Oʻzbekiston Respublikasi Prezidentining “Geologiya-qidiruv ishlarini tashkil etish va olib borish tizimi samaradorligini yanada oshirish chora-tadbirlari toʻgʻrisida” 2010-yil 27-avgustdagi PQ-1396-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Prezidentining 2010-yil 27-avgustdagi PQ-1396-son qarorining 4-bandiga muvofiq:

“Sharqiy Qurama” OAJ va “Olmaliq KMK” OAJ aksiyadorlarining umumiy yigʻilishi oʻtkazilganligi hamda “Sharqiy Qurama” OAJni “Olmaliq KMK” OAJga birlashtirish yoʻli bilan uni qayta tashkil etish toʻgʻrisida tegishli qaror qabul qilinganligi;

qayta tashkil etilayotgan “Sharqiy Qurama” OAJning “Olmaliq KMK” OAJga berilayotgan mol-mulki negizida yuridik shaxs maqomisiz “Olmaliq KMK” OAJning “Rangli metallar geologiyasi” ilmiy-ishlab chiqarish markazini (keyingi oʻrinlarda “Rangli metallar geologiyasi” IICHM deb ataladi) tashkil etish, Olmaliq shahri, Primqulov koʻchasi, 1-uyni uning joylashgan joyi etib belgilash toʻgʻrisida qaror qabul qilinganligi;

“Rangli metallar geologiyasi” IICHMning tashkiliy tuzilmasi, boshqaruv apparati tuzilmasi hamda markaz toʻgʻrisidagi Nizom loyihasi tegishli vazirliklar va idoralar bilan kelishilganligi;

“Rangli metallar geologiyasi” IICHM tomonidan 2011-yilda amalga oshiriladigan Geologiya-qidiruv ishlari dasturi ishlab chiqilganligi maʼlumot uchun qabul qilinsin.

2. Oʻzbekiston Respublikasi Davlat geologiya qoʻmitasi, Davlat mulki qoʻmitasi, Iqtisodiyot vazirligi, Moliya vazirligi, “Olmaliq KMK” OAJ va “Sharqiy Qurama” OAJ aksiyadorlarining “Sharqiy Qurama” OAJni “Olmaliq KMK” OAJga birlashtirish yoʻli bilan uni qayta tashkil etish toʻgʻrisidagi hamda belgilangan tartibda:

“Sharqiy Qurama” OAJning davlatga, Oʻzbekiston Respublikasi Davlat geologiya qoʻmitasiga va qoʻmitaga idoraviy mansub davlat korxonalariga tegishli aksiyalarini davlatning ulushi hisobiga “Olmaliq KMK” OAJ aksiyalari etib konvertatsiya qilishni;

boshqa yuridik shaxslarga tegishli boʻlgan jamiyat aksiyalari “Sharqiy Qurama” OAJ tomonidan bozor qiymati boʻyicha sotib olinishini;

“Sharqiy Qurama” OAJning jismoniy shaxslarga tegishli aksiyalarini “Olmaliq KMK” OAJning imtiyozli aksiyalari etib konvertatsiya qilishni nazarda tutadigan taklifiga rozilik berilsin.

3. Quyidagilar:

“Rangli metallar geologiyasi” IICHMning tashkiliy tuzilmasi 1-ilovaga muvofiq;

“Rangli metallar geologiyasi” IICHMning boshqaruv apparati tuzilmasi 2-ilovaga muvofiq;

“Rangli metallar geologiyasi” IICHM toʻgʻrisidagi Nizom 3-ilovaga muvofiq maʼqullansin.

“Olmaliq KMK” OAJ bosh direktoriga “Rangli metallar geologiyasi” IICHMning tashkiliy tuzilmasiga, boshqaruv apparati tuzilmasiga hamda markaz toʻgʻrisidagi Nizomga oʻzgartirish va qoʻshimchalar kiritish huquqi berilsin.

4. “Olmaliq KMK” OAJ “Rangli metallar geologiyasi” IICHM 2011-yil 1-yanvardan boshlab faoliyat koʻrsatishni boshlashini va keyinchalik samarali faoliyat koʻrsatishini taʼminlash uchun zarur tashkiliy chora-tadbirlarni amalga oshirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. “Olmaliq KMK” OAJning “Rangli metallar geologiyasi” ilmiy-ishlab chiqarish markazi (keyingi oʻrinlarda Markaz deb ataladi) Oʻzbekiston Respublikasi Prezidentining “Geologiya-qidiruv ishlarini tashkil etish va olib borish tizimi samaradorligini yanada oshirish chora-tadbirlari toʻgʻrisida” 2010-yil 27-avgustdagi PQ-1396-son qaroriga muvofiq tashkil etilgan.

