Mamlakatimizda bolalarning dam olishini tashkil etish, oromgohlarda ularni sog‘lomlashtirish chora-tadbirlarini yanada kuchaytirish, bu boradagi ishlarni tizimli ravishda yo‘lga qo‘yish va muvofiqlashtirib borish maqsadida Vazirlar Mahkamasi qaror qiladi:

1. Quyidagilar:

Respublika oromgohlarida bolalarning dam olishini tashkil etish va sog‘lomlashtirish Konsepsiyasi 1-ilovaga;

Bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruh (keyingi o‘rinlarda Muvofiqlashtiruvchi guruh deb yuritiladi) tarkibi 2-ilovaga*;

Bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruh tuzilmasi 3-ilovaga;

Bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruh to‘g‘risidagi nizom 4-ilovaga muvofiq tasdiqlansin.

2. Quyidagilar Muvofiqlashtiruvchi guruhning asosiy vazifalari etib belgilansin:

bolalar oromgohlarida maishiy, kommunal, transport va tibbiy ta’minotning barcha tizimlari ishonchli va uzluksiz faoliyat ko‘rsatishi bo‘yicha chora-tadbirlar kompleksini amalga oshirish;

bolalar oromgohlariga yondosh hududlarda sodir bo‘lishi mumkin bo‘lgan tabiiy va texnogen tusdagi favqulodda vaziyatlarning oldini olish chora-tadbirlarini ko‘rish;

bolalarni oromgohlarga olib borish va ularni dam olishdan keyin olib qaytishda transport xizmati xavfsizligini, shuningdek yong‘in xavfsizligini ta’minlash;

bolalar oromgohlarida jamoat tartibini saqlash va huquqbuzarlik holatlarining oldini olish, shuningdek bolalar, tarbiyachilar va xizmat ko‘rsatuvchi xodimlar xavfsizligini ta’minlash bo‘yicha profilaktika chora-tadbirlarini ko‘rish;

bolalar o‘rtasida sog‘lom turmush tarzini shakllantirish, ularga sifatli tibbiy xizmat ko‘rsatishni tashkil etish, oromgohlarni zarur dori-darmonlar va tibbiy vositalar bilan ta’minlash;

barcha oromgohlarda bolalarning yashash, ovqatlanish va dam olish joylariga qo‘yiladigan sanitariya-gigiyena talablariga qat’iy rioya etilishi, shuningdek oziq-ovqat mahsulotlari sifati va normalari ustidan kuchli nazoratni ta’minlash;

oromgohlarda bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan ta’lim-tarbiyaviy ishlarni tashkil etish;

bolalarning o‘qishdan tashqari vaqtini sermazmun o‘tkazish, ularning ham jismoniy, ham ruhiy jihatdan hordiq chiqarishlarini ta’minlash, turli sport musobaqalarini o‘tkazish va bu orqali bolalar sportini ommalashtirish;

oromgohlarda o‘tkaziladigan madaniy-ma’rifiy va sport tadbirlarida respublikadagi taniqli madaniyat, fan, adabiyot va san’at xodimlari hamda sportchilarning ishtirokini ta’minlash;

oromgohlarga jalb etiladigan bolalar salmog‘ini yildan yilga oshirib borishni nazarda tutgan holda, ularga ko‘rsatiladigan xizmatlar sifatini yaxshilab borish;

bolalarning dam olishini tashkil etish va sog‘lomlashtirish yuzasidan amalga oshirilayotgan ishlarni doimiy ravishda monitoring qilib borish, mazkur yo‘nalishdagi ishlarni yanada takomillashtirish yuzasidan zarur chora-tadbirlarni amalga oshirish;

bolalar oromgohlarining moddiy-texnika bazasini rivojlantirish bo‘yicha tadbirlar rejasini ishlab chiqish va amalga oshirish, zarur hollarda, mazkur yo‘nalishdagi ishlarni yanada takomillashtirish yuzasidan O‘zbekiston Respublikasi Vazirlar Mahkamasiga takliflar kiritish.

3. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlariga:

oromgohlar faoliyat samaradorligini oshirishga doir tashkiliy masalalarni o‘z vaqtida hal etish, xavfsizlik va tibbiy xizmat, shuningdek bolalarning mazmunli dam olishini ta’minlash bo‘yicha hududiy Muvofiqlashtiruvchi guruhlarni tuzsinlar;

hududiy Muvofiqlashtiruvchi guruhlar mazkur qarorning 2-bandida belgilangan vazifalardan kelib chiqib, faoliyat yo‘nalishlarini belgilasin hamda guruh a’zolarining shaxsiy mas’uliyati va javobgarligi kuchaytirilsin;

bolalar oromgohlarini yangi mavsumga har tomonlama tayyorlash maqsadida ularni to‘liq xatlovdan o‘tkazsinlar hamda mavjud kamchiliklarni bartaraf etish va yetarli shart-sharoitlar yaratish yuzasidan zaruriy chora-tadbirlarni amalga oshirsinlar;

bolalarning oromgohlarda dam olishlarini tashkil etish va sog‘lomlashtirish bo‘yicha ko‘rilgan chora-tadbirlar to‘g‘risida Muvofiqlashtiruvchi guruhga muntazam ravishda axborot berib borsinlar.

4. Tasarrufida bolalar oromgohlari bo‘lgan vazirliklar, idoralar va xo‘jalik birlashmalari rahbarlariga:

oromgohlarning samarali faoliyat ko‘rsatishi, xavfsizlik va tibbiy xizmat, shuningdek bolalarning mazmunli dam olishini ta’minlash bo‘yicha zaruriy tashkiliy chora-tadbirlarni ko‘rsinlar;

bir oy muddatda o‘z normativ-huquqiy hujjatlarini ushbu qarorga muvofiqlashtirsinlar;

bolalar oromgohlarining moddiy-texnika bazasini mustahkamlash bo‘yicha kompleks chora-tadbirlar belgilab, amalga oshirsinlar.

5. O‘zbekiston Respublikasi Vazirlar Mahkamasining 2011-yil 18-iyundagi 383-f-son farmoyishi o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N.Aripov zimmasiga yuklansin.

Mustaqillikning ilk yillaridan boshlab yoshlarni har tomonlama barkamol avlod etib tarbiyalash davlat siyosatining eng ustuvor yo‘nalishlaridan biri etib belgilab olindi.

Mazkur yo‘nalishda mamlakatimizda Muhtaram Prezidentimiz Islom Karimov rahbarligida keng miqyosdagi islohotlar amalga oshirilib, bu boradagi ishlar ko‘lami yil sayin kengayib va takomillashib bormoqda.

