Vatanimiz poytaxti azim Toshkent shahrining 2200 yillik qutlugʻ toʻyiga bagʻishlab mamlakatimizda keng koʻlamdagi tayyorgarlik ishlari amalga oshirilmoqda.

Xalqaro YUNESKO tashkiloti ishtirokida nishonlanayotgan bu sanaga xalqimiz va jahon jamoatchiligi oʻrtasida qiziqish va eʼtibor tobora ortib bormoqda.

Shu munosabat bilan Toshkent shahrining 2200 yillik yubileyini uning yurtimiz va mintaqamiz tarixidagi, ijtimoiy-siyosiy hayotimizdagi tutgan beqiyos oʻrni va mavqeyiga munosib tarzda yuqori saviyada nishonlash hamda bu tarixiy sanaga bagʻishlangan asosiy tantanalar va ommaviy sayillarni chuqur oʻylangan dastur asosida mazmunli oʻtkazish maqsadida:

1. Oʻzbekiston Respublikasi Prezidentining 2008-yil 2-aprelda qabul qilingan Qaroriga qoʻshimcha ravishda 1-ilovaga* muvofiq chora-tadbirlar rejasi qabul qilinsin. Toshkent shahrining 2200 yilligiga bagʻishlangan tantanali majlis va bayram konsertini tayyorlash boʻyicha tashkiliy-ijodiy guruh tarkibi 2-ilovaga* muvofiq tasdiqlansin.

2. Toshkent shahrining 2200 yillik yubileyini nishonlash sanasiga bagʻishlangan tantanali majlis va konsert dasturini 2009-yil 1-sentabr kuni “Oʻzbekiston” xalqaro anjumanlar saroyida, ommaviy tadbirlar va xalq sayillarini esa 2-sentabr kuni poytaxt maydonlarida oʻtkazish haqidagi takliflar maʼqullansin.

3. Mustaqillik kuni va Toshkent shahrining 2200 yilligi bayrami munosabati bilan hamda aholining dam olishi uchun qulay shart-sharoitlar yaratish, ish vaqtidan oqilona foydalanish maqsadida 2009-yil 29-avgust shanba dam olish kuni 2009-yil 31-avgust dushanba kuniga, 2009-yil 30-avgust yakshanba dam olish kuni 2009-yil 2-sentabr chorshanba kuniga koʻchirilsin. 29-avgust shanba va 30-avgust yakshanba kunlari ish kuni deb eʼlon qilinsin.

4. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga Toshkent shahrining 2200 yillik yubileyiga tayyorgarlik koʻrish va uni oʻtkazish bilan bogʻliq tadbirlarni keng yoritish tavsiya etilsin.

5. Mazkur Qarorning bajarilishini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.