Qayd etilsinki, respublikada Kadrlar tayyorlash milliy dasturining amalga oshirilishi natijasida namunaviy loyihalar boʻyicha, zamonaviy oʻquv hamda laboratoriya jihozlari, kompyuter texnikasi, ilgʻor texnologiya uskunalari va mashinalar namunalari bilan jihozlangan 1075,4 ming oʻquvchi oʻrinlariga ega 1,5 mingdan ziyod akademik litseylar va kasb-hunar kollejlari qurildi. Iqtisodiyotning real tarmoqlari va sektorlarida talab etilayotgan kasblar boʻyicha oʻrta maxsus maʼlumotga ega yuqori malakali mutaxassislarni tayyorlashga yoʻnaltirilgan yangi taʼlim standartlari ishlab chiqildi va oʻquv jarayoniga tatbiq etildi.

Akademik litseylar va kasb-hunar kollejlarining yaratilgan moddiy-texnika bazasi Oʻzbekiston Respublikasining “Taʼlim toʻgʻrisida”gi Qonuniga muvofiq holda 12 yillik taʼlimga toʻliq oʻtishni taʼminlaydi hamda umumtaʼlim maktablarining barcha 9-sinf bitiruvchilariga kasb-hunar taʼlimini olish va aniq kasbni egallash imkoniyatini yaratadi.

Shu bilan birga bir qator viloyatlar — Qashqadaryo, Samarqand, Jizzax, Surxondaryo, Toshkent va Fargʻona viloyatlarida kasb-hunar kollejlarini hududlar boʻyicha joylashtirishni maqbullashtirishda jiddiy xatolarga yoʻl qoʻyilgan, har yili umumtaʼlim maktablari 9-sinf bitiruvchilari soniga muvofiq tarzdagi quvvatlarga ega boʻlgan oʻrta maxsus, kasb-hunar taʼlimi muassasalarining oʻz vaqtida ishga tushirilishi taʼminlanmagan.

Kadrlar tayyorlash milliy dasturining prinsipial qoidalarini izchil va toʻliq hajmda amalga oshirish, respublikaning ayrim mintaqalaridagi olis hamda borish qiyin boʻlgan aholi punktlari umumtaʼlim maktablari 9-sinf bitiruvchilarining taʼlim olishni davom ettirishga teng imkoniyatlar yaratilishini taʼminlash, oʻrta maxsus, kasb-hunar taʼlimi muassasalarining oʻquv maydonlarini maqbul tarzda joylashtirish va ulardan samarali foydalanish maqsadida:

1. Qashqadaryo, Samarqand, Jizzax, Surxondaryo, Toshkent va Fargʻona viloyatlarining hokimlariga, Oʻzbekiston Respublikasi Iqtisodiyot vazirligiga, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga joylarda oʻrta maxsus, kasb-hunar taʼlimi obyektlarini foydalanishga topshirishdagi mavjud qoloqlik hamda topshiriqlar toʻla hajmda bajarilmagani va ularni maqbul tarzda joylashtirishda yoʻl qoʻyilgan xatolar qatʼiy ravishda koʻrsatib oʻtilsin.

2. Oʻzbekiston Respublikasi Xalq taʼlimi vazirligi, Iqtisodiyot vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan ilovaga* muvofiq ishlab chiqilgan, 10-sinflarga qabul istisno tariqasida yana 5 yilga saqlanib qoladigan respublika mintaqalarining olis aholi punktlaridagi umumtaʼlim maktablari roʻyxati maʼqullansin.

Belgilab qoʻyilsinki, ilovada koʻrsatilgan umumtaʼlim maktablarining 10-11-sinflaridagi oʻquvchilar kontingenti mazkur umumtaʼlim maktablari xizmat koʻrsatadigan hududda yashaydigan, olis aholi punktlaridagi 9-sinflarni bitiruvchilardangina shakllantiriladi.

3. Oʻzbekiston Respublikasi Xalq taʼlimi vazirligi Qashqadaryo, Samarqand, Jizzax, Surxondaryo, Toshkent va Fargʻona viloyatlarining hokimliklari bilan birgalikda mazkur maktablarning 9-sinf bitiruvchilari 10-sinflarga qabul qilinishlarini aniq-puxta tashkil etishni taʼminlasin hamda yuqori sinflarni yuksak malakali oʻqituvchilar bilan mustahkamlagan holda 10-11-sinflarda taʼlim-tarbiya jarayonining sifatli amalga oshirilishi uchun zarur shart-sharoitlarni yaratsin.

Bunda, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda ushbu Qaror ilovasida koʻrsatib oʻtilgan umumtaʼlim maktablarining 9-sinf bitiruvchilariga mustaqil ravishda oʻz istaklariga koʻra tanlab olgan mutaxassisliklari boʻyicha kasb-hunar kollejlari va akademik litseylarga kirish huquqi va imkoniyati berilsin.

4. Oʻzbekiston Respublikasi Taʼlim muassasalariga qabul boʻyicha davlat komissiyasi, Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi joylarda umumtaʼlim maktablarining 9-sinf bitiruvchilari va ularning ota-onalari oʻrtasida ularga qonun hujjatlarida mustaqil ravishda oʻz istaklariga koʻra tanlab olingan mutaxassislik boʻyicha kasb-hunar kollejlari va akademik litseylarda oʻqishni davom ettirish huquqi berilganligi toʻgʻrisida keng tushuntirish ishlarini olib borsinlar.

5. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.