Amalga oshirilgan sa’y-harakatlar o‘zining samarasini berib, yoshlarimiz bilim darajasi oshmoqda, ularning jismoniy holati yildan yilga rivojlanib bormoqda, yoshlarimizning jahon maydonlaridagi turli jabhalarda erishayotgan yutuqlari sharafiga davlatimiz bayrog‘i baland ko‘tarilib, uning nufuzi ortib bormoqda.

Mamlakatimizda bolalarning dam olishini tashkil etish va sog‘lomlashtirish sohasida erishilgan yutuqlar ham bu borada Hukumatimiz tomonidan amalga oshirilayotgan ishlar natijasidir.

Shu bilan birga, oromgohlarga jalb etiladigan bolalar salmog‘ini ko‘paytirish, ularga ko‘rsatiladigan xizmatlar sifatini oshirish, oromgohlar nufuzini yanada yuksaltirish maqsadi – ushbu yo‘nalishdagi ishlarni kompleks ravishda takomillashtirish va rivojlantirishni, shuningdek uning doimiy faoliyat yurituvchi tizimini yaratishni taqozo etmoqda.

Mazkur Konsepsiyada bolalarning dam olishini tashkil etish va sog‘lomlashtirish asosiy tushunchalari, maqsad va vazifalari, oromgohlar turlari va yo‘nalishlari, oromgohlarda bolalarga ko‘rsatiladigan xizmatlar hamda erishiladigan natijalar o‘z aksini topgan.

Konsepsiya o‘sib kelayotgan avlodni bolalarning dam olishini tashkil etish va sog‘lomlashtirish hamda har tomonlama barkamol avlod etib tarbiyalashning asosiy talab, mezon va g‘oyalarining mamlakat miqyosidagi to‘laqonli tizimini belgilaydi.

Konsepsiya O‘zbekiston Respublikasining “Ta’lim to‘g‘risida”gi, “Kasaba uyushmalari, ularning huquqlari va faoliyatining kafolatlari to‘g‘risida”gi, “Bola huquqlarining kafolatlari to‘g‘risida”gi qonunlariga, Birlashgan Millatlar Tashkilotining “Bola huquqlari to‘g‘risidagi Konvensiya”siga asoslangan holda ishlab chiqilgan.

Konsepsiya bolalarning dam olishini tashkil etish va sog‘lomlashtirishni yanada takomillashtirish va rivojlantirishga yo‘naltirilgan faoliyatda hamda turli darajadagi dastur va rejalarni ishlab chiqishda asos bo‘lib xizmat qiladi.

Ushbu Konsepsiya, mulkchilik shaklidan qat’i nazar, barcha turdagi oromgohlar faoliyatiga tatbiq etiladi.

Bolalarning dam olishini tashkil etish va sog‘lomlashtirish — bu sanitariya-gigiyena, sanitariya-epidemiologiya hamda xavfsizlik talablariga to‘liq javob beradigan va qulay sharoitda bolalarning belgilangan kundalik hayot tarziga rioya etishi, sifatli ovqatlanishi, ijodiy salohiyatining rivojlanishi, sog‘lom turmush tarzi ko‘nikmalarining shakllanishi, dam oldirilishi, salomatliklarining tiklanishi va mustahkamlanishi, jismoniy tarbiya, sport va turizm bilan shug‘ullanishlarini ta’minlovchi kompleks tadbirlar majmuidir.

Dam olish — bolalar organizmining jismoniy va ruhiy funksiyalari tiklanishiga, uning faolligini oshirishga yo‘naltirilgan maxsus ijtimoiy tadbirlar majmuidir.

Sog‘lomlashtirish — bolalarning jismoniy va ruhiy salomatligini yaxshilash, ratsional ovqatlanish hamda sog‘lig‘ini mustahkamlashga yo‘naltirilgan tibbiy, gigiyenik, jismoniy tarbiya tadbirlarining majmuidir.

Bolalarning dam olishini tashkil etish va sog‘lomlashtirishning asosiy maqsadi — bolalarning o‘qishdan tashqari vaqtini sermazmun o‘tkazish, ularning ham jismoniy, ham ruhiy jihatdan hordiq chiqarishlarini ta’minlash, ular ongiga milliy g‘oyani, vatanparvarlik tuyg‘ularini hamda milliy va umuminsoniy qadriyatlarni singdirish orqali har tomonlama barkamol avlodni voyaga yetkazishdan iboratdir.

Mazkur maqsadga erishish uchun amalga oshiriladigan vazifalar quyidagilardan iboratdir:

bolalarning dam olishini tashkil etish va sog‘lomlashtirishni tashkil etish va amalga oshirishning mukammal tizimini yaratish, respublika oromgohlar tarmog‘ini takomillashtirish va rivojlantirish;

bolalarning dam olishini tashkil etish va sog‘lomlashtirish yuzasidan har yili rejalar ishlab chiqish, zarur moliyaviy mablag‘lar manbalarini aniqlash va jalb etish orqali ushbu rejalarni to‘liq amalga oshirish;

bolalarning dam olishini tashkil etish va sog‘lomlashtirish bo‘yicha kompleks chora-tadbirlar rejasini ishlab chiqish, unda bajarish muddatlari va mas’ullarni aniq ko‘rsatish, ushbu reja ijrosini muntazam ravishda nazorat qilib borish;

bolalarning dam olishini tashkil etish va sog‘lomlashtirishni tashkil etish yuzasidan vazirlik, idora, tashkilot va mahalliy davlat hokimiyati organlari faoliyatini muvofiqlashtirib borish va o‘zaro hamkorligini ta’minlash, ularning taklif va tashabbuslarini qo‘llab-quvvatlash va ommalashtirish;

mazkur yo‘nalishda hududlarda amalga oshirilayotgan ishlarni joyining o‘ziga chiqqan holda o‘rganib, doimiy ravishda monitoring qilib borishni yo‘lga qo‘yish, ularni yanada takomillashtirish bo‘yicha tegishli choralarni amalga oshirish;

bolalarda bugungi kundagi “ommaviy madaniyat”ning turli illatlariga qarshi mafkuraviy immunitetni shakllantirish, ular ongiga umuminsoniy va milliy qadriyatlarni singdirishga qaratilgan dasturlarni amalga oshirish, bu boradagi ishlarga davlat va jamoat tashkilotlarini keng jalb etish.

