎
20.‎	Yosh avlodga xalqimizning koʻp asrlar davomida shakllangan qadriyatlarini, ezgu orzularini, jamiyatimiz oldiga qoʻyilgan oliy maqsad va vazifalarni singdirish. ‎	Respublika Maʼnaviyat va maʼrifat markazi, Vazirlar Mahkamasi huzuridagi “Oila” ilmiy-amaliy tadqiqot markazi”, XTV, OOʻMTV, Kasb-hunar taʼlimi markazi, “Mahalla” Fondi, Xotin-qizlar qoʻmitasi, Yoshlar ittifoqi‎	1. Soha mutaxassislari va jamoatchilik vakillaridan iborat Targʻibot guruhini shakllantirish. ‎2. Milliy qadriyat va anʼanalarimizni, ibratli urf-odatlarimizni targʻib etishga doir mavzularda uchrashuv, davra suhbati va seminarlar tashkil etish. ‎	2012-yil sentabrdan boshlab rejaga muvofiq‎
21.‎	“Yoshlar maʼnaviy olamini boyitishda adabiyot va sanʼatning oʻrni” mavzuida turkum maʼnaviy-maʼrifiy tadbirlar tashkil etish.‎	Oʻzbekiston Yozuvchilar uyushmasi, Respublika Maʼnaviyat va maʼrifat markazi, “Mahalla” Fondi, OʻzFA Til va adabiyot instituti, Yoshlar ittifoqi, XTV, OOʻMTV, Kasb-hunar taʼlimi markazi ‎	1. Yozuvchi, shoir, olim, sanʼatkor va yosh qalamkashlardan iborat Ishchi guruh tuzish. ‎2. Oʻquvchi-yoshlarning kitobxonlikka boʻlgan qiziqishlarini orttirish, kutubxonalarning kitob fondini boyitish maqsadida “Maktab-mahalla, oila-jamoatchilik” hamkorligida kitoblar koʻrgazmasini oʻtkazish. 3. “Birinchi kitobim” yoʻnalishida yosh qalamkashlarning kitoblari taqdimotini tashkil etish. ‎	2012-yil sentabr muntazam ravishda rejaga muvofiq ‎
22.‎	Oʻquvchi-yoshlarni gʻoyaviy tahdid va past saviyali “ommaviy madaniyat” va boshqa turdagi yot gʻoyalarning zararli taʼsiridan himoya qilishga qaratilgan maʼrifiy tadbirlar tashkil etish. ‎	Respublika Maʼnaviyat va maʼrifat markazi, XTV, OOʻMTV, Kasb-hunar taʼlimi markazi, SSV, Yoshlar ittifoqi, Xotin-qizlar, “Mahalla” Fondi‎	1. Soha mutaxassislari tomonidan mahalla oqsoqollarining diniy maʼrifat va maʼnaviy-axloqiy tarbiya masalalari boʻyicha maslahatchilari oʻrtasida “Missionerlik va prozelitizmning salbiy oqibatlari”, “Din va maʼnaviyat”, Xurofotga qarshi kurashda ayollarning oʻrni” mavzularida suhbatlar, muloqotlar tashkil etish. ‎2. Taʼlim muassasalarida “Yoshlarni gʻoyaviy tahdidlar va past saviyali “ommaviy madaniyat”ning halokatli taʼsiridan himoya qilishga qaratilgan seminarlar, savol va javoblar, ijodiy kecha, davra suhbatlarini tashkil etish. ‎	2012-yil sentabrdan boshlab muntazam ravishda ‎ ‎ ‎ ‎ ‎ ‎ ‎ ‎ ‎ ‎rejaga muvofiq ‎
23.‎	“Qudratimiz — birlik va hamjihatlikda” mavzuida madaniy tadbirlar tashkil etish.‎	Baynalmilal madaniyat markazi, Madaniyat va sport ishlari vazirligi, Respublika Maʼnaviyat va maʼrifat markazi, MTRK, “Mahalla” Fondi, Yoshlar ittifoqi	Respublikamizda istiqomat qilayotgan turli millat va elat vakillari ishtirokida joylarda doʻstlik festivallari, maʼnaviy-maʼrifiy uchrashuvlar, turli tildagi sheʼrxonlik kechalarini tashkil etish.‎	2012-yil iyuldan boshlab muntazam ravishda reja asosida ‎
24.‎	Barkamol avlodni tarbiyalashda oila, mahalla va taʼlim muassasalari hamkorligida amalga oshirilayotgan ishlarni keng yoritish.‎	MTRK, “Oʻzbekkino” Milliy agentligi, XTV, OOʻMTV, Kasb-hunar taʼlimi markazi, “Mahalla” Fondi, Xotin-qizlar qoʻmitasi, Yoshlar ittifoqi, QR Vazirlar Kengashi, viloyatlar va Toshkent shahar hokimliklari ‎	1. Amalga oshirilayotgan ishlarni televideniye, radio va matbuot orqali keng yoritish. ‎2. Manfaatdor vazirliklar va idoralarning oʻz tarmoq gazeta va jurnallarida va maxsus veb-saytlari orqali yoritish. ‎3. Hamkorlikda amalga oshirilayotgan ishlar doirasida namunaviy va ilgʻor ish tajribalarni ommalashtirish va ularning monitoringini yuritish. ‎	2012-yil iyundan boshlab muntazam ravishda ‎
25.‎	“Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar majmuasi bajarilishi boʻyicha axborot tayyorlash va keyingi yilda amalga oshiriladigan chora-tadbirlar rejasini ishlab chiqish. ‎	XTV, OOʻMTV, OʻMKHTM, IIV, SSV, “Mahalla” Fondi, Xotin-qizlar qoʻmitasi, “Kamolot” YOIH, “Oila” ilmiy-amaliy markazi, Respublika Maʼnaviyat targʻibot markazi, Milliy gʻoya va mafkura ilmiy-amaliy markazi, “Kelajak ovozi” YOTM, QR Vazirlar Kengashi, viloyatlar va Toshkent shahar hokimliklari ‎	1. Amalga oshirilgan chora-tadbirlarni samaradorligini oʻrganish, tanqidiy tahlil qilish hamda ularni kelgusida yanada samaradorligini oshirish yuzasidan takliflar ishlab chiqish. ‎2. 2013-yilga moʻljallangan “Oila-mahalla-taʼlim muassasasi” hamkorlik mexanizmini kuchaytirish boʻyicha chora-tadbirlar majmuasini ishlab chiqish va amalga oshirish. ‎	2013-yil 25-yanvarga qadar ‎ ‎ ‎ ‎ ‎ ‎2013-yil 1-fevralga qadar ‎

Izoh: belgilangan tadbirlar ijrosi bilan bogʻliq xarajatlar masʼul ijrochi tashkilotlarning oʻz mablagʻlari hisobidan qoplanadi.

(3-ilova Oʻzbekiston Respublikasi Vazirlar Mahkamasining 2018-yil 3-maydagi 327-sonli qarori tahririda — Qonun hujjatlari maʼlumotlari milliy bazasi, 14.05.2018-y., 09/18/327/1173-son)

(Oʻzbekiston Respublikasi qonun hujjatlari toʻplami, 2012-y., 25-son, 273-modda; 2017-y., 37-son, 996-modda, 38-son, 1040-modda; Qonun hujjatlari maʼlumotlari milliy bazasi, 14.05.2018-y., 09/18/327/1173-son)