toggle_night_mode
Hujjat 03.07.2018 sanasi holatiga
Amaldagi versiyaga o‘tish
Oʻzbekiston Respublikasi Vazirlar Mahkamasining
qarori
“AGROBANK” AKSIYADORLIK TIJORAT BANKI FAOLIYATINI TASHKIL ETISH CHORA-TADBIRLARI TOʻGʻRISIDA
Oʻzbekiston Respublikasi Prezidentining “Agrobank” aksiyadorlik tijorat bankini tashkil etish toʻgʻrisida” 2009-yil 30-martdagi PQ-1084-son qarorini bajarish yuzasidan va uning samarali faoliyati tashkil etilishini taʼminlash maqsadida Vazirlar Mahkamasi qaror qiladi:
1. “Agrobank” aksiyadorlik tijorat banki kengashi tarkibi ilovaga muvofiq tasdiqlansin.
Keyingi tahrirga qarang.
2. Quyidagilar “Agrobank” aksiyadorlik tijorat banki Kengashining asosiy vazifalari etib belgilansin:
qishloq xoʻjaligi ishlab chiqaruvchilariga hamda iqtisodiyotning agrosanoat sektori korxonalariga kredit berish va ularni moliyalashtirish boʻyicha koʻrsatiladigan xizmatlar sifatini va qulayligini oshirishga yoʻnaltirilgan uzoq muddatli bank siyosatini shakllantirish, shuningdek aholiga hamda qishloq tadbirkorlariga keng koʻlamli bank va konsalting xizmatlari koʻrsatish;
qishloq xoʻjaligi ishlab chiqaruvchilariga, mulkchilikning barcha shakllaridagi korxonalarga, shu jumladan “Oʻzpaxtasanoat” uyushmasi va “Oʻzdonmahsulot” aksiyadorlik kompaniyasi tizimiga kiradigan, qishloq xoʻjaligi mahsulotlarini qayta ishlash, saqlash, tashish va sotishga ixtisoslashgan korxonalarga yuqori sifatli, jahon bozorida raqobatbardoshli mahsulotlar ishlab chiqarish boʻyicha zamonaviy texnologiyalar va asbob-uskunalarni joriy etishga hamda ichki isteʼmol bozorini yuqori sifatli oziq-ovqat tovarlari bilan toʻldirishga koʻmaklashish maqsadida kredit berish va ularni moliyalashtirish mexanizmlarini izchil takomillashtirib borish;
bankda zamonaviy korporativ boshqaruvni shakllantirish va bank ijro etuvchi organining samarali faoliyatini taʼminlash;
bankning maqbul darajada kapitallashuvini, likvidliligini unga yuklangan vazifalarning bajarilishi va majburiyatlarining oʻz vaqtida amalga oshirilishi uchun yetarli darajada saqlab turish;
universal tijorat banki sifatida bank tomonidan yuridik va jismoniy shaxslarga kompleks xizmat koʻrsatish uchun shart-sharoitlar yaratish;
qishloq joylarda faoliyat koʻrsatayotgan bank-moliya infratuzilmasini faollashtirish va kengaytirish.
Keyingi tahrirga qarang.
3. “Agrobank” aksiyadorlik tijorat bankiga markaziy apparati tarkibida kreditlarning qaytariluvchanligi monitoringini olib borish va ulardan maqsadli foydalanilishini nazorat qilish boʻyicha maxsus guruh tashkil etish tavsiya qilinsin, quyidagilar maxsus guruhning asosiy vazifalari etib belgilansin:
kredit mablagʻlaridan foydalanish samaradorligini tizimli ravishda chuqur tahlil qilish;
bank filiallarida moliyalashtirish ishlarini muvofiqlashtirish, kredit portfeli holatini, shuningdek kreditlarning taʼminlanganligi va ulardan maqsadli foydalanilishi holatini monitoring qilish va xolisona baholash;
kreditlarning qaytariluvchanligi darajasini oshirish boʻyicha zarur chora-tadbirlar koʻrish.
4. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi “Paxta-bank” aksiyadorlik tijorat banki chiqargan aksiyalarni “Agrobank” aksiyadorlik tijorat bankiga qayta roʻyxatdan oʻtkazishni va yangidan chiqarilayotgan aksiyalarni roʻyxatdan oʻtkazishni yigʻimlar undirmasdan amalga oshirsin.
5. Belgilab qoʻyilsinki, “Agrobank” aksiyadorlik tijorat banki boshqaruvi raisi Oʻzbekiston Respublikasi Vazirlar Mahkamasi qarori bilan lavozimga tayinlanadi va lavozimdan ozod qilinadi.
Keyingi tahrirga qarang.
6. “Agrobank” aksiyadorlik tijorat banki Kengashi va boshqaruvi:
bir oy muddatda bank ustavini ishlab chiqsin va aksiyadorlarning umumiy yigʻilishida tasdiqlasin, shuningdek bankni qonun hujjatlarida belgilangan tartibda roʻyxatdan oʻtkazish uchun hujjatlarning zarur paketini tayyorlasin va Oʻzbekiston Respublikasi Markaziy bankiga taqdim etsin;
bankka yuklangan vazifalarning samarali bajarilishi zarurligidan kelib chiqqan holda bank hamda uning filiallari tuzilmasini va shtatlar jadvalini oʻn kun muddatda ishlab chiqsin va tasdiqlasin;
bankning markaziy apparati va uning filiallarini banklarning boʻlinmalarida va fermer xoʻjaliklariga, paxta tozalash va donni qayta ishlash sanoatining paxta va don mahsulotlarini qayta ishlash, saqlash, tashish va sotishga ixtisoslashgan korxonalariga kredit berish sohasida ish tajribasiga ega boʻlgan yuqori malakali mutaxassislar bilan taʼminlasin.
7. Oʻzbekiston banklar uyushmasi va Bank-moliya akademiyasi 2009-yil mobaynida “Agrobank” aksiyadorlik tijorat banki mutaxassislari uchun, oʻqitish haqini undirmagan holda, fermer xoʻjaliklariga, paxta tozalash va donni qayta ishlash sanoatining paxta va don mahsulotlarini qayta ishlash, saqlash, tashish va sotishga ixtisoslashgan korxonalariga kredit berish boʻyicha maxsus kurslar tashkil etilishini taʼminlasinlar.
8. “Agrobank” aksiyadorlik tijorat bankiga Milliy teleradiokompaniya, Matbuot va axborot agentligi, Oʻzbekiston Respublikasi Markaziy banki va Oʻzbekiston banklar uyushmasi bilan birgalikda bir oy muddatda 2009-2010-yillarda ommaviy axborot vositalarida bank faoliyatini hamda uning tomonidan koʻrsatilayotgan xizmatlarni keng yoritish boʻyicha kompleks tadbirlarni ishlab chiqish va tasdiqlash tavsiya etilsin.
9. Oʻzbekiston Respublikasi Markaziy banki Adliya vazirligi hamda manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Markaziy banki raisi F.M.Mullajonov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2009-yil 31-mart,
89-son
Oldingi tahrirga qarang.
Vazirlar Mahkamasining 2009-yil 31-martdagi 89-son qaroriga
ILOVA
“Agrobank” aksiyadorlik tijorat banki kengashining
TARKIBI