Oromgohlar faoliyatining asosiy tamoyillari quyidagilardan iborat:

bolalar hayoti va sog‘lig‘i xavfsizligini ta’minlagan hamda ratsional ovqatlanishni tashkil etgan holda, ularning sifatli dam oldirilishi va sog‘lomlashtirilishini tashkil etish;

bolalar manfaatlarining ustuvorligi, ularning ijodiy rivojlanishi hamda o‘z imkoniyatlarini to‘liq namoyon etishlari uchun zarur shart-sharoitlar yaratish;

ijtimoiy me’yorlar va oromgoh qoidalariga rioya qilgan holda, pedagog va yetakchilarning bolalar shaxsini rivojlantirish va ularning ko‘ngilli dam olishlarini ta’minlash borasidagi tashabbuslarini qo‘llab-qavatlash;

bolalarning dam olishini tashkil etish va sog‘lomlashtirish mobaynida bolalar ongiga umuminsoniy va milliy qadriyatlarni singdirish, ularda mafkuraviy immunitetni shakllantirishga qaratilgan ma’naviy-ma’rifiy chora-tadbirlar amalga oshirilishiga alohida e’tibor qaratish.

Har bir oromgoh jamoasi o‘z tashkiliy-pedagogik faoliyatining yo‘nalishlarini yuqori darajadagi tegishli tashkilotlar tavsiya va ko‘rsatmalari asosida mustaqil ravishda ishlab chiqadi.

U o‘z ichiga sog‘lomlashtirish, rivojlantirish, ta’lim-tarbiyaviy va bolalarni ijtimoiy tiklash dasturlarini ishlab chiqish, bolalarni ijtimoiylashtirish, ular o‘rtasida o‘zaro hamkorlikning rivojlanishi uchun sharoitlar yaratish kabilarni qamrab oladi.

Oromgohlar 2 turga ajratiladi:

Statsionar oromgohlar — statsionar baza asosida qurilgan yoki vaqtinchalik ijaraga olingan obyektlarda tashkil etilib, unda bolalar smena davomida yashaydi.

Mazkur oromgohlar statsionar oromgohlar joylashuvi, ta’minoti va kun tartibini tashkil etishning sanitariya talablariga asosan faoliyat olib boradi.

Kunduzgi oromgohlar — umumta’lim maktablari, akademik litsey va kasb-hunar kollejlari, sport, ijtimoiy xizmat ko‘rsatish, sanatoriy-kurort muassasalari, klublar qoshida vaqtinchalik tashkil etilib, unda bolalar faqatgina kunduz kuni dam oldiriladi va sog‘lomlashtiriladi.

Ushbu oromgohlar faoliyati ta’til davrida bolalarning kunduz kuni dam olishlarini ta’minlash va sog‘lomlashtirish oromgohlari joylashuvi, ta’minoti va kun tartibini tashkillashtirishning gigiyena talablariga muvofiq yuritiladi.

Oromgohlar bolalarning yoshini e’tiborga olgan holda, tarbiyaviy ishlarning mazmuni bo‘yicha quyidagi ixtisoslashgan yo‘nalishlarda tashkil etilishi mumkin:

1. Intellektual rivojlantirish oromgohlari. Oromgohlar fan olimpiadalari, ta’lim sohasining turli darajadagi musobaqalari g‘oliblari bo‘lgan 10 — 14 yoshdagi bolalarni dam oldirish va sog‘lomlashtirish uchun yo‘naltirilgan bo‘lib, unda bir yoki bir nechta fanlar yoxud tillar chuqurlashtirilgan tarzda o‘rganilishiga e’tibor beriladi.

2. Sport-sog‘lomlashtirish oromgohlari. Oromgohlar 8 — 18 yoshdagi bolalar va o‘smirlar uchun sport yo‘nalishidagi o‘quv muassasalari tarbiyalanuvchilarining o‘quv-mashq jarayonini davom ettirishlari, ularning sport mahoratini takomillashtirish, jismoniy tayyorgarlik darajasini oshirish, sog‘lig‘ini mustahkamlashga yo‘naltirilgan bo‘lib, unda bolalarning yoshi va sport turining o‘ziga xos xususiyatlari asosida har xil guruhlar tuzilishi mumkin.

3. Sanatoriy-sog‘lomlashtirish oromgohlari. Oromgohlar yurak qon-tomir tizimining kasallanishi, nafas olish, ovqat hazm qilish organlari, tayanch-harakat apparatining o‘ziga xos bo‘lmagan xususiyatlari bilan betob bo‘lib turadigan 7 — 14 yoshdagi bolalarni dam oldirish va sog‘lomlashtirish uchun tashkil etiladi.

4. Mehnat va dam oldirish oromgohlari. Oromgohlar umumta’lim maktablari, akademik litsey va kasb-hunar kollejlari 15 — 18 yoshdagi o‘quvchilarining ijtimoiy foydali mehnati dam oldirish va sog‘lomlashtirish bilan birga qo‘shib olib borilishiga yo‘naltiriladi. Unda bolalar ijtimoiy foydali mehnatga tayyorlanadi, ularning mehnat ko‘nikmalari shakllantiriladi. O‘quvchilarning qiziqishlari va ehtiyojlarini moddiy jihatdan qo‘llab-quvvatlash va rag‘batlantirish oromgohni tashkil etishning asosiy sharti hisoblanadi.

5. Harbiy-sport oromgohlari. Oromgohlar 12 — 17 yoshdagi bolalarni harbiy-vatanparvarlik ruhida tarbiyalash, yoshlarni Vatan mudofaasiga, O‘zbekiston Respublikasi Qurolli kuchlari saflarida xizmat qilishga tayyorlash maqsadida tashkil etiladi.

6. Ekologik-biologik, o‘lkashunoslik oromgohlari. Oromgohlarda 7 — 14 yoshdagi bolalar uchun sayyohlik-o‘lkashunoslik va ekskursiya ishlarining serqirrali turlari tashkil etiladi, ularga mamlakatimizning tabiiy, ijtimoiy-iqtisodiy va tarixiy jihatdan o‘ziga xos jihatlari chuqur o‘rgatiladi.

7. Ixtisoslashgan bolalar oromgohlari. Oromgohlar 7 — 14 yoshdagi bolalarda yetakchilik va faollikni shakllantirish, ularning ijtimoiy moslashuv ko‘nikmalarini oshirishga yo‘naltiriladi.

Bolalarning dam olishini tashkil etish va sog‘lomlashtirishni amalga oshirish bo‘yicha mutasaddi tashkilotchilarning taklif va tashabbuslari bilan boshqa yo‘nalishlarda ham oromgohlar faoliyati yo‘lga qo‘yilishi mumkin.

