O‘zbekiston Respublikasi Soliq kodeksi va O‘zbekiston Respublikasi Prezidentining 2015-yil 22-dekabrdagi PQ-2455-son “O‘zbekiston Respublikasining 2016-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida”gi qaroriga muvofiq O‘zbekiston Respublikasi Moliya vazirligi va Davlat soliq qo‘mitasi qaror qiladi:

1. Ishlab chiqariladigan tabiiy gazga aksiz solig‘ini to‘lash tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom O‘zbekiston Respublikasida ishlab chiqariladigan tabiiy gazga aksiz solig‘ini hisoblab chiqarish va to‘lash tartibini belgilaydi.

1. Ushbu Nizomda quyidagi asosiy tushunchalar qo‘llaniladi:

tabiiy gaz — konlardan qazib olinadigan, gaz va neft qazib oluvchi, gazni qayta ishlovchi va utilizatsiya qiluvchi tashkilotlar tomonidan qayta ishlanadigan va utilizatsiya qilinadigan tabiiy gaz;

pirovard iste’molchilar — tabiiy gazdan ishlab chiqarish va/yoki maishiy maqsadlarda foydalanadigan tashkilotlar, avtomobillarni gaz bilan to‘ldirish kompressor stansiyalari;

gaz bilan ta’minlovchi tashkilot — gazning pirovard iste’molchilarga yetkazib berilishi, uzatilishi va taqsimlanishini ta’minlovchi tashkilot.

2. O‘zbekiston Respublikasi Soliq kodeksining 283 va 289³-moddalariga muvofiq respublikada ishlab chiqariladigan tabiiy gaz realizatsiyasiga aksiz solig‘i solinadi.

3. Tuzilgan Mahsulot taqsimotiga oid bitimda aksiz solig‘i to‘lanishi bo‘yicha ushbu Nizomda nazarda tutilgan tartibdan boshqacha tartib belgilangan bo‘lsa, unda Mahsulot taqsimotiga oid bitimda nazarda tutilgan tartib qo‘llaniladi.

4. Quyidagi tabiiy gazga aksiz solig‘i solinadi:

ichki bozorda pirovard iste’molchiga realizatsiya qilinadigan;

gaz va neft qazib oluvchi, gazni qayta ishlovchi va utilizatsiya qiluvchi tashkilotlar, shuningdek gaz bilan ta’minlovchi tashkilot tomonidan o‘z ehtiyoji uchun foydalaniladigan;

gaz bilan ta’minlovchi tashkilotga gaz va neft qazib oluvchi, gazni qayta ishlovchi va utilizatsiya qiluvchi tashkilotlar uchun O‘zbekiston Respublikasi Iqtisodiyot va moliya vazirligi tomonidan tasdiqlanadigan eng yuqori deklaratsiya qilinadigan narxdan oshadigan narx bo‘yicha realizatsiya qilinadigan.

5. Tabiiy gazga aksiz solig‘i to‘lovchilari quyidagilardir:

a) gaz bilan ta’minlovchi tashkilot – o‘zi sotib olgan va ichki bozorda pirovard iste’molchilarga, avtomobillarni gaz bilan to‘ldirish kompressor stansiyalariga realizatsiya qiladigan hajmlar bo‘yicha, shuningdek o‘z ehtiyojlari uchun foydalanadigan hajmlari bo‘yicha;

b) tabiiy gazni qazib olishni, qayta ishlashni va utilizatsiya qilishni amalga oshiruvchi tashkilotlar tomonidan quyidagi hajmlar bo‘yicha:

gaz bilan ta’minlovchi tashkilotga gaz va neft qazib oluvchi, gazni qayta ishlovchi va utilizatsiya qiluvchi tashkilotlar uchun O‘zbekiston Respublikasi Iqtisodiyot va moliya vazirligi tomonidan tasdiqlanadigan eng yuqori deklaratsiya qilinadigan narxdan oshadigan narx bo‘yicha realizatsiya qilinadigan hajmlar bo‘yicha;

tabiiy gaz hajmini gaz bilan ta’minlovchi tashkilotga realizatsiya qilmagan holda ichki bozorda pirovard iste’molchilarga realizatsiya qilish hajmlari bo‘yicha;

o‘z ehtiyojlari uchun foydalanadigan hajmlari bo‘yicha.

6. Realizatsiya qilinadigan tabiiy gazga aksiz solig‘ini hisoblab chiqarish uchun soliq solinadigan baza bo‘lib realizatsiya qilingan tabiiy gazning aksiz solig‘i va qo‘shilgan qiymat solig‘ini o‘z ichiga olmagan holdagi qiymati hisoblanadi.

7. O‘z ehtiyojlari uchun foydalaniladigan tabiiy gaz bo‘yicha soliq solinadigan baza uning tannarxidan kelib chiqib aniqlanadi.

10. Aksiz solig‘ining hisob-kitobi soliq bo‘yicha hisobga olish joyidagi davlat soliq xizmati organlariga har oyda, soliq davridan keyingi oyning 10-kunidan kechiktirmay taqdim etiladi.

11. Aksiz solig‘ini to‘lash hisob-kitoblarni topshirish muddatlaridan kechiktirmay amalga oshiriladi.

12. Tabiiy gaz uchun aksiz solig‘ining to‘g‘ri hisoblab chiqarilishi va to‘lanishi ustidan nazorat davlat soliq xizmati organlari tomonidan qonunchilik hujjatlariga muvofiq amalga oshiriladi.

13. Ushbu Nizom “O‘zbekneftegaz” MXK bilan kelishilgan.