1.

Xaydarov A.Ya.

—

Oʻzbekiston Respublikasi moliya vazirining birinchi oʻrinbosari, Kengash raisi

2.

Mirzayev Sh.Sh.

—

Moliya vazirligi huzuridagi Qishloq xoʻjaligi davlat tomonidan qoʻllab quvvatlash jamgʻarmasini boshqarish departamenti direktori, Kengash raisining oʻrinbosari

3.

Lavozim boʻyicha

—

Qishloq xoʻjaligi vazirining oʻrinbosari

4.

Obidov A.A.

—

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisining oʻrinbosari

5.

Maksudov A.I.

—

“Oʻzpaxtasanoat” AJ boshqaruvi raisi

6.

Vafayev Sh.A.

—

Oʻzbekiston Respublikasi Tiklanish va taraqqiyot jamgʻarmasining ijro etuvchi direktori

7.

Saliyev Sh.I.

—

Oʻzbekiston Respublikasi Vazirlar Mahkamasining Makroiqtisodiy tahlil va prognozlashtirish, moliya
va bank tizimlarini isloh qilish, xususiy tadbirkorlik va kichik biznesni rivojlantirish masalalari yigʻma axborot-tahlil departamenti bosh mutaxassisi

8.

Xaydarov S.O.

—

“Oʻzdonmahsulot” aksiyadorlik kompaniyasi boshqaruvi raisi

9.

Norgitov M.D.

—

Oʻzbekiston Respublikasi Tiklanish va taraqqiyot jamgʻarmasining yuridik xizmat rahbari

Izoh. Kengash aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoxud zimmasiga tegishli vazifalarni bajarish yuklangan shaxslar Bank kengashi tarkibiga kiritiladi.
(ilova Oʻzbekiston Respublikasi Vazirlar Mahkamasining 2018-yil 3-iyuldagi 499-sonli qarori tahririda — Qonun hujjatlari maʼlumotlari milliy bazasi, 03.07.2018-y., 09/18/499/1439-son)
Keyingi tahrirga qarang.
Keyingi tahrirga qarang.
(Oʻzbekiston Respublikasi qonun hujjatlari toʻplami, 2009-y., 14-son, 158-modda; 2017-y., 26-son, 593-modda; Qonun hujjatlari maʼlumotlari milliy bazasi, 03.07.2018-y., 09/18/499/1439-son, 14.05.2019-y., 09/19/397/3123-son; 15.04.2020-y., 09/20/217/0426-son)