Oromgohlarda bolalarga ko‘rsatiladigan xizmatlar quyidagilardan iboratdir:

1. Jamoat tartibini saqlash va xavfsizlikni ta’minlash, aloqa va transport xizmatlari. Bunda:

oromgohlar va ularning atrofidagi hududlarda jamoat tartibini saqlash va xavfsizlikni ta’minlash bo‘yicha ichki ishlar organlari xodimlarining doimiy navbatchiligi tashkil etiladi;

bolalarning daryo, anhor yoki suv havzasi bo‘yida bo‘lishlari, sayrga chiqishlari oromgoh yetakchisi yoki tarbiyachisi kuzatuvisiz bo‘lishiga yo‘l qo‘yilmaydi;

har bir oromgohda yong‘in chiqish va tabiiy ofat ehtimoliga qarshi bolalarni ko‘chirish rejasi ishlab chiqiladi va shunga asosan tayyorgarlik ko‘riladi;

bolalar yong‘in xavfsizligi va jarohatlanishning oldini olish talablariga javob beruvchi turar joy bilan ta’minlanadi;

oromgoh hududida begona kishilarning bo‘lishi yoki yashashiga mutlaqo yo‘l qo‘yilmaydi;

oromgohlardagi bolalar hamda ularga xizmat ko‘rsatayotgan xodimlarning yuzaga kelishi mumkin bo‘lgan favqulodda vaziyatlar bo‘yicha hushyorligini oshirish yuzasidan profilaktik tadbirlar o‘tkaziladi;

har bir oromgoh shaharlararo telefon bilan ta’minlanadi, agar oromgoh joylashgan hududga telefon tarmog‘i o‘tkazilmagan bo‘lsa, u holda uyali aloqa vositasi bilan ta’minlanadi;

bolalar belgilangan joydan texnik jihatdan soz bo‘lgan transport vositalarida yo‘l patrul xizmati kuzatuvida oromgohlarga olib boriladi va olib kelinadi;

bolalarni sayohat, ekskursiya va safarlarga yoki oromgoh tomonidan o‘tkaziladigan boshqa tadbirlarga olib borish va olib kelish uchun transport vositalari ajratiladi.

2. Oromgohlarni tibbiy yordam bilan ta’minlash, Davlat sanitariya nazoratini o‘rnatish, oziq-ovqat mahsulotlari bilan ta’minlash hamda sifatini nazorat qilib borish xizmatlari. Bunda:

har bir oromgohda tibbiy punkt tashkil etilib, u tez tibbiy yordam ko‘rsatish uchun zarur bo‘lgan barcha dori-darmonlar va tibbiy asbob-uskunalar bilan ta’minlanadi;

bolalarga doimiy tez tibbiy yordam ko‘rsatish uchun shay bo‘lgan tibbiyot muassasalari oldindan belgilab qo‘yiladi;

bolalar oromgohga yuborilishidan oldin shifokor va tibbiyot hamshirasi tomonidan tibbiy ko‘rikdan o‘tkaziladi, tibbiy hujjatlar tekshiriladi, agarda bolada biror kasallik alomati aniqlansa, uning oromgohga jo‘natilishiga ruxsat berilmaydi;

bolalarning yoshi va mavjud kasalliklarini e’tiborga olgan holda kun tartibi ishlab chiqiladi, ratsional ovqatlantirish tashkil etiladi va muntazam ravishda nazorat qilib boriladi;

bolalarning sog‘lig‘i muntazam ravishda kuzatib boriladi, ular shifokor tomonidan reja asosida tibbiy tekshiruvdan o‘tkazilib boriladi;

bolalar uzluksiz ravishda oziq-ovqat mahsulotlari bilan ta’minlanadi, ularning sifati va belgilangan me’yorlarga mosligi doimiy ravishda nazorat qilib boriladi;

mavsumiy kasalliklar (o‘tkir ichak kasalliklari) ko‘payishi mumkin bo‘lgan oylarda tibbiyot xodimlari tomonidan kasallikning oldini olish va zarur bo‘lganda davolash ishlari tashkil etiladi;

yuqumli kasalliklar aniqlangan taqdirda, bu haqda sog‘liqni saqlash muassasalariga va Sanitariya-epidemiologik osoyishtalik va jamoat salomatligi xizmatining hududiy bo‘linmalariga belgilangan tartibda ma’lum qilinadi va bemor bola oromgoh rahbari nazoratida shifoxonaga yotqiziladi;

oromgoh oshxonasi ishi ustidan nazorat olib boriladi, taomnoma tuzishda shifokor ishtirok etadi, tayyor ovqatlar kaloriyasi tekshirib boriladi, tashqaridan keltirilgan oziq-ovqat mahsulotlari shifokor ruxsatisiz bolalarga berilmaydi;

oziq-ovqat mahsulotlarining sifati, saqlanishi, idish-tovoq va texnologik jihozlarni yuvishda sanitariya-gigiyena talablariga rioya etilishi qattiq nazoratga olinadi;

bolalar bilan sog‘lom turmush tarzi bo‘yicha mutaxassislar ishtirokida davra suhbatlari, uchrashuvlar, savol-javoblar, davolash-profilaktik, sanitar-gigiyenik va epidemiyaga qarshi tadbirlar o‘tkaziladi, bolalarning yoshini e’tiborga olgan holda, ular o‘rtasida turli yuqumli kasalliklarning oldini olish bo‘yicha sanitariya-oqartuv ishlar olib boriladi;

oromgoh joylashgan hudud sanitariya-gigiyena talablariga javob beradigan holda tartibga keltiriladi va tozalanadi;

tibbiyot xodimlarining bolalar salomatligi va oromgohda sanitariya-gigiyena talablariga rioya etilishi uchun, oromgoh rahbarining oromgoh hududi tozaligi uchun javobgar shaxs ekanliklari belgilab qo‘yiladi;

oromgohlarda ko‘rsatilayotgan tibbiy xizmatlarning monitoringi olib boriladi.

3. Ta’lim-tarbiyaviy xizmatlar. Bunda:

har bir oromgohda kutubxona yoki axborot-resurs markazi ishi tashkil etiladi, bolalar kitoblar, jurnal va gazetalar bilan ta’minlanadi;

bolalarning qiziqishlari va iqtidorlari bo‘yicha to‘garaklar, bolalar studiyalari, kompyuter sinflari, mahorat darslari tashkil etiladi;

olimpiadalar, viktorinalar, bilimlar tanlovlari, texnik va badiiy ijodiyot ko‘rgazmalari o‘tkaziladi, fan va san’at arboblari bilan uchrashuvlar uyushtiriladi;

bolalarning yoshi va salomatligiga mos keluvchi ijtimoiy foydali va pedagogik maqsadga muvofiq mehnat turlari tashkil etiladi;

xizmat ko‘rsatuvchi xodimlar, ayniqsa, pedagog va yetakchilarni oromgoh faoliyatiga jalb etishda ularning o‘z kasbini puxta egallaganligi, bola shaxsini hurmat qilishi, ijodkorligi, tashabbuskorligi, fidoyiligiga e’tibor qaratiladi.

