Oʻzbekiston Respublikasi Prezidentining 2010-yil 9-iyuldagi PF-4224-sonli “Ish haqi, pensiyalar, stipendiyalar va ijtimoiy nafaqalar miqdorini oshirish toʻgʻrisida”gi Farmoniga muvofiq buyuraman:

1. Oʻzbekiston Respublikasi Prezidentining 2010-yil 9-iyuldagi PF-4224-sonli “Ish haqi, pensiyalar, stipendiyalar va ijtimoiy nafaqalar miqdorini oshirish toʻgʻrisida”gi Farmoni boʻyicha pensiyalarni qayta hisoblash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiritiladi.

Mazkur Nizom Oʻzbekiston Respublikasi Prezidentining 2010-yil 9-iyuldagi PF-4224-sonli “Ish haqi, pensiyalar, stipendiyalar va ijtimoiy nafaqalar miqdorini oshirish toʻgʻrisida”gi Farmonining 4-bandiga asosan pensiyalarni qayta hisoblash tartibini belgilaydi.

1. Yuqorida koʻrsatib oʻtilgan Farmonga muvofiq 2010-yilning 1-avgustidan quyidagilarning eng kam miqdorlari belgilanadi:

eng kam ish haqi — oyiga 45 215 soʻm;

yoshga doir pensiyalar — oyiga 88 845 soʻm;

bolalikdan nogironlarga beriladigan nafaqa — oyiga 88 845 soʻm;

zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa — oyiga 54 265 soʻm.

2. 1991-yilning 1-yanvarigacha va undan keyingi yillarda tayinlangan pensiyalarning miqdorini tenglashtirish va qayta hisoblab chiqish maqsadida, ilovaga muvofiq yangi yillar boʻyicha differensiyalangan tuzatuvchi koeffitsiyentlar oʻrnatiladi.

3. Pensiyani hisob-kitob qilish uchun eng kam ish haqining sakkiz baravaridan ortiq boʻlmagan oʻrtacha oylik ish haqi inobatga olinadi (45 215 soʻm x 8 = 361720 soʻm).

4. Yangi tuzatuvchi koeffitsiyentlar qoʻllanilgan oʻrtacha oylik ish haqi miqdori eng kam oylik ish haqining sakkiz baravari va undan yuqori miqdorida boʻlgan hollarda, pensiyalarni qayta hisoblashni amalga oshirishda ish haqi miqdori eng kam ish haqining sakkiz hissasi 361 720 soʻm (45 215 soʻm x 8) bilan chegaralanib, ish stajining davomiyligiga bogʻliq ravishda pensiyalarni hisoblash uchun qabul qilingan foizlarga koʻpaytiriladi.

5. Yoshga doir yoki I va II guruh nogironlik boʻyicha pensionyerlar “Fuqarolarning davlat pensiya taʼminoti toʻgʻrisida”gi Qonunning 7 va 17-moddalariga muvofiq pensiya tayinlash uchun zarur ish stajiga ega boʻlmagan taqdirda, qayta hisoblashdagi pensiya miqdori bor stajga mutanosib ravishda belgilanadi.

6. Barcha hollarda pensiyalarga ustama eng kam oylik ish haqidan kelib chiqib aniqlanadi (45 215 soʻm).

7. Mazkur Nizom Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi huzuridagi budjetdan tashqari Pensiya jamgʻarmasi bilan kelishilgan.