2. Markaz “Olmaliq KMK” OAJning (keyingi oʻrinlarda OKMK deb ataladi) yuridik shaxs maqomisiz filiali sifatida uning alohida boʻlinmasi hisoblanadi.

3. Markaz oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, boshqa normativ-huquqiy hujjatlarga, shuningdek OKMK boshqaruv organlari qarorlariga amal qiladi.

4. Markaz oʻz faoliyatini OKMKning geologiya-qidiruv ishlarini olib borish samaradorligini oshirishga doir tadbirlarni ishlab chiqish va joriy etishda qatnashuvchi boshqa boʻlinmalari bilan oʻzaro hamkorlikda amalga oshiradi.

5. Markazga unga OKMK tomonidan biriktirilgan mol-mulk beriladi. Markaz ushbu mol-mulkdan tasarruf etish huquqisiz OKMK tomonidan berilgan huquqlar doirasida foydalanadi.

6. Markazga biriktirilgan mol-mulkni begonalashtirish OKMK vakolatli boshqaruv organlarining qaroriga koʻra belgilangan tartibda amalga oshiriladi.

7. Markaz ilova hisob raqamiga ega va ishlab chiqarish boʻlinmasi huquqi bilan tugallanmagan buxgalteriya balansi tuzadi. Buxgalteriya balansi belgilangan muddatlarda OKMKning yigʻma balansiga kiritish uchun taqdim etiladi.

8. Markazning tashkiliy tuzilmasiga quyidagilar kiradi:

Xonjiza geologiya-qidiruv ekspeditsiyasi;

Ilmiy-mavzuli guruh;

Sharqiy-Qurama geologiya-qidiruv ekspeditsiyasi;

Geologik materiallarni kompyuterda qayta ishlash xizmati;

Tahliliy laboratoriya.

Markazning boshqaruv apparati tuzilmasi boʻlimlardan va boshqa tarkibiy boʻlinmalardan iborat.

9. Markazning boshqaruv apparati shtat jadvali OKMK bosh direktori tomonidan tasdiqlanadi.

10. Markazning tashkiliy tuzilmasiga kiradigan boʻlinmalarning shtat jadvallarini OKMK rahbariyati bilan kelishgan holda hamda bajariladigan ishlarning oʻziga xosligi va hajmi hisobga olingan holda namunaviy tuzilmalarga hamda ishchi va xizmatchilar soni normativlariga muvofiq Markazning direktori tasdiqlaydi.

11. Markaz boshqaruv apparati boʻlinmalari rahbarlari, shuningdek Markazning tashkiliy tuzilmasiga kiradigan boʻlinmalar rahbarlari bilan mehnat shartnomalari tuzish va ularni toʻxtatish Markaz direktorining taqdimnomasiga koʻra OKMKning Bosh direktori tomonidan amalga oshiriladi.

Markaz boshqaruv apparati boʻlinmalari, shuningdek Markazning tashkiliy tuzilmasiga kiradigan boʻlinmalar xodimlari bilan mehnat shartnomalarini tuzish va ularni toʻxtatish OKMK Bosh direktorining vakolatli oʻrinbosari tomonidan amalga oshiriladi.

12. Markaz direktori vaqtincha boʻlmagan taqdirda uning vazifalarini Markazning Bosh muhandisi bajaradi.

13. Markazning boʻlinmalari, shu jumladan boshqaruv apparatining boʻlinmalari oʻrtasidagi funksiyalarni boʻlinmalar toʻgʻrisidagi nizomga va ushbu nizomga muvofiq Markaz direktori taqsimlaydi.

14. Quyidagilar Markazning asosiy vazifalari hisoblanadi:

yer qaʼrini geologik oʻrganish, undan foydalanish va uni muhofaza qilish, rangli metallarning mineral-xom ashyo bazasini hamda ularga qoʻshilib chiqadigan foydali qazilmalarni takror ishlab chiqarish sohasida davlat siyosatini amalga oshirishda qatnashish;

rangli metallarning mineral-xom ashyo bazasini hamda ularga qoʻshilib chiqadigan foydali qazilmalarni yanada mustahkamlash va kengaytirish maqsadida yer qaʼrini geologik oʻrganish (izlash, baholash va qidirish);

OKMK balansiga berilgan qimmatbaho metallar konlarini qayta qidirish va foydalanilayotgan konlarda qidirish ishlari olib borish ustidan metodik nazorat qilish;

rangli metallar va ularga qoʻshilib chiqadigan foydali qazilmalar zaxirasi oʻsishi boʻyicha davlat buyurtmasini bajarish.