4. Ma’naviy-ma’rifiy va madaniy xizmatlar. Bunda:

oromgoh hududi, binolari, ma’naviyat va ma’rifat xonalari noan’anaviy va qiziqarli ravishda, milliy va umuminsoniy qadriyatlarga asoslangan holda o‘ziga xos jihozlanadi va bezatiladi;

bolalarda mafkuraviy immunitetni shakllantirish, ularni vatanparvarlik va milliy g‘oya ruhida tarbiyalashga qaratilgan davra suhbatlari, uchrashuvlar o‘tkaziladi;

bolalarning yoshiga qarab, ular stol usti o‘yinlari hamda o‘yinchoqlar bilan ta’minlanadi;

madaniyat va san’at to‘g‘risida suhbatlar, o‘qilgan kitoblar, namoyish etilgan kinofilmlarning muhokamasi o‘tkaziladi, badiiy va ilmiy-ommabop kinofilmlar, multfilmlar, slaydlar, videofilmlar namoyish etiladi;

yosh tomoshabinlar teatri va boshqa ijodiy jamoalarning bolalar uchun spektakllari, konsert dasturlari namoyish etiladi, bolalarning muzeylar, ko‘rgazmalarga tashriflari uyushtiriladi;

bolalarning yoshi, qiziqish va qobiliyatlarini e’tiborga olib, milliy musiqa madaniyati, tasviriy san’at, xalq hunarmandchiligi, jahon madaniyati va san’ati durdonalari bo‘yicha mashg‘ulotlar o‘tkaziladi;

turli millatga mansub bolalar uchun yangi do‘stlar orttirish, til o‘rganish va do‘stlik klublari tashkil etiladi;

jismoniy yoki ruhiy rivojlanishida nuqsoni bo‘lgan bolalarda jismoniy va aqliy mehnatga birday hurmat uyg‘otish, ularda mehnatsevarlik va yaratuvchanlik xislatlarini shakllantirishga qaratilgan mahorat darslari tashkil etiladi;

iste’dodli bolalar bilan ishlashda ularning o‘z iqtidorlarini namoyon etishlariga sharoit yaratib beriladi va ular namunasida boshqa tengdoshlarining imkoniyatlari ham kashf etiladi;

har bir tadbir o‘tkazilishiga yuqori talab va mas’uliyat bilan yondashgan holda oromgohdagi barcha narsalar bolalar yoshiga mos, ularning qiziqishlari, dunyoqarashlari va ehtiyojlaridan kelib chiqib tayyorlanadi;

oromgoh tartib-qoidalariga amal qilish, odob-axloq me’yorlarini bajarish va yuksak intizomli bo‘lish har bir tarbiyalanuvchiga tushuntiriladi;

oromgoh hududi bolalar dunyosiga mos ravishda turli banner va shiorlar bilan bezatiladi.

5. Jismoniy tarbiya va sport sohasidagi xizmatlar. Bunda:

bolalar uchun ertalabki gigiyenik hamda davolash gimnastikasi o‘tkaziladi;

sport o‘yinlari hamda mashg‘ulotlarini o‘tkazish uchun sport maydonchalari tayyorlanadi, ular sport inventarlari bilan ta’minlanadi;

suzish, yugurish, yurish, futbol, voleybol, tennis, shaxmat, stol tennisi va sportning boshqa turlari bo‘yicha sport musobaqalari hamda mashg‘ulotlar tashkil etiladi;

sportning ommaviy turlari bilan bir qatorda bolalarning yoshini, bilim darajalari, salomatliklari va jismoniy imkoniyatlarini hisobga olgan holda, maxsus mashg‘ulotlar ham o‘tkaziladi;

bolalarning o‘zlariga ma’qul bo‘lgan sport seksiyalariga qatnashishi, turli musobaqalarda ishtirok etishi ta’minlanadi, mazkur tadbirlar belgilangan tartibdagi tibbiy ko‘rik ostida amalga oshirilib, bu jarayon tibbiyot xodimlarining nazoratida bo‘lishi muhimdir.

6. Sayyohlik va ekskursiya xizmatlari. Bunda:

bolalarni sayyohlik safarlari va ekskursiyalarga olib chiqishdan oldin ularda ekstremal holatda o‘zini tutish ko‘nikmalari shakllantiriladi, xavfsizlik qoidalari tushuntiriladi;

ishlab chiqilgan va tasdiqlangan yo‘nalishlar bo‘yicha turli ekskursiyalar (shahar bo‘ylab, shahardan tashqarida, dam olish kuni yo‘nalishlari va boshqalar) uyushtiriladi;

o‘lkashunoslik, yosh tabiatshunoslik va ekologik yo‘nalishlarda amaliy mashg‘ulotlar o‘tkaziladi, bu jarayonda bolalar tabiat hodisalarini kuzatishlari va taqqoslashlari, ekologik muammolarni amaliyotda o‘rganishlari va muhokama etishlari, bevosita tajriba o‘tkazishlari mumkin.

Bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruh tashkil etiladi.

Mazkur Muvofiqlashtiruvchi guruh zimmasiga bolalarning dam olishini tashkil etish va sog‘lomlashtirishni ta’minlashga doir barcha chora-tadbirlarni tashkil etish, bu borada vazirliklar, idoralar, tashkilotlar va mahalliy davlat hokimiyati organlari faoliyatini muvofiqlashtirib borish, mazkur yo‘nalishda joylarda amalga oshirilayotgan ishlarni tahliliy o‘rganib, ularni yanada takomillashtirish va rivojlantirish yuzasidan zarur chora-tadbirlarni amalga oshirish, zarur hollarda, O‘zbekiston Respublikasi Vazirlar Mahkamasiga takliflar kiritish vazifalari yuklanadi.

Bolalarning dam olishini tashkil etish va sog‘lomlashtirishni amalga oshirish ishlariga davlat tashkilotlari bilan birga jamoat tashkilotlari ham keng jalb etiladi.

Bolalarning dam olishini tashkil etish va sog‘lomlashtirish borasida amalga oshirilayotgan keng ko‘lamdagi ishlar ommaviy axborot vositalarida muntazam ravishda yoritib boriladi.

