1. Oʻzbekiston yoshlarining “Kamolot” jamgʻarmasini tashkil etish Oʻzbekiston Yoshlar Ittifoqi, Oliy va oʻrta maxsus taʼlim, Xalq taʼlimi vazirliklari, Respublika davlat jismoniy tarbiya va sport qoʻmitasi, Oʻzbekiston “Biznes-fondi” boshqaruvi, Oʻzbekiston xotin-qizlar qoʻmitasi, Respublika kasaba uyushmalari federatsiyasi Kengashi, Respublika “Maʼnaviyat va maʼrifat” jamoatchilik markazi, “Sogʻlom avlod uchun” xalqaro xayriya jamgʻarmasi, Respublika “Mahalla” xayriya jamgʻarmasi va boshqa taʼsischilarning takliflari qabul qilinsin.

2. Oʻzbekiston yoshlarining “Kamolot” jamgʻarmasi yosh avlodning har tomonlama kamol topishi, chuqur bilim, kasb egallashi, oʻzlarida yuksak maʼnaviyat, vatanparvarlik, mehnatsevarlik fazilatlarini hosil qilishi, ularning istiqlol ishining izchil davomchilari boʻlib etishishlarida koʻp qirrali yordam koʻrsatishni oʻzining dasturiy vazifasi qilib belgilanganligi maʼqullansin.

3. Jamgʻarma oʻzini oʻzi mustaqil boshqaruvchi, mablagʻ bilan taʼminlovchi va mustaqil faoliyat yurituvchi nohukumat jamoat birlashmasi sifatida yuridik shaxs huquqiga ega ekanligi inobatga olinsin.

4. Jamgʻarma Oʻzbekistonda kelajagi buyuk davlat barpo etish, demokratiyani rivojlantirish, yoshlar qalbida milliy maʼnaviyatimiz, madaniy merosimiz va umuminsoniy qadriyatlar zaminida sogʻlom ruh hamda dunyoqarashni shakllantirishdek xayrli ishni maqsad qilib qoʻyganligi eʼtirof etilsin.

Jamgʻarma quyidagilarni oʻz faoliyatining asosiy yoʻnalishi etib belgilagani eʼtiborga olinsin:

— yoshlarni ijtimoiy jihatdan muhofaza etish ishlarida qatnashish, ularning bilim olish, mehnat qilish, siyosiy va bosh konstitutsiyaviy huquqlarini toʻla amalga oshira olishlari uchun zarur shart-sharoit yaratish;

— yoshlarning tarbiyasiga taalluqli keng qamrovli ishlarni amalga oshirishda davlat idoralari, muassasalar, mehnat jamoalari, ilmiy, ijodiy uyushmalar, jamoat tashkilotlari, homiylar, jamoat arboblari faoliyatini muvofiqlashtirish;

— yoshlarda umuminsoniy qadriyatlar, milliy axloq, odob, demokratik yoʻnalishlarni takomillashtirish asosida barkamol maʼnaviy xislatlar, yurtga muhabbat, Vatanga sadoqat, millatlararo doʻstlik rishtalarini mustahkamlash uchun zarur muhit va shart-sharoitning yaratilishiga koʻmaklashish;

— yoshlarga zamonaviy bilim, texnologiyalarni egallash, bozor iqtisodiyoti qonuniyatlari va amaliyotini oʻzlashtirish, yangicha fikrlash omillarini hosil qilishda yordam koʻrsatish, isteʼdodli yoshlarni qoʻllab-quvvatlash.

5. Jamgʻarmani qoʻllab-quvvatlash, uning faoliyatida ishtirok etish respublika jamoatchiligining, davlat idoralari, muassasalar va tashkilotlar rahbarlari, fuqarolar, jamoat arboblari, yoshlar murabbiylari, yurt oqsoqollarining vatanparvarlik burchi ekanligi taʼkidlansin.

6. Jamgʻarma barcha yuridik va jismoniy shaxslar, jumladan xorijiy fuqarolar, tashkilotlar, firmalar va uyushmalar uchun ochiq ekanligi eʼtirof etilsin.

7. Qoraqalpogʻiston Respublikasi, barcha viloyatlar, Toshkent shahrida jamgʻarmaning boʻlimlarini tashkil etish maqsadga muvofiq deb topilsin.

8. Jamgʻarmani davlat tomonidan qoʻllab-quvvatlash maqsadida uning Ustav doirasidagi faoliyati boʻyicha soliqlardan 5 yil muddatga ozod qilinsin.

9. Oʻzbekiston Respublikasi Vazirlar Mahkamasi “Kamolot” jamgʻarmasining faoliyati uchun zarur shart-sharoitlar yaratish yuzasidan tegishli qaror qabul qilsin.