15. Markaz yuklangan asosiy vazifalarga muvofiq quyidagi funksiyalarni bajaradi:

a) geologik va boshqa maʼlumotlarni tahlil qilish asosida yer qaʼri toʻgʻrisida OKMK geologiya-qidiruv ishlarining uzoq muddatli (3 yildan ortiq davrga), oʻrtacha muddatli (uch yilgacha davrga) va yillik dasturlarini ishlab chiqadi hamda ularni Oʻzbekiston Respublikasi Iqtisodiyot vazirligi va Moliya vazirligi bilan kelishish uchun materiallarni tayyorlaydi;

b) quyidagilarni:

geologiya-qidiruv ishlarini olib borish uchun obyektma-obyekt geologik topshiriqlar va loyihalar ishlab chiqilishini;

respublikaning butun hududida istiqbolli maydonlarni geologik oʻrganishni hamda rangli metallar va ularga qoʻshilib chiqadigan foydali qazilmalar oʻsishini;

konlarni izlash va qidirish texnologiyalarini takomillashtirish uchun qidiruv maʼlumotlarini qiyoslashni hamda rangli va qimmatbaho metallar konlaridan foydalanishni;

burgʻulash, kon va boshqa geologiya-qidiruv ishlarining istiqbolli, yillik, choraklik va oylik rejalari ishlab chiqilishini, shuningdek Markaz boʻyicha pul mablagʻlari sarfi smetasi OKMK boshqaruv apparatiga taqdim etilishini;

rudali konlar prognozi va ularni qidirish usullarini takomillashtirish boʻyicha tajriba-metodik va ilmiy-tadqiqot ishlari natijalari tezkor joriy etilishini;

Markazning ishlab chiqarish-xoʻjalik faoliyati uchun zarur boʻlgan tovar-moddiy boyliklarga buyurtmanomalar ishlab chiqilishini va OKMKning boshqaruv apparatiga taqdim etilishini, shuningdek ajratilgan limitlar doirasida shartnomalar boʻyicha tovar-moddiy boyliklar olinishini;

yer qaʼrini geologik oʻrganish uchun loyiha-smeta hujjatlari ishlab chiqilishini va belgilangan tartibda tasdiqlanishini tashkil etadi;

v) barcha bosqichlarda geologiya-qidiruv ishlari amalga oshirilishiga metodik rahbarlik qiladi, shuningdek bajarilayotgan ishlarning geologiya-qidiruv ishlarining tasdiqlangan loyihalariga muvofiqligini nazorat qiladi;

g) yer qaʼrini geologik oʻrganish ishlarining natijalari boʻyicha hisobotlarni tasdiqlaydi;

d) Markazning boʻlinmalari tomonidan geologiya-qidiruv ishlari olib borilishi uchun ajratilgan mablagʻlardan foydalanilishini nazorat qiladi;

e) geologiya tarmogʻi kadrlari malakasini oshirish, ularni tayyorlash va qayta tayyorlash boʻyicha tizimli asosda ish olib boradi.

16. Markaz oʻziga yuklangan vazifalarni bevosita, shuningdek oʻz tarkibiga kiradigan boʻlinmalar orqali hal etadi.

17. Markaz oʻziga yuklangan vazifalar va funksiyalarni bajarish uchun:

OKMK rahbariyatining ruxsati bilan, chet tashkilotlarning roziligi boʻyicha geologik materiallarni ekspertizadan oʻtkazish uchun ularning mutaxassislarini jalb etish;

OKMK rahbariyatining ruxsati bilan Markazning balansidagi mol-mulkni belgilangan tartibda OKMKning boshqa boʻlinmalariga berish;

OKMK rahbariyati bilan kelishgan holda normativ-huquqiy hujjatlarni ishlab chiqish uchun yuqori malakali mutaxassislardan vaqtinchalik ishchi guruhlar tashkil etish, shu jumladan shartnomalar asosida ushbu ishga chet tashkilotlarning mutaxassislari va ekspertlarini jalb etish huquqiga ega.

18. Markaz:

barcha texnik-iqtisodiy koʻrsatkichlar boʻyicha geologiya-qidiruv ishlari rejasi bajarilishi;

asosiy va aylanma mablagʻlar, moddiy-texnika resurslari saqlanishi, ulardan maqsadli va samarali foydalanilishi;

Markazning hisobot hujjatlari belgilangan shaklda oʻz vaqtida taqdim etilishi;

mehnat toʻgʻrisidagi qonunchilikda hamda mehnatni muhofaza qilish toʻgʻrisidagi qonunchilikda va texnika xavfsizligiga rioya qilinishi;

ishlab chiqarish va ijro intizomiga rioya qilinishi uchun javob beradi.