Mazkur Konsepsiyada belgilangan vazifalarni amalga oshirish orqali quyidagi natijalarga erishiladi:

Bolalarning dam olishini tashkil etish va sog‘lomlashtirishning respublika miqyosidagi tizimi yaratiladi;

oromgohlarni yangidan qurish, kapital ta’mirlash, rekonstruksiya qilish, ularning moddiy-texnik bazasini yaxshilab borish tufayli respublika oromgohlar tarmog‘i takomillashtiriladi;

bolalarni tizimli ravishda dam olishini tashkil etish va sog‘lomlashtirish qamrovi yildan-yilga ortib boradi;

bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruh darajasida oromgohlarda xizmat ko‘rsatish borasidagi vazifalar va ularning ijrochilari aniq belgilanganligi sababli xizmat ko‘rsatish darajasi va sifati yaxshilanadi;

yosh avlodda hozirgi davrdagi “ommaviy madaniyat”ning turli illatlariga qarshi mafkuraviy immunitet shakllantiriladi.

1. Mazkur Nizom Bolalarning dam olishini tashkil etish va sog‘lomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni ta’minlash bo‘yicha Muvofiqlashtiruvchi guruhi (keyingi o‘rinlarda Muvofiqlashtiruvchi guruh deb yuritiladi)ning asosiy maqsadi va vazifalari, huquqlari, faoliyatini tashkil etish tartiblarini belgilaydi.

2. Muvofiqlashtiruvchi guruh o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmon, qaror va farmoyishlariga, O‘zbekiston Respublikasi Vazirlar Mahkamasining qaror va farmoyishlariga, boshqa normativ-huquqiy hujjatlarga, shuningdek mazkur Nizomga amal qiladi.

3. Muvofiqlashtiruvchi guruh tomonidan o‘ziga yuklangan vazifalarni samarali tashkil etish yuzasidan qabul qilingan qarorlar ijrosini ta’minlash guruh a’zolari uchun majburiy hisoblanadi.

4. Muvofiqlashtiruvchi guruhning asosiy maqsadi oromgohlarda bolalarning sifatli dam olishini tashkil etish va sog‘lomlashtirish orqali har tomonlama barkamol avlodning voyaga yetishiga ko‘maklashishdan iborat.

5. Quyidagilar Muvofiqlashtiruvchi guruhning asosiy vazifalari hisoblanadi:

bolalar oromgohlarida maishiy, kommunal, transport va tibbiy ta’minotning barcha tizimlari ishonchli va uzluksiz faoliyat ko‘rsatishi bo‘yicha chora-tadbirlar kompleksini amalga oshirish;

bolalar oromgohlariga yondosh hududlarda sodir bo‘lishi mumkin bo‘lgan tabiiy va texnogen tusdagi favqulodda vaziyatlarning oldini olish chora-tadbirlarini ko‘rish;

bolalarni oromgohlarga olib borish va ularni dam olishdan keyin olib qaytishda transport xizmati xavfsizligini, shuningdek yong‘in xavfsizligini ta’minlash;

bolalar oromgohlarida jamoat tartibini saqlash va huquqbuzarlik holatlarining oldini olish, shuningdek bolalar, tarbiyachilar va xizmat ko‘rsatuvchi xodimlar xavfsizligini ta’minlash bo‘yicha profilaktika chora-tadbirlarini ko‘rish;

bolalar o‘rtasida sog‘lom turmush tarzini shakllantirish, ularga sifatli tibbiy xizmat ko‘rsatishni tashkil etish, oromgohlarni zarur dori-darmonlar va tibbiy vositalar bilan ta’minlash;

barcha oromgohlarda bolalarning yashash, ovqatlanish va dam olish joylariga qo‘yiladigan sanitariya-gigiyena talablariga qat’iy rioya etilishi, shuningdek oziq-ovqat mahsulotlari sifati va normalari ustidan kuchli nazoratni ta’minlash;

oromgohlarda bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan ta’lim-tarbiyaviy ishlarni tashkil etish;

bolalarning o‘qishdan tashqari vaqtini sermazmun o‘tkazish, ularning ham jismoniy, ham ruhiy jihatdan hordiq chiqarishlarini ta’minlash, turli sport musobaqalarini o‘tkazish va bu orqali bolalar sportini ommalashtirish;

oromgohlarda o‘tkaziladigan madaniy-ma’rifiy va sport tadbirlarida respublikadagi taniqli madaniyat, fan, adabiyot va san’at xodimlari hamda sportchilarning ishtirokini ta’minlash;

oromgohlarga jalb etiladigan bolalar salmog‘ini yildan yilga oshirib borishni nazarda tutgan holda, ularga ko‘rsatiladigan xizmatlar sifatini yaxshilab borish;

bolalarning dam olishini tashkil etish va sog‘lomlashtirish yuzasidan amalga oshirilayotgan ishlarni doimiy ravishda monitoring qilib borish, mazkur yo‘nalishdagi ishlarni yanada takomillashtirish yuzasidan zarur chora-tadbirlarni amalga oshirish;

bolalar oromgohlarining moddiy-texnika bazasini rivojlantirish bo‘yicha tadbirlar rejasini ishlab chiqish va amalga oshirish, zarur hollarda, mazkur yo‘nalishdagi ishlarni yanada takomillashtirish yuzasidan O‘zbekiston Respublikasi Vazirlar Mahkamasiga takliflar kiritish.

6. Muvofiqlashtiruvchi guruh quyidagi huquqlarga ega:

vazirlik, idora, tashkilot va mahalliy davlat hokimiyati organlariga bolalarni dam oldirish va sog‘lomlashtirish ishlarini sifatli tashkil etish maqsadida tegishli yo‘nalishlar bo‘yicha topshiriqlar berish;

bolalarni oromgohlarda dam olishini tashkil etish va sog‘lomlashtirish chora-tadbirlari uchun korxona, tashkilot va muassasalarning homiylik mablag‘larini jalb etish, ushbu mablag‘larni maqsadli ishlar uchun yo‘naltirish hamda sarflanishini nazorat qilib borish;

tegishli vazirlik, idora, tashkilot va mahalliy davlat hokimiyati organlari rahbar xodimlarining oromgohlar faoliyatini tashkil etish borasida amalga oshirilayotgan ishlari to‘g‘risidagi hisobotlarini eshitish;

vazirlik, idora va tashkilotlardan Muvofiqlashtiruvchi guruhga yuklangan vazifalarning bajarilishini ta’minlash uchun zarur axborotlarni so‘rab olish;

tegishli vazirlik, idora va tashkilotlar mutaxassislari, oliy ta’lim muassasalari professor-o‘qituvchilarini bolalarni dam olishini tashkil etish va sog‘lomlashtirish bo‘yicha uslubiy materiallar tayyorlash uchun jalb etish;

joylarda oromgohlar faoliyatiga mas’ul bo‘lgan mansabdor shaxslarning lavozimiga qonunchilik talablari buzilishiga yo‘l qo‘yganlarga nisbatan belgilangan tartibda choralar ko‘rish to‘g‘risida tegishli organlarga takliflar kiritish.

7. Muvofiqlashtiruvchi guruh o‘ziga yuklangan vazifalar ijrosining samarali amalga oshirilishi yuzasidan javobgar hisoblanadi.

8. O‘zbekiston Respublikasining Bosh vaziri – Muvofiqlashtiruvchi guruh raisi, O‘zbekiston Respublikasi Bosh vazirining o‘rinbosari va O‘zbekiston Kasaba uyushmalari Federatsiyasi Kengashi raisi – Muvofiqlashtiruvchi guruh raisining o‘rinbosarlari hisoblanadi.

Muvofiqlashtiruvchi guruhning a’zolari tegishli vazirlik, idora va tashkilotlar vakillari, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlaridan iborat bo‘ladi.

Muvofiqlashtiruvchi guruh tarkibi Vazirlar Mahkamasi tomonidan tasdiqlanadi.

Muvofiqlashtiruvchi guruh a’zolari boshqa ishga o‘tgan taqdirda uning tarkibiga ularning lavozimiga yangidan tayinlangan (saylangan) shaxslar kiritiladi.

9. Muvofiqlashtiruvchi guruhi raisi guruh faoliyatini boshqaradi, uning majlislarini olib boradi, majlislar bayonlarini tasdiqlaydi.

10. Muvofiqlashtiruvchi guruh faoliyatida qarorlar qabul qilishda a’zolarning tenghuquqliligi va kollegiallik tamoyillariga amal qilinadi.

11. Muvofiqlashtiruvchi guruh majlislari yiliga kamida ikki marta o‘tkaziladi, Muvofiqlashtiruvchi guruh raisi tomonidan yoki a’zolarning taklifiga ko‘ra navbatdan tashqari majlislar chaqirilishi mumkin.

12. Muvofiqlashtiruvchi guruh majlislari unda a’zolarining ko‘pchiligi ishtirok etganda vakolatli hisoblanadi.

Muvofiqlashtiruvchi guruh qarorlari majlisda ishtirok etayotganlarning yarmidan ko‘pi qo‘llab-quvvatlaganda qabul qilingan hisoblanadi, ovozlar teng bo‘lganda raisning ovozi hal qiluvchi hisoblanadi.

13. Zarurat bo‘lganda, Muvofiqlashtiruvchi guruh majlisiga ko‘rib chiqilayotgan masalalar xarakteriga qarab, vazirliklar, idoralar, xo‘jalik birlashmalari, jamoat tashkilotlari, korxona, muassasa va tashkilotlar rahbarlari taklif etiladi.

14. Muvofiqlashtiruvchi guruh o‘z faoliyatini tizimli ravishda yo‘lga qo‘yish, belgilangan vazifalarni o‘z vaqtida va sifatli bajarish maqsadida 5 ta asosiy yo‘nalish bo‘yicha Ishchi guruhlar tuzadi.

1-ishchi guruh. “Oromgohlarda ta’lim-tarbiyaviy ishlarni tashkil etish, ularni malakali pedagog va yetakchilar bilan ta’minlash”.

Ishchi guruh:

oromgohlarni malakali pedagog xodimlar bilan ta’minlaydi, ular uchun qisqa muddatli o‘quv kurslari tashkil etadi;

oromgohlarning axborot-resurs markazlarini O‘zbekiston Respublikasi Prezidentining kitoblari, badiiy adabiyotlar, gazeta va jurnallar bilan ta’minlaydi;

bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan uslubiy qo‘llanmalar tayyorlaydi va har bir oromgohga yetkazadi;

ta’lim yo‘nalishlari bo‘yicha turli tanlovlar, bolalar ongini rivojlantirishga qaratilgan o‘yinlar o‘tkazish, to‘garaklar tashkil etish ishlarini yo‘lga qo‘yadi.

2-ishchi guruh. “Bolalarga malakali tibbiy xizmat ko‘rsatish, oromgohlarda oziq-ovqat mahsulotlari sifatini, sanitariya-gigiyena talablariga rioya etilishini nazorat qilish”.

Ishchi guruh:

oromgohlarni yetarli miqdordagi barcha zarur dori-darmon vositalari, shu jumladan, ilon va qoraqurt zahriga qarshi zardoblar bilan ta’minlaydi;

oromgohlarni malakali tibbiyot xodimlari bilan ta’minlaydi, ular uchun qisqa muddatli o‘quv kurslari tashkil etadi;

oromgohlarda oziq-ovqat mahsulotlari va ichimlik suvining sifatini hamda sanitariya-gigiyena talablariga rioya etilishini o‘rganib boradi hamda aniqlangan kamchiliklarning zudlik bilan bartaraf etilishini tashkil qiladi;

bolalar bilan sog‘lom turmush tarzi bo‘yicha davra suhbatlari, savol-javoblar, davolash-profilaktik, sanitariya-gigiyenik va epidemiyaga qarshi tadbirlar o‘tkazadi, bolalarning yoshini e’tiborga olgan holda, ular o‘rtasida turli yuqumli kasalliklarning oldini olish bo‘yicha sanitariya-gigiyenaga doir tushuntirish ishlarini olib boradi.

3-ishchi guruh. “Bolalarni vatanparvarlik ruhida tarbiyalashga qaratilgan ma’naviy-ma’rifiy tadbirlar va sport musobaqalarini o‘tkazish, ularga madaniy xizmat ko‘rsatishni tashkil etish”.

Ishchi guruh:

madaniy-ma’rifiy tadbirlarni o‘tkazish maqsadida har bir oromgoh bo‘yicha alohida dastur ishlab chiqilishini va amalga oshirilishini ta’minlaydi;

oromgohlarga madaniyat va fan xodimlari, yozuvchi va shoirlar, mashhur sportchilarning tashrifini tashkil etib, bolalar bilan uchrashuvlar, davra suhbatlari, badiiy kechalar, savol-javoblar, mahorat darslari o‘tkazadi;

oromgohlarda mumtoz va estrada san’atkorlarining chiqishlarini, milliy konsert namoyishlarini tashkil etadi;

oromgohlarda o‘zbek milliy kinofilmlari namoyishlarini o‘tkazadi;

bolalar o‘rtasida turli sport musobaqalarini tashkil etadi.