19. Markaz xodimlarining javobgarligi darajasi qonunchilikda va lavozim yoʻriqnomalarida belgilanadi.

20. Markazga umumiy rahbarlikni OKMKning bosh direktori tomonidan lavozimga tayinlanadigan va lavozimdan ozod qilinadigan direktor amalga oshiradi. Markaz direktori oʻz faoliyatida bevosita OKMK bosh muhandisiga boʻysunadi.

Markazning bosh muhandisi va bosh geologi Markaz direktorining taqdimnomasi boʻyicha OKMK bosh direktorining qarori bilan lavozimga tayinlanadi va lavozimdan ozod qilinadi.

Direktorning Markaz direktorining taqdimnomasi boʻyicha OKMK bosh direktorining qarori bilan lavozimga tayinlanadigan va lavozimdan ozod qilinadigan ilmiy ishlar boʻyicha bir nafar oʻrinbosari boʻladi.

21. Markaz direktori:

Markazga yuklangan vazifalar va funksiyalar samarali bajarilishi uchun shaxsan javob beradi;

OKMK bosh direktori tomonidan berilgan ishonchnoma asosida Markaz nomidan ish koʻradi;

zaruriyat boʻlganda xodimlarning belgilangan umumiy soni va mehnatga haq toʻlash fondi doirasida Markazning tashkiliy tuzilmasini, boshqaruv apparati tuzilmasini oʻzgartirish toʻgʻrisida OKMK rahbariyatiga takliflar kiritadi;

Markaz xodimlarini lavozimga tayinlash va lavozimdan ozod qilish toʻgʻrisida OKMK rahbariyatiga taqdimnomalar kiritadi;

Markazning boshqaruv apparati va tarkibiy boʻlinmalari toʻgʻrisidagi Nizomni, shuningdek markaz xodimlarining lavozim yoʻriqnomalarini tasdiqlaydi;

Markaz tomonidan Oʻzbekiston Respublikasi qonunchiligiga rioya etilishi tashkil etilishini va nazorat qilinishini taʼminlaydi;

qonunchilikka, ushbu Nizomga va OKMK Ustaviga zid boʻlmagan boshqa vakolatlarni amalga oshiradi.

22. Geologiya-qidiruv ishlarining eng muhim yoʻnalishlarini, geologiya-qidiruv ishlari natijalari boʻyicha loyihalar va hisobotlarni hamda yer qaʼrini geologik oʻrganish bilan bogʻliq boshqa masalalarni koʻrib chiqish uchun Markaz huzurida 15 kishidan iborat Ilmiy-texnik kengash tuziladi.

Ilmiy-texnik kengash tarkibiga Markaz boshqaruv apparati va uning boʻlinmalarining mutaxassislari, OKMK kon boshqarmasining bosh geologlari kiradi. Ilmiy-texnik kengash ishiga OKMKning boshqa mutaxassislari ham jalb etilishi mumkin.

Ilmiy-texnik kengashga Markaz direktori boshchilik qiladi. Ilmiy-texnik kengashning tarkibi va u toʻgʻrisidagi Nizom OKMKning bosh direktori tomonidan tasdiqlanadi.

23. Markazning boshqaruv apparati va uning tashkiliy tuzilmasiga kiradigan boʻlinmalar taʼminoti OKMK mablagʻlari hisobiga amalga oshiriladi.

24. Markaz OKMK boʻlinmalari bilan OKMK boshqaruv apparatining tegishli funksional boʻlinmalari orqali yoki toʻgʻridan-toʻgʻri ishlab chiqarish aloqalarini amalga oshiradi.

25. Markazning OKMK boʻlinmalari, shuningdek chet tashkilotlar bilan oʻzaro hamkorligi ushbu Nizomda nazarda tutilgan Markazning vazifalari, funksiyalari va huquqlaridan kelib chiqib belgilanadi.

26. Markaz davlat statistika organlari, moliya organlari va OKMK rahbariyati tomonidan belgilanadigan tartibda va muddatlarda ishlab chiqarish-xoʻjalik va moliya-iqtisodiy faoliyat natijalarining tezkor, statistika va buxgalteriya hisobi va nazoratini amalga oshiradi, oʻzining tashkiliy tuzilmasiga kiradigan boʻlinmalar boʻyicha buxgalteriya va statistika hisoboti, yigʻma hisobot yuritadi.

27. Markazning ishlab chiqarish-xoʻjalik va moliya-iqtisodiy faoliyatini tekshirish OKMKning tegishli boʻlinmalari tomonidan bir yilda kamida bir marta, shuningdek OKMK faoliyatini tekshirish doirasida belgilangan tartibda nazorat organlari tomonidan amalga oshiriladi.