Ishchi guruh:

bolalarni dam olishini tashkil etish va sog‘lomlashtirish davomida oromgohlarda jamoat tartibini saqlash va xavfsizlikni ta’minlash borasidagi ishlarni tashkil etadi;

oromgohlardagi bolalar hamda ularga xizmat ko‘rsatayotgan xodimlarning yuzaga kelishi mumkin bo‘lgan favqulodda vaziyatlar bo‘yicha hushyorligini oshirish yuzasidan profilaktik tadbirlar o‘tkazilishini ta’minlaydi;

har bir oromgohga ichki ishlar xodimlarini biriktirib, ularning doimiy ravishda navbatchiligini tashkil etadi;

mahalla posbonlari va faollarini jamoat tartibini saqlash va xavfsizlikni ta’minlash ishlariga jalb etadi;

bolalarning belgilangan joylardan oromgohlarga borib-kelishlarini ta’minlaydi, bunda yo‘l harakati xavfsizligi xodimlari kuzatuvini tashkil etadi;

oromgohlarga bolalarni olib borayotgan va olib kelayotgan har bir transport vositasining texnik jihatdan soz bo‘lishini muntazam ravishda nazorat qilib boradi;

oromgohlarga olib boradigan yo‘llarning xavfsizlik nuqtai nazaridan soz bo‘lishini ta’minlaydi;

yuzaga keladigan favqulodda vaziyatlar va tabiiy ofatlarning oldini olish barcha zarur choralarni ko‘radi;

tektonik hududda joylashgan yoki sel kelishi xavfi bo‘lgan oromgohlar faoliyatini vaqtincha yopish choralari ko‘rilishini ta’minlaydi;

ichki ishlar, favqulodda vaziyatlar xodimlari uchun qisqa muddatli o‘quv mashg‘ulotlari yoki o‘quv kurslari tashkil etadi;

bolalar uchun yo‘l harakati qoidalariga rioya etish bo‘yicha o‘quv mashg‘ulotlari olib borilishini ta’minlaydi.

Ishchi guruh:

oromgohlarda elektr energiyasi va tabiiy gaz uzluksizligini ta’minlaydi, favqulodda holatlarda elektr energiyasi o‘chib qolganda qo‘shimcha choralardan foydalanish imkoniyatini yaratadi, bu borada har bir hududda Shtablar tashkil etib, ularning faoliyatini nazorat qilib boradi;

oromgohlarda toza ichimlik suvi ta’minotini tashkil etadi, chekka hududlarda joylashgan oromgohlarga ichimlik suvining maxsus transport vositalari orqali uzluksiz ravishda yetkazib berilishini ta’minlaydi;

oromgohlarda obodonlashtirish ishlari olib borilishini tashkil etadi, obodonlashtirish uchun zarur bo‘lgan maxsus transport vositalari xizmatlarini tashkil etadi.

15. Har biri Ishchi guruh rahbari huzurida tegishli vazirlik va tashkilotlar mutaxassislaridan iborat tarkibda jamoatchilik asosida faoliyat olib boradigan monitoring guruhlari tashkil etiladi. Ularning asosiy vazifasi Ishchi guruhlar tomonidan amalga oshirilayotgan ishlar to‘g‘risida tahliliy axborotlar tayyorlab, Muvofiqlashtiruvchi guruh mas’ul kotibiga taqdim etib borishdan iborat.

16. Ishchi guruhlar bolalarni dam olishini tashkil etish va sog‘lomlashtirish bo‘yicha o‘z yo‘nalishi bo‘yicha belgilangan ishlarni amalga oshirish, zudlik bilan hal etish lozim bo‘lgan vazifalarni bajarish va nazorat qilish bo‘yicha malakali mutaxassislardan iborat guruhlar tuzishi va ularning faoliyatini yo‘lga qo‘yishi mumkin.

17. Joylarda bolalarni dam olishini tashkil etish va sog‘lomlashtirishni tashkil etish, Muvofiqlashtiruvchi guruh topshiriqlarining ijrosini o‘z vaqtida va sifatli bajarish maqsadida Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari rahbarligida hududiy Muvofiqlashtiruvchi guruhlar tashkil etiladi.

Hududiy Muvofiqlashtiruvchi guruhlar:

bolalarni dam olishini tashkil etish va sog‘lomlashtirishni tashkil etish bo‘yicha joylardagi hududiy idora va tashkilotlar faoliyatini muvofiqlashtirib boradi;

bolalarni dam olishini tashkil etish va sog‘lomlashtirish rejasini amalga oshirish uchun talab etiladigan moliyaviy mablag‘lar manbalarini aniqlashtiradi;

oromgohlarning moddiy-texnik bazasini rivojlantirish, ularni rekonstruksiya qilish, kapital va joriy ta’mirlash chora-tadbirlarini amalga oshiradi;

oromgohlarni belgilangan me’yorlar asosida, uzluksiz ravishda sifatli oziq-ovqat hamda go‘sht mahsulotlari bilan ta’minlashni muvofiqlashtiradi;

oromgohlarni zarur inventarlar bilan ta’minlash choralarini amalga oshiradi;

bolalarni dam olishini tashkil etish va sog‘lomlashtirish chora-tadbirlari ijrosini to‘liq va sifatli bajarish yuzasidan homiylik mablag‘larini jalb etadi va ularning maqsadli sarflanishini nazorat qiladi;

joylardagi oromgohlar faoliyatini takomillashtirish yuzasidan takliflar tayyorlaydi va ko‘rib chiqish uchun Muvofiqlashtiruvchi guruhga taqdim etadi.

18. Muvofiqlashtiruvchi guruh majlisiga materiallar guruh a’zolari, hududiy guruhlar, tegishli vazirlik, idora va tashkilotlar tomonidan taqdim etilgan ma’lumotlar, shuningdek oromgohlarning bolalarni qabul qilishga tayyorligi holatini o‘rganish materiallari asosida tayyorlanadi.

Muvofiqlashtiruvchi guruh majlisi kun tartibining har bir masalasi bo‘yicha hujjatlar paketida guruh qarorini qabul qilish uchun zarur bo‘lgan materiallar (tahliliy ma’lumotnomalar, jadvallar va boshqalar) hamda Muvofiqlashtiruvchi guruh qarori loyihasi mavjud bo‘lishi lozim.

19. Muvofiqlashtiruvchi guruh majlisiga materiallarni guruh mas’ul kotibi tayyorlaydi, shuningdek u Muvofiqlashtiruvchi guruh qarorlarining ijrosi monitoringini yuritadi va uning natijalarini Muvofiqlashtiruvchi guruh rahbariyatiga ko‘rib chiqish uchun taqdim etadi.